Niyolik itech xiuit 1983. Amo nikpiaya nion se kokolis, sayoj ke keman nikajxitij majtakti xiuit, peuak nochi nechkokoua. Kemej ome xiuit satepan, se tonal niijsak [oso nitachiak] uan amo uelia nimooliniaya. Niknekia nikolinis nometsuan uan amo niuelia. Amo kemanok uelik ninejnemik, nion nimoskaltijok. Yejua ika nimoita kemej se okichpil.

Satepan ke seki metsti amo nikistoya, techkalpanojkej seki siuamej akin katkaj itaixpantijkauan Jiova. Nochipa nimotatiaya keman oksekin techkalpanouayaj, sayoj ke nejon tonal iniuan nitajtoj nejon siuamej. Keman nechtapouijkej ke tinemiskej itech se xochital, nikelnamikik ke keman nikpiaya kemej makuil xiuit, se misionero itokay Jethro uan kayot Surinam, ualaya toxolal sepa itech metsti uan kimachtiaya ika Biblia nopopaj. Nikuelitaya maj Jethro techkalpanouani porin kualtsin nechnojnotsaya. Uan no, noueyitatuan kemansa nechuikayaj nechikolmej tein kichiuayaj itaixpantijkauan Jiova itech toxolal. Yejua ika, keman Florence, semej siuamej akin nechkalpanoj nejon tonal, nechtajtanij ox niknekia nikmatis toni okachi tamachtia Biblia, nikiluij ke kemaj.

Florence oksepa nechkalpanoko iuan inamik, Justus, uan peuak nechmachtiaj ika Biblia. Kemej kiitakej ke amo uelia nitaixtajtoltiaya, nechmachtijkej. Satepan, ueliaya nitaixtajtoltiaya noselti. Se tonal nechiluijkej ke kintitaniaj maj tapaleuitij Surinam itech tanojnotsalis. Amo akinok moajsia akin ueliskia kisentokas nechmachtis ika Biblia. Sayoj ke semi niyolpakik keman nikitak ke Jiova amo nechelkauak.

Tepitsin satepan ejkok Floyd, se precursor akin tapaleuiko Orealla. Se tonal nechkalpanoko keman tanojnotstinemia kajkalpan. Keman nechtajtanij ox niknekia nimomachtis Biblia, niixuetskak. Yejua ika nechtajtanij: “¿Keyej tiuetska?”. Nikiluij ke nimomachtijkaya folleto ¿Toni kichia Dios maj tikchiuakan? uan ke peujka nimomachtia amatajkuilol El conocimiento que lleva a vida eterna. * Uan no, nikiluij keyej amo niksentokak nimomachtij. Nimotamimachtij amatajkuilol Conocimiento iuan Floyd, sayoj ke satepan no kititankej maj tapaleuiti okseko. Oksepa yajki notamachtijkauj.

Sayoj ke itech xiuit 2004 ejkokej Orealla seki precursores especiales akin monotsayaj  Granville uan Joshua. Nechajsikej keman tanojnotstinemiaj kajkalpan. Keman nechtajtanijkej ox niknekia nimomachtis Biblia, niixuetskak. Nikiniluij ke niknekia nimomachtis nochi amatajkuilol Conocimiento. Niknekia nikitas ox nechmachtiayaj tein nechmachtijkaj okseki tokniuan. Granville nechiluij ke itech noxolal mochiuayaj nechikolmej. Maski amo nikistoya ajsitoyaya majtakti xiuit, niknekia nias. Yejua ika Granville nechkuiko uan nechuikak itech se silla de ruedas hasta kampa yetok Kali kampa tiMosentiliaj.

Satepan, Granville nechyolchikauak maj nimoijkuilo itech Escuela tein Techmachtia iTekiyo Dios. Nechiluij: “Melauj ke amo semi kuali tietok, sayoj ke ueli titajtoua. Se tonal tiktemakas se tanojnots. Tikitas”. Itajtoluan nechyolchikaujkej.

Peuak iuan nitanojnotsa, sayoj ke miak ojmej amo yekchijchiujtoyaj uan ouij katka nechuikas itech silla de ruedas. Yejua ika nikiluij maj nechuika itech se carretilla, uan okachi kuali katka. Itech metsti abril xiuit 2005 nimoauij. Tepitsin satepan, tokniuan nechnextilijkej keniuj nikchiuas tekit kampa motemakaj amaixmej itech Kali kampa tiMosentiliaj uan kampa kitaliaj nekuikatilmej uan kiitaj okseki taman.

Itech xiuit 2007, nopopaj momikilij keman uetsito aijtik uan barco tein itech yaya kiteloj. Nochankauan semi tayokoxtoyaj. Granville touan kichiuaya netataujtil uan techyolseuiaya ika Biblia. Ome xiuit satepan, tikpanokej okse ouijkayot: Granville no momikilij keman barco tein itech yaya pankalakik aijtik.

Itech tonechikol, kampa amo miakej timosentiliayaj, amo moajsiaok nion se tayekankej uan sayoj moajsia se tapaleuijkej. Semi nitayokoxtoya porin momikilij notasojikniuj Granville. Yejua nochipa nechpaleuij maj kuali nimouika iuan Jiova uan nechpaleuiaya keman teisa nechpolouaya. Itech nechikol tein tikpiakej satepan ke momikilij, nejua nitaixtajtoltiskia itech Nemachtil ika amaix Tanejmachtijkej. Satepan ke nikixtajtoltij ome párrafos, peuak nichoka. Monekik nitemos porin niksentokaya nichokaya.

Peuak okachi kuali nimomachilia keman seki tokniuan akin mosentiliayaj itech okse nechikol techpaleuikoj. Uan no, tokniuan akin tekitij Betel kiualtitankej maj tapaleuiki Orealla se precursor especial akin monotsa Kojo. Semi nechyolpaktij maj nomomaj uan se nokniuj takat akin nikyekana peuanij momachtianij Biblia uan maj moauianij. Itech metsti marzo xiuit 2015, nechixtalijkej kemej tapaleuijkej itech nechikol. Uan tepitsin satepan niktemakak yekinika tanojnots. Nejon tonal niuetskak uan nichokak keman nikelnamikik tein Granville nechiluijka seki xiujmej achto: “Se tonal tiktemakas se tanojnots. Tikitas”.

Ika JW Broadcasting^®, nikinixmatini tokniuan akin kipanotokej se taman kemej tein nejua nikpanotok. Maski mokokouaj, ueli kichiuaj miak taman uan yolpakij. Nejua no ueli nikchiua seki taman. Kemej niknekia nikmakas Jiova nochi tein niueliskia, nimochiuak precursor regular. ¡Uan panok se taman tein semi kualtsin! Itech metsti septiembre xiuit 2019 nechixtalijkej kemej tayekankej itech tonechikol, kampa moajsij kemej cuarenta tokniuan tanojnotsanij.

Semi nikintasojkamatilia tokniuan takamej uan siuamej akin nechmachtijkej tein melauak uan nechpaleuianij maj niktekitili Jiova. Sayoj ke okachi nimotasojkamati porin Jiova amo nechelkauani.