1, 2. ¿Toni ouijkayomej kipiaj miakej tokniuan?

TATITANIL Pablo kiyolchikauak Timoteo maj kichiuani nochi tein ueliskia itech tanojnotsalis (2 Tim. 4:5). Tinochin timochikauaj tikchiuaskej tein kiyolmajxitij, sayoj ke kemansa ouij techkisa tikchiuaskej. Miakej tokniuan moneki yeskij semi yolchikaujkej keman tanojnotsaj (2 Tim. 4:2). Kemej neskayot, maj inintech titanemilikan tokniuan akin nemij itech altepemej kampa tekiuanij amo kinkauaj maj kiueyichiuakan Dios. Yejuan kiteixmatiltiaj iTajtol Dios maski kimatij ke uelis kintsakuaskej.

² Itekitikauan Jiova kipanouaj miak ouijkayomej tein ueliskia kichiuas maj kinekikan mosenkauaskej. Kemej neskayot, miakej semi tekitij, uan maski ijkon, sayoj ueli kinmakaj ininchankauan tein okachi moneki. Kiuelitaskiaj okachi tanojnotsaskej, sayoj ke itamian semana semi sioujtokej. Oksekin amo ueli semi tanojnotsaj porin mokokouaj oso xiuejkejya; sekin xa hasta nion ueli kisaj. Uan no, seki tokniuan kinemiliaj ke Jiova amo kinpatiuita. Se tokniuj siuat akin monotsa Mary * kijtoua: “Keman niknemilia ke Jiova amo nechpatiuita, moneki nimochikauas amo ijkon nitanemilis uan nejon kichiua maj amo nikpiaok chikaualis. Satepan amo kuali nimomachilia porin nejon kichiua maj amo nikpiaok tiempo nion chikaualis tein nikuiskia itech tanojnotsalis”.

3. ¿Toni tikitaskej itech nejin tamachtilis?

³ Maski tein yeski ouijkayot tikpiaskej, Jiova techmakas chikaualis tein techpaleuis maj titaxikokan uan maj tiksentokakan timochikauakan tiktekitiliskej. Itech nejin tamachtilis tikitaskej keniuj techpaleuia Jiova. Sayoj ke achto maj tikitakan keniuj  kinpaleuij Pablo uan Timoteo maski kipiayaj ouijkayomej.

4. ¿Toni ouijkayomej kipiak Pablo?

⁴ Pablo kipiak miak ouijkayomej. Okachiok monekik maj Jiova kimakani chikaualis keman kiuijuitekkej, keman kitetenkej uan keman kitsakkej (2 Cor. 11:23-25). Amo pinauak kijtos ke kemansa monekik mochikauas amo mosenkauas (Rom. 7:18, 19, 24). Uan no, kipiaya se ouijkayot tein kijtoj ke ‘keme yeskia se uitsti kalakiskia itech inakayo’, uan semi kitataujtiaya Dios maj kiajchiuiliani (2 Cor. 12:7, 8).

5. ¿Toni kichiuak Pablo maski kipiaya ouijkayomej?

⁵ Jiova kimakak Pablo chikaualis tein kipaleuij maj kisentokani tanojnotsani maski kipiaya ouijkayomej. Maj tiknemilikan nochi tein kichiuak Pablo. Kemej neskayot, keman tsaktoya itech se kali ompa Roma kinnojnotsak miakej taltikpakneminij, xa hasta seki tekiuanij (Hech. 28:17; Filip. 4:21, 22). No kinnojnotsak tateuianij romanos uan nochin akin kikalpanouayaj (Hech. 28:30, 31; Filip. 1:13). No ijkuak Dios kichiuak maj kijkuilouani seki amamej tein kinpaleuij tokniuan itech nejon tonalmej uan tein no techpaleuia tejuan. Uan ineskayo kinyolchikauak tokniuan akin nemiaj Roma porin kiteixmatiltijkej “in Tajtoltsin de Dios [...] amo ika moukayot” (Filip. 1:14). Maski amo nochipa uelik kichiuak nochi tein kinekia, nochipa kichiuak tein uelik uan kijtoj ke tein kipanotoya tapaleuiaya maj moteixmatilti iTajtol Dios (Filip. 1:12).

