1, 2. 1) ¿Toni tikitaskej itech nejin tamachtilis? 2) ¿Toni kinextia ke Jehová kineki techpaleuis?

 JEHOVÁ uelis techpaleuis maj titaxikokan keman tikpanouaj ouijkayomej uan maj tiyolpakikan keman tiktekitiliaj. Itech nejin tamachtilis tikitaskej keniuj kichiua uan toni moneki tikchiuaskej para maj techpaleui tein techmaka. Sayoj ke achto tikitaskej ox Jehová yekmelauj kineki techpaleuis.

² Para tikmatiskej nejin, maj tikitakan se tajtol tein kikuik tatitanil Pablo keman kintajkuilouilij tokniuan hebreos. Yejua kijtoj: “Jehová nechpaleuia. Amo nimouis. ¿Toni uelis nechchiuiliskej?” (Heb. 13:6). Seki diccionarios tein ika tajtouaj Biblia kijtouaj ke tajtol “nechpaleuia”, mokui keman ika motajtoua aksa akin tsikuini para kipaleuis aksa akin tajtani maj kipaleuikan. Xikonnemili keniuj Jehová ijsiujka kipaleuia aksa akin semi motekipachojtok. Nejin kinextia ke Jehová yekmelauj kineki techpaleuis. Keman Jehová techpaleuia ueli tikxikouaj tein yeski ouijkayot uan ueli tiksentokaj tiyolpakij.

3. ¿Toni eyi taman ika techpaleuia Jehová para maj titaxikokan uan maj tiksentokakan tiyolpakikan keman tikpanouaj ouijkayomej?

³ ¿Keniuj techpaleuia Jehová maj titaxikokan uan maj tiksentokakan tiyolpakikan keman tikpanouaj ouijkayomej? Itech amatajkuilol Isaías techiluia keniuj. Miak taman tein Jehová achtook kimatiltij tanauatijkej Isaías semi kinpaleuia itekitikauan Dios axkan. Uan no, miakpa kikuik tajtolmej tein amo ouij se kiajsikamati keman ika tajtoj keniuj tamati Jehová. Kemej neskayot, itech capítulo 30, Isaías kijtoj seki taman tein kualtsin tein ika  kimelauak keniuj Jehová kinpaleuia itekitikauan. Yejua kijtoj ke Jehová 1) techkaki uan technankilia keman tiktataujtiaj, 2) techixyekana uan 3) techtatiochiuia axkan uan satepan. Maj ika titajtokan nejin eyi taman.

4. 1) ¿Keniuj kijtoj Jehová ke katkaj judíos, uan toni kikauak maj kinpano? 2) ¿Toni kijtoj Jehová ke ueliskia kichiaskej judíos akin amo kikauayaj? (Isaías 30:18, 19).

⁴ Ipeujyan Isaías capítulo 30, Jehová kijtoj ke judíos katkaj “yoltakuaujkej” uan ke ‘okachiok tajtakouayaj maski ipa tajtakolchiujtoyajya’. Uan satepan kijtoj: “Nejin xolal taixnamiki, […] amo kinekij kikakiskej tein Jehová tanauatia” (Is. 30:1, 9). Kemej amo tatakamatiaj, Isaías kijtoj ke Jehová kikauaskia maj kinpano tein tel amo kuali (Is. 30:5, 17; Jer. 25:8-11). Uan yejua nejon tein panok porin babilonios kinuikakej. Sayoj ke seki judíos kemaj tatakamatiaj, uan Isaías kijtoj ke ueliskia kichiaskej tein kuali. Yejua kiniluij ke Jehová kinkauaskia maj mokepanij Jerusalén (xikonixtajtolti Isaías 30:18, 19). Uan nejon mochiuak, porin satepan Jehová kinkixtij de Babilonia, sayoj ke amo niman kichiuak. Keman moijtoua “Jehová kiita kemanian moneki namechpaleuis” kiteajsikamatiltiaya ke Jehová amo niman kinmakixtiskia nejon judíos akin amo kikauayaj, ta monekia panos se tiempo. Uan panok 70 xiujmej hasta keman yejuatsin kikauak maj seki judíos mokepanij Jerusalén (Is. 10:21; Jer. 29:10). Keman judíos yetoyaj Babilonia chokayaj porin semi motayokoltiayaj, sayoj ke keman mokepkej Jerusalén chokayaj porin semi yolpakiaj.

5. ¿Toni techmatiltia tein kijtoua Isaías 30:19?

