1. ¿Toni tikmatij ke techpanoskia tiitekitikauan Dios uan toni senkis tikneltokaj?

 AMO tikmojkaitaj maj techixnamikikan keman titanojnotsaj uan satepan xa okachi techixnamikiskej (Dan. 11:44; 2 Tim. 3:12; Apoc. 16:21). Sayoj ke senkis tikmatij ke Jehová techpaleuis. Uan tikmatij nejin porin nochipa kinpaleuiani itekitikauan maj kichiuakan tekit tein kinmakani maski semi ouij. Para titakuaujtamatiskej ke yekmelauj ijkon panoua, maj tikitakan seki taman tein kipanok tanauatijkej Ezequiel, akin monekik kinnojnotsas Judíos akin kinuikakej Babilonia.

2. 1) ¿Keniuj kijtoj Jehová ke tamatiaj judíos akin Ezequiel monekia kinnojnotsas? (Ezequiel 2:3-6). 2) ¿Toni tikitaskej itech nejin tamachtilis?

² ¿Keniuj tamatiaj akin Ezequiel monekia kinnojnotsas? Jehová kijtoj ke nejin judíos “taixnamikiaj”, “amo tatakamatiaj” uan “katkaj yoltakuaujkej”. Tetajyouiltiayaj kemej uitsti uan katkaj tamouililmej kemej alacranes. Yejua ika Jehová miakpa kiluij Ezequiel: “Amo ximoui” (xikonixtajtolti Ezequiel 2:3-6). Ezequiel uelik tanojnotsak porin 1) yejua Jehová akin kititanik, 2) ichikaualis Dios kipaleuij uan 3) kuali kiselij tein Jehová kiluij. ¿Keniuj kipaleuij nejin eyi taman uan keniuj no techpaleuia axkan?

3. ¿Katiyejua tajtolmej kiyolchikaujkej Ezequiel uan keniuj Jehová kimatiltij ke kipaleuiskia?

³ Jehová kiluij Ezequiel: “Nimitstitani” (Ezeq. 2:3, 4). Nejon xa semi kiyolchikauak. Xa kielnamikia ke yejuatsin no ijkon kiniluij Moisés uan Isaías keman kinixpejpenak kemej itanauatijkauan (Éx. 3:10; Is. 6:8). Ezequiel no kimatia  ke Jehová kinpaleuijka nejin tanauatianij maj kichiuakan seki tekimej tein semi ouijkej. Yejua ika, keman ojpa kiluij: “Nimitstitani”, yejua kimatia ke Jehová kipaleuiskia. Uan no, itech amatajkuilol Ezequiel miakpa tikajsij nejin tajtolmej: “Jehová nechiluij” (Ezeq. 14:2). Uan miakpa no nesi nejin: “Jehová oksepa nechiluij” (Ezeq. 6:1). Yejua ika, Ezequiel senkis kimatia ke Jehová yejua akin kititanka. Uan no, kemej itat Ezequiel katka tiopixkat, xa kimachtijka ke Jehová nochipa kiniluiaya itanauatijkauan ke kinpaleuiskia, porin yejuatsin no kiniluijka Isaac, Jacob uan Jeremías: “Nejua nietok mouan” (Gén. 26:24; 28:15; Jer. 1:8).

4. ¿Toni tein Jehová kiluij Ezequiel xa kiyolchikauak?

⁴ ¿Keniuj kiseliskiaj miakej israelitas tein Ezequiel kinmatiltiskia? Jehová kiluij: “Israelitas amo mitskakiskej porin nejua amo kinekij nechkakiskej” (Ezeq. 3:7). Keman kiixtopeujkej Ezequiel, kiixtopeujkej Jehová. Nejin tajtolmej kiyolchikaujkej Ezequiel porin kimatiltijkej ke kichiujtoya se kuali tekit maski israelitas kiixtopeuayaj. Uan no, Jehová kiluij ke keman judíos kiitaskiaj ke mochiua nochi tein moijtojka, yejuan kimatiskiaj ke “iniuan moajsia se tanauatijkej” (Ezeq. 2:5; 33:33). Nejin tajtolmej semi kiyolchikaujkej Ezequiel para maj kisentoka tanojnotsa.

5. ¿Keyej techyolchikaua tein kijtoua Isaías 44:8?

⁵ Tejuan no techyolchikaua tikmatiskej ke yejua Jehová akin techtitani maj titanojnotsatij. Tikpiaj tatiochiualis  tiyeskij tiitaixpantijkauan (Is. 43:10). Ijkon kemej Jehová kiluij Ezequiel: “Amo ximoui”. Tejuan no techiluia: “Amo ximomoujtikan”. ¿Keyej amo moneki tikinmouiliskej akin techixnamikij? Porin yejua Jehová akin techtitani uan techpaleuia ijkon kemej kichiuak iuan Ezequiel (xikonixtajtolti Isaías 44:8).

