ITECH xiuit 1910, notatuan kiskej itech xolal Tiflis (Georgia) uan mokaltalitoj itech se kaltsin kampa uelia tatokayaj uan kiniskaltiayaj tapialmej ompakauin itech xolal Pelly (Saskatchewan, itonalkalakyampa altepet Canadá). Niyolik itech xiuit 1928, tikatkaj chikuasen tiiknimej uan nejua nixokoyot. Nopopaj momikilij chikuasen metsti achto ke niyoliskia, uan nomomaj momikilij keman nikpiaya kemej se xiuit. Tepitsin satepan momikilij nokniuj siuat akin tayekanaya, Lucy, akin kipiaya 17 xiujmej. Yejua ika totío Nick techiskaltij nejua uan nokniuan.

Se tonal, nochankauan nechitakej ke niktilanilijtoya ikuitapil semej caballos. Nejua nikpiaya kemej ome xiuit. Yejuan kimouiliayaj maj nechteliksani, yejua ika nechtsajtsilijkej maj nikajkauani. Nejua niikankeptoya uan amo nikinkakik. Maski amo teyi nechpanok, itech nejon tonal nochankauan kimatkej ke amo uelia nitakakia.

Se inintasojikniuj nochankauan kijtoj ke okachi nechpaleuiskia maj nimomachtiani iniuan okseki konemej akin no amo ueli takakij. Yejua ika notío Nick nechtitanik itech se kaltamachtiloyan kampa kinmachtiayaj akin amo uelij takakij itech xolal Saskatoon (Saskatchewan), tein tel uejka moajsia. Kemej nikpiaya sayoj makuil xiuit, nitelmouia. Sayoj uelia nikinkalpanouaya nochankauan itech vacaciones. Ijkon kemej panotiyajkej tonalmej, niuelik tajtol ika señas uan nechyolpaktiaya  nimauiltis iniuan okseki konemej.

Marion, semej nokniuan siuamej akin tayekana, monamiktij iuan Bill Danylchuck itech xiuit 1939, uan yejuan techyekpiakej nejua uan nokniuj Frances. Yejuan yekinika nochankauan akin peuak momachtiaj iniuan itaixpantijkauan Jiova. Itech tonalmej keman amo nimomachtiaya, mochikauayaj nechnextiliskej tein momachtijtoyaj itech Biblia. Techouijmakaya titajtoskej, porin yejuan amo ueliaj tajtol ika señas. Maski ijkon, kiitakej ke semi nikuelitaya tein nechmachtiayaj. Nikajsikamatik ke tein kichiujtoyaj yejua tein Biblia tamachtia, yejua ika iniuan niyaya nitanojnotsati. Niman niknekik nimoauis. Itech tonal 5 metsti septiembre xiuit 1941, Bill nechauij itech se ueyi tapalkat tachijchiuj ika tepos tein kipiaya at tein kikixtijkaj itech se atekoch. ¡At tel sesek katka!

Keman nimokepak kalijtik itajkotian xiuit 1946, tiyajkej se ueyi nechikol itech xolal Cleveland (Ohio, Estados Unidos). Yekinika tonal, nokniuan siuamej kijkuilojkej tein motamachtiaya uan ijkon ueliskia nikmatis toni ika motajtojtoya. Sayoj ke itech ojpatika tonal semi nechyolpaktij nikmatis ke se tokniuj kintajtolkepilijtoya ika señas akin amo uelia takakiaj. Ijkuak uelik nikmatikya tein motamachtijtoya uan nikajsikamatik tein Biblia tamachtia. ¡Nechtelyolpaktij!

