1, 2. ¿Keniuj uelis tikchiuaskej tein kijtoua Proverbios 4:25? Xikonijto se neskayot.

MAJ titanemilikan itech nejin eyi neskayomej: se tokniuj siuat akin xiuejya kielnamiki tein kuali tein kipanok achto. Axkan okachi ouij kikisa kichiuas seki taman, sayoj ke mochikaua kisentokas kitekitilis Jiova (1 Cor. 15:58). Mojmostaj kinemilia ke yetoka itech Xochital iniuan ichankauan uan akin kuali iniuan mouika. Okse tokniuj siuat kielnamiki ke se tokniuj kiyolkokoj, sayoj ke kiixtalia amo kualantos iuan (Col. 3:13). Uan se tokniuj takat kielnamiki tein amo kuali tein kichiuak achto, sayoj ke axkan kitayekanaltia kichiuas tein kipaleuis maj nochipa kitakamati Jiova (Sal. 51:10).

² Nochin nejin eyi tokniuan kielnamikij tein achto kipanokej, sayoj ke amo nochipa itech tanemilijtokej. Yejuan tachiaj taixpan, tein kijtosneki ke itech tanemiliaj tein kiseliskej satepan (xikonixtajtolti Proverbios 4:25).

3. ¿Keyej moneki nochipa titachixtoskej taixpan?

³ ¿Keyej moneki nochipa titachixtoskej taixpan? Porin ijkon kemej se taltikpaknenkej amo ueli yekojtoka komo nochipa tachixtiuj taikan, tejuan amo uelis tiktekitiliskej Jiova kemej moneki komo nochipa itech titanemilijtokej tein tikpanokej oso tein tikchiujkej achto (Luc. 9:62).

4. ¿Toni ika titajtoskej itech nejin tamachtilis?

⁴ Itech nejin tamachtilis ika titajtoskej eyi taman tein uelis kichiuas maj tiksentokakan itech titanemilikan tein tikpanokej achto. Nejin yejua tayokol, keman tikualantokej iuan se tokniuj uan keman kisentoka techkuejmoloua totanemilil porin achto tikchiujkaj tein amo kuali. Tikitaskej keniuj tein Biblia tayolmajxitia  uelis techpaleuis maj amo itech titanemilikanok tein “mochiuak ya ne achtopa”, ta maj itech titanemilikan tein tikseliskej satepan (Filip. 3:13).

5. ¿Toni technejmachtia Eclesiastés 7:10?

⁵ (Xikonixtajtolti Eclesiastés 7:10). Nejin tajkuilol amo kijtoua ke amo kuali yetok maj timotajtanikan keyej kuali katka tein achto tikpanokej. Tein melauj, se inetetayokolil Jiova maj tikelnamikikan tein kuali tein tikpanokej achto. Nejin tajkuilol kijtoua ke amo kuali yetok maj timotajtanikan keyej okachi kuali katka tein achto tikpanokej. Nejin kinextia ke amo kuali yetok maj tiknemilikan ke tein achto tikpanouayaj okachi kuali katka uan ke tein axkan tikpanouaj semi amo kuali.

6. ¿Keyej amo tiknextiskiaj tamatilis komo nochipa tiknemilijtokej ke tein achto tikpanokej okachi kuali katka? Xikonijto se neskayot.

⁶ ¿Keyej amo tiknextiskiaj tamatilis komo nochipa tiknemilijtokej ke tein achto tikpanokej okachi kuali katka? Porin uelis sayoj tikelnamikiskej tein kuali tein tikpanokej uan tikelkauaskej tein amo kuali. Yejua nejon tein kinpanok israelitas. Keman kiskej Egipto niman kielkaujkej ke semi kintajyouiltiayaj uan sayoj kielnamikkej takual tein uelik tein ompa kipiayaj. Israelitas kijtouayaj: “¡Semi tikelnamikij pescado tein techuantiaj ompa Egipto, uan pepinos, sandías, puerros, cebollas uan ajos!” (Núm. 11:5). Sayoj ke ¿yekmelauj sayoj kinuantiaj? Amo. Tein melauj, semi patiyoj kinkisaya tein kikuayaj, porin ompa Egipto semi kintekitiltiayaj uan kintajyouiltiayaj (Éx. 1:13, 14; 3:6-9). Sayoj ke niman kielkaujkej ouijkayomej tein kipanokej uan peuak kinejnekij tein achto kipiayaj. Amo itech tanemilijkej keniuj kinpaleuijka Jiova, ta itech tanemilijkej tein kipiayaj achto. Jiova nion tepitsin kiyolpaktij tein kichiujkej (Núm. 11:10).

