ITEKITIKAUAN Jiova nochipa kiueyichiuanij ika tataman netetayokolilmej. Israelitas kitemakayaj tapialmej kemej nemaktilmej, uan akin kichiuaj kemej Cristo nochipa kiueyichiuanij Dios ‘ika ininten’. Sayoj ke no moajsi seki netetayokolilmej tein no kiyolpaktiaj Dios (Heb. 13:15, 16). Akin kitemakaj yolpakij uan kiseliaj tatiochiualismej, kemej kinextiaj nejin neskayomej.

Ana katka se israelita tatakamatkej akin kinekia kipias se okichpil, sayoj ke amo uelia kinpiaya konemej. Itech se netataujtil motenkauak iuan Jiova ke komo kipiaya se okichpil, kimaktiliskia maj kitekitili “nochi tonalmej tein nemis[kia]” (1 Sam. 1:10, 11). Satepan, Ana mokokoxkatalij uan kipiak se okichpil akin kitokaytij Samuel. Keman amo yejua kitamakakok, kiuikak maj kitekitili Jiova itech tabernáculo, ijkon kemej motenkaujka. Jiova kitatiochiuij Ana porin kichiuak nejon. Ana kinpiak makuil konemejok, uan Samuel mochiuak tanauatijkej uan semej akin kijkuiloj Biblia (1 Sam. 2:21).

Ijkon kemej Ana uan Samuel, tiitekitikauan Dios no uelis tiktekitiliskej toTachijchiujkauj. Jesús motenkauak ke tikseliskej miak tatiochiualismej komo tiktekitiliaj maski teisa tikauaskej (Mar. 10:28-30).

Dorcas katka se itatojtokakauj Cristo akin kinextiaya “kualtagayot uan kinpaleuijtinemia nochi tagayot”. Sayoj ke, “kokolispeuak” uan “momikilij”, uan tokniuan itech nechikol semi tayokoyakej. Keman kimatkej ke Pedro amo uejka moajsia, kitataujtijkej maj niman yani kinitati. ¡Xikonnemili keniuj yolpakkej keman Pedro ajsik uan kiajokuik Dorcas! Itech nejin tajkuilol yekinika moijtoua itech Biblia ke se tatitanil kiajokuik aksa (Hech. 9:36-41). Dios amo keman kielkauak tein kichiuak Dorcas (Heb. 6:10). Itech Biblia ika motajtoua, uan axkan uelis tikchiuaskej kemej yejua.

Tatitanil Pablo no techkauilia se kuali neskayot porin kitemakak itonaluan uan kinpaleuij tokniuan. Kinijkuilouilij tokniuan kayomej Corinto: “Ika ueyi yolpakilis [...] nimotatekiutijtiyas uan nimotajyouiltijtiyas de nejua nochikaualis sayo porin semi namechueyitasojtatinemi” (2 Cor. 12:15). Pablo kimatik ika tein kichiuak ke komo tikinpaleuiaj oksekin tiyolpakij uan tikseliaj se taman tein okachi moneki: itatiochiualis Jiova (Hech. 20:24, 35).

Kemaj, Jiova kiyolpaktia maj ika totonaluan uan tochikaualis tikchiuakan itekiyo uan maj tikinpaleuikan tokniuan. Sayoj ke ¿uelis tikchiuaskej okse taman? Kemaj. Amo sayoj moneki tiyeskij tikualtakamej iniuan oksekin, uelis tikueyitaliskej Jiova keman titapaleuiskej ika tomin. Nejon tapaleuia maj kisentoka motanojnotsa noyampa taltikpak. Kemej neskayot, ika nejon tomin, kiseliaj nepaleuil misioneros uan okseki tokniuan akin kitekitiliaj Jiova nochi tonalmej. Uan no, ika mochijchiuaj uan motajtolkepaj amaixmej uan videos, motemaka nepaleuil kampa mochiua se tetsauit uan mochijchiuaj okachi Kalmej kampa tiMosentiliaj. Uelis tikyekmatiskej ke komo tiktemakaj totapaleuil, tikseliskej tatiochiualismej. Uan no, tikueyitaliskej Jiova ika “tein kipia ipatiuj” tein tikpiaj (Prov. 3:9; 22:9).