1. ¿Toni moneki kiixpejpenaskej nochin?

 ITECH nejin tonalmej nochin moneki kiixpejpenaskej ox kikauaskej maj Jiova kinixyekana kemej taixyekankej itech nochi taltikpak, oso mokauaskej maj kinixyekana Satanás, akin semi kiixnamiki Dios. Itech nejin taman amo uelis tikijtoskej ke amo tikpaleuiaj nion se. Ika tein tikixpejpenaskej uelis tinemiskej nochipaya oso amo (Mat. 25:31-33, 46). Itech okachi ueyi tajyouilis tinochin techneskayotiskej, nejon kinextis ox timomakixtiskej oso techixpoloskej (Apoc. 7:14; 14:9-11; Ezeq. 9:4, 6).

2. 1) ¿Toni techyolchikaua maj tikchiuakan Hebreos 10:35-39? 2) ¿Keniuj techpaleuia tein kijtoua amatajkuilol Apocalipsis?

² (Xikonixtajtolti Hebreos 10:35-39). Komo tionmokauaniya maj mitsonixyekana Jiova, semi kuali tein tikonixpejpenak. Uan axkan tikonneki tikonpaleuis oksekin maj no ijkon kichiuakan. Yejua ika, tein kijtoua amatajkuilol Apocalipsis uelis semi mitsonpaleuis. Nejin amatajkuilol ika tajtoua tein kinpanos akin kiixnamikij Jiova. Sayoj ke no kijtoua toni tatiochiualismej kiseliskej akin mokauaj maj kinixyekana. Semi kuali komo timomachtiaj nochi nejin porin techpaleuis maj senkis tikixtalikan tiksentokaskej tiktekitiliskej Jiova. Uan no, ika tein timomachtianij uelis tikinpaleuiskej oksekin maj kiixtalikan kitekitiliskej Jiova uan maj amo keman kikauakan.

3. ¿Katiyejua netajtanilmej tiknankiliskej itech nejin tamachtilis?

³ Itech nejin tamachtilis tiknankiliskej nejin netajtanilmej: ¿toni kiseliskej akin kipaleuiskej itaixyekanalis Dios? uan ¿toni kinpanos akin mokauaskej maj kinixyekana koujtajtapial chichiltik tein ika motajtoua itech amatajkuilol Apocalipsis?

4. ¿Akonimej kinita tatitanil Juan ke ijkatokej iuan Jesús ompa iluikak?

⁴ Jiova kichiuak maj tatitanil Juan kinita tel miakej taltikpakneminij akin kipaleuiaj itaixyekanalis, akin nemiskej nochipaya uan kiseliaj okseki tatiochiualismej. Yekinika moajsij 144,000 (Apoc. 7:4). Yejuan kayomej nikan taltikpak, uan youij iluikak porin tekiuajtiskej iuan Jesús. Yejuan sentaixyekanaskej nikan taltikpak (Apoc. 5:9, 10; 14:3, 4). Juan kiita ke ijkatokej iuan Jesús itech tepet Sion ompa iluikak (Apoc. 14:1).

5. ¿Toni panos iniuan tokniuan taixpejpenalmej akin yetokejok nikan taltikpak?

⁵ Keman nemiajok itatitaniluan Jesús peuak kinixpejpenaj akin pouiskej iniuan 144,000 (Luc. 12:32; Rom. 8:17). Sayoj ke Juan kimatiltiaj ke itech itamian tonalmej amo miakejok yetoskiaj nikan taltikpak. Achto ke peuas okachi ueyi tajyouilis, nejin tokniuan taixpejpenalmej kinixkuaneskayotiskej, tein kijtosneki ke Jiova senkis kinselisya (Apoc. 7:2, 3; 12:17). Ompa, itech okachi ueyi tajyouilis, nejin tokniuan kinuikaskej iluikak uan mosentiliskej iniuan akin no pouij itech 144,000 akin amo keman kikaujkej Jiova. Yejuan taixyekanaskej iuan Jesús itech iTekiuajyo Dios (Mat. 24:31; Apoc. 5:9, 10).

6, 7. 1) ¿Akonimej no kinita tatitanil Juan, uan toni moijtoua de yejuan? 2) ¿Keyej moneki kimatiskej toni tamachtia Apocalipsis capítulo 7 tokniuan taixpejpenalmej uan “uel miak tagayot”?

