1. ¿Toni techolinia nekuikatilmej maj tikchiuakan?

SE TONAL, se takat akin kijkuiloua nekuikatilmej akin motelixmati kijtoj ke tajtolmej techtanemililtiaj uan ke tatsotson kichiua maj tikmachilikan, sayoj ke nekuikatilmej kichiuaj maj tikmachilikan tein tiknemiliaj. Ika tonekuikatiluan tikueyichiuaj uan tiknextiliaj netasojtalis toTajtsin, Jiova. Nejon okachi techtokia iuan. Tikmatij ke timokuikatiskej yejua se taman tein motelneki itech totaueyichiualis, yeski toselti oso iniuan tokniuan.

2, 3. 1) ¿Keniuj momachiliaj seki tokniuan keman moneki chikauak mokuikatiskej itech nechikol? 2) ¿Toni netajtanilmej tiknankiliskej itech nejin tamachtilis?

² Sayoj ke ¿techyolpaktia chikauak timokuikatiskej itech nechikol, oso tipinauaj? Itech seki altepemej, takamej pinauaj mokuikatiskej senteixtenoj. Nejon uelis kinmauas tokniuan, okachiok komo tayekananij amo chikauak mokuikatiaj oso kichiuaj okseki taman keman tokniuan mokuikatijtokej (Sal. 30:12).

³ Timokuikatiskej no poui itech totaueyichiualis, yejua ika tiajsiskej achto ke peuas uan amo tikisaskej achto ke tatamis. Maj timotajtanikan: “¿Keniuj nikita maj timokuikatikan itech nechikolmej? ¿Toni uelis nechpaleuis maj amo nipinaua nimokuikatis ika yolpakilis? ¿Keniuj uelis niknextis ke nikmachilia tein moijtoua itech tonekuikatiluan?”.

4, 5. ¿Keyej uelis tikijtoskej ke israelitas kiitayaj ke motelnekia mokuikatiskej keman taueyichiuayaj?

⁴ Itekitikauan Jiova tel miak xiujmejya kiueyichiuanij ika nekuikatilmej. Ueli tikitaj ke keman israelitas kitakamatiaj Dios, kiitayaj ke motelnekia mokuikatiskej keman taueyichiuayaj. Kemej neskayot, keman tekiuaj David kixejxeloj tekimej tein mochiuaskia itech templo, kinixtalij 4,000 levitas maj kiueyichiuanij Dios ika tatsotson. Ompa pouiaj 288 akin tel kuali mokuikatiayaj (1 Crón. 23:5; 25:7).

⁵ Israelitas tatsotsonkej uan mokuikatijkej keman kitamichijchiujkej templo. Biblia kijtoua: “Keman tapitsanij ika trompetas uan mokuikatianij senoloch kiueyichiujtoyaj uan kitasojkamatilijtoyaj Jiova, uan keman okachi chikauak kakistikej trompetas, címbalos uan okseki manamikmej tein ika tatsotsontoyaj keman kiueyichiujtoyaj Jiova, [...] iueyiyo Jiova moajsik itech nochi ichan Dios akin melauak”. Nejon xa semi kichikauak inintakuaujtamatilis israelitas (2 Crón. 5:13, 14; 7:6).

6. ¿Keniuj israelitas moyolpaktijkej ika tatsotson uan nekuikatilmej keman Nehemías taixyekanaya ompa Jerusalén?

⁶ Keman israelitas kitamichijchiujkej tepamit tein kiyoualouaya Jerusalén, Nehemías kinixtalij levitas maj mokuikatianij uan maj tatsotsonanij. Keman kichiujkej iluit porin matankajya tepamit, tatsotson kichiuak maj nochin okachi yolpakinij. Moajsiaj ome oloch taltikpakneminij akin motasojkamatkej iuan Jiova ika nekuikatilmej. Sejse oloch nejnenkej tepankuako uan seseko kimalakachojkej nochi tepamit hasta monamikkej keman ajsitiyayajya templo. Kemej tel chikauak mokuikatijtoyaj tel uejka mokakiaj (Neh. 12:27, 28, 31, 38, 40, 43). Tikmatij ke Jiova semi kiyolpaktij kinkakis itekitikauan keman ika yolpakilis kiueyichiujkej ika nekuikatilmej.

