1, 2. ¿Keyej moneki maj timomachtikan amatajkuilol Apocalipsis?

 ¿TIKONITANI nochi itaixkopinuan aksa? Xa miakej amo tikonixmatik. Sayoj ke sepasaj tionmotsakuilia uan okachi tikonita se taixkopin, porin tejuatsin ompa tionnesi. Tikonyekita uan tikonneki tikonelnamikis kemanian uan kani kikixtijkej. Uan no, tikonneki tikonixmatis sejse akin no ompa nesij. Para tejuatsin, nejin taixkopin amo kemej okseki.

² Amatajkuilol Apocalipsis no kemej nejon taixkopin. Ome taman kinextia keyej, yekinika, porin moijkuiloj para techpaleuis tejuan. Ipeujyan kijtoua: “Nejin yejua tein Dios kinextilij Jesucristo, para maj kinnextili itakeualuan tein amo uejkaua moneki mochiuas” (Apoc. 1:1, TNM). Nejin amatajkuilol amo ijkuiliujtok para nochin ta sayoj para tejuan, tiitekitikauan Dios. Yejua ika, amo tikmoujkaitaj maj tejuan no tikchiuakan tein ompa kijtoua. ¡No tinesij “itech taixkopin”!

3, 4. Kemej kijtoua amatajkuilol Apocalipsis, ¿kemanian mochiuaskia tein ompa ijkuiliujtok uan keniuj uelis techpaleuis tejuan?

³ Ojpatika taman yejua kemanian mochiuaskia tein ompa ijkuiliujtok. Tatitanil Juan ika tajtoj nejon tonalmej keman kijtoj: “Dios ika ichikaualis nechajxitij hasta itonal toTekotsin” (Apoc. 1:10, TNM). Juan kijkuiloj nejin tajtolmej kemej itech xiuit 96 itech totonaluan. Ijkuak, miak xiujmej poliuiaok para ejkos “itonal toTekotsin” (Mat. 25: 14, 19; Luc. 19:12). Sayoj ke, tein Biblia achto kijtojka kinextia ke nejon tonal peuak itech xiuit 1914, keman Jesús peuak tekiuajti ompa iluikak. Itech nejon xiuit peuak mochiua tein moijtojka itech Apocalipsis tein ika tajtoua ixolal Dios. Nejin kijtosneki ke tejuan tinentokej itech “itonal toTekotsin”.

⁴ Kemej tinentokej itech nejin tonalmej, moneki tikelnamikiskej tein ika netasojtalis techyolmajxitiaj itech Apocalipsis 1:3: “Yolpaktokke nochi nekes ten kileerojtinemiske nijin tajtolme. Uan no tatiochiualme nochi nekes ten kikaktinemiske [...]. Uan [...] ten kitakamatinemiske [...] ten nikan ixnesi […]. Porin ejkotok ya in tonal”. Moneki tikixtajtoltiskej “nijin tajtolme”, tikakiskej uan tiktakamatiskej. ¿Katiyejua nejon tajtolmej tein moneki tiktakamatiskej?

5. ¿Keniuj kinextia amatajkuilol Apocalipsis ke semi moneki tikitaskej maj Jiova kiseli totaueyichiualis?

⁵ Itech yekinika capítulo tein kipia Apocalipsis, moyekita ke Jesús kimati toni panoua itech nechikolmej (Apoc. 1:12-16, 20; 2:1). Tein kiniluij chikome nechikolmej tein moajsiaj Asia Menor kinextia ke yekmelauj kichiua nejon. Tein kinyolmajxitij, kinpaleuiskia tokniuan itech yekinika siglo maj kiueyichiuanij Jiova kemej kiyolpaktiskia, uan nejon tayolmajxitilis no techpaleuia axkan tiitekitikauan Dios. ¿Toni techmachtia nejin? Ke toTaixyekankauj Jesucristo kimati ox kuali timouikaj iuan Jiova. Yejua techixyekana, techyekpia uan kiita nochi tein panoua. Kimati tein moneki tikchiuaskej para tiksentokaskej tikyolpaktiskej Jiova. ¿Toni tein tayolmajxitij moneki tiktakamatiskej axkan?

6. 1) Kemej kijtoua Apocalipsis 2:3, 4, ¿toni kinpanotoya tokniuan itech nechikol ompa Éfeso? 2) ¿Toni techmachtia tejuan?