6. 1) ¿Keniuj techmatiltia Jehová ke techpaleuia? 2) ¿Toni semi techyolchikaua?

⁶ Jehová motenkaua ke techpaleuis. Achto ke kijtoskia: “Namejuan nannotaixpantijkauan”, yejuatsin kijtoj: “Keman tikpanauis at, nietos mouan uan keman tikinpanauis amej, amo tiatsonpoliuis. Keman tikpanauis tit amo timotajtatis uan amo tichichinauis” (Is. 43:2). Kemansa keman titanojnotsaj tikixnamikij ouijkayomej tein kemej yeskia at uan tit. Sayoj ke tiksentokaj titanojnotsaj porin Jehová techpaleuia (Is. 41:13). Axkan no techpanoua kemej Ezequiel, miakej amo kinekij techkakiskej. Sayoj ke tikmatij ke nejin amo kijtosneki ke amo kuali titanojnotsaj. Techyolchikaua tikmatiskej ke Jehová semi yolpaki keman tiksentokaj titanojnotsaj. Tatitanil Pablo kijtoj: “Sejse Dios kitatiochiuis ijkon kemej tekitis” (1 Cor. 3:8; 4:1, 2). Se tokniuj siuat akin miak xiujmejya tekiti kemej precursora, kijtoua: “Semi niyolpaki nikmatis ke Jehová tetatiochiuia keman se mochikaua”.

7. ¿Keniuj xa momachiliaya Ezequiel keman itech tanemiliaya tein kiitaka? (Xikonita taixkopin ipeujyan amaix).

⁷ Ezequiel kiitak keniuj ichikaualis Dios semi tapaleuia. Jehová kichiuak maj kiitani keniuj ichikaualis kinpaleuiaya ángeles akin semi chikaujkej. Uan no, keniuj kinoliniaya uejueyi ruedas tein kipia icarro (Ezeq. 1:20, 21). Ezequiel techiluia keniuj momachilij keman kiitak nejon: “Keman nikitak, nimoixtokak”. Kemej semi kimojkaitak moixpiloj hasta talpan (Ezeq. 1:28). Keman itech tanemiliaya tein kiitaka, xa okachi kineltokaya ke Jehová ika ichikaualis kipaleuiskia maj tanojnotsa.

8, 9. 1) ¿Toni kinauatij Jehová tanauatijkej Ezequiel? 2) ¿Toni okseki taman kichiuak Jehová para kiyolchikauas Ezequiel?

⁸ Jehová kinauatij Ezequiel: “Ximoketsa uan maj mouan nitajto”. Tein kiluij uan ichikaualis yejuatsin kipaleuij Ezequiel maj ueli moketsa. Yejua kijkuiloj: “Ichikaualis nechpaleuij maj ueli nimoketsa” (Ezeq. 2:1, 2). Uan keman tanojnotstinemiaya, Jehová kipaleuij ika ichikaualis (Ezeq. 3:22; 8:1; 33:22; 37:1; 40:1). Nejon chikaualis kipaleuij maj ueli kinnojnotsani judíos akin amo teyi kinekiaj “kiyekkakiskej uan yoltakuaujkej” katkaj (Ezeq. 3:7). Jehová kiluij: “Nikchiuak xiixtakuauak kemej yejuan ixtakuaujkej uan xiixkuatakuauak kemej yejuan ixkuatakuaujkej. Nikchiuak maj moixkuako moita kemej se tetsin, maj okachi takuauak ke se tet. Amo xikinmouili, uan maj ininixko amo mitsmojmoujti” (Ezeq. 3:8, 9). Kemej yeskia Jehová kiluij: “Maski yejuan yoltakuaujkej, amo ximosenkaua. Nejua nimitspaleuis”.

⁹ Ijkuak, ichikaualis Dios kichiuak maj Ezequiel yani kampa monekia tanojnotsas. Yejua kijkuiloj: “Ichikaualis Jehová semi nechpaleuij”. Monekik panos se semana para maj tanauatijkej Ezequiel kuali kiajsikamatini tein monekia kitematiltis (Ezeq. 3:14, 15). Satepan, Jehová kiluij maj yani kampa amo tepeyoj  uan ijkuak ichikaualis peuak kipaleuia (Ezeq. 3:23, 24). Ezequiel ueliskiaya tanojnotsas.