7. ¿Keniuj kinextij Jesús ke itatojtokakauan moneki kiueyichiuaskej Dios ika nekuikatilmej?

⁷ Itech itonaluan Jesús, kisentokayaj kiueyichiuayaj Dios ika tatsotson. Satepan ke Jesús kipeualtij iTakualis toTekotsin, itech tonal tein okachi moneki, mokuikatij iniuan imomachtijkauan (xikonixtajtolti Mateo 26:30).

8. ¿Toni kuali neskayot techkauilijkej tokniuan itech yekinika siglo?

⁸ Tokniuan itech yekinika siglo techkauilijkej se kuali neskayot porin kisenueyichiuayaj Dios ika nekuikatilmej. Maski amo mosentiliayajok itech templo, ta itech kaltsitsin, amo kichiuak maj amo mokuikatianij ika yolpakilis. Dios kichiuak maj tatitanil Pablo kiniluiani tokniuan: “Ximomachtijtiyakan se uan okse uan no ximoyolmajxitijtiyakan se uan okse ika [...] salmos uan ka himnos uan ka ne cantos [...]. Uan ma tiktasojkamachilijtiyakan Totajtsin Dios” (Col. 3:16). Ijkon moneki timokuikatiskej nekuikatilmej tein ika tikueyichiuaj Dios. Amatajkuilol tein ika timokuikatiaj no poui itech tamachtilis tein techmaka takeual takuaujtamach uan tamatkej (Mat. 24:45).

9. 1) ¿Keyej sekin pinauaj chikauak mokuikatiskej itech nechikolmej uan uejueyi nechikolmej? 2) ¿Keniuj moneki timokuikatiskej keman tikueyichiuaj Jiova, uan akonimej moneki kikauaskej se kuali neskayot? (Xikonita taixkopin ipeujyan tamachtilis.)

⁹ Tisekimej xa tipinauaj timokuikatiskej porin tochankauan oso kampa tinemij amo momattokej mokuikatiskej. Oso xa tiknemiliaj ke amo tiuelij keman tikakij ke tel kualtsin mokuikatiaj akin panouaj  itech radio oso televisión. Sayoj ke tinochin moneki maj tikueyichiuakan Jiova ika nekuikatilmej. Yejua ika, maj tikajkoketsakan toamatajkuilol, maj timoixajokuikan uan maj timokuikatikan ika nochi toyolo (Esd. 3:11; xikonixtajtolti Salmo 147:1). Axkan, itech miak Kalmej kampa tiMosentiliaj onkakej pantallas kampa nesij tonekuikatiluan. Nejon uelis techpaleuis maj okachi chikauak timokuikatikan. Uan no, itech tamachtilis tein kiseliaj tayekananij axkan no ixyetok maj mokuikatikan. Nejin kinextia ke motelneki maj tayekananij kikauakan se kuali neskayot keman mokuikatiaj itech nechikolmej.

10. ¿Toni moneki tikelnamikiskej komo tipinauaj chikauak timokuikatiskej?

¹⁰ Miakej amo chikauak mokuikatiaj porin pinauaj maj motelkakikan oso porin kinemiliaj ke amo kualtsin mokuikatiaj. Sayoj ke maj tiknemilikan nejin. Keman titajtouaj, “tinochin timotajtakolmakaj ika miak tataman”, sayoj ke nejon amo kichiua maj amo titajtokanok (Sant. 3:2). No ijkon, moneki tiksentokaskej tikueyichiuaskej Jiova ika nekuikatilmej maski xa amo kualtsin timokuikatiaj.

