1. ¿Toni Jiova techkaua maj tikchiuakan?

JIOVA techkaua maj tikixpejpenakan toni tikchiuaskej. Techmachtia maj kuali tikixejekokan tein tikchiuaskej uan komo kiyolpaktia tein tikixtaliaj, techpaleuia maj kuali kisa (Sal. 119:173). Tikchiuaskej tein iTajtol techyolmajxitia techpaleuia maj kuali titaixejekokan (Heb. 5:14).

2. ¿Toni uelis techouijmakas satepan ke tikixtaliskej tikchiuaskej teisa?

² Maski tikixtalijkejya tikchiuaskej teisa, xa monekis timochikauaskej tiktamichiuaskej tein tikpeualtijkej. Maj tikitakan seki neskayomej. Se telpoch kiixtalia kiixtajtoltis nochi Biblia. Itech seki semanas ijkon kichiua, sayoj ke satepan amook. Se tokniuj siuat kiixtalia mochiuas precursora, sayoj ke amo kipeualtia keman kiixtalij. Se oloch tayekananij kiixtaliaj kinkalpanoskej tokniuan uan kinyolchikauaskej, sayoj ke panoua miak metsti uan ayamo akin kikalpanouanij. Tataman tein kiixtalijkej nejin tokniuan, sayoj ke nion semej kichiujkej tein kiixtalijkej. No ijkon kinpanok tokniuan ompa Corinto itech yekinika siglo. Maj tikitakan toni uelis techmachtis tein kinpanok.

3. ¿Toni kiixtalijkej tokniuan ompa Corinto, sayoj ke toni panok?

³ Kemej itech xiuit 55, tokniuan ompa Corinto kiixtalijkej kichiuaskej se taman tein motelnekia. Yejuan kimatkej ke tokniuan ompa Jerusalén uan Judea semi kipanotoyaj tatasojtilis, uan ke okseki nechikolmej kisentilijtoyaj tomin tein ika kinpaleuiskiaj. Corintios kiixtalijkej no tapaleuiskej uan kitajtanijkej tatitanil Pablo keniuj ueliskiaj kichiuaskej. Yejua kiniluij toni kichiuaskiaj uan kiixtalij Tito maj kinpaleui maj kisentilianij tomin (1 Cor. 16:1; 2 Cor. 8:6). Sayoj ke, seki metsti satepan Pablo kimatik ke ayamo teyi kisentiliayaj. Yejua ika, xa ayamo ueliskia kititaniskej  ininnepaleuil ompa Jerusalén itech tonal keman okseki nechikolmej kititaniskiaj (2 Cor. 9:4, 5).

4. Kemej kinextia 2 Corintios 8:7, 10, 11, ¿toni Pablo kiniluij corintios maj kichiuakan?

⁴ Tel kuali tein corintios kiixtalijkej kichiuaskej. Pablo kiniluij ke kinextijtoyaj ke chikauak katka inintakuaujtamatilis uan ke kiuelitayaj kitemakaskej tein kipiayaj. Sayoj ke no kiniluij ke monekia kitamichiuaskej tein kipeualtijkaj (xikonixtajtolti 2 Corintios 8:7, 10, 11). Tein kinpanok techmachtia ke xa hasta akin kitakamatij Dios monekis mochikauaskej kichiuaskej tein kiixtalijkej.

5. ¿Katiyejua netajtanilmej tiknankilitij?

⁵ Kemej corintios, tejuan xa no techouijmakas tikchiuaskej tein tikixtalianij porin titajtakouanij uan amo niman tikchiuaj teisa. Keman mochiua tein amo tikchiayaj no uelis techtsakuilis maj tikchiuakan tein tikixtalijkej (Ecl. 9:11; Rom. 7:18). Itech nejin tamachtilis, tiknankilitij nejin netajtanilmej: ¿Keniuj uelis kuali titaixpejpenaskej? ¿Toni uelis tikchiuaskej uan ijkon tikitaskej tein achto tikixpejpenkej uan tikixejekoskej ox monekis tikpataskej? Uan ¿toni techpaleuis maj tiktamichiuakan tein tikpeualtijkej?

6. ¿Kemanian xa monekis tikpataskej tein tikixtalijkej tikchiuaskej?

⁶ Onkak seki taman tein tikixtalijkej tikchiuaskej tein amo keman tikpataskej. Kemej neskayot, nochipa tiktekitiliskej Jiova uan amo keman tikajkayauaskej tonamik (Mat. 16:24, TNM; 19:6). Sayoj ke, seki taman tein tikixtalianij tikchiuaskej xa monekis tikpataskej porin mopata tein tikpanouaj. ¿Toni techpaleuis maj kuali titaixpejpenakan?

7. ¿Toni moneki tiktajtaniliskej Dios uan keyej?

