1, 2. 1) ¿Toni kijtouaj seki taltikpakneminij ika se kiueyichiuas Dios? 2) ¿Toni tikitaskej itech nejin tamachtilis?

SEKI taltikpakneminij kijtouaj ke komo se kineki se kiueyichiuas Dios amo moneki se pouis itech se taneltokalis. Kijtouaj ke sayoj moneki kuali se mouikas iuan. ¿Melauak nejon?

² Itech nejin tamachtilis tikitaskej ke Jiova nochi kuali kiixtalia tein kichiuas uan kiixtalia keniuj kiueyichiuaskej uan tanojnotsaskej akin pouij itech ixolal. No tikitaskej tein moneki tikchiuaskej keman itech inechikol Jiova motemakaj tanauatilmej (1 Cor. 14:33, 40). Itech yekinika siglo, itatojtokakauan Cristo kichiuayaj tein kijtouaya iTajtol Dios. Nejon kinpaleuij maj miakkan kiteixmatiltianij iTekiuajyo Dios. Itech nejin tonalmej, tiitaixpantijkauan Jiova no tikauaj maj Biblia techixyekana uan tiktakamatij tanauatilmej tein techmakaj itech inechikol. Yejua ika ueli tikteixmatiltiaj iTekiuajyo Dios semanauak taltikpak. Uan no, titapaleuiaj maj tinochin tichipaujkanemikan, maj kuali timouikakan uan maj tiyolseujtokan.

3. ¿Toni techpaleuia maj tikneltokakan ke Jiova kuali kiixtalia tein kichiua?

³ Keman titanemiliaj itech tein Jiova kichijchiuak, tikitaj ke yejuatsin kuali kiixtalia tein kichiuas. Proverbios 3:19 kijtoua ke yejuatsin “ika tamatilis kichijchiuak taltikpak” uan kichijchiuak “iluikak ika kuali taixejekolis”. Sayoj ke amo nochi tikixmatij tein Dios kichijchiuak. Yejua ika Biblia kijtoua ke sayoj se “ichtakatajtolis mokakini kemej tamati” (Job 26:14). Sayoj ke, tein tikixmatij kemej chijchiujtok iluikak uan taltikpak, maski amo miak, techpaleuia maj tikitakan ke nochi kuali ixyetok (Sal. 8:3, 4). Maj titanemilikan itech millones sitalimej tein mooliniaj ejekaixko uan amo motelouaj. No maj tiknemilikan keniuj planetas kitojtokaj se ojti keman kiyoualouaj Tonaltsin. Tel kuali nochi ixyetok porin Jiova ijkon kinekik. Keman tiknemiliaj ke Jiova kichijchiuak nochi ika miak tamatilis techolinia maj tikueyichiuakan uan maj amo keman tikauakan (Sal. 136:1, 5-9).

4. ¿Keyej tamatinij amo ueli kinankiliaj miak netajtanilmej?

⁴ Tamatinij kiitanij miak taman keman momachtiaj keniuj chijchiujtok taltikpak uan nochi tein onkak. Nejin tapaleuia maj okachi kuali tinemikan. Sayoj ke yejuan amo ueli kinankiliaj miak netajtanilmej tein motelnekij. Kemej neskayot, amo ueli senkis kijtouaj keniuj peuak nochi tein onkak nion keyej onkak nemilis sayoj itech taltikpak. Uan tel miakej taltikpakneminij amo ueli kimelauaj keyej amo akin kineki momikilis (Ecl. 3:11). ¿Keyej amo ueli kinankiliaj nejin netajtanilmej? Se taman, porin miakej tamatinij uan okseki taltikpakneminij kijtouaj ke Dios amo nemi uan tamachtiaj ke nemilis iselti peuak. Sayoj ke Dios kemaj techmaka tanankililmej itech iTajtol, Biblia.

5. ¿Toni neskayomej kinextiaj ke tinochin moneki tiktakamatiskej tanauatilmej tein kiixyekana tein onkak?

