1-3. 1) ¿Toni kuejmol xa kipiakej Evodia uan Síntique? (Xikonita taixkopin ipeujyan tamachtilis.) 2) ¿Toni techpaleuis maj amo tikpiakan kuejmolmej iniuan tokniuan?

TIITAIXPANTIJKAUAN Jiova semi tikpatiuitaj Biblia porin tikmatij ke yejua iTajtol Dios. Tein techyolmajxitia techpaleuia maj amo tikpiakan kuejmolmej uan techmelaua keman timopolouaj. ¿Keniuj tikitaj tein techyolmajxitia? Maj titanemilikan itech tein panok itech yekinika siglo iniuan Evodia uan Síntique, ome tokniuan siuamej akin katkaj taixpejpenalmej. Biblia kijtoua ke kipiakej se kuejmol, maski amo kijtoua keyej. Maj tiknemilikan tein xa panok.

² Evodia xa kinyoleuak seki tokniuan maj takuatij ichan, sayoj ke amo kiyoleuak Síntique. Satepan, keman Síntique kikakik ke tokniuan semi yolpakkej ichan Evodia, tel kualanik. Yejua xa kinemilij: “Amo ueli nikneltoka maj Evodia amo nechyoleuani. Niknemiliaya ke katkaj titasojiknimej”. Síntique xa kinemilij ke Evodia iuan kualantoya uan ke amo kinekia iuan tajtos. Yejua ika no kinyoleuak nejon tokniuan maj takuatij ichan, sayoj ke amo kiyoleuak Evodia.  Nejin xa kichiuak maj tokniuan moxexelouanij. Biblia kijtoua ke Pablo kinmelauak uan kinyolchikauak maj kiyektalianij ininkuejmol. Yejuan xa kitakamatkej uan kisentokakej kitekitilijkej Jiova ika yolpakilis (Filip. 4:2, 3).

³ Axkan, tejuan no uelis tikpiaskej se kuejmol iuan se tokniuj. Sayoj ke uelis tikyektaliskej oso hasta amo tikpiaskej nejon kuejmolmej. ¿Keniuj? Komo tiktakamatij tein techyolmajxitia Biblia. Ijkon, tiknextiaj ke yekmelauj tikpatiuitaj iTajtol Dios, Biblia (Sal. 27:11).

4, 5. ¿Keniuj techyolmajxitia Biblia maj amo niman tikualanikan?

⁴ Kemansa teouijmaka amo niman se kualanis. Kemej neskayot, xa semi titayokoyaj oso semi tikualanij keman aksa techyolxokolia oso techchiuilia tein amo kuali porin okseko tikayomej, amo tiixtamatij kemej yejua oso taman kemej timoitaj. Nejin uelis okachi techyolxokolis komo se tokniuj techchiuilia nejon. ¿Toni tayolmajxitilis tein kitemaka iTajtol Dios uelis techpaleuis?

⁵ Jiova kimati tein uelis panos komo niman tikualanij. Keman tikualantokej uelis tikijtoskej oso tikchiuaskej seki taman tein satepan tiknemiliskej maj amo tikchiuanij. Itech Biblia, Jiova techyolmajxitia: “Amo niman ximokualanti”. Maj tiknemilikan nochi kuejmolmej tein amo tikpiaskej komo tiktakamatij nejin tayolmajxitilis uan amo niman tikualanij (xikonixtajtolti Eclesiastés 7:9 uan Proverbios 16:32). Biblia no techiluia maj tikintapojpoluikan oksekin. Jesús kijtoj ke komo amo titetapojpoluiaj, Jiova amo no techtapojpoluis (Mat. 6:14, 15). ¿Moneki okachi amo tiyolijsiuiskej uan okachi tiknekiskej titetapojpoluiskej?

6. ¿Toni ueliskia panos komo niman timoyolxokoliaj?

⁶ Komo niman timoyolxokoliaj, uelis nochipa tikualantoskej uan hasta tiktauelitaskej aksa. Hasta uelis tikchiuaskej maj okseki tokniuan no momachilikan kemej tejuan. Xa tiknekiskej tiktatiskej ke tikualantokej oso ke tiktauelitaj se tokniuj. Sayoj ke satepan oksekin ipa kiitaskej uan xa amo kinekiskejok mouikaskej touan (Prov. 26:24-26). Komo techpanoskia nejin, tayekananij kitemoskiaj techpaleuiskej ika Biblia maj amo tikmachilikan nejon uan maj tikintapojpoluikan oksekin (Lev. 19:17, 18; Rom. 3:11-18). ¿Tiktakamatiskej tein Biblia tayolmajxitia?

7, 8. 1) ¿Keniuj Jiova kiixyekana ixolal? 2) ¿Toni tanauatilmej techmaka Biblia, uan keyej moneki tiktakamatiskej?

