1, 2. 1) ¿Keniuj tiitaixpantijkauan Jiova tikitaj Biblia? 2) ¿Katiyejua amatajkuilol tein kipia Biblia okachi tikonuelita?

TIITAIXPANTIJKAUAN Jiova tiktasojtaj Biblia. Nejin amatajkuilol techyolseuia, techmatiltia ke uelis tikchiaskej tein kuali satepan uan techmaka taixyekanalis tein uelis itech titakuaujtamatiskej (Rom. 15:4). Amo kipia inintanemililuan taltikpakneminij, ta yejua “Tajtoltsin de Dios” (1 Tes. 2:13).

² ¿Katiyejua amatajkuilol tein kipia Biblia okachi tikuelitaj? Sekin kinyolpaktia kiixtajtoltiskej Mateo, Marcos, Lucas uan Juan, porin kemej kimelauaj keniuj tamatia Jesús kinpaleuia maj kiixmatikan ikualtsitsin kualneskayouan Jiova (Juan 14:9). Oksekin kiuelitaj amatajkuilolmej kemej Apocalipsis, tein ika tajtoua “nochi ten niman moneki mochiuas” (Apoc. 1:1). Miakej kinyolseuia tein kijtoua Salmos, uan oksekin kinyolpaktia kuali tayolmajxitilis tein kitemaka Proverbios. Senkis moita ke Biblia kinpaleuia nochin tataman taltikpakneminij.

3, 4. 1) ¿Keniuj tikitaj toamaixuan? 2) ¿Toni nepaleuilmej tikpiaj tein chijchiujtok kemej kinpaleuis tataman taltikpakneminij?

³ Kemej tiktasojtaj Biblia, no tikitaj ke motelneki nochi amaixmej  tein kimelauaj tein kijtoua Biblia. Itech libros, folletos, revistas uan okseki amaixmej tikajsij tamachtilis tein Jiova techmaka (xikonita kampa kijtoua “Tein okachi momelaua”). Techpaleuiaj maj kuali timouikakan iuan Dios uan maj totakuaujtamatilis kisentoka chikauak (Tito 2:2).

⁴ Miak toamaixuan ijkuiliujtokej kemej kinpaleuis nochin itaixpantijkauan Jiova. Oksekin kinijkuilouiliaj sayoj seki taltikpakneminij, kemej telpochmej oso tetatmej. Uan miak tamachtilis uan videos tein moajsij itech Internet kampa timoteixmatiltiaj kinchijchiuiliaj akin amo itaixpantijkauan Jiova. Nochi nejin tataman tamachtilis kinextia ke Jiova kichiujtok tein motenkauak keman kijtoj ke kinmakaskia nochin taltikpakneminij miak tamachtilis (Is. 25:6).

5. ¿Toni uelis tikyekmatiskej?

⁵ Timiakej tikuelitaskiaj okachi uejkaua tikixtajtoltiskej Biblia uan amaixmej. Xa amo nochipa ueli tikixtajtoltiaj ika nejmachkayot sejse amaix tein tikseliaj. Sayoj ke uelis tikyekmatiskej ke Jiova kiyolpaktis tein tikchiuaj komo kuali tikuij tiempo uan tikixtajtoltiaj uan timomachtiaj Biblia uan toamaixuan (Efes. 5:15, 16). Maski ijkon, moajsi se taman tein tamouilil tein moneki ika timoyekpiaskej. Maj tikitakan toni.

6. ¿Toni uelis kichiuas maj amo kuali tikuikan nochi tamachtilis tein Jiova techmaka?

⁶ Komo amo timoyekpiaj, uelis tiknemiliskej ke seki tajkuilolmej tein kipia Biblia oso seki amaixmej amo uelis techmachtiskej teisa tein motelneki. Kemej neskayot, ¿toni tikchiuaskej komo tiknemiliaj ke tein kijtoua seki tajkuilolmej itech Biblia nion tepitsin mouika ika tein tikpanotokej? ¿Oso toni tikchiuaskej komo tikitaj ke tein kijtoua se amaix amo chijchiujtok kemej techpaleuis tejuan? ¿Ijsiujka tikixtajtoltiskej? ¿Oso nion tikixtajtoltiskej? Komo ijkon tikchiuaj, timopolouiliskej se tamachtilis tein techtelpaleuiskia. ¿Toni techpaleuis maj amo ijkon titanemilikan? Maj tikelnamikikan ke nochi tamachtilis tein tikseliaj ualeua imako Jiova. Biblia kijtoua: “Nejua, Jiova, nimoDios, Akin mitsmachtia tein tejua mitspaleuis” (Is. 48:17). Itech nejin tamachtilis tikitaskej eyi tayolmajxitilis tein techpaleuis maj kuali tikuikan nochi tamachtilis tein Jiova techmaka.