⁶ (Xikonixtajtolti Apocalipsis 2:3, 4). Maj tiksentokakan tiktasojtakan Jiova kemej yekinika. Tein Jesús kiniluij tokniuan akin nemiaj Éfeso kinextia ke kisentokayaj kitekitiliayaj Jiova maski kipiayaj ouijkayomej. Sayoj ke, amo kitasojtayajok Jiova kemej achto. Komo kinekiaj maj Jiova kiyolpaktiani kemej kiueyichiuayaj, monekia maj oksepa kitasojtanij. No ijkon panoua axkan, amo sayoj moneki titaxikoskej, ta moneki tikchiuaskej porin tiktasojtaj Jiova. Yejuatsin amo sayoj kiita tein tikchiuaj, ta no keyej tikchiuaj. Yejuatsin kiita ke semi moneki toni techolinia maj tikchiuakan teisa, kichia maj tikueyichiuakan porin tiktasojtaj uan timotasojkamatij (Prov. 16:2; Mar. 12:29, 30).

7. 1) Kemej kijtoua Apocalipsis 3:1-3, ¿toni kiitak Jesús ke kinpanotoya tokniuan ompa Sardis? 2) ¿Toni moneki tikchiuaskej tejuan?

⁷ (Xikonixtajtolti Apocalipsis 3:1-3). Maj tiksentokakan titachixtokan. Tokniuan akin nemiaj Sardis kinpanotoya okse taman. Maski achto kuali kitekitilijtoyaj Jiova amo ijkon kichiujtoyajok. Yejua ika, Jesús kiniluij ke monekia tachixtoskej. ¿Toni techmachtia tejuan? Jiova amo kielkaua tein tikchiuaj para tiktekitiliskej (Heb. 6:10). Sayoj ke amo moneki tiknemiliskej ke kemej tiktekitilijkejya Jiova achto, amo monekiok tiktekitiliskej axkan. Xa amo ueli tikchiuajok tein achto tikchiuayaj, sayoj ke moneki semi tiktekitilijtoskej Dios uan tiksentokaskej  titachixtoskej hasta keman ixpoliuis nochi tein amo kuali (1 Cor. 15:58; Mat. 24:13; Mar. 13:33).

8. ¿Toni techmachtia tein Jesús kiniluij tokniuan akin nemiaj Laodicea itech Apocalipsis 3:15-17?

⁸ (Xikonixtajtolti Apocalipsis 3:15-17). Maj tikueyichiuakan Jiova ika yolpakilis uan ika nochi toyolo. Tein Jesús kiniluij tokniuan akin nemiaj Laodicea, kinextia ke kinpanotoya okse taman. Amo semi kinyolpaktiayaok kitekitiliskej Jiova. Jesús kijtoj ke katkaj ‘tekneltijkej’. Yejua ika, monekia kichiuaskej tein kinpaleuiskia maj oksepa kinyolpaktiani kiueyichiuaskej Jiova (Apoc. 3:19). ¿Toni techmachtia tejuan? Komo amo semi techyolpaktiaok tiktekitiliskej Jiova, moneki itech titanemiliskej tein yejuatsin uan inechikol kichiuanij (Apoc. 3:18). Maj amo techtapololti tiknekiskej kuali tinemiskej. Tiknekij tiktayekanaltiskej itech tonemilis tikueyichiuaskej Jiova.

9. Ijkon kemej Jesús kiniluij tokniuan akin nemiaj Pérgamo uan Tiatira, ¿toni moneki tikixtopeuaskej?

⁹ Maj tikixtopeuakan tein tamachtiaj akin kikaujkej uan kiixnamikij tamachtilis tein melauak. Jesús kinchikaujkanojnotsak seki tokniuan akin nemiaj Pérgamo porin kichiujtoyaj maj moxexelokan (Apoc. 2:14-16). Sayoj ke, tokniuan akin nemiaj Tiatira kiniluij ke kuali tein kichiuayaj porin amo kikakiaj “tamachilisme de [...] Satanás”, uan kinyolchikauak maj amo keman kikauanij tamachtilis tein melauak (Apoc. 2:24-26). Tokniuan akin amo kuali mouikayajok iuan Jiova uan mokaujkaj maj kinkajkayauakan ika nejon tamachtilismej, monekia moyolnonotsaskej oso moyolnemiliskej. ¿Toni techmachtia tejuan? Moneki tikixtopeuaskej tein yeski tamachtilis tein kiixnamiki tein kinemilia Jiova. Akin kikaujkej uan kiixnamikij tamachtilis tein melauak xa kinextiaj ke kiitaj tein kijtoua Biblia sayoj ke ika tein kichiuaj kinextiaj ke amo (2 Tim. 3:5). Komo kuali timomachtiaj iTajtol Dios, niman tikitaskej katiyejua tamachtilis amo melauj uan tikixtopeuaskej (2 Tim. 3:14-17; Jud. 3, 4).

10. ¿Toni no techmachtia tein Jesús kiniluij tokniuan itech nechikolmej Pérgamo uan Tiatira?

