Maj amo tikauakan maj kaxani tonetasojtalis
“Momiaktilis miak ten amo kuali tachiualisme, uan ika nojon miakke taneltokani kikauaske ne tasojtalis.” (MAT. 24:12)
1, 2. 1) ¿Akonimej yekinika kinpanok tein kijtoua Mateo 24:12? 2) ¿Keniuj amatajkuilol Hechos kinextia ke tel miakej tokniuan itech yekinika siglo kisentokayaj kitasojtayaj Dios? (Xikonita taixkopin ipeujyan tamachtilis.)
KEMAN Jesús moajsia nikan taltikpak, kijtoj ke itech itamian tonalmej “miakke [...] kikauaske ne tasojtalis se uan okse” (Mat. 24:3, 12; xikonita kampa kijtoua “Tein okachi momelaua”). Nejin tein kijtoj yekinika kinpanok judíos itech yekinika siglo. Yejuan kijtouayaj ke pouiaj itech ixolal Dios, sayoj ke kikaujkej maj kaxani netasojtalis tein kipialiayaj.
2 Sayoj ke tel miakej tokniuan itech nejon tonalmej ika yolpakilis kiteixmatiltiayaj “ke Jesús Yejuatsin Cristo” uan kinextiayaj ke kitasojtayaj Dios, kintasojtayaj tokniuan uan akin ayamo kiixmatiaj tein melauak (Hech. 2:44-47; 5:42). Sayoj ke seki tokniuan kikaujkej maj kaxani ininnetasojtalis. ¿Keniuj tikmatij?
3. ¿Toni xa kichiuak maj kaxani ininnetasojtalis seki tokniuan?
3 Jesús kiniluij tokniuan akin nemiaj Éfeso: “Amo [tinechtasojta] Apoc. 2:4). Nejin tokniuan xa peuak tanemiliaj kemej akin amo kitekitiliayaj Jiova, akin sayoj inintech tanemiliayaj (Efes. 2:2, 3). Ompa Éfeso uelia se kitania miak tomin, uan akin ompa nemiaj kitayekanaltiayaj kuali nemiskej uan kipiaskej miak taman tein patiyoj. Uan no, miakej tel auilnemiaj uan amo kipoujkaitayaj itanauatiluan Dios. Sayoj kinekiaj moyolpaktiskej ke kitasojtaskej Dios uan okseki taltikpakneminij uan amo teyi kichiaskej.
ok, keme ne achtopa tinechyoltasojtaya” (4. 1) ¿Keyej axkan kaxani ininnetasojtalis miakej? 2) ¿Toni tikitaskej itech nejin tamachtilis?
4 Tein Jesús kijtoj ke panoskia ika netasojtalis no mochiujtok axkan. Taltikpakneminij amo semi kitasojtajok Dios. Millones taltikpakneminij amo kitemouaj maj yejuatsin kiyektali kuejmolmej, ta kitemouaj nepaleuil itech taltikpaknechikolmej. Nejin kichiua maj okachi kaxani ininnetasojtalis. Hasta itekitikauan Jiova no uelis kaxanis ininnetasojtalis, ijkon kemej kinpanok tokniuan akin nemiaj Éfeso. Yejua ika, maj tikitakan keniuj uelis tiksentokaskej tiktasojtaskej Jiova, tein tamachtia Biblia uan tokniuan.
NETASOJTALIS TEIN TIKPIALIAJ JIOVA
5. ¿Keyej moneki tiktasojtaskej Dios?
5 ¿Akoni moneki okachi tiktasojtaskej? Jesús kijtoj: “‘Xiktasojta moueyitekotsin Totajtsin Dios ika nochi moyolo, uan ika nochi motanejnekilis, uan ika nochi motanemililis’. Yejua ya nijin in kachi ueyi tanauatil uan de kachi kuika ueyi chikaualis” (Mat. 22:37, 38). Netasojtalis tein tikpialiaj Jiova techolinia maj tiktakamatikan, techpaleuia maj tikxikokan ouijkayomej uan maj tiktauelitakan tein amo kuali (xikonixtajtolti Salmo 97:10). Sayoj ke Satanás uan nochi tein kiixyekana kitemouaj maj amo tiktasojtakanok Dios.
6. ¿Toni panoua keman taltikpakneminij amo kitasojtajok Dios?