7. ¿Keyej moneki tikixtajtoltiskej Biblia ika se kuali tanemilil?

⁷ Maj titaixtajtoltikan ika se kuali tanemilil. Melauak ke seki tajkuilolmej tein kipia Biblia kinijkuilouilijkej sayoj se oso seki taltikpakneminij. Sayoj ke 2 Timoteo 3:16 kiyekijtoua ke “nochi in Tajkuilolamatsitsin nochi yejuan Dios kichiuak ika ichikaualisuan” uan tepaleuia. Yejua ika moneki tikixtajtoltiskej Biblia ika se kuali tanemilil (xikonita kampa kijtoua “Tein okachi momelaua”). Kemej neskayot, se tokniuj kijtoua ke yejua mochikaua kielnamikis ke sayoj se tajkuilol tein kipia Biblia uelis kimachtis miak taman. Nejon kipaleuia maj kiajsi tamachtilismej tein amo ijsiujka se kiajsi. Yejua ika achto ke tikixtajtoltiskej Biblia, maj tiktajtanikan Jiova maj techpaleui maj tikpiakan se kuali tanemilil uan maj techmaka tamatilis tein techpaleuis maj tikitakan tein kineki techmachtis (Esd. 7:10; xikonixtajtolti Santiago 1:5).

8, 9. 1) ¿Toni uelis timotajtaniskej keman tikixtajtoltiskej Biblia? 2) ¿Toni techmachtia kemej tanemilia Jiova tein kintajtania tayekananij?

⁸ Maj timochiuilikan netajtanilmej. Keman tikixtajtoltiskej Biblia, uelis timochiuiliskej nejin netajtanilmej: “¿Toni nechmachtia  nejin kemej tanemilia Jiova? ¿Keniuj uelis nechpaleuis itech nonemilis? ¿Keniuj uelis ika nikinpaleuis oksekin?”. Komo itech titanemiliaj nejin netajtanilmej, okachi tiktemoskej keniuj techpaleuis tein tikixtajtoltiskej itech Biblia. Maj tikitakan se neskayot. Biblia kitekpana seki taman tein moneki kichiuaskej tayekananij itech nechikol (xikonixtajtolti 1 Timoteo 3:2-7). Melauak ke timiakej amo titapaleuiaj kemej tayekananij. Yejua ika xa tiknemiliskej ke nejin tajkuilolmej amo semi techpaleuiaj. Sayoj ke ika eyi netajtanilmej tein tikitakej itech nejin párrafo tiktemotij keniuj uelis techpaleuiskej tinochin.

⁹ “¿Toni nechmachtia nejin kemej tanemilia Jiova?” Tein Jiova kintajtania tayekananij kinextia ke yejuatsin kichia maj tel kuali monejnemiltikan. ¿Keyej? Porin yejuatsin kitelpatiuita nechikol kampa kichiuaj kemej Cristo. Biblia kijtoua ke Jiova kikouak nejin nechikol ika iesyo iKonetsin (Hech. 20:28, TNM). Nejin kiteajsikamatiltia ke Dios kichia maj tayekananij kikauakan se kuali neskayot. Uan no, yejuatsin kinmelauas ijkon kemej kinyekpiaskej akin pouij itech nechikol. Jiova kineki maj kuali timomachilikan ika ininnepaleuil tayekananij (Is. 32:1, 2). Kemej tikitaj, tein Jiova kintajtania tayekananij techmachtia ke yejuatsin semi toka motekipachoua.

10, 11. 1) ¿Keniuj techpaleuia komo tikitaj tein motajtani maj kichiuakan tayekananij? 2) ¿Keniuj uelis ika tikinpaleuiskej oksekin?

 ¹⁰ “¿Keniuj uelis nechpaleuis itech nonemilis?” Komo titapaleuiaj kemej tayekananij itech nechikol, moneki maj kemansa timoitakan ox tikchiujtokej tein Jiova kintajtania tayekananij uan maj timochikauakan tikyektaliskej tein monekis. Uan komo amo titapaleuiaj kemej tayekananij sayoj ke tiknekij tikseliskej nejon tekit, moneki timochikauaskej tiktakamatiskej nochi tein tiueliskej tein kintajtaniaj tayekananij (1 Tim. 3:1). Sayoj ke tinochin uelis techpaleuis tein kintajtaniaj tayekananij. Kemej neskayot, Jiova kichia maj tisejsemej titeajsikamatikan uan maj ‘tikuatamatkanentinemikan’ (1 Ped. 4:7; Filip. 4:5). Keman tayekananij kitemakaj se kuali neskayot, tokniuan uelis kichiuaskej kemej yejuan uan kinextiskej takuaujtamatilis kemej tein tayekananij kinextiaj (Heb. 13:7; 1 Ped. 5:3).

