1. ¿Toni uelis panos keman peua tikintapouiaj oksekin tein timomachtijtokej itech Biblia?

¿TIKONELNAMIKI keniuj tionmomachilij keman tikonajsikamatik ke tein tionmomachtijtoya itech Biblia katka tein melauak? Tikonnemiliaya ke tein tamachtia Biblia amo ouij tekisa se kiajsikamatis uan ke oksekin no kiuelitaskiaj kiixmatiskej. Tikonmatia ke tein Biblia tamachtia kinpaleuiskia maj yolpakikan uan kichiaskiaj kuali nemiskej satepan (Sal. 119:105). Yejua ika peuak tikontapouia tein tionmomachtijtoya akin kuali iniuan tionmouikaya uan mochankauan. Sayoj ke semi tionmotayokoltij keman miakej amo kinekkej mitsonkakiskej.

2, 3. ¿Keniuj kiitayaj Jesús uan tein kiteixmatiltiaya miakej taltikpakneminij?

² Maj amo tikmoujkaitakan komo sekin amo kinekij kikakiskej tein tikteixmatiltiaj. Keman Jesús yetoya nikan taltikpak kichiuak miak taman tein kinextiaya ke Jiova kipaleuijtoya, sayoj ke miakej kiixtopeujkej. Kemej neskayot, kichiuak maj Lázaro oksepa nemini. Hasta akin kitauelitayaj kiitakej ke kichiuak nejon. Maski ijkon, taixyekananij itech taneltokalis amo kinekkej kineltokaskej ke yejua katka Mesías. Hasta kinekiaj kimiktiskej yejua uan Lázaro (Juan 11:47, 48, 53; 12:9-11).

³ Jesús kimatia ke miakej amo kineltokaskiaj ke yejua katka Mesías (Juan 5:39-44). Miakej imomachtijkauan Juan Taauijkej kiniluij: “Tatiochiual ya nochi naken amo kitauelkakij uan amo no moyolxokoliaj ok kuak kikakij notajtoluan” (Mat. 11:2, 3, 6). ¿Keyej miakej kiixtopeujkej Jesús?

4. ¿Toni tikitaskej itech nejin tamachtilis?

⁴ Itech nejin tamachtilis uan itech okse tikitaskej keyej itech yekinika siglo miakej kiixtopeujkej Jesús. No tikitaskej keyej axkan miakej amo kinekij kikakiskej tein tikteixmatiltiaj. Uan  tein okachi moneki, tikitaskej toni techpaleuis maj titakuaujtamatikan iuan Jesús uan maj amo tikauakan.

5. ¿Keyej sekin amo kineltokayaj ke Jesús katka Mesías?

⁵ Maski miakej taltikpakneminij kimatiaj ke Jesús katka se kuali tamachtijkej uan ke kichiuaya uejueyi tachiualismej, kiixtopeujkej porin sayoj kiitakej ke katka iokichpil se koujxijxinkej. Uan no, katka kayot Nazaret. Miakej kinemiliayaj ke akin ompa nemiaj amo teyi chiuanimej katkaj. Hasta Natanael, akin satepan mochiuak imomachtijkauj Jesús, kijtojka: “¿Xe timoyolilia ke uelis ma aksa kisa yolkuali tech ne pueblo de Nazaret?” (Juan 1:46). ¿Keyej kijtoj nejon? Xa amo kiuelitaya xolal kampa Jesús nemia oso xa itech tanemilijtoya tein moijtojka itech Miqueas 5:2, ke Jesús yoliskia Belén, uan amo Nazaret.

6. ¿Toni monekia kichiuaskej akin amo kineltokakej ke Jesús katka Mesías?