⁵ Axkan no semi techyolchikaua nejin: “Keman tiktataujtis maj mitspaleui yejuatsin mitsiknelis” (Is. 30:19). Isaías techmatiltia ke Jehová kuali kikaki keman tiktataujtiaj uan niman technankilia. Tanauatijkej no kijtoua: “Keman mitskakis, niman mitsnankilis”. Nejin techelnamiktia ke Jehová amo sayoj kineki kinpaleuis akin kitajtaniaj maj kinpaleui, ta yekmelauj kineki kichiuas. Tikmatiskej nejin techpaleuia maj titaxikokan uan maj tiksentokakan tiyolpakikan keman tikpanouaj ouijkayomej.

6. ¿Keniuj kinextia tein kijtoua Isaías ke Jehová kikaki sejse itekitikauj keman kitataujtia?

⁶ Nejin versículo no techmatiltia ke Jehová kuali kikaki keman tiktataujtiaj tisejsemej. ¿Keniuj tikmatij nejin? Porin ipeujyan Isaías capítulo 30 Jehová kijtoua “namejuan”, porin kiniluia nochin itekitikauan. Sayoj ke itech versículo 19 kijtoua “tejua”, porin kiluijtok sejse itekitikauj. Isaías kijtoua: “tejua yekmelauj amo tichokasok”, “yejuatsin mitsiknelis”, “mitsnankilis”. Kemej Jehová toTajtsin akin semi techtasojta, keman semej ikoneuan tayokoxtok amo kiluia: “Moneki yeski tiyolchikauak kemej mokniuj”. Yejuatsin toka motekipachoua tisejsemej, uan techkaki keman tisejsemej tiktataujtiaj (Sal. 116:1; Is. 57:15).

7. ¿Keniuj kinextijkej Isaías uan Jesús ke moneki miakpa se kitataujtis Jehová?

⁷ Keman tiktataujtiaj Dios ika teisa tein techtekipachoua, yekinika xa techmakas chikaualis para titaxikoskej. Uan komo tiksentokaj tikpiaj nejon ouijkayot, xa monekis maj miakpa tiktajtanikan maj techmaka chikaualis para titaxikoskej. Yejua nejon tein Jehová kineki  maj tikchiuakan. Uan ijkon kinextia nejin tein Isaías kijtoj: “Amo xikauakan maj moseui” (Is. 62:7). ¿Toni kijtosneki nejin? Ke moneki tiksentokaskej tiktataujtiskej Jehová uan kemej yeskia amo tikauaskej maj moseui. Nejin techelnamiktia tein Jesús kijtoj itech Lucas 11:8-10, 13 keman ika tajtoj netataujtil. Ika miak neskayomej Jesús kinextij ke keman tiktataujtiskej Jehová moneki miakpa tikchiuaskej uan tiksentokaskej tiktajtaniskej ichikaualis. No uelis tiktajtaniskej Jehová maj techixyekana keman monekis tikixpejpenaskej teisa.

8. ¿Keniuj mochiuak tein kijtoua Isaías 30:20, 21?

⁸ (Xikonixtajtolti Isaías 30:20, 21). Tateuianij babilonios kiyoualojkej Jerusalén se xiuit uan tajko. Itech nejon tonalmej judíos tel tajyouijkej. Sayoj ke, itech versículo 20 uan 21 kijtoua ke Jehová motenkauak ke kinmakixtiskia komo moyolpatayaj uan kikauayaj tein kichiujtoyaj. Isaías kijtoj ke Jehová katka ‘ininUeyi Tamachtijkauj’ uan motenkauak ke yejuatsin kinmachtiskia keniuj monekia kiueyichiuaskej. Nejin mochiuak keman judíos kiskej de Babilonia. Jehová kinextij ke katka ininUeyi Tamachtijkauj. Uan kemej kinixyekanak, judíos uelik oksepa kiueyichiujkej kemej yejuatsin kinekia. Semi tiyolpakij porin axkan Jehová no kinextia ke toUeyi Tamachtijkauj.

9. ¿Katiyejua se taman kemej Jehová techixyekana axkan?

⁹ Tikpiaj ueyi tatiochiualis maj Jehová techmachti. Isaías kijtoua ke tejuan kemej yeskia seki momachtianij akin Jehová kinmachtia ika ome taman. Yekinika kijtoua: “Tikitas moUeyi Tamachtijkauj ika moixtololouan”. Ika tein Isaías kijtoj kinextia ke tamachtijkej yetok ininixpan akin kinmachtia. ¿Keniuj techmachtia Jehová axkan? Itechkopa inechikol. Uan semi timotasojkamatij porin kuali techmachtia itech nechikolmej, uejueyi nechikolmej, amaixmej, tamachtilis tein mejmetstika kisa itech JW Broadcasting^® uan ika miak tamanok. Nochi nejin techpaleuia maj titaxikokan uan maj tiksentokakan tiyolpakikan keman tikpanouaj ouijkayomej.

10. ¿Keniuj tikakij Dios taikampa?

