1, 2. 1) ¿Toni ouijkayomej kipanouaj miakej konemej akin inintatuan mokaltalitoj itech okse ueyi altepet? 2) ¿Toni netajtanilmej monankiliskej itech nejin tamachtilis?

SE TOKNIUJ akin monotsa Joshua kijtoua: “Notatuan okseko kayomej katkaj, uan keman ninojnelok nikatka nitajtouaya inintajtol kalijtik uan itech nechikol”. Sayoj ke keman Joshua peuak youi kaltamachtiloyan, peuak okachi kiuelita tajtos tajtol tein mokui itech altepet kampa mokaltalitoj. Yejua kijtoua: “Satepan ke panokej seki xiujmej, nochi mopatak: amo nikajsikamatia tein moijtouaya itech nechikolmej uan nikmachiliaya ke amo nikpiayaok tanemilil tein kipiaj kampa kayomej notatuan”. Miakej kinpanouani tein kipanok Joshua.

² Itech nejin tonalmej, panoua 240 millones taltikpakneminij nemij itech okse ueyi altepet. Komo tejuatsin tionmokaltalito itech okse ueyi altepet, ¿keniuj uelis tikonpaleuis mokoneuan maj kitasojtakan Jiova uan maj kisentokakan “itech in yek melauak Tajtoltsin de Dios”? (3 Juan 4.) ¿Keniuj okseki tokniuan uelis tapaleuiskej?

3, 4. 1) ¿Keniuj tetatmej uelis kinkauiliskej se kuali neskayot ininkoneuan? 2) ¿Toni moneki amo kichiaskej tetatmej maj kichiuakan ininkoneuan?

³ Tetatmej, komo nankinekij maj nanmokoneuan kuali mouikakan iuan Jiova uan maj nemikan nochipaya, motelneki xikinkauilikan se kuali neskayot. Komo kiitaj ke nankitayekanaltiaj iTekiuajyo Dios, kimatiskej ke uelis takuaujtamatiskej ke Jiova mojmostaj kinmakas tein kinpolos (Mat. 6:33, 34). Amo xiktemokan nankipiaskej okachi miak taman, ta xiktayekanaltikan itekiyo Jiova uan amo ximotauikaltikan. No amo xiktemokan nankipiaskej miak tomin nion maj taltikpakneminij namechueyitalikan, ta ximochikauakan nankipiaskej itatiochiualis Jiova (xikonixtajtolti Marcos 10:21, 22; Juan 12:43).

⁴ Maski nankipiaskej miak tekit, xikxelokan tiempo nanyetoskej iniuan nanmokoneuan. Xikiniluikan ke semi namechyolpaktia tein kichiuaj keman kitayekanaltiaj kitekitiliskej Jiova uan amo kitemouaj maj kintelixmatikan oso kitaniskej miak tomin tein ika kuali nemiskej yejuan oso namejuan. Miakej kinemiliaj ke konemej moneki tekitiskej uan ijkon inintatuan kipiaskej se kuali nemilis, sayoj ke nejon tanemilil amo kuali yetok. Xikelnamikikan ke “amo moneki ke in koneme ma kinechikojtiyas tomin para ika kinixpanoltijtiyas intatuan. Ta, xikmatikan ke in tetatme moneki kinechikojtiyaske tomin para ika kinixpanoltijtiyaske nikoneuan” (2 Cor. 12:14).

5. ¿Keyej tetatmej nochipa moneki ika tajtoskej Jiova iniuan ininkoneuan?

⁵ Kemej itech Biblia achtook moijtojka, taltikpakneminij “itech nochi tataman tajtolmej tein tajtouaj itech altepemej” motokijtokej itech inechikol Jiova (Zac. 8:23). Tetatmej, komo nanmokoneuan amo kiyekajsikamatij nanmotajtol, ouij namechkisas nankinmachtiskej tein melauak. Yejuan akin okachi moneki nankinmachtiskej ika Biblia, uan sayoj uelis kipiaskej nemilis nochipaya komo kiixmatij Jiova (Juan 17:3). Yejua ika moneki nochipa ika nankinnojnotsaskej tein Jiova tamachtia (xikonixtajtolti Deuteronomio 6:6, 7).