Yankuixtok tanka Ojpatika Neteuilis tein Mochiuak itech Nochi Taltikpak, uan taltikpakneminij kinekiaj kinextiskej ke kipaleuiayaj ininaltepeuj. Sayoj ke, keman nimokepak kaltamachtiloyan satepan ke mochiuak ueyi nechikol, nikixtalijtoya niktakamatis Jiova. Yejua ika amo niktajpalouayaok bandera, amo nimokuikatiayaok himno uan amo niyayaok keman mochiuayaj iluimej. No amo niyayaok tiopan. Nejon amo kiuelitakej akin tekitiaj kaltamachtiloyan, uan nechmojmoujtiayaj uan nechkajkayauayaj porin kinekiaj maj nikpatani notanemilil. Akin iniuan nimomachtiaya kiitakej tein panotoya, uan nejon kichiuak maj uelini nikinnojnotsani. Satepan sekin kiselijkej tamachtilis tein melauak. Sekin katkaj Larry Androsoff, Norman Dittrick uan Emil Schneider, akin kisentokaj kitekitiliaj Jiova.

Keman niyaya itech okseki xolalmej, nochipa nimochikauaya nikinnojnotsas akin amo ueli takakij. Kemej neskayot, ompa Montreal niyajki kampa mosentiliayaj akin amo uelij takakij. Ompa niknojnotsak Eddie Tager, se telpoch akin iniuan mokuia okseki telpochmej. Eddie tapaleuij itech se nechikol itech tajtol ika señas tein moajsi Laval (Quebec) hasta keman momikilij, se xiuitya. No nikixmatik se telpoch akin monotsaya Juan Ardanez. Ijkon kemej akin nemiaj Berea itech yekinika siglo, Juan kitemoj okachi tamachtilis porin kinekia kimatis ke momachtijtoya tein melauak (Hech. 17:10, 11). Mochiuak itaixpantijkauj Jiova, uan tapaleuij kemej tayekankej itech xolal Ottawa (Ontario) hasta keman momikilij.

Itech xiuit 1950, nimokaltalito Vancouver. Maski nikteluelitaya nikinnojnotsas akin amo ueli takakij, amo keman nikelkauas tein nechpanok keman nitajtoj itech ojti iuan Chris Spicer, se siuat akin kemaj uelia takakia. Yejua kinekik kiselis toamaixuan sejse metsti uan nechiluij ke kinekia maj nikixmati inamik, Gary. Yejua ika niyajki ichan uan  uejkauak titajtojtoyaj ika inepaleuil amamej kampa tikijkuilouayaj tein tikijtouayaj. Oksepa timoitakej hasta seki xiujmej satepan, keman nechtajpalokoj itech se ueyi nechikol tein mochiuak Toronto (Ontario). ¡Semi nikmoujkaitak! Gary yaya moauiti nejon tonal. Nejin tein nikpanok nechelnamiktij ke motelneki tiksentokaskej titanojnotsaskej. Amo tikmatij komo aksa akin tiknojnotsaj satepan mochiuas itekitikauj Jiova.

Satepan, nimokepak Saskatoon. Ompa nikixmatik se siuat akin nechiluij maj nikinmachtiani ika Biblia ome isiuapipiluan akin senyolkej, akin amo uelia takakiaj. Motokaytiayaj Jean uan Joan Rothenberger. Yejuan momachtiayaj kampa nejua nimomachtijka. Niman peujkej kintapouiaj akin iniuan momachtiayaj tein momachtijtoyaj, uan makuil ichpochmej mochiujkej itaixpantijkauan Jiova. Semej katka Eunice Colin. Timoixmatkaj itech xiuit keman yaya nikisatiya kaltamachtiloyan. Nechmakak se dulce uan nechtajtanij ox ueliskia timochiuaskej titasojiknimej. Eunice satepan mochiuak se akin nikteltasojtaya: mochiuak nonamik.

Keman imomaj Eunice kimatik ke momachtijtoya ika Biblia, kitajtanij akin taixyekanaya kaltamachtiloyan maj kitanemililtiani ke monekia amo kisentokas. Maski tamachtijkej kitemoj kichiuas nejon uan kikuilij amaixmej, Eunice kiixtalijtoya kitakamatis Jiova. Keman kinekik moauis, itatuan kiluijkej: “Komo timochiua tiitaixpantijkauj Jiova, amo uelisok nikan tinemis”. Yejua ika keman kipiaya 17 xiujmej Eunice nemito iniuan seki kalyetouanij akin itaixpantijkauan Jiova. Kisentokak momachtij Biblia uan moauij. Timonamiktijkej itech xiuit 1960, sayoj ke itatuan amo yajkej. Ijkon kemej panotiyajkej xiujmej, itatuan peujkej techpoujkaitaj porin kuali tein timomachtiayaj uan kuali tikiniskaltiayaj tokoneuan.