6. Kemej kijtoua 2 Corintios 12:9, 10, ¿toni kipaleuij Pablo maj kisentokani tanojnotsani?

⁶ Pablo kimatia ke nochi tein kichiuaya itech itekiyo Jiova amo kichiuaya ika yejua ichikaualis, ta kimatia ke yejuatsin kipaleuiaya. Yejua ika kijkuiloj ke ichikaualis Dios “moueyinextia [...] kuak in tagat kiyolmachilia yolkuetauilis” (xikonixtajtolti 2 Corintios 12:9, 10). Ika iyektikatsin espíritu, Jiova kimakak Pablo chikaualis tein kipaleuij maj kisentokani tanojnotsani maski kitajyouiltiayaj, maski kitsakkaj uan maski kipiaya okseki ouijkayomej.

7. ¿Toni ouijkayomej kipiak Timoteo?

⁷ Dios no kimakak chikaualis Timoteo tein kipaleuij maj kisentokani tanojnotsani. Kemej neskayot, iuan yajtinemik Pablo keman  tanojnotsato itech miak xolalmej. Uan no, Pablo kemansa kititanik maj kinkalpanoti uan maj kinyolchikauati tokniuan itech seki nechikolmej (1 Cor. 4:17). Timoteo xa kinemilij ke nejon tekit amo yejua kinamikia kichiuas. Xa yejua ika Pablo kiluij: “Amo ximotekauili ke ma senme mitsmouispolokan porin kitaske ke tejua titelpoch ok” (1 Tim. 4:12). Uan itech nejon tonalmej Timoteo no kipiaya okse ouijkayot, porin Biblia kijtoua ke aachka mokokouaya (1 Tim. 5:23). Sayoj ke Timoteo kimatia ke Jiova kimakaskia chikaualis ika iyektikatsin espíritu tein kipaleuiskia maj kisentokani tanojnotsani uan maj kinpaleuiani tokniuan (2 Tim. 1:7).

8. ¿Toni techmaka Jiova tein techpaleuia maj tikpiakan chikaualis?

⁸ Axkan Jiova techmaka “chikaukauelilis” tein techpaleuia maj tiksentokakan tiktekitilikan (2 Cor. 4:7). Maj tikitakan naui taman tein Jiova techmaka tein techpaleuia maj tikpiakan chikaualis uan maj tiksentokakan tiktekitilikan: netataujtil, Biblia, tokniuan uan tanojnotsalis.

9. ¿Keniuj techpaleuia netataujtil?

⁹ Netataujtil. Itech Efesios 6:18, Pablo kijtoj: “Ximotatatautilikan iuan Dios youalitonal”. Komo tikchiuaj, Dios techmakas chikaualis. Jonnie, se tokniuj takat akin nemi Bolivia, kiitak ke Jiova kipaleuij keman kipanok miak ouijkayomej. Itatuan uan inamik senkokolispeujkej. Ouij kikisaya kinyekpias. Imomaj momikilij, uan ipopaj uan inamik amo niman pajtikej. Jonnie kielnamiki: “Keman semi nimotekipachouaya, nochipa nechpaleuiaya niktataujtis Jiova uan nikiluis keniuj nimomachiliaya”. Jiova kipaleuij maj taxiko. No ompa Bolivia, se tokniuj tayekankej akin monotsa Ronald kimatik ke imomaj kipiaya cáncer, uan se metsti satepan momikilij. ¿Toni kipaleuiani maj taxiko? Yejua kijtoua: “Keman niktataujtia Jiova nikiluia keniuj nimomachilia. Nikmati ke yejuatsin okachi nechajsikamati ke oksekin, hasta okachi ke nejua”. Kemansa xa tikmachiliaj ke amo titaxikouajok oso ke amo tikmatij toni tikiluiskej Jiova, sayoj ke yejuatsin techyoleua maj iuan titajtokan maski ouij techkisa tikiluiskej tein tikmachiliaj (Rom. 8:26, 27).