6. ¿Toni tein kuali kiualkui keman konemej uelij tajtouaj inintajtol inintatuan? (Xikonita taixkopin ipeujyan tamachtilis.)

⁶ Nanmokoneuan xa ueliskej tajtol tein mokui itech altepet kampa nanmokaltalitoj keman yetoskej kaltamachtiloyan oso iniuan oksekin. Sayoj ke ueliskej nanmotajtol sayoj komo namejuan nanmomattokej iniuan nantajtoskej. Komo uelij tajtouaj nanmotajtol, okachi amo ouij kinkisas tajtoskej namouan uan namechtapouiskej keniuj momachiliaj. Sayoj ke no kiualkui okseki taman tein kuali. Komo uelij ome tajtolmej kinpaleuis maj okachi kuali tanemilikan uan maj kiajsikamatikan keniuj tanemiliaj okseki taltikpakneminij. Uan no kinpaleuis maj kichiuakan okachi tekit itech tanojnotsalis. Carolina, akin itatuan mokaltalitoj itech okse ueyi altepet, kijtoua: “Niyetos itech se nechikol kampa motajtoua okse tajtol nechyolpaktia. Uan nikteluelita nitapaleuis kampa monekij okachi tanojnotsanij”.

7. ¿Toni uelis kichiuaskej tetatmej komo ininkoneuan tajtouaj okse tajtol?

⁷ Ininkoneuan tetatmej akin mokaltalitoj itech okse ueyi altepet yolik peua tanemiliaj kemej akin ompa nemij uan kikuij inintajtol. Yejua ika sekin xa amo kinekijok oso hasta amo uelijok tajtouaj inintajtol inintatuan. Komo nanmokoneuan kinpanoua nejon, ¿ueliskia namejuan nanueliskej maski  sayoj tepitsin tajtol tein mokui kampa nanmokaltalitoj? Okachi amo namechouijmakas nankinpaleuiskej maj kuali monejnemiltikan komo nankiajsikamatij tein ika tajtouaj, tein ika moixpetaniaj uan tekimej tein kinkauiliaj tamachtiloyan, uan komo ueli nantajtouaj iniuan inintamachtijkauan. Melauak ke moneki tiempo, chikaujkayot uan yolyemanilis se momachtis se yankuik tajtol. Sayoj ke amo nenkaj. Xiknemilikan nejin. Komo nanmokonetsin amo ueliskiaok takakis, ¿melauj ke nanmochikauaskiaj iuan nantajtoskej ika señas? Komo ijkon, komo nanmokonetsin okachi amo ouij kikisa tajtos itech okse tajtol, ¿melauj ke no kinamiki ximochikauakan nanueliskej nejon tajtol? *

8. ¿Keniuj uelis tikonpaleuis mokoneuan komo amo kiyekajsikamatij motajtol?

⁸ Seki tetatmej xa kinouijmakas kuali tajtoskej yankuik tajtol tein kimatij ininkoneuan. Xa yejua ika ouij kinkisas kinpaleuiskej ininkoneuan maj kiajsikamatikan “Tajkuilolamatsin de Dios” (2 Tim. 3:15). Xa yejua nejin nankipanotokej. Maski ijkon, uelis nankinpaleuiskej nanmokoneuan maj kiixmatikan uan maj kitasojtakan Jiova. Se tokniuj tayekankej akin monotsa Shan kijtoua: “Tomomaj, akin iselti techiskaltij, amo uelia tajtouaya tajtol tein okachi kuali tikajsikamatiaj nokniuan siuamej uan nejua, uan tejuan amo semi kuali titajtouayaj itajtol. Sayoj ke tikitaskej ke momachtiaya, kichiuaya netataujtil uan mochikauaya kichiuas nochi semanas taueyichiualis kemej kalyetouanij techajsikamatiltij ke motelnekia tikixmatiskej Jiova”.

9. ¿Keniuj tetatmej uelis kinpaleuiskej ininkoneuan akin moneki momachtiskej itech ome tataman tajtolmej?

⁹ Seki konemej xa monekis se kinpaleuis maj kiixmatikan Jiova itech ome tataman tajtolmej. ¿Keyej? Porin tajtouaj se tajtol kampa momachtiaj uan okse tajtol ininchan. Yejua ika, seki tetatmej kitekitiltiaj amaixmej, grabaciones uan videos itech ome tataman tajtolmej. Tetatmej akin mokaltalitoj itech okse ueyi altepet moneki okachi mochikauaskej uan ijkon uelis kinpaleuiskej ininkoneuan maj kuali mouikakan iuan Jiova.