⁶ ¿Toni kijtoua Biblia? Tanauatijkej Isaías kijtojka ke akin kitauelitaskiaj Jesús amo kitemoskiaj kimatiskej itech katiyejua xolal uan itech katiyejua kalyetouanij ualeuaskia Mesías (Is. 53:8; nota). Miak taman achtoya moijtojka. Komo kitemoskiaj kimatiskej kani ualeuaya Jesús, kimatiskiaj ke yolka Belén uan ke katka ichankauj tekiuaj David (Luc. 2:4-7). Ijkon kemej moijtojka itech Miqueas 5:2 Jesús kemaj yolik Belén. Komo ijkon, ¿keyej amo kineltokakej ke katka Mesías? Porin kemej miak taman amo kimatiaj, niman kinemilijkej ke Jesús amo katka Mesías uan kiixtopeujkej.

7. ¿Keyej miakej kinixtopeuaj itaixpantijkauan Jiova?

⁷ ¿No ijkon panoua axkan? Kemaj. Miakej tiitekitikauan Jiova amo titominpiaj nion tiueyichiuanimej. Yejua ika miakej kijtouaj ke amo tikpiaj nemachtil uan amo kuali techitaj (Hech. 4:13). Kijtouaj ke amo monekiskia titamachtiskej ika Biblia porin amo tiajkaj uejueyi kaltamachtiloyamej kampa kinmachtiaj akin tamachtiaj ika Biblia. Oksekin kijtouaj ke itaixpantijkauan Jiova se taneltokalis tein moajsi Estados Unidos, maski tein melauj miakej itaixpantijkauan Jiova amo ompa nemij. Sekin kintapouianij ke amo tikneltokaj Jesús. Miak xiujmejya taltikpakneminij techijtouilianij ke “amo tiyolkualmej”, ke “tikinxelouaj kalyetouanij” uan ke “tikejkepaj tein kijtoua Biblia”. Yejua ika miakej techixtopeuaj uan amo kinekij mochiuaskej itaixpantijkauan Jiova porin amo techixmatij uan kineltokaj tein kitekakiliaj.

8. Kemej kijtoua Hechos 17:11, ¿toni moneki tikonchiuas komo tikonneki tikonmatis akonimej itekitikauan Dios axkan?

⁸ ¿Toni mitsonpaleuis amo xikonkaua tein tionmomachtia? Semi mitsonpaleuis komo kuali tionmomachtia. Yejua nejon tein mochikauak kichiuas Lucas keman yaya kijkuiloti amatajkuilol tein kipia itokay. Yejua kijtoj: “Nejua nikyektatemolijtiuits ya ika nejmach nochi nijin chiualis de Cristo”. Kinekia maj akin kiixtajtoltiskiaj iamatajkuilol kiitanij “ke nochi melau” tein kikakkaj ke kichiujka Jesús (Luc. 1:1-4). Judíos akin nemiaj Berea no kichiujkej kemej Lucas. Keman yekinika kintapouijkej akoni katka Jesús, momachtijkej tein kijtoua Escrituras Hebreas porin kinekiaj kimatiskej ox melauak katka tein kiniluiayaj (xikonixtajtolti Hechos 17:11). Tejuatsin no moneki tikonchiuas kemej yejuan. Xikontemo itech Biblia ox melauak tein mitsonmachtiaj itaixpantijkauan Jiova. No kuali yeskia xionmomachti tein kichiuanij. Komo kuali timomachtiaj, amo tikinchikoitaskej itaixpantijkauan Jiova nion tikneltokaskej tein kinijtouiliaj.

9. ¿Toni kichiujkej seki taltikpakneminij keman Jesús amo kinekik kichiuas se ueyi tachiualis?

⁹ Maski Jesús semi kuali tamachtiaya, seki taltikpakneminij kinekiaj maj kichiuani okseki taman. Kiluijkej “ma kinnextiliani se mouiskanexkuitil den ne eluiyaktsinko” tein ika kinextiskia ke katka Mesías (Mat. 16:1). Xa kiluijkej maj kichiuani nejon porin amo kuali kiajsikamatkaj tein kijtoua Daniel 7:13, 14. Sayoj ke Jiova ayamo kiixtalijka maj mochiuani tein kijtouaj nejon tajkuilolmej. Tein Jesús tamachtiaya monekia kinpaleuis maj kineltokanij ke yejua katka Mesías. Sayoj ke kemej amo kichiuak tein kitajtanijkej, kiixtopeujkej (Mat. 16:4).