10. ¿Toni techpaleuis maj tiksentokakan titanojnotsakan uan keyej?

¹⁰ ¿Toni techpaleuis maj tiksentokakan titanojnotsakan? Maj tikelnamikikan tein kipanok Ezequiel. Ichikaualis Dios kipaleuij maj ueli tanojnotsa. Ijkon kemej Ezequiel, tejuan amo no ueliskia titanojnotsaskej komo amo techpaleuiskia ichikaualis Dios. ¿Keyej? Porin Satanás semi techixnamiki uan amo kineki maj titanojnotsakan (Apoc. 12:17). Miakej kinemiliaj ke Satanás tel chikauak uan amo uelis tiktaniskej. Sayoj ke nejon amo melauak porin keman titanojnotsaj tiktanij (Apoc. 12:9-11). Keman titanojnotsaj tiknextiaj ke Satanás amo techmojmoujtia uan senkis tikixnamikij. Yejua ika keman tiksentokaj titanojnotsaj maski techixnamikij, tiknextiaj ke ichikaualis Dios techpaleuia uan ke Jehová kiyolpaktia tein tikchiuaj (Mat. 5:10-12; 1 Ped. 4:14).

11. ¿Keniuj techpaleuis ichikaualis Dios uan keniuj uelis tikseliskej?

¹¹ ¿Toni techmachtia tein kichiuak Jehová keman kimakak Ezequiel ichikaualis para tanojnotsas? Techmachtia ke ichikaualis Dios techpaleuis maj tikixnamikikan tein yeski ouijkayot tein tikpiaskej keman titanojnotsaskej (2 Cor. 4:7-9). Yejua ika, ¿toni uelis tikchiuaskej para tiksentokaskej tikseliskej ichikaualis Dios? Maj tiksentokakan tiktataujtikan maj techmaka uan maj titakuaujtamatikan ke yejuatsin techkakis. Jesús kiniluij imomachtijkauan: “xiksentokakan xitajtanikan”, “xiksentokakan xiktemokan” uan “xiksentokakan xitakakalatsakan”. ¿Toni kichiuas Jehová? Yejuatsin “kinmakas ichikaualis akin kitajtaniaj” (Luc. 11:9, 13; Hech. 1:14; 2:4).

12. Kemej kijtoua Ezequiel 2:9-3:3, ¿kani ualeuaya amatatetekuinol uan toni kijtouaya?

¹² Jehová amo sayoj kipaleuij Ezequiel keman kimakak ichikaualis para maj uelini tanojnotsani, ta tein kiluij no kipaleuij maj okachi takuaujtamati. Jehová kichiuak maj Ezequiel kiita ke aksa maktoya se amatatetekuinol (xikonixtajtolti Ezequiel 2:9-3:3). Sayoj ke, ¿kani ualeuaya? ¿Toni kijtouaya? ¿Uan keniuj kipaleuij Ezequiel? Nejon amatatetekuinol ualeuaya itech iueyi silla Jehová. Yejuatsin xa kichiuak maj semej de naui ángeles tein Ezequiel kiitaka kimakani nejon amatatetekuinol (Ezeq. 1:8; 10:7, 20). Ompa ijkuiliujtoya tein Ezequiel monekia kitematiltis, ke Jehová yaya kintatsakuiltiti judíos akin kinuikakaj Babilonia uan amo tatakamatiaj (Ezeq. 2:7). Nejon amatatetekuinol ojkan ijkuiliujtoya, taikan uan taixpan.

13. ¿Toni kiluij Jehová tanauatijkej Ezequiel maj kichiuani ika amatatetekuinol uan keyej katka tsopek?

¹³ Jehová kiluij tanauatijkej: “Xikua nejin amatatetekuinol […,] uan ika xiixui”. Ezequiel tatakamatik uan kikuaj nochi. ¿Toni kijtosneki nejin tein kiitak? Ke Ezequiel monekia kuali kiajsikamatis tein yaya kitematiltiti. Monekia kineltokas tein Jehová kiluij porin nejon kichiuaskia maj kinekini kiteixmatiltis. Ompa, Ezequiel kiyekoj ke nejon amatatetekuinol “katka tsopek kemej nekti” (Ezeq. 3:3). ¿Keyej? Porin yejua kiitaya ke katka se tatiochiualis yeski itanauatijkauj Jehová, katka kemej se teisa tein tsopek oso kualtsin (Sal. 19:8-11). Semi motasojkamatia porin Jehová kiixpejpenka maj kichiua nejon tekit.

14. ¿Toni kipaleuij Ezequiel maj uelini kipeualtianiya tekit tein kimakakaj?