10. Kemej kijtoua Hebreos 4:12, ¿keyej moneki tikixtajtoltiskej Biblia uan itech titanemiliskej?

¹⁰ Biblia. Pablo kiixtajtoltiaya iTajtol Dios porin kipaleuiaya maj kipia chikaualis uan kiyolseuiaya, uan tejuan no techpaleuis komo tikchiuaj nejon (Rom. 15:4). Keman tikixtajtoltiaj se tajkuilol uan itech titanemiliaj, Jiova uelis techpaleuis ika iespíritu maj tikajsikamatikan keniuj uelis techpaleuis nejon tajkuilol (xikonixtajtolti Hebreos 4:12). Ronald, akin ika titajtojkej itech párrafo 9, kijtoua: “Niyolpaki porin nikixtalij nikixtajtoltis Biblia mojmostaj youak. Semi itech nitanemilia ikualneskayouan Jiova uan itech netasojtalis tein kinnextilia itekitikauan. Nejin nechpaleuia maj oksepa nikpia chikaualis”.

11. ¿Keniuj Biblia kipaleuij se tokniuj siuat akin tajyouijtoya?

¹¹ Titanemiliskej itech iTajtol Dios techpaleuia maj amo sayoj itech titanemilijtokan ouijkayomej tein tikpiaj. Maj tikitakan tein kipanok se tokniuj siuat akin momikilij inamik. Se tokniuj tayekankej kiyolmajxitij maj kiixtajtoltiani amatajkuilol Job uan kiluij ke nejon kipaleuiskia. Keman kiixtajtoltij, yekinika amo kuali kiitak kemej tanemiliaya Job, uan kemej yeskia kiluiaya: “Job, ¡amo sayoj itech xitanemilijto mokuejmoluan!”. Sayoj ke  satepan kiitak ke yejua no ijkon tanemiliaya. Nejon kipaleuij maj kipatani itanemilil uan kimakak chikaualis tein kipaleuij maj kixiko tayokol tein kimachiliaya.

12. ¿Keniuj techmaka chikaualis Jiova inintechkopa tokniuan?

¹² Tokniuan. Jiova no techmaka chikaualis inintechkopa tokniuan. Pablo kijkuiloj ke kinekia kinitas tokniuan porin kinekia maj kiyolchikauakan uan yejua no kinekia kinyolchikauas (Rom. 1:11, 12). Mary, akin ika titajtojkej itech párrafo 2, semi kiuelita yetos iniuan okseki tokniuan. Yejua kijtoua: “Jiova nechpaleuiani inintechkopa tokniuan takamej uan siuamej akin nion kimatiaj ke teisa nikpanotoya. Kijtojkej teisa tein nechyolchikauak oso nechtitanilijkej se amat, uan nejon semi nechpaleuij. No nechpaleuia nitajtos iniuan tokniuan siuamej akin kipanokej tein nejua nikpanotok uan nikchiuas tein yejuan kichiujkej. Uan tokniuan tayekananij nochipa kichiuaj maj nikmachili ke tokniuan itech nechikol nechtasojtaj”.

13. ¿Keniuj uelis timoyolchikauaskej iniuan tokniuan itech nechikolmej?

¹³ Itech nechikolmej uelis timoyolchikauaskej iniuan tokniuan. Keman ompa tietokej, uelis tikinyolchikauaskej oksekin keman tikiniluiskej ke tikintasojtaj uan ke tiktasojkamatij tein kichiuaj. Kemej neskayot, achto ke peuaskia se nechikol, se tokniuj tayekankej akin monotsa Peter kiluij se tokniuj siuat akin inamik amo itaixpantijkauj Jiova: “Semi techyolchikaua nikan timitsonitaskej. Chikuasen mokoneuan nochipa kualtsin moitaj uan nochipa nikan yetokej, uan kimatijya toni tanankiliskej”. Tokniuj siuat chokak porin semi motasojkamatik uan kinankilij: “Axkan yekmelauj monekia nikakis seki tajtolmej kemej nejon”.

14. ¿Keniuj techpaleuia tanojnotsalis?

¹⁴ Tanojnotsalis. Keman tikteixmatiltiaj iTajtol Dios techpaleuia maj kuali timomachilikan uan techyolchikaua, maski taltikpakneminij techkakiskej oso amo (Prov. 11:25). Se tokniuj siuat akin monotsa Stacy kiitak ke melauak nejin. Keman se ichankauj kikalankixtijkej itech nechikol, semi motayokoltij. Nochipa motajtaniaya ox amo semi kipaleuij maj amo kikauani Jiova. Sayoj itech tanemilijtoya nejon. ¿Toni kipaleuij maj okachi kuali momachiliani? Tanojnotsalis kipaleuij, porin okachi itech tanemiliaya keniuj ueliskia kinpaleuis akin kinnojnotsaya. Yejua kijtoua: “Ijkuak, Jiova nechpaleuij maj peuani nikmachtiani ika Biblia se siuat akin niman peuak kichiua tein momachtiaya, uan nejon semi nechyolchikauak. Nikteixmatiltis iTajtol Dios semi nechpaleuia”.