⁶ Satepan ke tatitanil Juan kinita akin youij iluikak, no kinitak “uel miak tagayot”. Sayoj ke yejuan semi miakej uan amo ixyetok kanachimej (Apoc. 7:9, 10). ¿Toni moijtoua de yejuan? Juan kiluijkej: “Yejuan [...] mopanouilijke ya ne ueyi tatsakuiltilis tech taltikpak. Uan […] moyolchipauke ika esyotsin de […] ichkatsin, ijkon keme kuak se kipaka tilma uan pochinia” (Apoc. 7:14). Satepan ke momakixtiskej itech okachi ueyi tajyouilis, “uel miak tagayot” nemiskej itech taltikpak uan kiseliskej miak tatiochiualismej (Sal. 37:9-11, 27-29; Prov. 2:21, 22; Apoc. 7:16, 17).

⁷ Komo tikchiaj tiaskej iluikak oso tinemiskej nikan taltikpak, tinochin monekiskia timoitaskej itech “taixkopin” tein ika motajtoua itech Apocalipsis capítulo 7. Ijkuak, semi yolpakiskej akin yaskej iluikak uan akin nemiskej nikan taltikpak. Uan no semi tiyolpakiskej porin tikixtalijkej tikpaleuiskej itaixyekanalis Jiova. ¿Toni no kijtoua amatajkuilol Apocalipsis ke panos itech okachi ueyi tajyouilis? (Mat. 24:21).

8. ¿Keniuj peuas okachi ueyi tajyouilis, uan toni kichiuaskej miakej?

⁸ Kemej tikitakej itech tamachtilis 20, amo uejkaua nochi tekiuajyomej kiixnamikiskej Ueyi Babilonia, tein kijtosneki nochi taneltokalismej tein amo melaujkej (Apoc. 17:16, 17). Keman mochiuas nejon, peuas okachi ueyi tajyouilis. ¿Kichiuas nejon maj semi miakej peua kiueyichiuakan Jiova? Amo. Kemej kijtoua Apocalipsis capítulo 6, ijkuak akin amo kitekitiliaj Jiova kitemoskej maj kinpaleuikan tekiuanij uan uejueyi tanamakanij itech nejin taltikpak. Itech nejin capítulo moijtoua ke kemej yeskia tepemej. Kemej amo kipaleuiskej iTekiuajyo Dios, Jiova kiitas ke kiixnamikij (Luc. 11:23; Apoc. 6:15-17).

9. Itech okachi ueyi tajyouilis, ¿keyej nochin kiitaskej ke itekitikauan Dios semi tamamej, uan toni panos?

 ⁹ Itech okachi ueyi tajyouilis, nochin kiitaskej ke itekitikauan Jiova semi tamamej. Sayoj yejuan kisentokaskej kitekitilijtoskej Jiova uan amo kinekiskej kipaleuiskej koujtajtapial oso “okuilin” (Apoc. 13:14-17). Keman kiitaskej ke senkis amo kinekij kinpaleuiskej, akin kiixnamikij Jiova semi kualaniskej. Yejua ika, oloch altepemej kinixnamikiskej itekitikauan Dios itech nochi taltikpak. Biblia kijtoua ke nejin yejua itaixnamikilis Gog akin ualeua Magog (Ezeq. 38:14-16).

10. Kemej kijtoua Apocalipsis 19:19-21, ¿toni kichiuas Jiova keman kinixnamikiskej itekitikauan?

¹⁰ ¿Toni kichiuas Jiova keman kiitas ke kinixnamikij uan kintajyouiltiaj itekitikauan? Yejuatsin kijtoua: “Niknextis nochi nokualanyo” (Ezeq. 38:18, 21-23). Apocalipsis capítulo 19 kijtoua tein panos. Jiova kiualtitanis iKonetsin maj kinpaleuiki itekitikauan uan maj kinixpoloki akin kinixnamikij. Uan Jesús amo iselti yetos, ta iuan yetoskej “soldados de ne iluikak”, tein kijtosneki ángeles iniuan 144,000 taixpejpenalmej (Apoc. 17:14; 19:11-15, TNM). Itech nejin neteuilis senkis kinixpoloskej nochin akin kiixnamikij Jiova (xikonixtajtolti Apocalipsis 19:19-21).