⁵ Jiova kiixtalij nochi tanauatilmej tein kiixyekana tein onkak, uan nejin tanauatilmej amo mopataj. Electricistas, plomeros, ingenieros, pilotos, tapajtianij uan okseki taltikpakneminij moneki kitojtokaskej nejin tanauatilmej keman kichiuaj inintekiuj. Kemej neskayot, tapajtianij kimatij kani kiajsiskej iyolo se kokoxkej. ¿Keyej? Porin tinochin sayoj seko tikpiaj. Uan no, tinochin tikmatij ke komo se aksa uejkapan pantsikuini uetsis uan hasta uelis mikis. Yejua ika, komo tiknekij tiyoltoskej, moneki tiktakamatiskej tanauatilmej tein kiixyekana tein onkak.

6. ¿Keniuj tikmatij ke Jiova kineki maj itekitikauan kiueyichiuakan kemej yejuatsin kiixtalijtok?

⁶ Jiova tel kuali kiixtalij keniuj tekitis nochi tein onkak. Yejua ika taixejekol maj se kinemili ke yejuatsin kineki maj ixyeto keniuj itekitikauan kiueyichiuaskej. Uan yejua ika techmaka Biblia kampa techmachtia keniuj moneki tikueyichiuaskej. Sayoj tiyolpakiskej komo tikchiuaj tein techiluia Jiova uan tein moijtoua itech inechikol.

7. ¿Toni techmachtia ijkon kemej ijkuiliujtok Biblia?

⁷ Biblia se inetetayokolil Dios. Seki taixmatinij kijtouaj ke itech Biblia sayoj moajsij ininamatajkuiloluan judíos uan itatojtokakauan  Cristo uan ke tanemililmej tein ompa moajsij amo mouikaj. Sayoj ke Dios kinixpejpenak akonimej kijkuiloskiaj Biblia, kemanian kijkuiloskiaj uan toni kijkuiloskiaj. Yejua ika amo moixnamikij tanemililmej tein kipia uan techpaleuiaj maj tikajsikamatikan tein Dios kineki techmachtis. Itech Génesis hasta Apocalipsis, Biblia kinextia ke moajsiskia se ‘konetsin’ akin kichiuaskia maj taltikpak oksepa mochiua se xochital. Techmachtia ke nejin ‘konetsin’ yejua Jesucristo uan ke iTekiuajyo kinextis ke sayoj Jiova kinamiki taixyekanas (xikonixtajtolti Génesis 3:15, Mateo 6:10, TNM uan Apocalipsis 11:15).

8. ¿Toni kinextia ke israelitas kimatiaj toni monekia kichiuaskej?

⁸ Dios no kiixtalij keniuj sentekitiskiaj itech xolal Israel. ¿Keniuj kichiuak? Ika Tanauatil tein kinmakak. Kemej neskayot, moajsiaj siuamej akin ixyetoya toni tekit kichiuaskiaj itech takenkal kampa taueyichiuayaj (Éx. 38:8). Dios no kinnauatij israelitas keniuj peuaskiaj ojtokaskiaj uan kiuikaskiaj tabernáculo. Satepan, tekiuaj David kiixtalij tekimej tein tiopixkamej uan levitas kichiuaskiaj itech templo (1 Crón. 23:1-6; 24:1-3). Keman israelitas kitakamatiaj Jiova, yejuatsin kintatiochiuiaya. Nochin sentekitiaj, yolseujtoyaj uan kuali mouikayaj (Deut. 11:26, 27; 28:1-14).

9. ¿Toni kinextia ke itech yekinika siglo ixyetoya keniuj tekitiskiaj tokniuan?

