1. ¿Toni kijtoj Jesús ika netetayokolilmej tein Dios kitemaka?

ONKAK netetayokolilmej tein amo moitaj tein okachi kipiaj ipatiuj. Itech tamachtilis tein Jesús kitemakak itech se tepet, ika tajtoj netetayokolilmej tein Dios kitemaka tein okachi kipiaj ipatiuj ke tomin oso okseki taman. Uan kijtoj: “Kampa yeski yetos nochi in namoricojyo, [...] sayo ompa itech ne moricojyo nanyoltanemilijtoske” (Mat. 6:19-21). Tein tikpatiuitaskej yejua tein tiknekiskej tiktemoskej. Tiksentiliaj ‘toricojyo itech ne eluiyaktsinko’ keman timochikauaj tikchiuaskej tein kiyolpaktia Dios uan tikseliaj itatiochiualis. Ijkon kemej kijtoj Jesús, nion teyi uelis kiixpolos nejin netetayokolilmej uan nion akin uelis techichtekilis.

2. 1) ¿Toni techyolchikaua Pablo maj tikchiuakan itech 2 Corintios 4:17, 18? 2) ¿Toni ika titajtoskej itech nejin tamachtilis?

² Tatitanil Pablo techyolchikaua maj tiksentokakan tikitakan “ten amo tikitstinemij” (xikonixtajtolti 2 Corintios 4:17, 18). Seki taman tein “amo tikitstinemij” yejua tatiochiualismej tein Dios kijtoua ke techmakas itech yankuik taltikpak. Itech nejin tamachtilis ika titajtoskej naui netetayokolilmej tein amo moitaj tein axkan tikpiajya: tokuali uikalis iuan Dios, netataujtil, nepaleuil tein tikseliaj ika yektikatsin espíritu uan nepaleuil tein Jiova, Jesús uan ángeles techmakaj itech tanojnotsalis. Uan no, tikitaskej keniuj tiknextiskej ke tiktasojkamatij nejin netetayokolilmej tein amo moitaj.

3. ¿Katiyejua netetayokolil tein amo moita okachi kipia ipatiuj, uan keyej ueli tikpiaj?

³ Netetayokolil tein amo moita tein okachi kipia ipatiuj yejua  tokuali uikalis iuan Jiova (Sal. 25:14). Sayoj ke ¿keniuj Dios ueli mouika iniuan taltikpakneminij tajtakolejkej uan kisentoka yektik? Porin inemilis Jesús tein kitemakak ‘kinajchiuilia nintajtakoluan de nochi taltikpakuani’ (Juan 1:29). Hasta achto ke Jesús momikiliskia, Jiova kimatia ke iKonetsin amo keman kikauaskia uan ijkon ueliskia kinmakixtis taltikpakneminij. Yejua ika sekin akin nenkej achto ke Cristo momikiliskia uelik kuali mouikakej iuan Dios (Rom. 3:25).

4. Xikonijto inintokay seki itasojikniuan Dios akin nenkej achto ke Jesús momikiliskia.

⁴ Maj ininka titajtokan sekin akin kuali mouikakej iuan Dios oso katkaj itasojikniuan akin nenkej achto ke Jesús momikiliskia. Abrahán semi takuaujtamatik iuan Dios. Panoua mil xiujmej satepan ke momikilijkaya, Jiova kijtoj: “Notasojikniuj Abrahán” (Is. 41:8). Nejin kinextia ke maski se taltikpaknenkej momikilis, Jiova kisentoka kiita kemej itasojikniuj. Tein melauj, Jiova kisentoka kielnamiki Abrahán (Luc. 20:37, 38). Okse yejua Job. Se tonal keman ángeles senyetoyaj, Jiova kinextij ke takuaujtamatia iuan Job keman kijtoj: “Yejua se takat yolmelauak akin kimoujkatoka Dios uan kiixtopeua nochi tein amo kuali” (Job 1:6-8). ¿Uan keniuj kiitaya Daniel, akin kisentokak kitekitilij kemej ochenta xiujmej itech se altepet kampa kinueyichiuayaj tiotsitsin? Keman Daniel semi xiuejya katka, ángeles expa kiluijkej: “Dios semi mitstasojta” (Dan. 9:23; 10:11, 19). Senkis tikmatij ke Jiova kineki maj ejko tonal keman kichiuas maj oksepa nemikan itasojikniuan (Job 14:15).