7. ¿Toni kipaleuij se tokniuj siuat maj amo semi motayokoltiani?

⁷ ¿Toni techpaleuis maj amo timotayokoltikan? Maj tikitakan ineskayo se tokniuj siuat akin peuak tapaleuia Betel ompa Brooklyn itech xiuit 1945. Seki xiujmej satepan, monamiktij  iuan se tokniuj akin no ompa tapaleuiaya uan mokaujkej ompa miak xiujmej. Itech xiuit 1976, inamik kokolispeuak. Keman tokniuj takat kiitak ke amo pajtiskiaok, kiyolmajxitij inamik seki taman tein kipaleuiskia keman yejua amo nemiskiaok. Kiluij: “Tiomen semi tiyolpakinij. Miakej amo kimatij toni kijtosneki nejon”. Uan no kiluij: “Maski tikelnamikis tein kuali tein tikpanokej, amo nochipa itech xitanemilijto. Ijkon kemej panotiaskej tonalmej, amo semi titayokoyasok. Amo ximosenkaua nion semi ximotayokolti porin mitspanok tein amo kuali. Xiktasojkamati tein kuali tein tikpanouani uan tatiochiualismej tein tikseliani. Se kielnamikis tein se kipanok se inetetayokolil Dios”. ¡Semi kuali tein kiyolmajxitij!

8. ¿Toni tatiochiualismej kiselij tokniuj siuat porin kikakik tein kiyolmajxitij inamik?

⁸ Tokniuj siuat kikakik tein inamik kiyolmajxitij. Nochipa kitekitilij Jiova hasta keman momikilij, keman kipiaya 92 xiujmej. Seki xiujmej achto ke momikiliskia, kijtoj: “Panoua sesenta y tres xiujmej niktekitiliani Jiova miak tonalmej uan keman itech nitanemilia nejon ueli nikyekijtoua ke semi niyolpakini”. ¿Keyej? Yejua kijtoj: “Ueli tiyolpakij porin timoajsij kemej kalyetouanij iniuan miakej tokniuan takamej uan siuamej uan tikchiaj tinemiskej iniuan itech se xochital, kampa tiksentekitiliskej toUeyi Tachijchiujkauj, Dios akin melauak, Jiova”. * Nejin tokniuj siuat kikauak se kuali neskayot porin nochipa itech tanemilij tein kiselis satepan.

9. Kemej kinextia Levítico 19:18, ¿kemanian uelis okachi ouij techkisas titetapojpoluiskej?

⁹ (Xikonixtajtolti Levítico 19:18). Miakpa, ouij techkisa titetapojpoluiskej komo akin techyolkokoj se tokniuj, se akin kuali iuan timouikaj oso se tochankauj. Kemej neskayot, se tokniuj siuat kipantij okse tokniuj siuat ke  kiichtekilij tomin. Satepan kiitak ke mopoloj uan kiluij maj kitapojpolui. Sayoj ke tokniuj siuat akin kipantijka ke kiichtekilij itomin semi kualantoya uan kisentokaya itech tanemilijtoya tein panok. Tejuan xa amo tikpanouanij se taman kemej nejon, sayoj ke xa tinochin ouij techkisak tikelkauaskej se taman tein techchiuilijkaj.

10. ¿Toni uelis techpaleuis maj amo tiksentokakan tikualantokan?

¹⁰ ¿Toni uelis techpaleuis maj amo tiksentokakan tikualantokan? Yekinika, maj tikelnamikikan ke Jiova nochi kiita. Yejuatsin kiita toni ouijkayomej tikpanouaj uan keman techchiuiliaj tein amo kuali (Heb. 4:13). No tajyouia keman titajyouiaj (Is. 63:9). Uan kijtoua ke ejkos tonal keman techajchiuilis tajyouilis tein techualkuiliani tein amo kuali tein techchiuilianij (Apoc. 21:3, 4).

11. ¿Keniuj techpaleuia komo amo tiksentokaj tikualantokej?