¹¹ “¿Keniuj uelis ika nikinpaleuis oksekin?” Uelis tikuiskej tein motajtani maj kichiuakan tayekananij uan ika tikinmelauiliskej akin tikinmachtiaj ika Biblia uan oksekin ke tayekananij amo monejnemiltiaj kemej akin taixyekanaj itech okseki taneltokalismej. Nejin no techelnamiktia ke tayekananij tel tekitij. Keman titanemiliskej itech nochi chikaujkayot tein kichiuaj, okachi tikinpoujkaitaskej (1 Tes. 5:12). Uan komo okachi tikinpoujkaitaj, okachi kinyolpaktis tapaleuiskej itech nechikol (Heb. 13:17).

12, 13. 1) ¿Toni uelis tiktemoskej ika nepaleuilmej tein tikpiaj? 2) Xikonijto se neskayot kampa moita toni tikajsij keman tiktemouaj tikmatiskej toni panotoya keman moijkuiloj se amatajkuilol.

¹² Maj tiktemokan okachi tamachtilis. Keman timomachtiaj Biblia, uelis tiktemoskej itanankililuan nejin netajtanilmej:

• ¿Akoni kijkuiloj nejin amatajkuilol?

• ¿Kani uan kemanian moijkuiloj?

• ¿Toni tein motelneki mochiuak keman moijkuilojtoya nejin amatajkuilol?

Komo tiktemouaj nejin uelis techpaleuis maj tikajsikan tamachtilis tein amo ijsiujka se kiajsi.

¹³ Maj tikitakan se neskayot. Itech Ezequiel 14:13, 14, Jiova kijtoj ke komo itech se xolal tajtakouayaj iixpan, yejuatsin kichiuaskia maj kipanokan mayan uan kinixpoloskia yejuan uan inintapialuan. Sayoj ke satepan kijtoj: “Komo nejin eyi takamej, Noé, Daniel uan Job, yetoskiaj ompa, yejuan ueliskiaj momakixtiskej ika ininmelaujkayo”. Komo tiktemouaj okachi tamachtilis, tikitaskej ke Ezequiel kijkuiloj nejin kemej 612 xiujmej achto itech totonaluan. Maski Noé uan Job momikilijkej tel miak xiujmej achto, Jiova kielnamikiaok ke amo keman kikaujkej. Sayoj ke Daniel yoltoyaok. Uan xa kipiaya kemej 20 xiujmej keman Jiova kijtoj ke katka tel yolmelauak kemej Noé uan Job. ¿Toni techmachtia nejin? Ke Jiova kinita uan kinpatiuita nochin itekitikauan akin amo kikauaj, hasta akin telpochmejok (Sal. 148:12-14).

14. 1) ¿Keniuj kinpaleuia telpochmej uan ichpochmej nochi tamachtilismej tein kinijkuilouiliaj? 2) ¿Keniuj kinpaleuia oksekin? (Xikonita taixkopin ipeujyan tamachtilis.)

¹⁴ Tein kinijkuilouiliaj telpochmej. Tikitakejya ke tinochin uelis techpaleuis nochi tein kijtoua Biblia. No ijkon, tinochin uelis techpaleuis nochi toamaixuan. Maj tikitakan seki neskayomej. Itech xiujmej tein panouanij, Jiova kichiuani maj mochijchiua miak tamachtilis uan amatajkuilolmej tein kinpaleuis telpochmej uan ichpochmej. ^[1] Nejin tamachtilismej kinpaleuia maj kimatikan toni  kichiuaskej keman kampa momachtiaj kinchikaujkauiaj maj kichiuakan tein amo kuali uan keman kipanouaj ouijkayomej. Sayoj ke ¿keniuj nejin tamachtilismej uan amatajkuilolmej uelis techpaleuis akin amo titelpochmejok? Komo tikixtajtoltiaj, tikmatiskej toni kuejmolmej kipanouaj telpochmej uan ichpochmej uan uelis tikinpaleuiskej uan tikinyolchikauaskej.

15. ¿Keyej tokniuan akin uejueykejya no moneki kiixtajtoltiskej tein kinijkuilouiliaj telpochmej uan ichpochmej?

¹⁵ Tokniuan akin uejueykejya moneki amo kinemiliskej ke amo moneki kiixtajtoltiskej tamachtilismej tein kinijkuilouiliaj telpochmej uan ichpochmej. Komo ijkon tanemiliskiaj kinextijtoskiaj ke moueyinekij. Akin uejueykejya no kipanouaj miak kuejmolmej tein ika motajtoua itech nejon tamachtilismej. Kemej neskayot, tinochin moneki tikinmelauiliskej oksekin tein tikneltokaj, tiktsakuiliskej tein tikmachiliaj, amo timokauaskej maj techchiualtikan tein amo kuali, amo tikinpiaskej amo kuali tasojiknimej uan amo timoixpetaniskej ika tein amo kuali. Tamachtilismej tein kinijkuilouiliaj telpochmej uan ichpochmej no kimelauaj tein kijtoua Biblia. Yejua ika tinochin akin tikchiuaj kemej Cristo uelis techtelpaleuis.