5. ¿Toni moneki tikchiuaskej uan ijkon kuali timouikaskej iuan Jiova?

⁵ Itech nejin tonalmej, millones taltikpakneminij kuali mouikaj iuan Jiova. Miakej takamej, siuamej uan konemej kinextijtokej ika tein kichiuaj ke kinekij kuali mouikaskej iuan Dios. Biblia kijtoua ke Jiova “semi kuali mouika iniuan akin yolmelaujkej” (Prov. 3:32). Kuali mouikaj iuan Jiova porin takuaujtamatij itech inemilis Jesús tein kitemakak. Nejin techpaleuia maj ueli timotemaktikan iuan Jiova uan maj timoauikan. Keman tikchiuaj nejin, peua timoajsij iniuan millones tokniuan akin motemaktijkejya uan moauijkejya, uan ‘semi kuali mouikaj’ iuan akin okachi ueyichiujkej itech iluikak uan taltikpak.

6. ¿Keniuj ueli tiknextiaj ke timotasojkamatij porin kuali timouikaj iuan Dios?

⁶ ¿Keniuj ueli tiknextiaj ke timotasojkamatij porin kuali timouikaj iuan Dios? Komo tikchiuaj kemej Abrahán uan Job. Yejuan kitekitilijkej Dios panoua cien xiujmej uan amo keman kikaujkej. Tejuan no moneki tikchiuaskej kemej yejuan, maski yankuixtok peuak tiktekitiliaj Jiova oso uejkaujya. No moneki tikchiuaskej kemej Daniel uan okachi tikpatiuitaskej tokuali uikalis iuan Jiova ke tonemilis (Dan. 6:7, 10, 16, 22). Ika inepaleuil Jiova, uelis titaxikoskej keman tikpanoskej tataman ouijkayomej uan tiksentokaskej kuali timouikaskej iuan (Filip. 4:13, TNM).

7. 1) Kemej kijtoua Proverbios 15:8, ¿keniuj kiita Jiova tonetataujtiluan? 2) ¿Keniuj kinankilia Jiova tonetataujtiluan?

⁷ Okse netetayokolil tein amo moita yejua netataujtil. Akin kuali mouikaj kiuelitaj motapouiskej tein kinemiliaj uan tein kimachiliaj. No ijkon panoua keman kuali timouikaj iuan Jiova. Yejuatsin technojnotsa ika iTajtol, uan ompa techmatiltia tein kinemilia uan tein kimachilia. Uan tejuan iuan titajtouaj keman tiktataujtiaj. Ijkuak ueli tiktapouiaj tein tiknemiliaj uan tein tikmachiliaj. Jiova kiuelita kikakis tonetataujtiluan (xikonixtajtolti Proverbios 15:8). Yejuatsin kintasojta itasojikniuan. Yejua  ika, amo sayoj kikaki tonetataujtiluan, ta no technankilia. Kemansa niman technankilia. Sayoj ke kemansa moneki tiksentokaskej tiktataujtiskej. Maski ijkon, uelis titakuaujtamatiskej ke yejuatsin technankilis keman monekis uan kemej okachi techpaleuis. Sayoj ke tein technankilis xa amo yejua tein tikchiayaj. Kemej neskayot, keman tikpanoskej se ouijkayot, xa amo techijkuanilis, ta techmakas tamatilis uan chikaualis tein techpaleuis maj titaxikokan (1 Cor. 10:13, TNM).

8. ¿Keniuj uelis tiknextiskej ke tiktasojkamatiliaj Dios maj ueli tiktataujtikan?