10. 1) ¿Akoni moneki kiixpejpenas itech katiyejua nechikol mosentiliskej kalyetouanij? 2) ¿Toni moneki kichiuas achto ke kiixpejpenas?

¹⁰ Komo “tepalyetonij” amo nemij kampa ika nemij tokniuan akin no tajtouaj inintajtol, moneki mosentiliskej itech se nechikol kampa motajtoua tajtol tein mokui itech altepet kampa mokaltalitoj (Sal. 146:9). Sayoj ke komo ompakauin moajsi se nechikol kampa motajtoua inintajtol, tepopaj moneki kiixpejpenas katiyejua nechikol okachi kinpaleuis ichankauan. Sayoj ke achto ke taixpejpenas, moneki tanemilis ika nejmachkayot uan kitajtanis Jiova maj kiixyekana. Uan no, moneki iniuan tajtos inamik uan ikoneuan (1 Cor. 11:3). ¿Toni moneki kiitas? ¿Toni tein Biblia tayolmajxitia uelis kipaleuis?

11, 12. 1) ¿Keniuj tajtol moteluika ika tein konemej momachtiaj itech nechikolmej? 2) ¿Keyej seki konemej amo kinekij momachtiskej inintajtol inintatuan?

¹¹ Tetatmej moneki kiitaskej toni yekmelauj  kinpoloua ininkoneuan. Konemej amo sayoj kinpaleuis maj kuali kiajsikamatikan tamachtilis tein melauak tepitsin horas tein momachtiaj sejse semana itech nechikolmej. Sayoj ke tetatmej moneki kiitaskej nejin: keman konemej youij nechikolmej kampa motajtoua tajtol tein okachi kiajsikamatij, uelis kiajsikamatiskej tein motamachtijtok sayoj porin ompa moajsij uan hasta momachtiskej okachi miak taman ke tein inintatuan kinemiliaj. Ouij yeski maj konemej kielnamikikan tein motamachtia itech nechikolmej komo amo kiajsikamatij tein moijtoua (xikonixtajtolti 1 Corintios 14:9, 11). Tajtol tein ika yolik se konet amo nochipa moneki yeski tein ika kijtos tein kinemilia uan tein kimachilia. Tein melauj, seki konemej momachtiaj tanankiliskej itech nechikolmej, kitemakaskej tamachtilismej oso tanojnotsmej itech inintajtol inintatuan, sayoj ke amo kijtouaj tein yekmelauj kinemiliaj uan kimachiliaj.

¹² Kemej tamati uan kemej tanemilia se konet amo sayoj mouika ika tajtol. Yejua nejon kipanok Joshua, akin achto ika titajtojkej. Iikniuj, Esther, kijtoua: “Keman konemej kiuelitaj tajtoskej inintajtol inintatuan, no kiuelitaj nemiskej kemej kampa kayomej inintatuan uan pouiskej itech inintaneltokalis”. Komo konemej amo kiuelitaj nemiskej kemej kampa kayomej inintatuan, xa amo no kinekiskej ueliskej inintajtol nion pouiskej itech inintaneltokalis. ¿Toni uelis kichiuaskej tetatmej?

13, 14. 1) ¿Keyej seki kalyetouanij akin mokaltalitoj itech okse ueyi altepet mopatakej itech okse nechikol? 2) ¿Toni kinpaleuij nejin tetatmej maj ininkuali uikalis iuan Jiova kisentokani chikauak?

¹³ Tokniuan tetatmej moneki amo kitayekanaltiskej tein yejuan kinekij, ta tein kinpoloua ininkoneuan (1 Cor. 10:24). Samuel, ipopaj Joshua uan Esther, kijtoua ke inamik uan yejua kiitakej katiyejua tajtol okachi kinpaleuiaya ininkoneuan maj motokikan iuan Jiova. Uan no, kitajtanijkej Dios maj kinmakani tamatilis. Tein yejuatsin kinnankilij amo katka tein yejuan okachi kiuelitakej. Samuel kijtoua: “Keman tikitakej ke amo semi kinpaleuiaya nechikolmej itech totajtol, timopatakej itech okse nechikol. Tisenyayaj nechikolmej uan iniuan titanojnotsayaj. Uan no, tikinyoleuayaj tokniuan maj touan takuakij uan maj tiyanij tipaxalotij. Nochi nejin tapaleuij maj tokoneuan okachi kuali kinixmatinij tokniuan uan maj kiitanij Jiova amo sayoj kemej ininDios, ta no kemej ininTajtsin uan ininTasojikniuj. Tikitayaj ke nejon okachi monekia ke tajtoskej totajtol”.