15. ¿Toni techmachtia tein kijtoj Mary?

¹⁵ Ika tein seki tokniuan kipanotokej xa kinemiliaj ke amo ueli semi tapaleuiaj itech tanojnotsalis. Komo ijkon timomachiliaj, maj tikelnamikikan ke Jiova yolpakis komo timochikauaj tikchiuaskej tein tiueliskej. Keman Mary, akin ika titajtojkej achto, panok itech se nechikol kampa motajtoua okse tajtol kinemiliaya ke amo semi tapaleuiaya. Mary kijtoua: “Yekinika, sayoj uelia nitanankiliaya itech nechikol teisa tein amo ouij oso nikixtajtoltiaya se tajkuilol itech Biblia, uan itech tanojnotsalis sayoj uelia nitemakaya se tratado”. Kinemiliaya ke okachi tapaleuiayaj akin ueliaj nejon tajtol. Sayoj ke kipatak kemej tanemiliaya, porin kiajsikamatik ke Jiova ueliskia kichiuas maj tapaleui maski amo semi uelia nejon tajtol. Kijtoua: “Tein Biblia tamachtia amo ouij se kiajsikamati, uan uelis kipatas ininnemilis taltikpakneminij”.

16. ¿Toni kinpaleuis maj kipiakan chikaualis akin amo ueli kisaj?

 ¹⁶ Sekin amo ueli tikisaj porin timokokouaj oso porin tixiuejkejya, maski ijkon Jiova kimati ke tiknekij titapaleuiskej itech tanojnotsalis. Yejuatsin uelis kichiuas maj ueli tikinnojnotsakan akin techyekpiatij tochan oso tapajtianij. Komo tiknemiliaj ke achto okachi uelia titanojnotsayaj, xa timotayokoltiskej. Sayoj ke komo tikitaj keniuj techpaleuijtok Jiova, tikpiaskej chikaualis tein techpaleuis maj tikxikokan tein yeski ouijkayot uan maj tiksentokakan tiyolpakikan.

17. Kemej kijtoua Eclesiastés 11:6, ¿keyej moneki tiksentokaskej titanojnotsaskej maski amo niman tikitaskej maj tapaleui tein tikteixmatiltiaj?

¹⁷ Keman titanojnotsaj amo tikmatij akoni uelis kipaleuis tein tikteixmatiltiaj uan kiixtalis kitekitilis Dios (xikonixtajtolti Eclesiastés 11:6). Kemej neskayot, Barbara, se tokniuj siuat akin kipia panoua 80 xiujmej nochipa tanojnotsa ika teléfono uan carta. Itech se carta tein yaya kititaniti, no kikalakij amaix Tanejmachtijkej 1 metsti marzo, 2014, tein kipia se tamachtilis tein motokaytia “¿Toni kichiuani Dios tein ika mitsonpaleuia?”. Maski amo kimatia, kintitanilij nejon carta se takat uan inamik akin achto katkaj itaixpantijkauan Jiova. Yejuan miakpa kiixtajtoltijkej amaix Tanejmachtijkej. Takat kimachilij kemej yeskia Jiova yejua kinojnotstoya. Maski kikaujkaj Jiova panoua 27 xiujmejya, oksepa peuak youij nechikolmej uan satepan oksepa mochiujkej itaixpantijkauan Jiova. Barbara semi kiyolchikauak kiitas ke carta tein kijkuilojka semi tapaleuij.

18. ¿Keniuj uelis tikseliskej chikaualis tein Jiova kitemaka?

¹⁸ Jiova techmaka miak taman tein ika techpaleuia maj tikpiakan chikaualis, kemej netataujtil, Biblia, tokniuan uan tanojnotsalis. Keman tikuij nochi tein techmaka tiknextiaj ke titakuaujtamatij ke yejuatsin uelis techpaleuis uan ke kineki kichiuas. Yejua ika, maj nochipa tiktemokan inepaleuil toTajtsin Jiova, porin yejuatsin “kineki kinpaleuis akin kitekitiliaj ika nochi ininyolo” (2 Crón. 16:9).