16. ¿Keniuj amaixmej no kinpaleuia telpochmej uan ichpochmej?

¹⁶ Amaixmej tein kinijkuilouiliaj telpochmej uan ichpochmej no kinpaleuia maj okachi kuali mouikakan iuan Jiova (xikonixtajtolti Eclesiastés 12:1, 13). Sayoj ke akin uejueykejya no uelis kinpaleuis. Kemej neskayot, amaix ¡Despertad! abril de 2009 kipiaya se tamachtilis tein kinijkuilouilijkej telpochmej uan ichpochmej tein motokaytiaya “¿Cómo disfrutar la lectura de la Biblia?”. Nejin tamachtilis kipiaya miak tayolmajxitilis uan se recuadro tein ueliskia se kitejtekis uan se kikalakis itech Biblia uan ika se momachtis satepan. ¿Kinpaleuij nejin tamachtilis akin uejueykejya? ¡Kemaj! Se siuat akin namikej uan kinpia konemej kijtoj ke kiouijmakaya kiixtajtoltis Biblia, yejua ika kichiuak tein motayolmajxitij itech nejon tamachtilis. Axkan semi kiyolpaktia kiixtajtoltis Biblia uan kiitas keniuj itech amatajkuilolmej tein kipia amo moixnamiki nion se tanemilil. Yejua kijtoua: “Amo keman semi nechyolpaktijtoya nikixtajtoltis”.

17, 18. ¿Keniuj techpaleuiaj tamachtilismej tein kinijkuilouiliaj akin amo itaixpantijkauan Jiova? Xikonijto se neskayot.

¹⁷ Tein kinijkuilouiliaj akin amo itaixpantijkauan Jiova. Itech xiuit 2008 peuak tikixtiaj itech tajtol español amaix Tanejmachtijkej tein ika timomachtiaj, tein kinijkuilouiliaj okachi akin itaixpantijkauan Jiova. Sayoj ke no tikixtiaj amaixmej tein okachi kinijkuilouiliaj akin amo itaixpantijkauan Jiova. ¿Keniuj no uelis techpaleuiskej nejin amaixmej? Maj tikijtokan se neskayot. Maj tiknemilikan ke tikyoleujkej aksa maj touan youi se nechikol, uan yejua kijtoua ke kemaj yas. Nejon semi techyolpaktis. Uan keman motemakatos tanojnots, xa  tiknemiliskej keniuj momachilia taltikpaknenkej uan keniuj nejon tamachtilis uelis kipaleuis itech inemilis. Nochi nejin kichiuas maj okachi tiktasojkamatikan tamachtilis tein motemaka itech tanojnots.

¹⁸ Xa no ijkon techpanoua keman tikixtajtoltiaj amaixmej tein kinijkuilouiliaj akin amo itaixpantijkauan Jiova. Kemej neskayot, maj itech titanemilikan amaix Tanejmachtijkej tein tiktemakaj itech tanojnotsalis uan tamachtilismej tein moajsij itech jw.org. Nejin tamachtilis kimelaua tein kijtoua Biblia kemej amo kinouijmakas kiajsikamatiskej akin amo itaixpantijkauan Jiova. Keman tikixtajtoltiaj nejin tamachtilismej, okachi kuali tikajsikamatij tamachtilismej tein moajsij itech Biblia tein kuali tikixmatijya. Uan nejin kichiua maj okachi tikpatiuitakan. No techmachtia yankuik taman kemej tikmelauaskej tein tikneltokaj itech tanojnotsalis. No ijkon, amaix ¡Despertad! techmatiltia miak tamanok keyej tikneltokaskej ke Dios yekmelauj nemi uan ke yejuatsin kichijchiuak nochi tein onkak, uan no techmachtia keniuj tikmelauaskej tein tikneltokaj (xikonixtajtolti 1 Pedro 3:15).

19. ¿Keniuj uelis tiknextiskej ke tiktasojkamatij tamachtilis tein Jiova techmaka?

¹⁹ Senkis moita ke Jiova techmakatok tel miak tamachtilis tein techtelpaleuia (Mat. 5:3). Yejua ika, maj tiksentokakan tikixtajtoltikan uan maj tikchiuakan nochi tein techyolmajxitia uan techmachtia. Komo ijkon tikchiuaj, tikseliskej miak nepaleuil uan tiknextiliskej Jiova ke tiktasojkamatij nochi tamachtilis tein techmaka (Is. 48:17).