¹⁰ Maj senkis tikixtopeuakan auilnemilis. Itech nechikolmej Pérgamo uan Tiatira no panotoya okse taman. Seki tokniuan itech nejon nechikolmej amo  kiixtopeuayaj auilnemilis, yejua ika Jesús kinchikaujkanojnotsak (Apoc. 2:14, 20). ¿Toni techmachtia tejuan? Ke Jiova amo kineki maj tiauilnemikan maski miak xiujmejya tiktekitilijtoskej uan tikpiaskej miak tekimej itech inechikol (1 Sam. 15:22; 1 Ped. 2:16). Maski itech taltikpak okachi amo chipaujkanemij, Jiova kineki maj tiktakamatikan itanauatiluan tein kijtouaj maj tichipaujkanemikan (Efes. 6:11-13).

11. ¿Toni timomachtijkejya? (Xikonita recuadro “ Tein techmachtia tejuan”).

¹¹ ¿Toni tikitakejya itech nejin tamachtilis? Tikitakejya ke semi moneki maj tikueyichiuakan Jiova kemej kiyolpaktis. Komo tikchiujtokej teisa tein amo kuali, moneki niman tikpataskej (Apoc. 2:5, 16; 3:3, 16). Sayoj ke, Jesús no kijtoj okse taman keman kintajkuilouilijkej nechikolmej. ¿Toni kijtoj?

12. ¿Toni techmachtia tein Jesús kiniluij tokniuan itech nechikolmej Esmirna uan Filadelfia? (Apocalipsis 2:10).

¹² Axkan maj tikitakan tein Jesús kiniluij tokniuan itech nechikolmej Esmirna uan Filadelfia. Kiniluij maj amo kimouilianij maj kintajyouiltikan porin Jiova kintatiochiuiskia komo amo kikauayaj (xikonixtajtolti Apocalipsis 2:10; 3:10). ¿Toni techmachtia nejin? Ke moneki tikmatiskej ke techtajyouiltiskej uan moneki titaxikoskej (Mat. 24:9, 13; 2 Cor. 12:10). ¿Keyej semi moneki maj tikelnamikikan nejin?

13, 14. Ika tein kijtoua Apocalipsis capítulo 12, ¿toni kinpanouani itekitikauan Dios?

¹³ Itech amatajkuilol Apocalipsis kijtoua ke itekitikauan Dios kintajyouiltiskiaj itech “itonal toTekotsin”, oso itech nejin tonalmej. Itech capítulo 12 kijtoua ke ompa iluikak “mochiuak [se] ne teuilis” tepitsin satepan ke Jesús peuak tekiuajti itech iTekiuajyo Dios. Miguel, oso Jesucristo, uan iángeles moteuijkej iuan Satanás uan iamokuali ejekauan keman mokepak ompa iluikak (Apoc. 12:7, 8). Nejon kichiuak maj Satanás uan iamokuali ejekauan akin kiixnamikij Dios kinpantamotanij nikan taltikpak kampa semi kintajyouiltiaj taltikpakneminij (Apoc. 12:9, 12). ¿Toni kinpanouani itekitikauan Dios ika tein mochiuak?

¹⁴ Satepan, Apocalipsis kijtoua toni kichiua Satanás. Kemej amo ueliok youi iluikak, semi kualani iniuan tokniuan taixpejpenalmej, yejuan kiixnextiaj iTekiuajyo Dios nikan taltikpak uan “tanojnotstinemij de [...] Jesucristo” (Apoc. 12:17; 2 Cor. 5:20; Efes. 6:19, 20). ¿Keniuj mochiuani nejin tein achto moijtojka?

15. ¿Akonimej “ome taixpantinij” akin ininka motajtoua itech Apocalipsis capítulo 11 uan toni kinpanok?

 ¹⁵ Satanás kichiuak maj akin kitauelitayaj Dios kinixnamikinij tokniuan taixpejpenalmej akin kiixyekanayaj tanojnotsalis, uan seki tokniuan kiixyekanayaj miak tekit. Yejuan “ome taixpantinij” * akin kinmiktiaj ijkon kemej kijtoua amatajkuilol Apocalipsis (Apoc. 11:3, 7-11). Itech xiuit 1918, chikueyi tokniuan akin kiixyekanayaj inechikol Dios kintakajkayauilijkej uan miak xiujmej kintsakkej. Miakej kinemiliayaj ke motsakuilij tekit tein kichiuayaj.

16. ¿Toni tein se kimoujkaita panok itech xiuit 1919, sayoj ke toni kisentoka kichiua Satanás?