⁹ Itech yekinika siglo, no ixyetoya keniuj tekitiskiaj tokniuan. Ijkuak, moajsiaj seki oloch tokniuan akin kinixyekanayaj nechikolmej. Yekinika, sayoj katkaj tatitanilmej. Sayoj ke satepan peujkej kinpaleuiaj okseki tayekananij (Hech. 6:1-6; 15:6). Jiova kichiuak maj tatitanilmej uan tokniuan akin kinpaleuiayaj kijkuilouanij seki tanauatilmej uan tayolmajxitilismej tein kititaniskiaj itech nechikolmej (1 Tim. 3:1-13; Tito 1:5-9). ¿Toni nepaleuil kiselijkej itech nechikolmej keman kitakamatkej nejin tanauatilmej?

10. ¿Toni panok keman tokniuan itech yekinika siglo kitakamatkej inintanauatiluan akin taixyekanayaj? (Xikonita taixkopin ipeujyan tamachtilis.)

¹⁰ (Xikonixtajtolti Hechos 16:4, 5.) Itech yekinika siglo, seki tokniuan takalpanouayaj itech nechikolmej uan kinmatiltiayaj tokniuan tein kiixtalijkaj “tatitanilme de Cristo uan in tiopan ueuentsitsin de Jerusalén”. Kemej tokniuan kitakamatkej nejin tanauatilmej “kachi ok yek takuautamatke de Cristo. Ika ya nojon kachi ok momiaktilijtiayaj”. ¿Keniuj no ijkon uelis tikchiuaskej itech tonechikol?

11. ¿Toni moneki kichiuaskej tokniuan akin kiselijtokej se tekit itech nechikol keman kinmakaj tanauatilmej?

¹¹ Taixyekananij itech sucursal, takalpanouanij, tapaleuianij uan tayekananij moneki kitakamatiskej tanauatilmej tein kiseliaj itech inechikol Dios. Tein melauj, Biblia kijtoua ke tinochin moneki tikintakamatiskej akin techixyekanaj (Deut. 30:16; Heb. 13:7, 17). Komo tiknekij tikyolpaktiskej Jiova, amo tikinixnamikiskej nion tikinijijtoskej keman techmakaskej tanauatilmej. Amo tiknekij tiyeskij kemej Diótrefes, akin amo kinpoujkaitaya  tokniuan akin taixyekanayaj itech nechikol (xikonixtajtolti 3 Juan 9, 10). Keman titatakamatij tanauatilmej, titapaleuiaj maj itech nechikol onka yolseuilis uan maj kuali timouikakan. Yejua ika maj timotajtanikan: “¿Nikinyolchikaua tokniuan maj kiixtalikan amo kikauaskej Jiova? ¿Niman niktakamati tanauatilmej tein motemakaj itech inechikol Dios?”.

12. ¿Keniuj kinixtaliaj tapaleuianij uan tayekananij?

¹² Yankuixtok, Oloch Taojtokaltianij kipatakej kemej moixtaliaj tayekananij uan tapaleuianij. Amaix Tanejmachtijkej kimelauak ke itech yekinika siglo oloch taojtokaltianij kinmakakej tanauatil takalpanouanij maj kinixtalianij tayekananij uan tapaleuianij (xikonita “Tein tajtanij akin taixtajtoltiaj” itech Tanejmachtijkej 15 metsti noviembre, 2014). Yejua ika, itech metsti septiembre xiuit 2014 tokniuan takalpanouanij peujkej kichiuaj nejin. Keman tayekananij kijtouaj ke se tokniuj uelis tekitis kemej tayekankej oso tapaleuijkej, tokniuj takalpanojkej kitemoua okachi kiixmatis tokniuj uan ichankauan. Yejua ika xa iuan tanojnotsati (1 Tim. 3:4, 5). Satepan, tokniuj takalpanojkej iniuan mosentilia tayekananij. Kiitaj ika nejmachkayot tajkuilolmej itech Biblia kampa ika tajtoua tein moneki kichiuas se tokniuj akin yeski tayekankej oso tapaleuijkej (1 Tim. 3:1-10, 12, 13; 1 Ped. 5:1-3).