⁷ Maj tiktajtanikan tamatilis Dios. Jiova kichiuak maj Santiago kijkuilo: “Komo aksame tokniuan taneltokani kipoloaj in kuali taixejekolis, ijkuakon ma kitajtanilikan Totajtsin Dios [...]. Porin Yejuatsin nachipa kitetayokolijtika” (Sant. 1:5). Tinochin techpoloua “kuali taixejekolis” itech seki taman. Yejua ika, maj titakuaujtamatikan iuan Jiova keman tikixtaliaj se taman uan keman oksepa tikyekitaskej. Jiova techpaleuis maj kuali titaixpejpenakan.

8. ¿Toni moneki tikchiuaskej achto ke tikixtaliskej teisa?

⁸ Maj kuali timomachtikan. Maj tikitakan tein kijtoua iTajtol Dios, maj tikixtajtoltikan toamaixuan uan maj titajtokan iuan aksa akin kuali techyolmajxitis (Prov. 20:18). Semi moneki maj tikchiuakan nejon keman tiknemilijtokej tikpataskej tekit tein tikpiaj, timokaltalitiuij okseko oso toni timomachtiskej tein ika timoixpanoltiskej uan ijkon tiksentokaskej tiktekitiliskej Dios.

9. ¿Keniuj techpaleuia maj timelaujkej keman tikixtaliaj tikchiuaskej teisa?

⁹ Maj tikitakan keyej tikixtaliaj teisa. Jiova kiita toni techolinia maj tikchiuakan teisa (Prov. 16:2). Yejuatsin kichia maj timelaujkej itech nochi. Yejua ika, keman tikixtaliaj tikchiuaskej teisa moneki amo timokajkayauaskej tejuan uan nion oksekin. Komo amo tikchiuaj nejon, xa techouijmakas tiktamichiuaskej tein tikpeualtijkej. Maj tikijtokan ke se telpoch kiixtalia mochiuas precursor, sayoj ke satepan amo ueli kiajxitia horas tein ixyetok uan amo yolpakiok itech tanojnotsalis. Yejua xa kinemiliaya ke mochiuak precursor porin kinekia kiyolpaktis Jiova. Sayoj ke tein melauj, xa kinekia kinyolpaktis itatuan oso okse aksa.

10. Komo tiknekij tikpataskej seki taman, ¿toni moneki tikchiuaskej?

 ¹⁰ Maj tikijtokan okse neskayot. Se akin momachtijtok Biblia kiixtalia amo tachichinasok. Yekinika semi mochikaua uan amo tachichina kemej se oso ome semanas, sayoj ke satepan oksepa kichiua. Kemej kisentoka mochikaua, satepan senkis amo tachichinaok. ¿Toni kipaleuij? Kitasojtas Jiova uan kinekis kiyolpaktis (Col. 1:10; 3:23).

11. ¿Keyej moneki senkis tikixtaliskej tein tikchiuaskej?

¹¹ Maj senkis tikixtalikan tein tikchiuaskej. Nejon techpaleuis maj tiktamichiuakan tein tikpeualtijkej. Kemej neskayot, komo tikixtalianij okachi tikixtajtoltiskej Biblia, sayoj ke amo tikpiaj se programa, xa amo uelis tikchiuaskej. * Okse neskayot: tayekananij itech se nechikol kiixtaliaj okachi kinkalpanoskej tokniuan, sayoj ke panouaj tonalmej uan amo kichiuanij. Se taman tein kinpaleuis maj kichiuakan yejua komo motajtaniaj: “¿Tikixtalijkejya akonimej kinpaleuiskia maj tikinkalpanokan? ¿Tikixtalijkejya tonal keman tikinkalpanoskej?”.

12. ¿Toni xa monekis tikchiuaskej uan keyej?

¹² Maj tikajsikamatikan ke amo nochi ueli tikchiuaj. Amo akin kipia tiempo, chikaualis nion tein ika kichiuas nochi tein kinekiskia. Yejua ika moneki tikajsikamatiskej ke amo nochi ueli tikchiuaj. Kemansa xa monekis tikpataskej se taman tein tikixtalijkaj porin amo uelis tikchiuaskej (Ecl. 3:6). Sayoj ke, komo oksepa tikitaj tein tikixtalijkej, tikpataj tein moneki uan tiknemiliaj ke uelis tikchiuaskej, ¿toni techpaleuis maj tiktamichiuakan tein tikpeualtijkej? Maj tikitakan makuil taman.

13. ¿Keniuj uelis tikpiaskej chikaualis tein ika tikchiuaskej tein tikixtalijkej?