¹⁶ Tein achto moijtojka ke mochiuaskia itech Apocalipsis capítulo 11 kinextia ke “ome taixpantinij” niman oksepa nemiskiaj. Se kimoujkaita keniuj mochiuak nejin keman ayamo ajsia se xiuit ke kintsakkej. Itech metsti marzo xiuit 1919, nejin tokniuan taixpejpenalmej kinkixtijkej uan satepan amo teyi ika kinteluilijkejok. Tokniuan niman oksepa peuak tamachtiaj uan kiteixmatiltiaj iTekiuajyo Dios. Sayoj ke Satanás kisentokak kitemoj kintsakuilis. Ijkuak, Satanás semi peuak kintajyouiltia itekitikauan Dios (Apoc. 12:15). Yejua ika, tinochin moneki titaxikoskej uan titakuaujtamatiskej (Apoc. 13:10).

17. ¿Keniuj kinpaleuianij itekitikauan Dios maski Satanás semi kinixnamiki?

¹⁷ Satepan, Apocalipsis capítulo 12 kinextia ke itekitikauan Dios kinpaleuiskiaj kemej amo kichiayaj porin kijtoua ke “motapoj in tal” uan “pankalayik in at” tein kiixnextia tajyouilis (Apoc. 12:16). Uan yejua nejon tein panouani. Kemansa sekin akin tekitij nikan taltikpak kampa Satanás taixyekana, kemej tamelauanij akin kuali taixejekouaj, kinpaleuianij itekitikauan Dios. Yejuan miakpa uelini mopaleuianij ininixpan tamelauanij uan kinkauaj maj kisentokakan taueyichiuakan. Yejua ika, nochipa keman kiitaj ke ueli, kichiuaj tekit tein Jiova kinmakak (1 Cor. 16:9). ¿Toni kichiuaj itech nejin tekit?

18. ¿Katiyejua tekit moneki tiktayekanaltiskej itech itamian tonalmej?

 ¹⁸ Jesús kijtojka ke imomachtijkauan kiteixmatiltiskiaj “kuali tanauatilmej” ika iTekiuajyo Dios itech nochi taltikpak, achto ke ixpoliuiskia nochi tein amo kuali (Mat. 24:14, TNM). Para kichiuaskej nejin tekit, kinpaleuia se oso miakej ángeles akin kitematiltiaj “kuali tanauatilmej tein amo keman ixpoliuij, nochin akin pouij itech tataman altepemej, itech tataman uejueyi kalyetonij, akin tajtouaj tataman tajtolmej uan tataman ininxolal” (Apoc. 14:6, TNM).

19. ¿Toni no moneki kiteixmatiltiskej akin kitasojtaj Jiova?

¹⁹ Itekitikauan Dios amo sayoj kiteixmatiltiaj tein kuali tein kichiuas iTekiuajyo Dios, ta no moneki tekitiskej iniuan ángeles akin ininka motajtoua itech Apocalipsis capítulos 8 hasta 10. Nejin ángeles kiteixmatiltiaj nochi tein amo kuali tein kinpanos akin kiixtopeuaj iTekiuajyo Dios. Yejua ika, tiitaixpantijkauan Jiova tikteixmatiltianij ke amo uejkaua kintatsakuiltiskej, nejin kemej yeskia “tejsiuit uan tit” porin kinextia keniuj Dios kintatsakuiltis nochin akin kinixyekana Satanás (Apoc. 8:7, 13). Nochin taltikpakneminij moneki kimatiskej ke amo uejkaua ixpoliuis tein amo kuali. Sayoj ijkon uelis kipataskej tein kichiuaj, uan momakixtiskej itech tonal keman Jiova kikixtis ikualanyo (Sof. 2:2, 3). Kemej tein tikteixmatiltiaj amo kiuelitaj nochin, moneki tiyeskij tiyolchikaujkej. Tein tikteixmatiltiskej itech okachi ueyi tajyouilis okachi kinkualantis taltikpakneminij (Apoc. 16:21).

20. ¿Toni tikitaskej itech ome tamachtilis tein kisentoka?

²⁰ Semi moneki maj tiktakamatikan “nijin tajtolme” porin no tinesij “itech taixkopin”, nejin kijtosneki ke totech mochiua tein kijtoua amatajkuilol Apocalipsis (Apoc. 1:3). Sayoj ke, ¿keniuj uelis titaxikoskej keman techtajyouiltiskej uan tiksentokaskej titanojnotsaskej ika yolchikaualis? Ome taman techpaleuis maj ijkon tikchiuakan: yekinika, tein kijtoua amatajkuilol Apocalipsis ke kinpanos akin kiixnamikij Dios uan ojpatika, tatiochiualismej tein tikseliskej komo amo tikauaj Dios. Nejin tikitaskej itech ome tamachtilis tein kisentoka.