6 Akin amo kiixmatij Jiova taman kiitaj netasojtalis. Yejuan amo kitasojtaj Dios, ta ‘motasojtatinemij yejuan san’ (2 Tim. 3:2). Kitayekanaltiaj “tanejnekilis den pitsotik ten eua itech in tonakayo; uan yejua ne taixnejnekilis kuak kiyokolitaj in toixtololouan; uan yejua ne moueyinekilis ten eua itech miak tataman de se kipixtok” (1 Juan 2:16). Tatitanil Pablo technejmachtij tein uelis techpanos komo tiktayekanaltiaj totanejnekilis. Yejua kijtoj: “Kuak tikyoltanemilijtinemij sayo itech totalnamikilis ten kualkui tajtakol, ijkuakon yejua ne techuika ya tech in ixpoliuilis”. ¿Keyej teuika itech ixpoliuilis? Porin akin kitayekanaltiaj inintanejnekilis kiixnamikij Dios (Rom. 8:6, 7). Akin sayoj kitemouaj motomintiskej oso auilnemiskej semi amo yolpakij (1 Cor. 6:18; 1 Tim. 6:9, 10).
7. ¿Toni tanemililmej uelis kinijtakos itekitikauan Dios?
7 Miakej akin amo kineltokaj ke nemi Dios, akin kinemiliaj ke amo ueli se kimati ox nemi uan akin kinemiliaj ke nemilis iselti peuak kitemouaj maj oksekin amo kitasojtakanok oso maj amo kineltokakanok ke nemi. Kiteajsikamatiltiaj ke sayoj aksa akin amo tamati oso amo kipia miak tamachtilis kineltoka ke moajsi se Tachijchiujkej. Uan no, miakej okachi kinpoujkaitaj tamatinij ke Jiova, akin kichijchiuak nochi (Rom. 1:25). Komo tikinkakij, uelis timouejkatiliskej iuan Jiova, uan kaxanis netasojtalis tein tikpialiaj (Heb. 3:12).
8. 1) ¿Keyej itekitikauan Jiova uelis mosenkauaskej? 2) ¿Keniuj techyolseuia Salmo 136?
1 Juan 5:19). Sayoj ke komo timosenkauaj, uelis moijtakos totakuaujtamatilis iuan Dios uan kaxanis netasojtalis tein tikpialiaj. Xa amo techajsi tomin, timokokouaj oso tixiuejkejya. Oso xa titayokoyaj porin amo ueli tikchiuaj seki taman kemej tiknekiskiaj oso porin amo mochiuak tein tikchiayaj. Itech tein yeski kuejmol tein tikpiaskej, maj amo keman tiknemilikan ke Jiova techsenkauak. Maj tikelnamikikan keniuj techyolchikaua Salmo 136:23, tein kijtoua: “Yejuatsin techelnamikik keman tiyolkuetaujtoyaj, porin inetasojtalis tein amo tekaua uejkaua nochipaya”. Uelis tikyekmatiskej ke Jiova techkakis uan technankilis keman tiktataujtiskej maj techpaleui (Sal. 116:1; 136:24-26).
8 Kemej itech nejin taltikpak taixyekantok Satanás, kemansa xa tiknekiskej timosenkauaskej (9. ¿Toni kipaleuij Pablo maj kisentokani kitasojtani Dios?
9 Tatitanil Pablo semi itech tanemiliaya keniuj Jiova kipaleuiaya, uan nejin kiyolchikauak. Yejua kijkuiloj: “Yejuatsin nechpaleuijtinemi. lka ya nojon amo nimoyolmoutis tenika tensa uelis nechchiuilis in tagayot” (Heb. 13:6). Kemej Pablo nochipa takuaujtamatia iuan Jiova, kixikoj ouijkayomej tein kipanouaya. Hasta keman tsaktoya kinijkuilouilij tokniuan amamej tein ika kinyolchikauak (Efes. 4:1; Filip. 1:7; Filem. 1). Maski kipanok uejueyi ouijkayomej, kisentokak kitasojtak Jiova ika nochi iyolo. Takuaujtamatik iuan Dios akin “nachipa techyoltalijtinemi ika iuelilis. Uan Totajtsin Dios nachipa techyolpoxautinemi mientras tejuan titajyouijtinemij ika miak tataman toneukayot” (2 Cor. 1:3, 4). ¿Keniuj uelis tikchiuaskej kemej yejua?
Maj tiktasojtakan Jiova (xikonita párrafo 10)
10. ¿Toni techpaleuis maj tiksentokakan tiktasojtakan Jiova?