10. ¿Keniuj kichiuak Jesús tein Isaías kijtojka?

¹⁰ ¿Toni kijtoua Biblia? Keman ika tajtoj Mesías, Isaías kijtoj: “Amo tsajtsis nion chikauak tajtos, amo kakistis itech ojti” (Is. 42:1, 2). Itech itanojnotsalis, Jesús amo kitemoj maj kiueyitalianij. Amo kinchijchiuak templos tein semi kualtsin moitayaj, amo motalilij tilmaj nion motalilij se tokayit tein kiixnextiskia kemej se itekitikauj Dios. Keman kiuikakej iixpan tekiuaj Herodes, amo kinekik kichiuas se ueyi tachiualis uan ika kitemos maj kuali kiitani maski ueliskia kimiktiskej (Luc. 23:8-11). Maski itech itanojnotsalis kichiuak seki uejueyi tachiualismej, okachi kitayekanaltij kiteixmatiltis iTekiuajyo Dios. Kiniluij imomachtijkauan: “Yejika Nejuatsin niuala” (Mar. 1:38).

11. ¿Toni kitemouaj kiitaskej itech taneltokalismej seki taltikpakneminij?

¹¹ ¿No ijkon panoua axkan? Kemaj. Miakej semi kiuelitaj uejueyi tiopamej tein kipia miak taman tein semi patiyoj. Semi kiuelkakij tokaymej tein ika kinixmatij taixyekananij itech taneltokalismej uan no semi kiuelitaj tein mochiua itech nejon taneltokalismej maski peuak kichiuaj akin amo katkaj itatojtokakauan Cristo. Akin ompa mosentiliaj amo semi kinpaleuiaj maj kiixmatikan Dios uan tein kiixtalijtok kichiuas. Sayoj ke akin youij tonechikoluan momachtiaj toni kineki Jiova maj tikchiuakan uan keniuj uelis tikchiuaskej tein kiyolpaktia. Uan no, Kalmej kampa tiMosentiliaj  semi tapaleuiaj uan chipaujkej maski amo kipiaj miak taman tein patiyoj. Akin taixyekanaj itech tonechikoluan amo kikuij taken nion tokaymej tein kinextis ke yejuan taixyekanaj. Uan tein titamachtiaj uan tein tikneltokaj kisa itech iTajtol Dios. Maski ijkon, miakej amo kinekij kikakiskej tein tikteixmatiltiaj porin kinemiliaj ke amo kualtsin kemej tikueyichiuaj Dios uan porin tein titamachtiaj amo yejua tein kinekij kikakiskej.

12. Kemej kijtoua Hebreos 11:1, 6, ¿toni moneki tikchiuaskej tein techpaleuis maj titakuaujtamatikan?

¹² ¿Toni mitsonpaleuis amo xikonkaua tein tionmomachtia? Tatitanil Pablo kiniluij tokniuan akin nemiaj Roma: “Moneki ma se kiyekakili in tanojnotsalis de Cristo para ijkon uelis ya se takuautamatis” (Rom. 10:17). Mochikauas totakuaujtamatilis komo timomachtiaj iTajtol Dios, amo komo tikchiuaj tein momattokej kichiuaskej itech seki taneltokalismej, tein maski tiknemiliskej ke semi kualtsin itech Biblia amo moijtoua ke moneki se kichiuas. Moneki tikchikauaskej totakuaujtamatilis ika tein timomachtiaj itech Biblia, porin “komo se aksa amo takuautamatinemis iuan Dios, ijkuakon amo uelis kiyolpaktijtinemis” (xikonixtajtolti Hebreos 11:1, 6). Yejua ika, komo tiknekij tikneltokaskej ke tein timomachtijtokej yejua tein melauak, amo moneki tikitaskej uejueyi tachiualismej, ta sayoj moneki kuali timomachtiskej Biblia. Nejon techpaleuis maj mochikaua totakuaujtamatilis uan maj tikneltokakan ke tein timomachtiaj yejua tein melauak.