⁸ ¿Keniuj uelis tiknextiskej ke tiktasojkamatiliaj Dios maj ueli tiktataujtikan? Kemej neskayot, keman tikchiuaj nejin tein techyolmajxitia: “Ximotatatautilikan iuan Dios youalitonal” (1 Tes. 5:17). Jiova amo techchikaujkauia maj tiktataujtikan, ta techkaua maj tejuan tikixpejpenakan ox tiktataujtiskej uan techyolchikaua: “Xiksentokakan de nanmotatatautiliske” (Rom. 12:12). Yejua ika, uelis tiknextiliskej Jiova ke timotasojkamatij keman mojmostaj tiktataujtiskej. Uan keman tiktataujtiskej, maj amo tikelkauakan tiktasojkamatiliskej tein toka kichiua uan tikueyitaliskej (Sal. 145:2, 3).

9. 1) ¿Keniuj kiita netataujtil se tokniuj takat akin monotsa Chris? 2) ¿Keniuj tikonita tejuatsin netataujtil?

⁹ Okachi tikpatiuitaskej netataujtil komo uejkaujya tiktekitilijtokej Jiova uan tikitanij keniuj kinankiliani tonetataujtiluan. Maj tikitakan tein kijtoj Chris, se tokniuj takat akin cuarenta y siete xiujmejya kitekitiliani Dios miak tonalmej: “Semi nikuelita nimeuas kualkan uan ijkon uelis niktataujtis Jiova. Semi kualtsin keman se tajtojtok iuan uan tonaltsin peua tauia uan nochi kualtsin moita. Nejin necholinia maj niktasojkamatili Jiova nochi inetetayokoliluan, uan no tatiochiualis tein tikpiaj maj ueli tiktataujtikan. Uan keman tayoua, satepan ke niktataujtia Jiova, kuali nimomachilia keman nimoseuiti”.

10. ¿Keyej moneki tikpatiuitaskej iespíritu Dios?

¹⁰ Okse netetayokolil tein amo moita tein moneki semi tikpatiuitaskej yejua iyektikatsin espíritu  Dios. Jesús techyolchikauak maj tiksentokakan tiktajtanikan Dios iyektikatsin espíritu (Luc. 11:9, 13). Ika iespíritu, Jiova techmaka “chikaukauelilis [tein] ualeutok imako” (2 Cor. 4:7; Hech. 1:8). Iespíritu techpaleuia maj ueli tikxikokan tein yeski ouijkayot tein tikpiaskej.

11. ¿Keniuj uelis techpaleuis yektikatsin espíritu?

¹¹ Yektikatsin espíritu techpaleuia maj kuali tikchiuakan tekimej tein tikseliaj itech itekiyo Dios. Uelis techpaleuis maj okachi kuali tikchiuakan tein ipa tiuelijya. Tein melauj, tikmatij ke amo tejuan tikchiuaj maj kuali kisa tekimej tein tikpiaj itech itekiyo Jiova, ta sayoj iespíritu ueli kichiua maj kuali kisa.

12. Kemej kijtoua Salmo 139:23, 24, ¿toni uelis titajtaniskej itech tonetataujtiluan?

¹² Okse taman kemej tiknextiaj ke tikpatiuitaj yektikatsin espíritu, yejua keman tiktajtaniaj Jiova maj techpaleui maj tikitakan ox tiknemiliaj oso tiknejnekij tein amo kuali (xikonixtajtolti Salmo 139:23, 24). Keman tiktataujtiskej, Jiova uelis techpaleuis ika iespíritu maj tikitakan ox tikpiaj se amo kuali tanemilil oso tanejnekilis. Uan komo tikitaj ke kemaj tikpiaj, maj tiktajtanikan maj iyektikatsin espíritu techmaka chikaualis tein techpaleuis maj timoijkuanilikan nejon amo kuali tanemilil oso tanejnekilis. Ijkon tiknextiskej ke amo tiknekij tikchiuaskej nion teyi tein uelis kichiuas maj yejuatsin amo techpaleuiok ika iespíritu (Efes. 4:30).

13. ¿Keniuj uelis okachi tiktasojkamatiskej yektikatsin espíritu?