10 Pablo kijtoj se taman tein techpaleuis maj tiksentokakan tiktasojtakan Dios. Yejua kijkuiloj: “Ximotatatautilikan iuan Dios youalitonal”. Satepan, oksepa kijkuiloj: 1 Tes. 5:17; Rom. 12:12). ¿Keyej netataujtil kichikaua tokuali uikalis iuan Dios? Porin keman timotataujtiaj, titajtouaj iuan Jiova (Sal. 86:3). Keman tiktapouiaj toTajtsin tein tiknemiliaj uan tein tikmachiliaj, okachi iuan timotokiaj (Sal. 65:2). Uan no, netasojtalis tein tikpialiaj okachi mochikaua keman tikitaj ke technankilia. Tikitaj ke “Jiova amo moajsi uejka iniuan nochin akin kinotsaj” (Sal. 145:18). Komo titakuaujtamatij ke Jiova techtasojta uan amo techkaua, techpaleuis maj tikxikokan kuejmolmej tein tikpiaskej axkan uan satepan.
“Xiksentokakan de nanmotatatautiliske iuan Dios” (NETASOJTALIS TEIN TIKPIALIAJ TAMACHTILIS TEIN MELAUAK
11, 12. ¿Toni techpaleuis maj okachi tiktasojtakan tein melauak tein tamachtia Biblia?
11 Tiitekitikauan Dios tiktasojtaj tamachtilis tein melauak, tein moajsi itech iTajtol Dios. Jesús kiluij iTajtsin: “Motajtolis yejua ne yek melau tajtolis” (Juan 17:17). Yejua ika, komo tiknekij tiktasojtaskej tein melauak, moneki tikmatiskej toni tamachtia Biblia (Col. 1:10). Sayoj ke no moneki tikchiuaskej okse taman. Akin kijkuiloj Salmo 119 techpaleuia maj tikajsikamatikan toni kijtosneki se kitasojtas tamachtilis tein melauak (xikonixtajtolti Salmo 119:97-100). Moneki titanemiliskej itech tein tikixtajtoltiaj itech Biblia ijkon kemej panotiuj tonal. Komo tiknemiliaj keniuj techpaleuia komo tiktakamatij tein Biblia tamachtia, okachi tiktasojtaskej.
12 Akin kijkuiloj Salmo 119 no kijtoj: “Semi tsopek motajtoluan itech notenoj, ¡okachi ke nekti itech notenoj!” (Sal. 119:103). Amaixmej tein mochijchiuaj itech inechikol Dios tamatij kemej se takual tein tel uelik. Keman tikuaj teisa tein semi tikueliliaj, amo tikuajtiuetsij. No ijkon, moneki amo ijsiujka timomachtiskej. Ijkon techyolpaktis “tajtolmej tein kualtsitsin” tein tamachtia Biblia, uan uelis tikelnamikiskej tein tikixtajtoltiaj uan ika tikinpaleuiskej oksekin (Ecl. 12:10).
13. ¿Keyej Jeremías kitasojtaya tein Dios kimachtiaya, uan toni kiolinij maj kichiua?
13 Tanauatijkej Jeremías kitasojtaya tein Dios kimachtiaya. Yejua kijtoj: “Nikinajsik motajtoluan, uan nikinkuaj; uan motajtol notech mochiuak se ueyi pakilis uan kiyolpaktij noyolo, porin motokay kijtojkej notech, Jiova Dios akin tikinixyekana tateuianij” (Jer. 15:16). Jeremías kitasojtaya itajtoluan Dios tein kipiaj miak ipatiuj uan inintech tanemiliaya. Yejua ika kipatiuitaya kiixnextis Jiova uan kiteixmatiltis itanauatil. Komo tejuan tiktasojtaj tein melauak tein tamachtia Biblia, no tikpatiuitaskej tiyeskij tiitaixpantijkauan Jiova uan tikteixmatiltiskej iTekiuajyo itech nejin itamian tonalmej.
Maj tiktasojtakan tein tamachtia Biblia (xikonita párrafo 14)
14. ¿Toni no techpaleuis maj mochikaua netasojtalis tein tikpialiaj tein Biblia tamachtia?