¹⁴ Samuel kijtoua ke yejua uan inamik no yayaj nechikolmej itech inintajtol, uan ijkon ininkuali uikalis iuan Jiova kisentokaskia chikauak. Yejua kijtoua: “Tikpiayaj miak tekit uan tisioujtoyaj. Sayoj ke Jiova techtatiochiuij keman timochikaujkej uan timotemakakej tikauaskej seki taman, uan yejua ika tiktasojkamatiliaj. Nochin eyi tokoneuan kitekitiliaj Jiova miak tonalmej”.

15. ¿Keyej Kristina kinemilij ke okachi kuali kitekitiliskia Jiova itech se nechikol kampa motajtouaya tajtol tein mokui itech altepet kampa mokaltalito?

¹⁵ Keman konemej moskaltiaj, xa kiitaskej ke uelis okachi kuali kitekitiliskej Jiova itech se nechikol kampa motajtoua tajtol tein yejuan okachi kiajsikamatij. Komo panoua nejon, tetatmej moneki amo kinemiliskej ke ininkoneuan kinixtopeujtokej yejuan. Kristina kielnamiki: “Tepitsin nikajsikamatia inintajtol notatuan, sayoj ke ouij nechkisaya nikajsikamatis tein moijtouaya  itech nechikolmej. Keman nikpiaya 12 xiujmej, niyajki se ueyi nechikol itech tajtol tein nikuia kaltamachtiloyan. Ijkuak, yekinika nikajsikamatik ke nikaktoya tein melauak. Okse taman tein no motelneki tein nikpanok yejua keman peuak niktataujtia Jiova itech tajtol tein nikuia kaltamachtiloyan. ¡Axkan uelia nikiluiaya Jiova tein yekmelauj nikmachiliaya!” (Hech. 2:11, 41). Keman Kristina kiajxitij 18 xiujmej, tajtoj iniuan itatuan uan kiixtalij mopatas itech se nechikol kampa motajtouaya tajtol tein mokui itech nejon altepet. Yejua kijtoua: “Nikixmatis Jiova itech tajtol tein mokuia kaltamachtiloyan necholinij maj nikchiua tein moneki”. Tepitsin satepan, Kristina peuak kichiua tekit kemej precursor regular, uan nejon semi kiyolpaktia.

16. ¿Keyej yolpaki Nadia porin mokauak itech se nechikol kampa motajtouaya inintajtol itatuan?

¹⁶ Telpoch oso ichpoch, ¿tikuelitaskia tiyetos itech se nechikol kampa motajtoua tajtol tein mokui itech ueyi altepet kampa nanmokaltalitoj? Komo ijkon, ximotajtani keyej. ¿Tikuelitaskia timopatas itech nejon nechikol porin nejon mitspaleuis okachi kuali ximouika iuan Jiova? (Sant. 4:8.) ¿Oso tikuelitaskia timopatas porin amo tikneki maj motatuan kiitakan tein tikchiua oso porin amo tikneki timochikauas tikajsis tekimej itech nechikol? Xikita tein kijtoua Nadia, akin axkan tekiti Betel: “Keman nokniuan siuamej, nokniuj takat uan nejua titelpochmejok tikatkaj, tiknekkej timopataskej itech nechikol kampa motajtouaya tajtol tein mokui itech nejon ueyi altepet”. Sayoj ke inintatuan kimatiaj ke nejon amo kinpaleuiskia maj okachi kuali mouikanij iuan Jiova. Nadia kijtoua: “Axkan tikintasojkamatiliaj maj semi mochikauanij techmachtiskej inintajtol uan maj kichiuanij maj timokauanij itech nechikol kampa motajtouaya inintajtol. Nejon techmachtij miak taman uan kichiuak maj uelini tikinpaleuianij okseki taltikpakneminij maj kiixmatikan Jiova”.

