1. ¿Keyej moneki maj Dios techmaka tamatilis? (Proverbios 4:7).

 ¿TIKONIXPEJPENANI se taman tein semi moneki? Kemej tikonmatia ke monekia tamatilis, tikontajtanij Jiova (Sant. 1:5). Tekiuaj Salomón kijkuiloj: “Tamatilis yejua tein okachi moneki” (xikonixtajtolti Proverbios 4:7). Yejua amo ika tajtojtoya tein yeski tamatilis, ta tein kitemaka Jiova (Prov. 2:6). Sayoj ke, ¿uelis techpaleuis tamatilis tein kitemaka Jiova maj tikixnamikikan kuejmolmej tein tikpiaj axkan? Kemaj. Nejin tamachtilis techpaleuis maj tikitakan keniuj.

2. ¿Toni techpaleuis maj yekmelauj timochiuakan tamatinij?

² Komo yekmelauj tiknekij tiyeskij titamatinij, moneki timomachtiskej uan tikchiuaskej tein tamachtijkej ome takamej akin semi tamatinij katkaj. Yekinika ika titajtoskej Salomón. Biblia kijtoua ke “Dios kimakak Salomón miak tamatilis uan kuali taixejekolis” (1 Rey. 4:29). Uan ojpatika, timomachtiskej tein kichiuak Jesús, takat akin okachi tamatkej akin nemini nikan taltikpak (Mat. 12:42). Itech Biblia moijtojka de Jesús: “Uan ichikaualis Jiova itech moajsis. Yejua ika yeski tamatkej, nochi kiajsikamatis” (Is. 11:2).

3. ¿Toni tikitaskej itech nejin tamachtilis?

³ Ika tamatilis tein Dios kinmakak, Salomón uan Jesús tayolmajxitijkej seki taman tein semi moneki tein uelis techpaleuis. Itech nejin tamachtilis ika titajtoskej eyi taman,  ke moneki tikitaskej kemej moneki tomin, tekit uan no timoitaskej kemej moneki.

4. ¿Keniuj nemiaj Salomón uan Jesús?

⁴ Salomón kipiaya miak tomin uan semi takualtsinkan katka kampa nemia (1 Rey. 10:7, 14, 15). Sayoj ke Jesús amo kipiaya miak taman uan nion kipiaya ichan (Mat. 8:20). Maski ijkon, Salomón uan Jesús kiitayaj tomin kemej moneki, porin nochin omen kipiayaj tamatilis tein Jiova kitemaka.

5. ¿Keniuj Salomón kiitaya tomin?

⁵ Salomón kiitak ke tomin “tapaleuia” (Ecl. 7:12). Tomin techpaleuia maj timoixpanoltikan uan kemansa hasta ueli timokouiliaj tein tikuelitaj. Sayoj ke, maski Salomón kipiaya miak tomin, kiajsikamatik ke onkaya okseki taman tein okachi moneki. Kemej neskayot, kijkuiloj: “Okachi kuali maj kuali toka tajtokan ke tikpiaskej miak tomin” (Prov. 22:1). No kiitak ke akin kitasojtaj tomin, amo nochipa yolpakij ika tein kipiaj (Ecl. 5:10, 12). Uan no kijtoj ke maj amo tiknemilikan ke tomin yejua tein okachi moneki, porin axkan uelis tikpiaskej uan satepan amook (Prov. 23:4, 5).

6. ¿Keniuj kiitaya Jesús tein kipiaya? (Mateo 6:31-33).

⁶ Jesús kiitaya kemej monekia tein kipiaya. Kiuelitaya takuas uan tayis (Luc. 19:2, 6, 7). Se tonal, kichiuak maj at mokepani vino tein okachi kuali, nejon yejua yekinika milagro tein kichiuak (Juan 2:10, 11). Uan keman momikilij, kipiaya se taken tein semi patiyoj (Juan 19:23, 24). Sayoj ke amo kitayekanaltiaya kipias miak taman. Kiniluij imomachtijkauan: “Amo aken uelis kintekitilis ome patrones [...]. Amo aken uelis kintekitilis [...] Totajtsin Dios uan in ricojyot” (Mat. 6:24). Jesús tamachtij  ke komo tiktayekanaltiaj iTekiuajyo Dios, Jiova techmakas tein monekis (xikonixtajtolti Mateo 6:31-33).

7. ¿Keniuj kipaleuiani se tokniuj kiitas tomin kemej moneki?

⁷ Miakej tokniuan semi kinpaleuiani keman kiitaj tomin kemej Jiova kijtoua. Maj tikitakan tein kichiuak Daniel, se tokniuj akin amo kipia inamik. Yejua kijtoua: “Keman katka nitelpoch nikixtalij nochipa niktayekanaltis niktekitilis Jiova”. Kemej Daniel amo kitemouani kipias miak taman, ueli tapaleuiani keman mochiuaj tetsaujmej uan Betel. No kijtoua: “Tein melauj, amo keman niknemiliani ke amo kuali yetok tein nikixtalij. Xa niktaniskia miak tomin komo yejua tein nikixtaliskia, sayoj ke amo nimouikaskia iniuan akin axkan kuali nimouika. Uan no, komo nikixtaliskia niktanis tomin, amo niyolpakiskia kemej axkan ke niktekitilia Jiova. Yejuatsin semi nechtatiochiuani”. Nejin kinextia ke semi techpaleuia komo tiktayekanaltiaj tiktekitiliskej Jiova uan amo tiktaniskej miak tomin.