11. ¿Toni tein okachi tayekantok ika motajtoua itech amatajkuilol Apocalipsis?

¹¹ ¿Keniuj momachiliskej itekitikauan Jiova nikan taltikpak keman kiitaskej ke kinixpolojkejya akin kiixnamikiaj Dios uan yejuan makiskej? ¡Semi yolpakiskej! Uan maski ne iluikak semi yolpakiskej keman ixpoliuis Ueyi Babilonia, onkas okse taman tein kichiuas maj okachi yolpakikan (Apoc. 19:1-3). Itech amatajkuilol Apocalipsis ika motajtoua keman monamiktia “ichkatsin”, uan nejin yejua tein okachi tayekantok (Apoc. 19:6-9).

12. Kemej kijtoua Apocalipsis 21:1, 2, ¿kemanian monamiktis “ichkatsin”?

¹² ¿Kemanian monamiktis “ichkatsin”? Maski 144,000 taixpejpenalmej yetoskejya iluikak tepitsin achto ke peuas Armagedón, ayamo ijkuak monamiktis (xikonixtajtolti Apocalipsis 21:1, 2, TNM). Monamiktis keman panosya Armagedón uan keman kinixpoloskejya nochin akin kiixnamikij Dios (Sal. 45:3, 4, 13-17).

13. ¿Toni panos keman monamiktis “ichkatsin”?

¹³ ¿Toni panos keman monamiktis “ichkatsin”? Ijkon kemej se takat uan se siuat monamiktiaj, Jesús kemej tekiuaj, kemej yeskia monamiktis iuan ‘inovia’ oso 144,000. Ika nejin tein mochiuas, Jesús uan 144,000 taixpejpenalmej peuas taixyekanaskej nikan taltikpak 1,000 xiujmej (Apoc. 20:6).

14, 15. Kemej moijtoua itech Apocalipsis capítulo 21, ¿kemej toni tamatij 144,000 taixpejpenalmej? (Xikonita taixkopin ipeujyan amaix).

¹⁴ Itech Apocalipsis capítulo 21, moijtoua ke 144,000 taixpejpenalmej kemej yeskia se kualtsin xolal tein motokaytia “yankuik [...] Jerusalén” (Apoc. 21:2, 9). Nejin xolal kipia kemej tatsineualoni “majtaktiomome tataman teme”, uan ompa ijkuiliujtok “sejse tokayme den nojon majtaktiomome itanojnotskauan de [...] ichkatsin”. Juan xa semi kimoujkaita nejin. ¿Keyej? Porin kiita ke itokay ijkuiliujtok itech semej nejon temej, uan nejon se ueyi tatiochiualis (Apoc. 21:10-14; Efes. 2:20).

 ¹⁵ Nejin xolal amo kemej okseki xolalmej. Ueyi ojti tein kipia, chijchiujtok ika senkis oro, 12 puertas tein kipia 12 perlas, tepamit tein kiyoualoua uan tatsineualonimej kipiaj kualtsitsin temej, uan nochi kipia sayoj se tamachiuj (Apoc. 21:15-21). Sayoj ke Juan kiita ke poliui teisa. ¿Toni poliui? Yejua kijtoua: “Amo nikitak nion se templo itech ueyi xolal, porin Jiova Dios, akin kipia nochi chikaualis uan Ichkatsin yejuan templo. Amo moneki maj tonaltsin uan metsti kitauilikan ueyi xolal, porin ikualtsinyo Dios kitauilia uan itauil yejua Ichkatsin” (Apoc. 21:22, 23, TNM). Akin pouij itech Yankuik Jerusalén senkis yetoskej iuan Jiova (Heb. 7:27; Apoc. 22:3, 4). Yejua ika moijtoua ke Jiova uan Jesús yejuan templo tein kipia xolal.

16. ¿Toni kiseliskej taltikpakneminij keman iTekiuajyo Dios taixyekantos mil xiujmej?