¹³ Uelis okachi tiktasojkamatiskej yektikatsin espíritu komo tiknemiliaj keniuj semi tapaleuijtok axkan. Achto ke yaskia iluikak, Jesús kiniluij imomachtijkauan: “Kuak ualas ya namoyolijtik in [y]ektikatsin [e]spíritu, ijkuakon namejuan nankiseliske ichikaualis [...]. Uan no nantetapouijtinemiske de Nejuatsin nonouiyampa de nochi senmanauak” (Hech. 1:8). Yejua nejin tein mochiujtok axkan. Yektikatsin espíritu tapaleuiani maj miakej akin kayomej itech nochi taltikpak, panoua ocho millones uan tajko, kiixtalianij kitekitiliskej Jiova. Uan no, tinochin tiitekitikauan Jiova kuali timouikaj porin yektikatsin espíritu techpaleuia maj tikpiakan kualneskayomej kemej netasojtalis,  yolpakilis, yolseuilis, kualtakayot, yolkualtakayot, takuaujtamatilis, yolnejmachkayot uan no techpaleuia maj amo tiyolijsiuikan uan maj ueli timotsakuilikan (Gál. 5:22, 23). Kemej tikitaj, yektikatsin espíritu se netetayokolil tein semi kipia ipatiuj.

14. ¿Akonimej akin amo tikinitaj techpaleuiaj keman titanojnotsaj?

¹⁴ Tikpiaj okse netetayokolil tein amo moita: titekitiskej iuan Jiova, Jesús uan ángeles (2 Cor. 6:1). Yejuan nochipa techpaleuiaj keman tikinmatiltiaj oksekin tein Biblia tamachtia. Pablo kijtoj ke yejua uan okseki tokniuan tanojnotsanij ‘iuan tekitiaj Dios’ (1 Cor. 3:9, TNM). Keman titanojnotsaj, no titekitij iuan Jesús. Yejua kinnauatij itatojtokakauan: “Xikinnextilikan nochi in taltikpakuani ma yejuan no ma mochiuakan nomomachtijkauan”. Uan maj tikelnamikikan ke satepan kiniluij: “Nejuatsin niyetos nachipa namouan” (Mat. 28:19, 20). ¿Uan keniuj techpaleuiaj ángeles? Semi tiktasojkamatij maj ángeles techixyekanakan keman tikinmatiltiaj “Tajtoltsin de Dios ten kualkui ne nemakixtilis [...] nochi in taltikpakyetoni” (Apoc. 14:6).

15. ¿Toni neskayot tein moajsi itech Biblia kinextia tein Jiova kichiua keman titanojnotsaj?

¹⁵ Keman tikteixmatiltiaj tein kichiuas iTekiuajyo Dios, sekin kinyololinia tein kikakij uan mochiuaj itatojtokakauan Cristo (Mat. 13:18, 23). ¿Akoni kichiua maj pano nejin? Jesús kijtoj: “Amo aken uelis ejkos uan motemaktis nouantsin komo amo achto Notajtsin Dios kinualkuis” (Juan 6:44). Itech Biblia tikajsij se neskayot. Se tonal, Pablo kinnojnotsak seki siuamej akin moajsiaj kalampa itech xolal Filipos. Maj tikitakan tein panok iuan Lidia, semej siuamej akin ompa moajsiaj: “Totajtsin Dios [...] kiyoltapoj para uelis kajsikamatis uan kitakamatis tenika in Pablo kinojnotsaya” (Hech. 16:13-15). Ijkon kemej kichiuak iuan Lidia, Jiova kichiuani maj millones taltikpakneminij motokikan itech ixolal.

16. ¿Akoni moneki tikueyitaliskej keman se taltikpaknenkej techkaki uan kiyololinia tein tikiluiaj?

¹⁶ ¿Akoni moneki tikueyitaliskej keman se taltikpaknenkej techkaki uan kiyololinia tein tikiluiaj? Pablo kinankilij nejin netajtanil keman ika tajtoj nechikol tein moajsia Corinto. Yejua kijtoj: “Nejuatsin nitamachtijtinemik [...]. Uan in tokniu Apolos kachi ok kiajsikamajxitijtiaya notamachtilis [...]. Pero Totajtsin Dios kintaneltoktij in takakini”. Uan no kijtoj: “Naken tanojnotsa ika in Tajtoltsin de Dios uan naken kachi ok kiajsikamajxitijtiaya in takakini, yejuan nojonkes majya amo ueyi tekit kichiutinenke. Ta, sayo Totajtsin Dios [...] kipia uelilis para kinajsikamatiltis ika nintakuautamatilis in taneltokani” (1 Cor. 3:6, 7). Nochipa keman se taltikpaknenkej techkakis uan kiyololinis tein tikiluiskej, moneki tikueyitaliskej Jiova, ijkon kemej kichiuak Pablo.