13. ¿Keniuj tiknextiaj ke tikinpaleuiaj tayekananij?

¹³ Tayekananij tayolmajxitiaj ika Biblia porin kinekij kinmatampauiskej uan kinyekpiaskej nochin tokniuan. Moneki tikintakamatiskej, porin nejon techpaleuia (1 Tim. 6:3). Itech yekinika siglo, seki tokniuan amo kinekiaj tekitiskej uan mokalakiayaj kampa amo katka inintekiuj. Tayekananij kitemojkej kinpaleuiskej, sayoj ke yejuan amo kinekkej mopataskej. Pablo kiniluij tokniuan itech nejon nechikol keniuj monekia kiitaskej akin ijkon monejnemiltiaya. Kiniluij: “Kuali xikitakan akoni nojon motatsiukaketstinemi san. Uan [...] amo iuan ximouikatinemikan”. Tokniuan monekia amo semi iuan yetoskej nejon tokniuj, sayoj ke monekia amo kitauelitaskej (2 Tes. 3:11-15). Axkan, tayekananij no kitemouaj kinpaleuiskej tokniuan akin amo kitakamatij itanauatiluan Dios. Kemej neskayot, kitemoskej kiyolmajxitiskej se tokniuj akin peua moixmati iuan aksa akin amo kitekitilia Jiova (1 Cor. 7:39). ¿Uan komo tokniuj amo kineki mopatas? Tayekananij xa kiixtaliskej maj motemaka se tanojnots kampa momelauas ke nejon uelis kichiuas maj amo kuali ika tajtokan nechikol. Komo motemaka se tanojnots kemej nejon itech tonechikol, ¿toni tikchiuaskej? Uan komo tikixmatij tokniuj akin kichiuak maj motemaka nejon tanojnots, ¿amo semi iuan timouikaskejok? Ijkon uelis tikpaleuiskej maj kiajsikamati ke  tein kichiua kijtakoua yejua uan amo kiyolpaktia Jiova. Nejon xa kipaleuis maj mopata. ^[1]

14. ¿Keniuj uelis titapaleuiskej maj amo moijtako nechikol?

¹⁴ ITajtol Dios kijtoua tein tinochin moneki tikchiuaskej tein tapaleuis maj amo mochiua tein amo kuali itech nechikol. Maj titanemilikan itech tein panok itech xolal Corinto. Pablo kinteltasojtaya tokniuan akin ompa nemiaj. Yejua kinmachtijka miakej tein yekmelauj tamachtia Biblia (1 Cor. 1:1, 2). Yejua ika maj tiknemilikan keniuj momachilij keman kimatik ke se tokniuj auilnentoya, uan ke itech nechikol amo teyi kiluiayaj. Pablo kinnauatij tayekananij: “Xiktemaktikan imako in amokuali Satanás”. Yejuan monekia kikalankixtiskej nejon takat itech nechikol (1 Cor. 5:1, 5-7, 12). Axkan, tayekananij uelis kikalankixtiskej aksa akin ueyi tajtakoua uan amo moyolnonotsa. Komo tikinitaj akin kinkalankixtiaj kemej tanauatia Biblia, titapaleuiskej maj amo moijtako nechikol (xikonita kampa kijtoua “Tein okachi momelaua”). Uan xa no tikinpaleuiskej maj moyolnonotsakan uan maj kitemokan inetapojpoluilis Jiova.

15. ¿Keniuj titapaleuiaj maj tinochin kuali timouikakan itech nechikol?