14 ¿Toni no techpaleuis maj kisentoka mochikaua netasojtalis tein tikpialiaj tamachtilis tein melauak? Moneki nochipa tiyaskej nechikolmej, porin Jiova ompa techmachtia. Se taman tein Jiova okachi ika techmachtia yejua tamachtilis tein tikpiaj sejse semana ika amaix Tanejmachtijkej. Komo tiknekij maj techpaleui, yekinika moneki kuali timomachtiskej. Kemej neskayot, uelis tikixtajtoltiskej nochi tajkuilolmej itech Biblia tein ompa moajsij. Axkan, miakej tokniuan ueli kiixtajtoltiaj oso ijsiujka kitemouiaj nejin amaix itech inintepos. Nejin amaix moajsi itech miak tataman tajtolmej itech jw.org uan no itech JW Library. Itech seki amaixmej tein moajsij itech tepos ueli niman se kiixtajtoltia tajkuilolmej tein moajsij itech Biblia. Tein yeski taman tein tiktekitiltiskej keman timomachtiskej tamachtilismej itech nejin amaix, moneki tikixtajtoltiskej uan titanemiliskej ika nejmachkayot itech tajkuilolmej tein moajsij itech Biblia. Komo ijkon tikchiuaj, okachi tiktasojtaskej tein Biblia tamachtia (xikonixtajtolti Salmo 1:2).
NETASOJTALIS TEIN TIKINPIALIAJ TOKNIUAN
15, 16. 1) ¿Toni tanauatij Jesús itech Juan 13:34, 35? 2) ¿Keyej netasojtalis tein tikpialiaj Jiova uan tein tamachtia Biblia mouika ika netasojtalis tein tikinpialiaj tokniuan?
15 Youak achto ke momikiliskia, Jesús kiniluij imomachtijkauan: “Namechmaka se yankuik tanauatil ma xiktakamatiyakan ijkuin, ke moneki ximoyolsepantasojtakan se uan okse. Uan no namechilia ke ijkon keme Nejuatsin namechyoltasojtatiuits ya, no ijkon namejuan ximoyoltasojtatiyakan se uan okse. Uan komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35).
16 Netasojtalis tein tikinpialiaj tokniuan mouika iuan netasojtalis tein tikpialiaj Jiova. Komo amo tiktasojtaj Dios, amo uelis tikintasojtaskej tokniuan. Uan komo amo tikintasojtaj tokniuan, amo uelis tiktasojtaskej Dios. Tatitanil Juan kijkuiloj: “Komo tejuan amo tikinyektasojtaj in tokniuan taneltokani ten tikinyekitstokke ya, pues ijkon tejuan amo no uelis tiktasojtaske Totajtsin Dios porin Yejuatsin amo uelis tikitstinemij” (1 Juan 4:20). Uan no, netasojtalis tein tikpialiaj Jiova uan tokniuan mouika ika netasojtalis tein tikpialiaj tein tamachtia Biblia. ¿Keyej? Porin komo tiktasojtaj tein timomachtiaj itech Biblia, tiktakamatiskej tanauatil tein techiluia maj tiktasojtakan Dios uan tokniuan (1 Ped. 1:22; 1 Juan 4:21).
Maj tikintasojtakan tokniuan (xikonita párrafo 17)
17. ¿Keniuj tiknextiaj ke tikintasojtaj tokniuan?
17 (Xikonixtajtolti 1 Tesalonicenses 4:9, 10.) ¿Keniuj uelis tiknextiskej ke tikintasojtaj tokniuan? Xa aksa akin xiuejya moneki se kipaleuis maj youi nechikolmej. Oso xa se tokniuj siuat akin amo nemiok itakauj moneki maj se kiyekchijchiuili teisa ichan (Sant. 1:27). Tokniuan akin yolkuetauij, akin tayokoyaj oso kipiaj okse kuejmol moneki maj tikinpaleuikan, maj tikinyolchikauakan uan maj tikinyolseuikan (Prov. 12:25; Col. 4:11). Ika tein tikijtouaj uan tein tikchiuaj tiknextiaj ke tikintasojtaj “tokniuan taneltokani” (Gál. 6:10).
18. ¿Toni techpaleuis maj tikyektalikan kuejmolmej tein tikpiaskej iniuan tokniuan?
18 Biblia kijtoj ke itech itamian tonalmej miakej sayoj inintech tanemiliskiaj uan kitelnekiskiaj kipiaskej miak taman (2 Tim. 3:1, 2). Yejua ika tiitekitikauan Dios moneki timochikauaskej okachi tiktasojtaskej Jiova uan iTajtol, uan timotasojtaskej se uan okse. Kemej titajtakouanij, kemansa xa tikpiaskej se kuejmol iniuan tokniuan. Sayoj ke netasojtalis tein timopialiaj techolinis maj niman tikyektalikan tein yeski kuejmol ika yolseuilis (Efes. 4:32; Col. 3:14). Maj amo keman tikauakan maj tonetasojtalis kaxani, ta maj tiksentokakan tiktasojtakan Jiova, iTajtol uan tokniuan ika nochi toyolo.