13. ¿Keyej miakej kiixtopeujkej Jesús?

¹³ Imomachtijkauan Juan Taauijkej kimoujkaitakej maj imomachtijkauan Jesús amo kiixtalianij amo takuaskej seki tonalmej. Jesús kiniluij ke amo onkaya keyej kichiuaskej nejon porin yejua yoltoyaok (Mat. 9:14-17). Maski ijkon, fariseos uan oksekin akin kitauelitayaj Jesús kiixtopeujkej porin yejua amo kichiuaya tein yejuan momattoyaj kichiuaskej. Semi kualankej keman kiitakej ke kinpajtiaya itech tonal sábado akin mokokouayaj (Mar. 3:1-6;  Juan 9:16). Yejuan moueyimatiaj porin kitakamatiaj tanauatil tein kijtouaya maj amo teyi kichiuanij itech tonal sábado, sayoj ke amo kiitayaj ke amo kuali yetoya maj taltikpakneminij tanamakanij itech templo, uan kualankej keman Jesús kiniluij ke amo kuali tein kichiujtoyaj (Mat. 21:12, 13, 15). Uan no, keman Jesús tamachtij itech sinagoga tein moajsia Nazaret, akin kikakkej semi kualankej porin kijtoj seki taman tein panoka itech xolal Israel uan ika kinextij ke yejuan sayoj kitayekanaltiayaj inintanejnekilis uan ke amo takuaujtamatiaj (Luc. 4:16, 25-30). Miakej kiixtopeujkej Jesús porin amo kichiuak tein kinemiliayaj ke kichiuaskia (Mat. 11:16-19).

14. ¿Keyej Jesús kinextij ke amo kuali katka tein taltikpakneminij momattoyaj kichiuaskej?

¹⁴ ¿Toni kijtoua Biblia? Itenkopa tanauatijkej Isaías, Jiova kijtoj: “Nejin xolal motokia nouan sayoj ika tajtol uan nechueyitalia sayoj ika itenoj, sayoj ke iyolo semi uejka yetok, uan nechmoujkatoka ika inintanauatiluan takamej, tanauatilmej tein yejuan kinmachtianij” (Is. 29:13). Semi kuali maj Jesús kinextiani ke tein taltikpakneminij momattoyaj kichiuaskej amo kuali katka porin amo mouika ika tein iTajtol Dios kijtoua. Akin okachi kitayekanaltiayaj kitakamatiskej tanauatilmej uan tachiualismej tein taltikpakneminij kiixtalijkaj ke tein Biblia tamachtia, kiixtopeujkej Jiova uan Mesías akin kiualtitanka.

15. ¿Keyej kualanij iniuan itaixpantijkauan Jiova miakej taltikpakneminij?

¹⁵ ¿No ijkon panoua axkan? Kemaj. Miakej kualanij porin tiitaixpantijkauan Jiova amo tikchiuaj iluimej tein kitapanauiliaj tein Biblia kijtoua, kemej ijkuak se xiuajsi oso Navidad. Oksekin kualanij porin amo tiiluichiuaj keman kiiluichiuiliaj toaltepeuj nion tikchiuaj seki taman tein yejuan momattokej kichiuaskej keman momikilia se taltikpaknenkej. Nejin taltikpakneminij xa kinemiliaj ke Dios kiyolpaktia tein kichiuaj. Sayoj ke amo uelis kiyolpaktiskej komo kisentokaj kichiuaj tein ipa momattokej uan amo tein Biblia tamachtia (Mar. 7:7-9).

16. ¿Toni moneki tikchiuaskej uan toni amo? (Salmo 119:97, 113, 163-165).

¹⁶ ¿Toni mitsonpaleuis amo xikonkaua tein tionmomachtia? Komo tikonpatiuita itanauatiluan Jiova uan tein tayolmajxitia (xikonixtajtolti Salmo 119:97, 113, 163-165). Komo tikontasojta Jiova, amo tikonchiuas nion teyi tein yejuatsin amo kiyolpaktia, ta okachi tikontasojtas Jiova ke okseki taman.