Tikinpiakej chikome konemej akin ueli takakij. Techouijmakak tikinmachtiskej. Sayoj ke timochikaujkej tikinnextiliskej señas uan ijkon ueliskia kuali iniuan titajtoskej uan tikinmachtiskej tein melauak. Tokniuan itech nechikol techtelpaleuijkej. Kemej neskayot, se tepopaj techijkuilouilij itech se amat ke semej tokoneuan kijtojtoya amo kuali tajtolmej itech Kali kampa tiMosentiliaj. Niman tikmelaujkej tokonetsin. Nokoneuan James, Jerry, Nicholas uan Steven, tekitij kemej tayekananij uan kitekitiliaj Jiova iniuan ininchankauan. Uan no, Nicholas uan inamik, Deborah, tapaleuiaj maj motajtolkepa amaixmej itech tajtol ika señas itech sucursal tein moajsi Gran Bretaña. Steven uan inamik, Shannan, tapaleuiaj iniuan tokniuan akin kitajtolkepaj amaixmej itech tajtol ika señas itech sucursal tein moajsi Estados Unidos.

Se metsti achto ke tikajxitiskiaj 40 xiujmej ke timonamiktijkej, Eunice momikilij porin kipiaya cáncer. Itech nochi xiujmej tein kipiak nejon kokolis, itakuaujtamatilis itech neajokuilis kimakak chikaualis. Nikneki maj ejko tonal keman oksepa niuelis nikitas.

 Itech metsti febrero xiuit 2012, niuetsik uan nimotajkoyankokoj. Nikitak ke monekia nikselis nepaleuil, yejua ika ninemito iuan semej nokoneuan uan inamik. Tipouij itech se nechikol itech tajtol ika señas ompa Calgary (Alberta), kampa nitapaleuia kemej tayekankej. Tein melauj axkan yekinika nipoui itech se nechikol itech tajtol ika señas. Komo ijkon, ¿toni nechpaleuij maj niksentokani kuali nimouikani iuan Jiova itech nochi xiujmej keman niyetoya itech se nechikol itech tajtol inglés? Inepaleuil Jiova. Yejuatsin kichiuak tein motenkauak keman kijtoj ke kinyekpias akin amo kipiaj inintatuan (Sal. 10:14). Semi nikintasojkamatilia nochin akin mochikaujkej kijkuiloskej amamej, ueliskej tajtol ika señas uan nechtajtolkepiliskej tamachtilis kemej okachi uelkej.

Kemansa niknekia nimosenkauas, porin amo nikajsikamatia tein moijtouaya oso nikmachiliaya ke amo akin kimatia keniuj kinpaleuiskej akin amo ueli takakij. Ijkuak nitanemiliaya itech tajtolmej tein Pedro kiluij Jesús: “Notekotsin, ¿akoni ok uelis iuan timotokiske para uelis techpaleuijtiyas? Ta, sayo Tejuatsin tikonpia ne tanextililisme ten kualkui ne nemilis nachipa” (Juan 6:66-68). Ijkon kemej miakej tokniuan akin amo ueli takakij uan uejkaujya kitekitilijtokej Jiova, nikajsikamatini ke moneki amo niyolijsiuis uan ke moneki nitakuaujtamatis iuan Jiova uan itech inechikol. Nejon nechtelpaleuiani. Axkan onkak miak tamachtilis itech notajtol, uan ueli nikmati tein motamachtia itech nechikolmej uan uejueyi nechikolmej itech lenguaje de señas americano. Ueli nikyekijtoua ke niyolpakini uan nikseliani miak tatiochiualismej porin niktekitilia Jiova, toueyi Dios.