8. ¿Keniuj tikmatij ke Salomón kiitaya tekit kemej moneki? (Eclesiastés 5:18, 19).

⁸ Salomón kijtoj ke “se inetetayokolil Dios” keman se yolpaki porin se tekiti (xikonixtajtolti Eclesiastés 5:18, 19). No kijkuiloj: “Keman chikauak titekitij, techpaleuia” (Prov. 14:23). Yejua kimatia ke melauj nejon, porin yejua semi tekitik. Kinchijchiuak miak kalmej, kitokak uva, kitokak miak xochit, tachijchiuak kampa mosentiliskia at, uan no kinchijchiuak xolalmej (1 Rey. 9:19; Ecl. 2:4-6). Monekik chikauak tekitis. Maski nejon kichiuak maj kuali momachiliani, kimatia ke amo kichiuaskia maj yekmelauj yolpakini. No kichiuak miak taman para Jiova. Kemej neskayot, kiixyekanak tekit keman mochijchiuak templo para kiueyichiuaskej Jiova. Nejin tekit uejkauak chikome xiuit (1 Rey. 6:38; 9:1). Satepan ke kichiuak miak taman, kiitak ke okachi moneki se kitekitilis Jiova. Kijkuiloj: “Tein se kiajsikamati, satepan ke se kitamikaki nochi, yejua nejin: Xikmoujkatoka Dios akin melauak uan xiktakamati itanauatiluan” (Ecl. 12:13).

9. ¿Toni kichiuak Jesús para amo kitayekanaltis tekit?

⁹ Jesús semi kiuelitaya tekitis. Keman katka telpoch, katka koujxijxinkej (Mar. 6:3). Kemej ikalijtik semi miakej katkaj, itatuan xa semi kitasojkamatiaj maj kinpaleuiani. Kemej amo tajtakolej katka, kuali kikisaya nochi tein kichijchiuaya, yejua ika xa semi kitakouiayaj. Jesús xa semi kiyolpaktiaya tekitis. Uan maski semi kuali tekitia, kixelouaya tiempo para kitekitilis Jiova (Juan 7:15). Uan keman tanojnotsaya miak tonalmej, tayolmajxitij: “Amo ximotekitiltikan san sayo ika in takualis ten panoa san. Ta, ximotekitiltikan de ika ne takualis ten namechuejkauas, [...] ten namechmakas ne yek nemilis nachipa” (Juan 6:27). Uan keman tamachtij itech se tepet kijtoj: “Xiksentilikan namoricojyo tech ne eluiyaktsinko” (Mat. 6:20).

10. ¿Toni ueliskia techpanos komo semi kuali titekitij?

¹⁰ Tamatilis tein Jiova techmaka techpaleuia maj tikitakan tekit kemej moneki.  Akin tikchiuaj kemej Cristo techyolmajxitiaj maj chikauak titekitikan uan maj tikchiuakan “se kuali tekit” (Efes. 4:28). Miakpa, akin tikintekitiliaj kiitaj ke amo titakajkayauaj uan ke kuali titekitij, uan xa techiluiskej ke semi kiuelitaj tein tikchiuaj. Yejua ika, xa tiknekiskej okachi titekitiskej uan ijkon akin tiktekitiliaj kuali ininka tajtos itaixpantijkauan Jiova. Sayoj ke komo ijkon tikchiuaskiaj, xa amo ueliskiaok tietoskej iniuan tochankauan nion tiktekitiliskej Jiova. Komo ijkon techpanoskia, monekiskia tikpataskej teisa tein techpaleuis maj tikchiuakan tein okachi moneki.

11. ¿Keniuj kipaleuij William tein kichiuaya se tokniuj tayekankej?

¹¹ Se tokniuj telpoch akin monotsa William kiajsikamatik ke moneki se kiitas tekit kemej kinamiki. Yejua tekitia iuan se tokniuj tayekankej. William kijtoj: “Nejin tokniuj kiita tekit kemej moneki. Semi tekiti uan akin kinchiuilia se tekit semi kiuelitaj kemej kichiua. Sayoj ke keman ajsi hora, kikaua itekiuj para yetos iniuan ichankauan uan kiueyichiuas Jiova. Tein melauj, nikita ke semi yolpaki”. *

12. ¿Keniuj kinextij Salomón ke moitaya kemej monekia, sayoj ke toni kichiuak satepan?