¹¹ No moneki tikelnamikiskej ke komo amo tiksentokaj tikualantokej techpaleuia. Yejua nejon kiajsikamatik tokniuj siuat akin kipantijkaj ke kiichtekka tomin. Satepan uelik kitapojpoluij tokniuj siuat akin kipantijka uan amo kualantoyaok iuan. Kiajsikamatik ke komo titetapojpoluiaj, Jiova no techtapojpoluis (Mat. 6:14). Maski kimatia ke tein tokniuj kichiuilijka amo kuali katka, kiixtalij amo kualantosok iuan. Nejon kipaleuij maj okachi yolpaki uan maj kitayekanalti kitekitilis Jiova.

12. ¿Toni techmachtia 1 Juan 3:19, 20?

¹² (Xikonixtajtolti 1 Juan 3:19, 20). Kemansa tinochin uelis techkuejmolos totanemilil. Xa porin tikchiujkej tein amo kuali achto ke tikixmatiskiaj tamachtilis tein melauak oso satepan ke timoauijkej (Rom. 3:23). Tein melauj, maski semi timochikauaskej tikchiuaskej tein kuali, “tinochin timotajtakolmakaj ika miak tataman” (Sant. 3:2; Rom. 7:21-23). Maski amo kuali timomachiliaj keman techkuejmoloua totanemilil, nejon uelis techpaleuis. ¿Keyej? Porin tikauaskej tein amo kuali tein tikchiujtoyaj uan tikixtaliskej amo oksepa tikchiuaskej (Heb. 12:12, 13).

13. ¿Keyej moneki timochikauaskej maj totanemilil amo kisentoka techkuejmolo?

¹³ Sayoj ke totanemilil xa kisentoka techkuejmoloua maski timoyolnonotskejya oso timoyolnemilijkejya uan Jiova techtapojpoluijya. Keman totanemilil kisentoka techkuejmoloua uelis kichiuas maj tiknemilikan tein amo melauj (Sal. 31:10; 38:3, 4). ¿Keyej tikijtouaj nejin? Maj tikitakan tein kipanok se tokniuj siuat. Itanemilil kisentokaya kikuejmolouaya porin achto kichiujka tein amo kuali. Yejua kijtoua: “Niknemiliaya ke okachi kuali katka maj amo semi nimochikauani niktekitilis Jiova porin xa ipa amo nimakisaskia”. Miakej xa no ijkon titanemiliaj. Sayoj ke moneki timochikauaskej maj totanemilil amo kisentoka techkuejmolo. Satanás semi kiyolpaktiskia maj amo tiktekitilikanok Jiova, maski Jiova techtasojta uan techtapojpoluijya (no xikonita 2 Corintios 2:5-7, 11).

14. ¿Keniuj uelis tikmatiskej ke Jiova amo kinemilia ke amo timopataskejok?

¹⁴ Maski ijkon, xa timotajtaniaj: “¿Keniuj uelis nikmatis ke Jiova amo kinemilia ke amo nimopatasok?”. Ueliskia tikijtoskej ke keman timochiuiliaj nejin netajtanil tejuan tiknankilijtokejya. ¿Keyej tikijtouaj nejin? Itech se tamachtilis tein kisak miak xiujmej achto itech amaix Tanejmachtijkej moijtouaya keniuj uelis timomachiliskej komo achto tikchiuayaj se taman tein amo kuali uan axkan oksepa techyoltilana. Itech tamachtilis moijtouaya: “Amo xionmosenkaua. Amo xikonnemili ke tein tikonchiuak se ueyi tajtakol uan ke Jiova amo keman mitsontapojpoluis.  Satanás kiuelitaskia ijkon xikonnemili. Kemej tionmotekipachoua uan tiontayokoya kinextia ke amo mitsonyolpaktia tein amo kuali. Nochipa xikontataujti Jiova ika yolyemanilis uan xikontajtani maj mitsontapojpolui, maj mitsonpaleui maj amo mitsonkuejmolook motanemilil uan maj mitsonpaleui amo xikonchiuaok tein amo kuali. Xiontajto iuan kemej se konetsin tajtoua iuan ipopaj. Maski konetsin miakpa kipia se taman ouijkayot, nochipa kitajtania ipopaj maj kipaleui. Yejua ika xikonsentoka xikontajtani Jiova maj mitsonpaleui uan yejuatsin mitsonpaleuis porin kinextia ueyi teiknelilis”. *

15, 16. ¿Keniuj momachilianij seki tokniuan keman kimatij ke Jiova amo kinemilia ke amo mopataskejok?