17. 1) ¿Akonimej kinnauatiani Jiova maj kinmachtikan konemej? 2) ¿Toni uelis kichiuaskej tetatmej komo moneki maj kinpaleuikan maj kinmachtikan tein melauak ininkoneuan?

¹⁷ Jiova kinnauatiani tetatmej maj kinmachtikan ininkoneuan tein melauak. Nejin amo kinnauatiani teueyitatmej nion okse aksa (xikonixtajtolti Proverbios 1:8 uan 31:10, 27, 28). Sayoj ke tetatmej akin amo uelij tajtouaj tajtol tein mokui itech ueyi altepet kampa mokaltalitoj xa monekis maj kinpaleuikan maj ininkoneuan motokikan iuan Jiova. Keman tajtanij maj kinpaleuikan, amo kichiuaj porin amo kinekij kinmachtiskej ininkoneuan, ta porin kinekij kisentokaskej ‘kinmachtiskej uan kinmelaujtiyaskej’ itech itamachtilis Jiova (Efes. 6:4). Kemej neskayot, uelis kintajtaniskej tayekananij maj kinyolmajxitikan toni uelis kichiuaskej keman taueyichiuaj kemej kalyetouanij uan maj kinpaleuikan maj kinajsikan akin uelis kuali iniuan mouikaskej ininkoneuan.

18, 19. 1) ¿Keniuj okseki tokniuan uelis kinpaleuiskej telpochmej uan ichpochmej? 2) ¿Toni moneki kisentokaskej kichiuaskej tetatmej?

¹⁸ Tetatmej uelis kinpaleuiskej ininkoneuan komo kemansa kinyoleuaj okseki kalyetouanij maj iniuan taueyichiuakan. Miakej telpochmej uan ichpochmej momachtiaj miak taman tein kuali keman iniuan tanojnotsatij okseki tokniuan uan keman iniuan moixpetaniaj (Prov. 27:17). Shan, akin achto  ika titajtojkej, kijtoua: “Kuali nikinelnamiki tokniuan akin nechtelpaleuiayaj. Nochipa keman nechpaleuiayaj keniuj nitemakas notamachtilis, nimomachtiaya okachi miak taman. Uan nechtelyolpaktiaya tein tikchiuayaj keman timosenixpetaniayaj”.

¹⁹ Tokniuan akin kinpaleuiskej tetatmej nochipa moneki kinyolchikauaskej konemej maj kinpoujkaitakan inintatuan. ¿Keniuj uelis kichiuaskej? Keman kuali ininka tajtoskej uan amo kitapanauiliskej inintanauatil. Uan no, moneki amo kichiuaskej nion teyi tein se tokniuj oso aksa akin amo itaixpantijkauj Jiova uelis kiitas ke amo chipauak (1 Ped. 2:12). Maski tetatmej uelis kintajtaniskej oksekin maj kinpaleuikan, yejuan tetatmej akin moneki maj kinmachtikan tein melauak ininkoneuan. Moneki kiitaskej toni nepaleuil kiseliaj ininkoneuan.

20. ¿Keniuj tetatmej uelis kinpaleuiskej ininkoneuan maj mochiuakan itekitikauan Jiova?

²⁰ Tetatmej, xiktajtanikan Jiova maj namechpaleui uan xiksentokakan ximochikauakan nochi tein nanueliskej (xikonixtajtolti 2 Crónicas 15:7). Amo xiktayekanaltikan tein namejuan nankinekij, ta xiktemokan maj nanmokoneuan kuali mouikakan iuan Jiova. Ximochikauakan maj tein kijtoua iTajtol Dios ajsi itech ininyolo. Xitakuaujtamatikan ke yejuan uelis mochiuaskej itekitikauan Jiova. Keman kichiuaskej tein kijtoua Biblia uan kitojtokaskej kuali neskayot tein nankinkauiliaj, nanmomachiliskej kemej tatitanil Juan. Keman ininka tajtoj akin kinpaleuijka maj motokikan iuan Jiova, kijtoj: “Kachi nechpaktia kuak nikaki ke nokoneuan taneltokani de ke chipaukanentinemij itech in yek melauak Tajtoltsin de Dios” (3 Juan 4).