17. ¿Toni kichiayaj miakej taltikpakneminij maj kichiuani Mesías?

¹⁷ Itech itonaluan Jesús, sekin kinekiaj kinpataskej akin kinixyekanayaj. Kichiayaj maj Mesías kichiuani maj romanos amo kinixyekananijok. Sayoj ke keman kinekiaj kiixtaliskej Jesús kemej inintekiuaj, yejua amo kinekik (Juan 6:14, 15). Tiopixkamej uan oksekin kimouiliayaj maj Jesús kichiuani maj taltikpakneminij kinixnamikinij tekiuanij romanos, porin nejon kichiuaskia maj kualaninij uan kinkuiliskiaj tiopixkamej tanauatil tein kinmakakaj. Kemej Jesús amo kinekik mokalakis itech nochi nejin taman, miakej judíos kiixtopeujkej.

18. ¿Toni tein moijtojka ke kichiuaskia Mesías amo kiitayaj miakej judíos?

¹⁸ ¿Toni kijtoua Biblia? Melauj ke moijtojka ke Mesías tateuiskia itech se neteuilis uan ke tataniskia, sayoj ke no moijtojka ke achto monekia toka momikilis porin titajtakolejkej (Is. 53:9, 12). Komo ijkon, ¿keyej miakej kinemiliayaj ke Mesías ijkuak kichiuaskia miak taman? Porin sayoj kiitayaj tajkuilolmej tein ika tajtouayaj ke moyektaliskia ininkuejmoluan, uan  amo kiitayaj okseki taman tein no moijtojka ke mochiuaskia (Juan 6:26, 27).

19. ¿Keyej miakej taltikpakneminij techixtopeuaj?

¹⁹ ¿No ijkon panoua axkan? Kemaj. Miakej taltikpakneminij techixtopeuaj porin amo tikinpaleuiaj tekiuanij nion tikinixnamikij. Kinemiliaj ke keman motatanij akin kinekij mochiuaskej tekiuanij, no monekiskia tikixpejpenaskej se. Sayoj ke tikmatij ke komo tikixpejpenaskiaj se taltikpaknenkej kemej totaixyekankauj, Jiova kiitaskia ke tikixtopeujtokej (1 Sam. 8:4-7). Xa no kinemiliaj ke monekiskia titapaleuiskej maj onka okachi kaltapajtiloyamej uan okachi kaltamachtiloyamej uan no maj tikchiuakan okseki taman tein ika tikinpaleuiskej taltikpakneminij. Techixtopeuaj porin tiktayekanaltiaj tikteixmatiltiskej iTajtol Dios, uan amo tiktemouaj tikyektaliskej kuejmolmej tein onkak nikan taltikpak.

20. Ika tein kijtoj Jesús itech Mateo 7:21-23, ¿toni okachi tayekantok?

²⁰ ¿Toni mitsonpaleuis amo xikonkaua tein tionmomachtia? (Xikonixtajtolti Mateo 7:21-23). Xikonelnamiki ke okachi tayekantok maj tikchiuakan tekit tein Jesús technauatij (Mat. 28:19, 20). Amo xikonkaua maj kuejmolmej tein onkak nikan taltikpak kichiuakan xikontemo tikonyektalis. Tiitaixpantijkauan Jiova tikintasojtaj taltikpakneminij uan ininka timotekipachouaj, sayoj ke tikmatij ke okachi uelis tikinpaleuiskej komo tikinmachtiaj toni kichiuas iTekiuajyo Dios uan komo tikinpaleuiaj maj kuali mouikakan iuan Jiova.

21. ¿Toni moneki tikixtaliskej tikchiuaskej?

²¹ Itech nejin tamachtilis tikitakej naui taman tein kichiuak maj miakej kiixtopeuanij Jesús itech yekinika siglo, uan tein axkan no kichiua maj sekin kinixtopeuakan itatojtokakauan. Itech okse tamachtilis tikitaskej naui tamanok. Maj tinochin tikixtalikan tiksentokaskej titakuaujtamatiskej uan maj amo keman tikixtopeuakan Jesús.