11, 12. ¿Toni techpaleuis maj okachi kuali timokuikatikan?

¹¹ Xa tipinauaj timokuikatiskej porin amo tikmatij keniuj tikchiuaskej. Maj tikitakan seki tayolmajxitilis tein amo ouij tein uelis techpaleuis. *

¹² Techpaleuis maj chikauak timokuikatikan komo kuali timoijyokuij. Ijkon kemej tit kichiua maj se foco xota, keman timoijyokuij totajtol mochikaua keman titajtouaj uan timokuikatiaj. Moneki timokuikatiskej chikauak kemej ijkuak titajtouaj oso okachi (xikonita tayolmajxitilis tein moajsi itech amatajkuilol Benefíciese de la Escuela del  Ministerio Teocrático, páginas 181 hasta 184, kampa kijtoua “Control del volumen de aire”). Biblia kiniluia itekitikauan Dios maj chikauak mokuikatikan keman kiueyichiuaj (Sal. 33:1-3).

13. ¿Toni techpaleuis maj amo tiomeyolouakan timokuikatiskej?

¹³ Keman titaueyichiuaskej kemej kalyetouanij oso keman tiyetoskej toselti, maj tikchiuakan nejin: maj tikixpejpenakan se nekuikatil tein okachi tikuelitaj uan maj chikauak tikixtajtoltikan uan maj amo tiomeyolouakan; ompa, maj timoijyokuikan uan maj chikauak tiksenijtokan seki tajtolmej hasta tiajsiskej itech se punto; satepan, maj chikauak timokuikatikan nejon tajtolmej (Is. 24:14). Totajtol okachi chikauak mokakis, uan nejon semi kuali. Maj amo timouikan nion maj tipinauakan.

14. 1) ¿Keyej moneki maj okachi timotentapokan keman timokuikatiaj? (Xikonita kampa kijtoua “ Keniuj okachi kuali se mokuikatis”.) 2) Xikonijto seki taman tein tapaleuia maj okachi kuali mokaki se itoskak.

¹⁴ Chikauak kakistis totajtol komo kuali timotentapouaj. Yejua ika, keman timokuikatiskej maj okachi timotentapokan ke keman titajtouaj. ¿Uan komo tikmachiliaj ke amo semi mokaki totajtol oso titoskapitsaujkej? Tikajsiskej tayolmajxitilis tein techpaleuis itech amatajkuilol Benefíciese de la Escuela del Ministerio Teocrático, página 184 kampa kijtoua “Cómo superar problemas específicos”.

15. 1) ¿Toni motematiltij itech nechikol tein mochiuak itech xiuit 2016? 2) ¿Keyej monekik oksepa kiyekitaskej amatajkuilol tein ika timokuikatiaj?

¹⁵ Itech xiuit 2016, itech nechikol tein xijxiujtika kichiuaj itaixpantijkauan Jiova itech metsti octubre, motematiltij se taman tein semi teyolpaktij. Tokniuj Stephen Lett, akin poui iniuan Oloch Taojtokaltianij, kijtoj ke kisaskia se yankuik amatajkuilol tein ika timokuikatiaj. Motokaytiskia Maj timokuikatikan ika yolpakilis iixpan Jiova. Tokniuj Lett kijtoj ke monekia se yankuik amatajkuilol porin Traducción del Nuevo Mundo de las Santas Escrituras itech tajtol inglés  oksepa kiyekitakej. Monekik kijkuaniskej oso kipataskej tajtolmej tein amo mokuijok itech nejin Biblia. Uan no, kitamajxitijkej nekuikatilmej tein ika tajtouaj tanojnotsalis uan tein ika tiktasojkamatij inemilis Jesús tein kitemakak. Uan no, kemej se mokuikatis se taman tein tayekantok itech totaueyichiualis, Oloch Taojtokaltianij kinekkej maj mochijchiuani se amatajkuilol tein tel kuali chijchiujtoskia uan maj tamati kemej Traducción del Nuevo Mundo tein oksepa kiyekitakej.