¹⁵ Miakej tokniuan kinyolseuiani kimatiskej ke Jiova amo kinemilia ke amo mopataskejok. Kemej neskayot, seki xiujmej achto, itech taxelol “ITajtol Dios kipatak ininnemilis” se tokniuj siuat kitetapouij tein kipanoka. Kijtouaya ke kemej itech inemilis panoka miak taman tein amo kuali, ouij kikisaya kineltokas ke Jiova ueliskia kitasojtas. Uan ijkon kisentokaya tanemiliaya miak xiujmej satepan ke moauij. Sayoj ke peuak tanemilia itech inemilis Jesús tein kitemakak uan nejon kipaleuij maj kipata itanemilil. *

¹⁶ ¿Keniuj tein kijtoj tokniuj siuat kipaleuij se tokniuj takat? Yejua kijtoj: “Keman katka nitelpoch nikitaya pornografía, uan ouij nechkisak nikauas. Sayoj ke, yankuixtok oksepa peuak nikita. Nikiniluij tayekananij maj nechpaleuikan, uan uelini nikchiuani seki taman tein nechpaleuis maj nikaua. Yejuan nechiluianij ke Dios nechtasojta uan nechiknelia. Maski ijkon, kemansa niknemilia ke amo teyi nichiujkej, ke Dios amo uelis nechtasojtas”. Keman kiixtajtoltij tein kijtoj tokniuj siuat semi kipaleuij. Tokniuj takat kijtoj: “Axkan nikajsikamati ke keman niknemilia ke Jiova amo keman uelis nechtapojpoluis, tein melauj niknextijtok ke amo nikneltoka ke inemilis iKonetsin tein kitemakak uelis kichiuas maj yejuatsin nechtapojpolui notajtakoluan. Niktejtekik amaix kampa moajsia nejin neskayot uan ijkon uelis nikixtajtoltis  uan itech nitanemilis nochipa keman niknemilis ke Jiova amo nechtasojta”.

17. ¿Toni kipaleuij Pablo maj amo kisentokani kikuejmolouani itanemilil?

¹⁷ Nejin tein kinpanouani seki tokniuan kichiua maj itech titanemilikan tatitanil Pablo. Yejua kichiuak seki taman tein amo kuali achto ke mochiuaskia itatojtokakauj Cristo. Maski kielnamikia tein kichiujka, amo nochipa itech tanemilijtoya (1 Tim. 1:12-15). Kiitaya inemilis Jesús kemej se netetayokolil tein Dios kimakaka yejua (Gál. 2:20). Nejon kipaleuij maj amo kisentokani kikuejmolouani itanemilil uan maj kitayekanaltiani kimakas Jiova tein okachi kuali.

18. ¿Toni tikajsikamatkej itech nejin tamachtilis?

¹⁸ ¿Toni tikajsikamatkej itech nejin tamachtilis? Yekinika, ke tikelnamikiskej tein kuali tein tikpanokej achto se inetetayokolil Jiova; sayoj ke, maski semi kuali tein tikpanokej, okachi kuali yeski tein tikpanoskej satepan. Ojpatika, ke maski oksekin techyolkokoskej, komo tikintapojpoluiaj uelis tiktayekanaltiskej tiktekitiliskej Jiova. Expatika, ke keman totanemilil kisentoka techkuejmoloua uelis kichiuas maj amo tiktekitilikan Jiova ika yolpakilis. Yejua ika, ijkon kemej Pablo, moneki tikneltokaskej ke Jiova techtapojpoluijya.

19. ¿Keniuj tikmatij ke itech yankuik taltikpak amo tikelnamikiskejok nion se taman tein amo kuali?

¹⁹ Itech yankuik taltikpak kampa tinemiskej nochipaya, amo tikelnamikiskejok nion se taman tein amo kuali. Biblia kijtoua: “Tein achto panok amo moelnamikisok” (Is. 65:17). Sekin miak xiujmejya tiktekitilijtokej Jiova uan tixiuejkejya, sayoj ke itech yankuik taltikpak oksepa tiyeskij titelpochmej uan tiichpochmej (Job 33:25). Yejua ika, maj tikixtalikan amo tiksentokaskej itech titanemilijtoskej tein achto tikpanokej. Okachi kuali, maj itech titanemilikan tein tikseliskej satepan itech yankuik taltikpak uan maj tikchiuakan axkan tein techpaleuis maj ompa tinemikan.