¹⁶ Tokniuan taixpejpenalmej semi yolpakij keman itech tanemiliaj nejin xolal. Sayoj ke akin kichiaj nemiskej nikan taltikpak, no moneki itech tanemiliskej nejin. Keman iTekiuajyo Dios taixyekantos itech taltikpak mil xiujmej, Yankuik Jerusalén kichiuas maj taltikpakneminij kiselikan miak tatiochiualismej. Juan kiita ke nejon tatiochiualismej semi miak kemej yeskia “at ten kitemaka nemilis” uan ke tajtatenoj onkak “kuouit ten kitemaka nemilis [...]. Uan imaxiuyo de ne kuouit kualtia para kinpajtitiu nochi in taltikpakuani” (Apoc. 22:1, 2). Nochin akin nemiskej ijkuak, kiseliskej nochi nejin tein semi kuali. Uan akin tatakamatiskej kinajchiuilijtiaskej tajtakol. Amo akin kokolispeuasok, nion kikokos teisa nion tayokolchokas (Apoc. 21:3-5).

17. Kemej kijtoua Apocalipsis 20:11-13, ¿akonimej kiseliskej tatiochiualismej keman iTekiuajyo Dios taixyekantos mil xiujmej?

¹⁷ ¿Akonimej kiseliskej nejin tatiochiualismej? Nochin akin makisaskej keman mochiuas Armagedón uan konemej akin yoliskej itech yankuik taltikpak. Uan no, Apocalipsis capítulo 20 kijtoua ke mikemej oksepa nemiskej (xikonixtajtolti Apocalipsis 20:11-13). ¿Uan akonimej oksepa nemiskej nikan taltikpak? Nochin akin “yolkualime”, tein kijtosneki itekitikauan Jiova akin momikilijkej ne uejkauj, uan no akin “amo yolkualime”, tein kijtosneki  akin amo uelik kiixmatkej Jiova (Hech. 24:15; Juan 5:28, 29). Nejin amo kijtosneki ke nochin akin momikilijkejya oksepa nemiskej nikan taltikpak keman iTekiuajyo Dios taixyekantos mil xiujmej. Amo oksepa nemiskej akin amo kinekkej kitekitiliskej Jiova. Yejuan kinextijkej ke amo kinnamikia nemiskej itech xochital porin amo kitekitilijkej Jiova maski ueliskia kichiuaskej (Mat. 25:46; 2 Tes. 1:9; Apoc. 17:8; 20:15).

18. ¿Keniuj yeskij taltikpakneminij keman tamis 1,000 xiujmej?

¹⁸ Keman tamis 1,000 xiujmej, nochin akin nemiskej itech taltikpak amo tajtakolejkejok yeskij. Amo akin kitajyouiltisok tajtakol tein Adán techpanoltilij (Rom. 5:12). Senkis ixpoliuis nochi tein amo kuali tein peuak mochiua keman Adán tajtakoj. Yejua ika, keman tamis 1,000 xiujmej, akin yetoskej itech taltikpak senkis nemiskej porin amo kipiaskejok tajtakol (Apoc. 20:5).

19. ¿Keyej itekitikauan Dios monekis kinextiskej ke senkis amo kikauaj Jiova?

¹⁹ Tikmatij ke Jesús nochipa kitakamatik Dios maski Satanás kitemoj maj kikauani. Sayoj ke, ¿no kichiuaskej kemej Jesús taltikpakneminij akin amo kipiaskejok tajtakol? Sejsemej kinankiliskej nejin netajtanil keman tamis 1,000 xiujmej uan Satanás oksepa kimajkauaskej (Apoc. 20:7). Akin amo keman kikauaskej Jiova nemiskej nochipaya uan uelis yolpakiskej porin amo kipiaskejok tajtakol (Rom. 8:21). Sayoj ke akin taixnamikiskej, senkis kinixpoloskej ijkon kemej kiixpoloskej Amokuali uan iamokuali ejekauan (Apoc. 20:8-10).

20. ¿Keniuj tionmomachilia axkan ke tionmomachtijya tein kijtoua Apocalipsis?

²⁰ Axkan ke timomachtijkejya seki taman tein kijtoua Apocalipsis, ¿keniuj tionmomachilia? ¿Tionyolpaki tionmoitas itech “taixkopin”, uan tikonitas keniuj mochiua tein achto moijtojka? ¿Tikonneki tikonyoleuas oksekin maj no kiueyichiuakan Dios kemej yejuatsin kineki? (Apoc. 22:17). Timomachtijkejya ke tein mochiuas semi kualtsin yeski. Yejua ika xa semi tiyolpakij uan tiknekij tikijtoskej tein kijtoj tatitanil Juan: “Ma ijkon mochiua […] xionuiki, Notekotsin Jesucristo” (Apoc. 22:20).