⁷ Axkan, Jiova kinixyekana uan kinmachtia akin pouij itech inechikol nikan taltikpak. ¿Keniuj kichiua? Yejuatsin kiixtalij Cristo maj “kinyekantinemi itaneltokakauan” (Efes. 5:23). Uan Cristo kiixtalij takeual takuaujtamach uan tamatkej maj kinmachti uan maj kinixyekana itekitikauan Dios (Mat. 24:45-47). Kemej Biblia yejua iTajtol Dios, nejin takeual semi kipatiuita. Oloch taojtokaltianij itech yekinika siglo no ijkon kiitayaj (xikonixtajtolti 1 Tesalonicenses 2:13). ¿Toni tanauatilmej techmaka Biblia?

⁸ Biblia techiluia maj nochipa timonechikokan  (Heb. 10:24, 25). Techyoleua tinochin maj sayoj se taman tikneltokakan (1 Cor. 1:10). No techiluia maj tiktayekanaltikan iTekiuajyo Dios (Mat. 6:33). Uan no, technauatia maj titanojnotsakan kajkalpan, kampa miakej panouaj uan kampa yeski kampa moajsiskej taltikpakneminij (Mat. 28:19, 20; Hech. 5:42; 17:17; 20:20). Kinnauatia tayekananij maj kiitakan maj nochin chipaujkanemikan itech nechikol (1 Cor. 5:1-5, 13; 1 Tim. 5:19-21). Uan techiluia ke moneki tiyeskij tichipaujkej uan moneki amo tiknemiliskej nion tikchiuaskej tein Jiova kitauelita (2 Cor. 7:1).

9. ¿Akoni kiixtalij Jesús maj techpaleui maj tikajsikamatikan iTajtol Dios?

⁹ Seki taltikpakneminij xa kinemiliaj ke amo moneki maj kinmelauilikan tein Biblia tamachtia. Sayoj ke itech xiuit 1919 uan hasta axkan, Jesús kichiuani maj takeual takuaujtamach uan tamatkej kinpaleui itekitikauan Dios maj kiajsikamatikan Biblia uan maj kitakamatikan. Keman tiktakamatij tein Biblia tayolmajxitia, nochin tichipaujkanemij, kuali timouikaj uan onkak yolseuilis itech nechikol. Maj timotajtanikan: “¿Niktakamati Jesús uan tanauatilmej tein techmaka takeual takuaujtamach uan tamatkej?”.

10. ¿Keniuj amatajkuilol Ezequiel kineskayotia inechikol Jiova tein poui ompa iluikak?

¹⁰ Biblia tamachtia ke itekitikauan Jiova ompa iluikak no kuali ixyetok keniuj tekitiskej. Kemej neskayot, Ezequiel kiitak Jiova itech se carro tein ijsiujka yaya kampa yeski kampa yejuatsin kinekia (Ezeq. 1:4-28). Nejin carro kiixnextia inechikol Dios tein poui ompa iluikak. Akin pouij itech nejon nechikol nochipa kitakamatij Jiova. Uan no, kiixyekanaj inechikol Dios tein poui nikan taltikpak. Maj tiknemilikan nochi tein mopatani itech majtakti xiujmej tein panouanij. Maj tikelnamikikan ke Jiova kichiua maj inechikol kipata nochi nejon. Amo uejkaua, Cristo uan ángeles kiixpoloskej tein amo kuali. Ijkon nochin kipoujkaitaskej Jiova, itokay uan kiitaskej ke yejuatsin kinamiki taixyekanas.

11, 12. ¿Toni mochiuani itech inechikol Jiova itech nejin itamian tonalmej?

¹¹ Maj titanemilikan itech nochi tein mochiuani itech inechikol Jiova itech nejin itamian tonalmej. Yekinika, itech kalchiualis. Tel miakej tokniuan takamej uan siuamej tel tekitikej keman mochijchiuak yankuik kali kampa kinixyekanaj itaixpantijkauan Jiova, itech xolal Warwick (Nueva York, Estados Unidos). Okseki tel miakej tokniuan kichijchiujtokej Kalmej kampa tiMosentiliaj uan sucursales itech nochi taltikpak. Yejuan kinixyekanaj tokniuan akin tapaleuiaj kampa moixtalia keniuj mochijchiuas kalmej kampa titaueyichiuaj semanauak taltikpak. ¿Melauj ke semi tiktasojkamatij ueyi chikaujkayot tein kichiuaj nochin nejin tokniuan? Nejin uejueyi kalmej ueli mochijchiuaj porin itekitikauan Dios itech nochi taltikpak mochikauaj tapaleuiskej ika tomin. Jiova kintiochiua itekitikauan porin yolyemankej uan amo kikauaj (Luc. 21:1-4).