¹³ Maj tiktajtanikan chikaualis Dios. Jiova uelis techmakas chikaualis tein ika tikchiuaskej tein tikixtalijkej (Filip. 2:13). Yejua ika maj tiktajtanikan iyektikatsin espíritu tein techpaleuis maj tikpiakan chikaualis. Maj tiksentokakan tiktataujtikan maski tikitaskej ke amo niman technankilia. Jesús kijtoj: “Xiktajtanilikan Dios uan Yejuatsin namechmaktilis [yektikatsin espíritu]” (Luc. 11:9, 13).

14. ¿Keniuj techpaleuia tein kijtoua Lucas 14:28 maj tikchiuakan tein tikixtalianij?

¹⁴ Maj tikixtalikan keniuj tikchiuaskej (xikonixtajtolti Lucas 14:28). Uelis tikchiuaskej teisa komo tikixtaliaj keniuj tikchiuaskej. No ijkon keman tikixtaliskej teisa, maj tikijkuilokan nochi tein monekis tikchiuaskej. Komo moneki tikchiuaskej teisa tein ouij uelis tikxexeloskej, ijkon tikitaskej toni techpolouaok tikchiuaskej. Pablo kiniluij tokniuan ompa Corinto maj kixelouanij tepitsin inintomin “cada chikueyi tech ne tayekanatonal domingo”, ijkon amo kichiuaskiaj keman yejua ajsiskia (1 Cor. 16:2). Uan no, komo tikxexelouaj tein moneki tikchiuaskej amo semi tisiouiskej.

15. Satepan ke tikixtaliskej keniuj tikchiuaskej teisa, ¿toni okachi uelis tikchiuaskej?

¹⁵ Komo tikijkuilouaj keniuj tikchiuaskej tein tikixtalijkej techpaleuis maj tikchiuakan (1 Cor. 14:40). Kemej neskayot, oloch tayekananij kiixtaliaj se tayekankej maj kijkuilo tein kiixejekouaj kichiuaskej, akoni kichiuas uan kemanian ueliskia  kitamis tekit. Tayekananij akin ijkon kichiuaj okachi uelis kitamiskej tekit tein kiixtalijkej (1 Cor. 9:26). Tejuan no uelis ijkon tikchiuaskej. Kemej neskayot, uelis tikijkuiloskej tekimej tein tikchiuaskej mojmostaj uan maj achto tikijkuilokan tein yekinika tikchiuaskej. Nejon amo sayoj techpaleuis maj tiktamichiuakan tein tikpeualtijkej, ta no maj tikchiuakan okachi tekimej.

16. Kemej kijtoua Romanos 12:11, ¿toni techpaleuis maj tiktamichiuakan tein tikixtalijkej?

¹⁶ Maj timochikauakan. Monekis timochikauaskej tikchiuaskej ijkon kemej tikijkuilojkej uan tiktamichiuaskej tein tikpeualtijkej (xikonixtajtolti Romanos 12:11). Pablo kiluij Timoteo maj kisentokani mochikauani mochiuas se kuali tamachtijkej. Nejon tein kiyolmajxitij no tapaleuia itech tein yeski tekit tein tikixtaliskej tikchiuaskej itech itekiyo Dios (1 Tim. 4:13, 16).

17. ¿Keniuj techpaleuia Efesios 5:15, 16 maj tikchiuakan tein tikixtaliaj?

¹⁷ Maj kuali tikuikan tiempo (xikonixtajtolti Efesios 5:15, 16). Maj tikixtalikan kemanian tikchiuaskej teisa uan maj amo tikpatakan. Maj amo tikijtokan ke tikchiuaskej keman amo teyi techtsakuilis, porin xa amo keman panos nejon (Ecl. 11:4). Maj amo titonalpolokan ika tein amo moneki, ta maj tiktayekanaltikan tein okachi moneki (Filip. 1:10). Komo ueli, maj tikixtalikan tikchiuaskej seki taman keman amo semi techtapololtis teisa. Maj tikiniluikan oksekin ke tikchiuatij seki taman tein motelneki. Uelis tikseuiskej teléfono uan tikitaskej correo electrónico oso redes sociales satepan. *

18, 19. Satepan ke tikixtaliskej se taman, ¿toni uelis techpaleuis maj tikchiuakan maski kemansa ouij yeski?

¹⁸ Maj tiknemilikan tein kuali tein mochiuas. Tein mochiuas keman tiktamiskej se tekit, tamati kemej kansaika kampa tiknekij tiyaskej. Komo tiknekij tiajsiskej ompa, moneki amo timotsakuiliskej maski monekis tikuiskej okse ojti. No ijkon, komo okachi tiknemiliaj tein kuali tein mochiuas keman tiktamichiuaskej tein tikixtalijkej, tiksentokaskej maski kemansa ouij yeski (Gál. 6:9).

¹⁹ Ouij kuali titaixpejpenaskej uan tikchiuaskej tein tikixtalijkej. Sayoj ke Jiova uelis techmakas tamatilis uan chikaualis tein techpaleuis maj tiktamichiuakan tein tikpeualtijkej.