16, 17. ¿Toni mopatak itech yankuik amatajkuilol tein ika timokuikatiaj?

¹⁶ Amo teouijmakas se kitekitiltis yankuik amatajkuilol porin nekuikatilmej tein sayoj se taman ika tajtouaj sayoj seko tekpantokej. Kemej neskayot, yekinika 12 nekuikatilmej ika tajtouaj Jiova, okseki 8 ika tajtouaj Jesús uan inemilis tein kitemakak, uan ijkon motojtokatiyouij. Ipeujyan amatajkuilol no tekpantokej inintokay nochi nekuikatilmej. Nejin uelis kinpaleuis tokniuan takamej keman kiixpejpenaskej nekuikatil tein mokuis keman kitemakaskej se tanojnots.

¹⁷ Tajtolmej tein mokuij itech seki nekuikatilmej okachi amo ouij se kiajsikamati uan se mokuikatia ika nochi se iyolo. Kemej neskayot, mopatak itokay uan tein kijtoua nekuikatil “Xikyekpia moyolo”, uan axkan motokaytia “Maj tikyekpiakan toyolo”. Nejin mopatak porin inintech tanemilijkej tokniuan siuamej, telpochmej uan ichpochmej, akin yankuixtok moauijkej oso yankuixtok peuak tanojnotsaj, uan akin touan monechikouaj itech nechikolmej uan uejueyi nechikolmej. Keman yejuan mokuikatiayaj nejon nekuikatil, tein melauj kiniluijtoyaj oksekin toni monekia kichiuaskej, uan nejon ueliskia kichiuas maj amo kuali momachilianij.

18. ¿Keyej moneki kuali tikixmatiskej nekuikatilmej tein kipia yankuik amatajkuilol? (No xikonita nota.)

¹⁸ Miak nekuikatilmej tein kipia amatajkuilol Maj timokuikatikan ika yolpakilis iixpan Jiova ijkuiliujtokej kemej netataujtilmej. Nejin techpaleuia maj tikiluikan Jiova tein tikmachiliaj. Okseki nekuikatilmej techoliniaj maj tikinyolchikauakan tokniuan maj kinextikan netasojtalis uan maj kichiuakan tein kuali (Heb. 10:24). Yejua ika moneki kuali tikixmatiskej tatsotson, ox yolik oso ijsiujka youi nekuikatil uan tein kijtoua. Techpaleuis komo tikakij nekuikatilmej tein tokniuan mokuikatiaj itech jw.org. Keman tochan timomamachtiskej nekuikatilmej, amo tiomeyolouaskej keman timokuikatiskej uan tikchiuaskej ika nochi toyolo. *

19. ¿Keniuj tinochin itech nechikol uelis tikueyichiuaskej Jiova?

¹⁹ Maj tikelnamikikan ke timokuikatiskej se taman tein tayekantok itech totaueyichiualis. Se taman tein motelneki tein ika tiknextiliaj Jiova ke tiktasojtaj uan timotasojkamatij (xikonixtajtolti Isaías 12:5). Keman timokuikatiaj ika yolpakilis, tikinyolchikauaj oksekin maj no ijkon kichiuakan. Tinochin itech nechikol, yeski titelpochmej oso tiichpochmej, tiuejueykejya oso yankuixtok timoauijkej, uelis ijkon tikueyichiuaskej Dios. Yejua ika, maj amo tiomeyolouakan timokuikatiskej ika nochi toyolo uan ijkon tikueyichiuaskej yejuatsin. Maj tiktakamatikan nejin tanauatil: “Ximokuikatikan iixpan Jiova”. ¡Maj ika yolpakilis tikueyichiuakan Jiova ika nekuikatilmej! (Sal. 96:1.)