¹² Ojpatika, maj tikitakan tein mochiuani itech tamachtilis. Jiova semi kiuelita kinmachtis itekitikauan (Is. 2:2, 3). Maj titanemilikan itech tataman tamachtilis  tein onkak. Moajsi Tamachtilis tein kiselia akin Tekiti kemej Precursor, Tamachtilis tein kiseliaj akin kiteixmatiltiaj iTekiuajyo Dios, Tamachtilis tein motemaka Galaad, Tamachtilis tein kiseliaj akin Yekin Ajsij Betel, Tamachtilis tein kiseliaj Tokniuan Takalpanouanij uan Ininnamik, Tamachtilis tein kiseliaj Tayekananij itech Nechikol, Tamachtilis tein kiseliaj Tayekananij uan Tapaleuianij uan Tamachtilis tein kiseliaj Taixyekananij itech Sucursal uan Ininnamik. No moajsi jw.org itech Internet, kampa ueli tikajsij Biblia uan okseki amaixmej itech tel miak tataman tajtolmej. No kipia taxelolmej tein kinpaleuia konemej uan kalyetouanij, uan se taxelol kampa moteixmatiltia tein yankuixtok mochiuak. ¿Tiktekitiltijtokej jw.org itech tanojnotsalis uan keman titaueyichiuaj kemej kalyetouanij?

13. ¿Toni moneki tikchiuaskej tiitekitikauan Jiova?

¹³ Se ueyi tatiochiualis tipouiskej itech inechikol Jiova uan tikmatiskej tein yejuatsin  kineki maj tikchiuakan. Sayoj ke kemej tikmatij tein yejuatsin kiyolpaktia, moneki tiktakamatiskej uan tikchiuaskej tein kuali. Miakej kiuelitaj kichiuaskej tein amo kuali. Sayoj ke tejuan moneki tiktauelitaskej tein amo kuali, ijkon kemej Jiova kitauelita (Sal. 97:10). Moneki amo tiyeskij kemej akin kinemiliaj ke “tein kuali, amo kuali, uan tein amo kuali kiitaj ke kuali” (Is. 5:20). Tiknekij tikyolpaktiskej Jiova. Yejua ika senkis tikixtalijtokej maj chipauak moajsi tonakayo, totanemilil uan totaueyichiualis (1 Cor. 6:9-11). Tikmatij ke tein techiluia itech Biblia techpaleuia. Uan no, tiktasojtaj Jiova uan amo tiknekij tikauaskej. Yejua ika tiktakamatij itanauatiluan tokalijtik, itech nechikol, kampa titekitij, itech kaltamachtiloyan oso kampa yeski timoajsiskej (Prov. 15:3). Maj tikitakan seki taman kampa moneki tiknextiskej ke tiktakamatij Jiova.

14. ¿Keniuj tetatmej uelis kinextiskej ke kinekij kiyolpaktiskej Jiova?

¹⁴ Keman se kinmachtia konemej. Itech Biblia, Jiova kiniluia tetatmej keniuj moneki kinmachtiskej ininkoneuan. Tokniuan tetatmej kinextiaj ke kinekij kiyolpaktiskej Jiova keman kitakamatij. Moneki amo tanemiliskej kemej tanemiliaj akin amo kitekitiliaj Jiova (Efes. 2:2). Kemej neskayot, itech seki altepemej se tepopaj xa kijtos ke siuamej moneki kinmachtiskej ininkoneuan. Sayoj ke Biblia senkis kijtoua ke tepopaj moneki kinpaleuis ikoneuan maj kiixmatikan Jiova (Efes. 6:4). Takamej uan siuamej akin kipiaj konemej uan kitasojtaj Jiova kinekij maj ininkoneuan kuali mouikakan iuan, ijkon kemej Samuel peuak kuali mouika iuan keman nojnelok katka (1 Sam. 3:19).

15. ¿Keniuj tiknextiliaj Jiova ke tiknekij tikyolpaktiskej keman titaixpejpenaj?

¹⁵ Keman se taixpejpena. Achto ke tikixpejpenaskej seki taman tein motelneki, moneki tiktemoskej tikmatiskej tein kinemilia Jiova. ¿Keniuj? Keman tiktemoskej tikmatiskej toni techyolmajxitia itech Biblia uan itech inechikol. Ijkon tiknextiliaj Jiova ke tiknekij tikyolpaktiskej. Kemej neskayot, sekin akin tekititij itech okse ueyi altepet uan ompa kinpiaj konemej kiixtaliaj kintitaniskej keman yekin yolij kampa yejuan kayomej maj ompa kiniskaltikan ininchankauan. Ijkon, tepopaj uan temomaj uelis kisentokaskej ompa tekitiskej. Melauak ke nejin sejse moneki kiixpejpenas. Sayoj ke tetatmej moneki motajtaniskej keniuj kiita Jiova tein kiixtaliaj (xikonixtajtolti Romanos 14:12). Maj tikelnamikikan ke achto ke tikixpejpenaskej teisa tein mouika ika tekit uan tochankauan, moneki tiknemiliskej tein kijtoua Biblia. Moneki maj toTajtsin techyekana (Jer. 10:23).