¹⁵ Onkaya okse kuejmol itech nechikol tein moajsia Corinto. Sekin kinteiluilijtoyaj okseki tokniuan iniuan tekiuanij. Pablo kiniluij: “Kachi kuali ximotekauilikan ke ma namechchiuilikan tensa chiualis ten amokuali” (1 Cor. 6:1-8). Axkan, seki tokniuan kichiuanij se tekit iniuan okseki tokniuan uan kipolouanij tomin oso kinemiliaj ke tokniuan kinkajkayaujkej. Yejua ika kinteiluilianij iniuan tekiuanij. Nejin uelis kichiuas maj taltikpakneminij amo kuali ika tajtokan Jiova uan inechikol uan maj onka kuejmolmej itech nechikol. ITajtol Dios kijtoua ke moneki kuali timouikaskej iniuan tokniuan, maski xa tikpoloskej tomin. ^[2] Jesús tamachtij keniuj se kiyektalis kuejmolmej iniuan oksekin (xikonixtajtolti Mateo 5:23, 24 uan 18:15-17). Maj tiktakamatikan tein tayolmajxitij. Ijkon, tinochin kuali timouikaskej itech nechikol.

16. ¿Toni tapaleuia maj itekitikauan Dios kisenueyichiuakan?

¹⁶ Biblia techiluia: “¡Xikitakan! Semi kuali uan semi teyolpaktij maj tokniuan kualtsin sennemikan” (Sal. 133:1). Israelitas sentekitiaj uan kuali mouikayaj keman kitakamatiaj Jiova. Keman ika tajtoj tein kipanoskej itekitikauan, Dios kijtoj:  “Nikinolochsentilis kemej ichkamej itech corral” (Miq. 2:12). Jiova no kijtoj ke itekitikauan kisenueyichiuaskiaj porin momachtiskiaj tein yekmelauj tamachtia Biblia. Yejuatsin kijtoj: “Nikpatas inintajtol xolalmej ika se tajtol tein chipauak, uan ijkon nochin yejuan kikuiskej itokay Jiova uan kisentekitiliskej” (Sof. 3:9). ¿Melauj ke timoteltasojkamatij porin ueli tiksenueyichiuaj Jiova?

17. ¿Toni moneki kichiuaskej tayekananij komo se tokniuj ueyi tajtakoua?

¹⁷ Komo aksa ueyi tajtakoua, tayekananij moneki niman kimelauaskej uan ika netasojtalis. Yejuan kimatij ke Jiova kineki maj kinmatampauikan tokniuan ika tein uelis kinijtakos. Ijkon tokniuan amo xexeliujtoskej uan chipaujkanemiskej (Prov. 15:3). Pablo kinteltasojtaya tokniuan kayomej Corinto. Yejua ika kinmelauaya keman monekia. Yejua nejin tein kichiuak itech yekinika amat tein kinijkuilouilij. ¿Keniuj tikmatij? Porin itech ojpatika amat tein kinijkuilouilij seki metsti satepan, kiniluij ke kuali tein kichiujkej. Yejua ika “takan aksa se tokniu taneltokakke uetstiuetsik tech in tajtakol”, tayekananij moneki kimelauaskej ika nejmachkayot (Gál. 6:1).

18. 1) ¿Keniuj semi kinpaleuij tokniuan itech yekinika siglo kitakamatiskej iTajtol Dios? 2) ¿Toni tikitaskej itech okse tamachtilis?

¹⁸ Kemej tokniuan itech yekinika siglo kitakamatkej iTajtol Dios, chipaujkanemiaj, amo xexeliujtoyaj uan yolseujtoyaj (1 Cor. 1:10; Efes. 4:11-13; 1 Ped. 3:8). Nejin kinpaleuij maj uelinij kinixmatiltianij kuali tanauatilmej “nochi taltikpakuani tech nochi in senmanauak” (Col. 1:23). Axkan tiitekitikauan Dios no kuali timouikaj uan tisentekitij, uan tikteixmatiltiaj kuali tanauatilmej semanauak taltikpak. Itech okse tamachtilis tikitaskej okseki taman tein kinextia ke tiktelnekij tikueyichiuaskej toTajtsin Jiova akin okachi Ueyi Taixyekankej, uan tiktakamatiskej tein kijtoua iTajtol, Biblia (Sal. 71:15, 16).