17. ¿Keniuj uelis tiknextiskej ke tiktasojkamatij tatiochiualis tein tikpiaj maj ueli titekitikan iuan Dios, Cristo uan ángeles?

¹⁷ ¿Keniuj uelis tiknextiskej ke tiktasojkamatij tatiochiualis tein tikpiaj maj ueli titekitikan iuan Dios, Cristo uan ángeles? Keman nochipa tiktemouaj tikintapouiskej oksekin tatiochiualismej tein kiualkuis iTekiuajyo Dios. Uan onkak miak taman kemej uelis tikchiuaskej nejin. Kemej neskayot, uelis titanojnotsaskej kampa miakej panouaj uan kajkalpan (Hech. 20:20). Miakej tokniuan kiuelitaj tanojnotsaskej kampa yeski. Keman kiitaj se taltikpaknenkej akin amo kiixmatij, kitajpalouaj uan kitemouaj iuan tajtoskej. Komo taltikpaknenkej kineki iniuan tajtos, yolik peua ika tajtouaj tein kichiuas iTekiuajyo Dios.

18, 19. 1) ¿Keniuj tiktemouaj okachi tikinpaleuiskej taltikpakneminij? 2) ¿Keniuj kipaleuij Jiova se takat akin momachtijtoya Biblia?

 ¹⁸ Kemej “iuan titekitij Dios”, amo sayoj moneki tikintapouiskej taltikpakneminij tein Biblia kijtoua, ta moneki tiktemoskej okachi tikinpaleuiskej. Keman se taltikpaknenkej kuali techkaki, tiknekij oksepa tikalpanoskej uan tiksentokaskej iuan titajtoskej oso tikiluiskej okse tokniuj maj kikalpano uan maj kitemo kipeualtis se nemachtil ika Biblia. Keman se akin momachtijtok Biblia peua kichiua tein momachtia, techyolpaktia tikitaskej keniuj Jiova kipaleuijtiuj maj kipata kemej tanemilia uan tein kimachilia.

¹⁹ Maj tikitakan tein kichiuak Raphalalani, akin kayot Sudáfrica uan katka se naual. Semi kiuelitaya nochi tein kimachtiayaj ika Biblia. Sayoj ke keman kiixtajtoltij itech iTajtol Dios ke amo kuali yetok maj tiktemokan titajtoskej iniuan tochankauan akin momikilijkejya, ouij kikisak kitakamatis (Deut. 18:10-12). Yolik kikaujtiyajki maj Dios kipaleuiani maj kipata itanemilil. Uan satepan kikauak naualot, maski ika nejon moixpanoltiaya. Axkan kipia 60 xiujmej uan kijtoua: “Semi nikintasojkamatilia itaixpantijkauan Jiova porin semi nechpaleuijkej”. Uan no kijtoua: “Sayoj ke okachi moneki niktasojkamatilis Jiova, akin nechpaleuij maj nikpata miak taman itech nonemilis, uan axkan nimoauijya uan ueli nitanojnotsa kemej se itaixpantijkauj Jiova”.

20. ¿Toni tiknekij tikchiuaskej?

²⁰ Itech nejin tamachtilis ika titajtojkej naui netetayokolilmej tein amo moitaj. Tein okachi kipia ipatiuj yejua maj ueli kuali timouikakan iuan Jiova. Kemej kuali timouikaj iuan, ueli tikpiaj okseki netetayokolilmej tein amo moitaj: ueli tiktataujtiaj, techpaleuia ika iyektikatsin espíritu uan techpaleuia itech tanojnotsalis iuan Jesús uan ángeles. Tiknekij okachi tikpatiuitaskej nejin netetayokolilmej tein amo moitaj. Uan nochipa tiktasojkamatiliskej Jiova porin se totasojikniuj akin nochipa techpaleuia.