¹⁴ Satepan Jehová kiluij Ezequiel: “Xikaki uan kuali xikseli nochi tein nimitsiluia” (Ezeq. 3:10). Jehová kiluijtoya maj mochikauani kielnamikis nochi tein ijkuiliujtoya itech amatatetekuinol uan maj itech tanemiliani. Nejon kipaleuiskia maj okachi takuaujtamati uan maj okachi kiajsikamati tein monekia kitematiltis (Ezeq. 3:11). Keman Ezequiel kuali kiajsikamatik uan kineltokak tein Jehová kiluij, ueliskiaya tanojnotsas uan matamis nejon tekit (no xikonita Salmo 19:14).

15. ¿Toni moneki kuali tikseliskej para tiksentokaskej titanojnotsaskej?

¹⁵ Para tiksentokaskej titanojnotsaskej moneki tikauaskej maj tein Dios techiluia techpaleui maj okachi titakuaujtamatikan. Moneki kuali tikseliskej nochi tein Jehová techiluia. Axkan Jehová technojnotsa ika Biblia. ¿Keniuj uelis tikmatiskej ox iTajtol Dios techpaleuijtok maj tikpatakan kemej titanemiliaj uan tein tikmachiliaj?

16. ¿Toni moneki tikchiuaskej ika iTajtol Dios uan keniuj uelis tikchiuaskej?

¹⁶ Keman titakuaj techpaleuia porin techchikaua, no ijkon keman timomachtiaj iTajtol Dios uan itech titanemiliaj techpaleuia porin okachi titakuaujtamatij. Yejua nejin tein Jehová kinekia techmachtis keman kichiuak maj Ezequiel kiitani se amatatetekuinol. Yejuatsin kineki maj kemej yeskia ika timotamakakan iTajtol, tein kijtosneki maj  kuali tikajsikamatikan. Uelis tikchiuaskej nejin komo tikchiuaj netataujtil, titaixtajtoltiaj uan itech titanemiliaj. Yekinika, tikchiuaj netataujtil para uelis kuali tikseliskej tein Dios kinemilia. Ompa, tikixtajtoltiajya Biblia uan satepan itech titanemiliaj. ¿Keniuj techpaleuis nejin? Keman okachi itech titanemiliaj tein tikixtajtoltiaj, techpaleuis maj okachi tikajsikamatikan iTajtol Dios uan maj okachi titakuaujtamatikan.

17. ¿Keyej motelneki maj itech titanemilikan tein tikixtajtoltiaj itech Biblia?

¹⁷ ¿Keyej motelneki maj tikixtajtoltikan Biblia uan maj itech titanemilikan? Porin nejon techmakas chikaualis tein techpaleuis maj tiksentokakan tikteixmatiltikan tein kichiuas iTaixyekanalis Dios. Satepan no techpaleuis keman xa monekis tiktematiltiskej ke Dios kintatsakuiltis akin amo yolkualmej. Keman okachi itech titanemiliaj ikualneskayouan Jehová, okachi kuali timouikaj iuan. Uan nejon kichiua maj tikmachilikan teisa tein kemej yeskia tsopek uan tel kualtsin, tein kijtosneki ke tiyolseuij uan tiyolpakij (Sal. 119:103).

18. ¿Toni kiitaskej akin nemij kampa titanojnotsaj uan keyej?

¹⁸ Axkan, tejuan amo titanauatianij ijkon kemej Ezequiel, sayoj ke tikpiaj iTajtol Dios kampa yejuatsin techiluia tein kineki maj tiktematiltikan. Yejua ika tikixtaliaj tiksentokaskej titanojnotsaskej hasta keman Jehová kijtos maj amo tikchiuakanok. Keman ejkos tonal keman Jehová kiixtalis tein kinnamiki kiseliskej nochin, amo akin uelis kijtos ke amo kinejmachtijkej (Ezeq. 3:19; 18:23). Ijkuak, kiitaskej ke tein tiktematiltiayaj ualeuaya de Dios.

19. ¿Toni techpaleuis maj tiksentokakan titanojnotsakan?

¹⁹ ¿Toni techpaleuis maj tiksentokakan titanojnotsakan? Eyi taman tein Ezequiel no kipaleuij: tiksentokaj titanojnotsaj porin tikmatij ke Jehová technauatia, porin ichikaualis techpaleuia uan porin timomachtiaj iTajtol Dios. Kemej Jehová techpaleuia, senkis tikixtaliaj tiksentokaskej titanojnotsaskej uan titaxikoskej “hasta keman tatamis” (Mat. 24:13).