¹² Keman Salomón kuali kitekitilijtoya Jiova, moitaya kemej monekia. Keman katka telpoch uan peuak taixyekana, kimatia ke amo nochi uelia kichiuaya uan kitajtanij Jiova maj kiixyekana (1 Rey. 3:7-9). Uan no, kinextij ke kiajsikamatia ke semi amo kuali maj se moueyimati. Kijkuiloj: “Se moueyinekis kichiuas maj se motelo, uan se moueyimatis kichiuas maj se uetsi” (Prov. 16:18). Sayoj ke satepan kielkauak tein kijtojka. Keman tekiuajtitoyaya seki xiujmej, peuak  moueyimati uan peuak amo kitakamatiok itanauatiluan Dios. Kemej neskayot, tanauatil kijtouaya ke se tekiuaj hebreo amo monekia “kinpias miakej isiuauan, uan ijkon amo kiyolkepaskej” (Deut. 17:17). Salomón amo kitakamatik nejin tanauatil uan monamiktij iniuan 700 siuamej uan kinpiak okseki 300 siuamej, ¡uan miakej kinueyichiuayaj okseki tiotsitsin! (1 Rey. 11:1-3). Xa kinemilij ke amo teyi kipanoskia. Komo kinemilij nejon oso amo, ipa tajyouij porin kikauak Jiova (1 Rey. 11:9-13).

13. ¿Toni techmachtia tein kichiuak Jesús?

¹³ Jesús moitaya kemej monekia uan amo moueyimatik. Achto ke ualaskia nikan taltikpak, kichiuak miak taman tein ika kitekitilij Jiova. Colosenses 1:16, itech Traducción del Nuevo Mundo kijtoua ke “itechkopa, Dios kichijchiuak nochi okseki taman ne iluikak uan nikan taltikpak”. Keman Jesús moauij, xa kielnamikik seki taman tein kichiujka iluikak iuan iTajtsin (Mat. 3:16; Juan 17:5). Sayoj ke maski kielnamikik nochi nejon, amo moueyimatik. Uan amo keman kinextij ke okachi ueyichiujkej katka ke oksekin. Jesús kiniluij imomachtijkauan: “Amo niuala para ma aksame nechtekitilikan. Ta, niuala sayo para ma nitetekitilis, uan para ma niktemakas nonemilis para nikixtauas in tajtakol, uan para nikinmakixtis nijin taltikpakuani” (Mat. 20:28). Jesús kijtoj ke tein kichiuaya amo iselti kinemiliaya (Juan 5:19). ¡Jesús amo moueyimatia! ¿Melauj ke tiknekij tikchiuaskej kemej yejua?

14. ¿Keniuj techpaleuia maj timoitakan kemej moneki tein Jesús kijtoj?

¹⁴ Jesús kinnextilij imomachtijkauan ke monekia moitaskej kemej moneki. Se tonal kiniluij: “Totajtsin Dios kinpoua namotsonuan” (Mat. 10:30). Semi techyolchikaua nejin tajtolmej, okachiok komo tikmachiliaj ke amo teyi tichiuanimej.  Techelnamiktia ke Jiova semi toka motekipachoua uan ke semi techpatiuita. Komo Jiova kiitak ke technamiki maj tiktekitilikan uan maj tinemikan nochipaya itech yankuik taltikpak, amo moneki tiknemiliskej ke amo kuali tein kiixtalia.

15. 1) Ijkon kemej kijtoj La Atalaya, ¿keniuj moneki maj timoitakan? 2) Kemej moita itech taixkopimej itech página 24, ¿toni amo tikpiaskej komo sayoj totech titanemiliaj?

¹⁵ Kemej 15 xiujmej achto, amaix La Atalaya techyolchikauak maj timoitakan kemej moneki. Kijtoj: “Amo tiknekij semi timopatiuitaskej hasta timoueyimatiskej. Sayoj ke amo no moneki tiknemiliskej ke amo teyi tichiuanimej. Ta, okachi kuali maj timoitakan kemej moneki, yejua ika maj tikitakan tein ueli tikchiuaj uan tein amo ueli tikchiuaj. Se tokniuj siuat ijkon kijtoj: ‘Amo nikijtoua ke amo niyolkuali, sayoj ke amo no nikijtoua ke semi niyolkuali. Nikpia kualneskayomej uan no nimopoloua ijkon kemej nochin’”. * Senkis tikitaj ke moneki timoitaskej kemej moneki.

16. ¿Keyej Jiova techyolmajxitia?

¹⁶ Jiova techyolmajxitia ika iTajtol uan kichiua porin techtasojta uan kineki maj tiyolpakikan (Is. 48:17, 18). Semi kuali komo tiktayekanaltiaj tiktekitiliskej Jiova. Yejua nejon tein kichiuas maj yekmelauj tiyolpakikan. Amo tikpiaskej kuejmolmej tein kipiaj akin semi kitayekanaltiaj tomin, tekit oso sayoj inintech tanemiliaj. Yejua ika, ¡maj tiknextikan tamatilis uan maj tikyolpaktikan Jiova! (Prov. 23:15).