16. ¿Toni monekik kiixpejpenas se temomaj keman yolik ikonetsin? ¿Toni kipaleuij maj kiixpejpena tein okachi kuali?

 ¹⁶ Seki namikuanij yajkej mokaltalitoj itech okse ueyi altepet uan ompa kipiakej se konetsin. Yejuan kinemiliayaj kititaniskej iniuan iueyitatuan itech altepet kampa yejuan kayomej. Sayoj ke itech nejon tonalmej, siuat peuak kimachtiaj Biblia uan kimatik ke yejua monekia kipaleuis ikonetsin maj kiixmati Jiova (Sal. 127:3; Prov. 22:6). Yejua ika kitataujtij Jiova maj kipaleui maj kiixpejpena tein okachi kuali, ijkon kemej kijtoua Biblia ke moneki tikchiuaskej (Sal. 62:7, 8). No iuan tajtoj tokniuj siuat akin kimachtiaya uan iniuan okseki tokniuan. Ichankauan uan itasojikniuan kiteliluiayaj maj kititanini ikonetsin iniuan iueyitatuan. Sayoj ke yejua kiajsikamatik ke nejon amo kuali yetoya. Inamik kiitak ke tokniuan itech nechikol semi kipaleuiayaj yejua uan ikonetsin. Yejua semi kimoujkaitak nejin uan yejua ika peuak momachtia Biblia uan peuak youi nechikolmej iniuan. Maj tiknemilikan keniuj tel yolpakik temomaj keman kiitak ke Jiova kinankilijka inetataujtil.

17. ¿Toni tanauatilmej moneki tiktakamatiskej keman titamachtiaj ika Biblia?

¹⁷ Keman techmakaj tanauatilmej. Se taman kemej uelis tiknextiskej ke tiknekij tikyolpaktiskej Jiova yejua keman tiktakamatij tanauatilmej tein techmakaj itech inechikol. Kemej neskayot, maj tiknemilikan tein moneki tikchiuaskej tepitsin satepan keman tipeuaskej titamachtiskej ika amatajkuilol Tamachtia Biblia. Techiluianij ke moneki tikuiskej seki minuto satepan ke timatamiskej sejse tamachtilis uan ijkon tikinpaleuiskej akin tikinmachtiaj maj okachi kuali kiixmatikan inechikol Jiova. Uelis tikinpaleuiskej ika video ¿Keniuj tikchiuaj tonechikoluan? uan folleto ¿Akonimej kichiujtokej itanejnekilis Jiova itech nejin tonalmej? No techyolmajxitianij ke satepan ke tikinmachtiskej ika amatajkuilol Tamachtia Biblia maj tikinmachtikan ika amatajkuilol “Xiksentokakan itech inetasojtalis Dios”, maski moauijkejya. Ijkon tikinpaleuiskej maj kuali moajsi inintakuaujtamatilis (Col. 2:7). ¿Tiktakamatij nejin tanauatilmej tein techmakaj itech inechikol Jiova?

18, 19. ¿Keyej moneki tiktasojkamatiliskej Jiova?

¹⁸ Onkak miak taman tein moneki tiktasojkamatiliskej Jiova. Yekinika, “ika iuelilis de Totajtsin Dios nochi tejuan tinentinemij uan tinejnentinemij uan tiyoltinemij” (Hech. 17:27, 28). Ojpatika, porin techmakatok Biblia. Kemej tokniuan akin nemiaj Tesalónica, tejuan no tikpatiuitaj nejin netetayokolil porin yejua “Tajtoltsin de Dios” (1 Tes. 2:13).

¹⁹ Expatika, porin techmachtiani itech Biblia keniuj uelis timochiuaskej tiitasojikniuan (Sant. 4:8). Uan naujpatika, porin techkaua maj tipouikan itech inechikol. Timomachiliaj kemej akin kijkuiloj Salmo 136, akin kijtoj: “Xiktasojkamatilikan Jiova, porin yejua yolkuali; inetasojtalis tein amo tekaua uejkaua nochipaya” (Sal. 136:1). Itech sejse tajkuilol itech nejin capítulo miakpa moijtoua tajtolmej “inetasojtalis tein amo tekaua uejkaua nochipaya”. Komo amo tikauaj Jiova uan tiktakamatij tanauatilmej tein techmaka itech inechikol, tikpiaskej nochipaya inetasojtalis tein amo tekaua.