¹⁰ Isaías kinextia ojpatika taman kemej Jehová techmachtia keman kijtoua: “Monakasuan kikakiskej moikampa  nejin tajtolmej”. Axkan Isaías kinextia ke Jehová kemej yeskia se tamachtijkej akin youi ininikampa akin kinmachtia uan kiniluijtiuj kanikauin moneki yaskej. ¿Uan axkan keniuj tikakij ke Dios technojnotsa taikampa? Keman tikixtajtoltiaj Biblia. Ompa moijkuiloj ne uejkauj tein yejuatsin kinemilia. Yejua ika, keman tikixtajtoltiaj Biblia kemej yeskia tikakij ke Jehová technojnotsa taikampa oso desde ne uejkauj (Is. 51:4).

11. ¿Toni moneki tikchiuaskej para uelis tiksentokaskej tiktekitiliskej Jehová ika yolpakilis uan keyej?

¹¹ ¿Keniuj uelis okachi techpaleuis tein Jehová techiluia itech iTajtol uan inechikol? Isaías kijtoua ome taman. Yekinika kijtoua “Yejua nejin ojti”, uan ojpatika “Itech xinentinemi” (Is. 30:21). Yejua ika amo sayoj moneki tikixmatiskej ojti, ta moneki ompa tiaskej. Jehová techmachtia ika iTajtol uan inechikol, ijkon ueli tikmatij toni kineki maj tikchiuakan uan keniuj uelis tikchiuaskej. Moneki tikchiuaskej nejin ome taman para uelis tiksentokaskej tiktekitiliskej Jehová ika yolpakilis. Sayoj ijkon uelis titakuaujtamatiskej ke yejuatsin techtatiochiuis.

12. Kemej kijtoua Isaías 30:23-26, ¿keniuj kintatiochiuiskia Jehová itekitikauan?

¹² (Xikonixtajtolti Isaías 30:23-26). ¿Keniuj mochiuak ne uejkauj nejin tein achtook moijtojka? Judíos akin kiskej de Babilonia uan mokepkej Jerusalén kiselijkej miak taman tein kuali, porin Jehová kinmakak tein kinpaleuij maj kisentokakan yoltokan uan maj kisentokakan kitekitilikan. Kinmakak miak taman tein kikuaskej. Sayoj ke no kinmakak tein okachi monekia, tein kinpaleuiskia maj iuan motokikan uan maj oksepa kiueyichiuakan kemej yejuatsin kiyolpaktia. Ijkuak, Jehová kinmakak itekitikauan miak taman tein kuali kemej amo keman ijkon kichiujtoya. Kemej kinextia versículo 26, Jehová kichiuak maj kemej yeskia tatanesi porin kinpaleuij maj kiajsikamatikan iTajtol (Is. 60:2). Kemej Jehová kintatiochiuij, itekitikauan yolpakkej uan moyolchikaujkej. Nejon kinpaleuij maj kisentokakan kitekitilikan. Yejua ika Judíos xa semi yolpakiaj (Is. 65:14).

13. ¿Keniuj axkan oksepa kiueyichiuaj Jehová kemej kiyolpaktia ijkon kemej achtook moijtojka?

¹³ Achtook moijtojka ke oksepa kiueyichiuaskiaj Jehová kemej kiyolpaktia,  ¿mochiuani nejon axkan? Kemaj. Itech xiuit 1919 hasta axkan, millones kisanij de Ueyi Babilonia, tein kijtosneki nochi taneltokalismej tein amo melaujkej. Kinpaleuianij maj moajsikan kemej yeskia itech se xochital tein okachi kuali ke Tal tein Jehová kinmakaka israelitas (Is. 51:3; 66:8). ¿Toni kijtosneki keman moijtoua ke moajsij kemej yeskia itech se xochital?

14. ¿Toni kemej yeskia se xochital, uan akonimej ompa moajsij? (Xikonita nota).

¹⁴ Itech xiuit 1919 hasta axkan, tokniuan taixpejpenalmej oso taijitalmej yolpakinij kisenueyichiuaskej Jehová. b Uan akin kichiaj nemiskej nikan taltikpak oso “okseki ichkamej”, no semi yolpakinij kisenueyichiuaskej. Jehová kinmakani itekitikauan miak taman tein kuali (Juan 10:16; Is. 25:6; 65:13).

15. ¿Kani moajsi xochital axkan?

¹⁵ ¿Kani moajsi nejon xochital axkan? Kemej itekitikauan Jehová nemij itech nochi taltikpak, nejon xochital no moajsi itech nochi taltikpak. Yejua ika, maski kampa yeski tinemiskej tinochin uelis timoajsiskej ompa sayoj komo tikueyichiuaj Jehová kemej kiyolpaktia.

16. ¿Keniuj uelis tiksentokaskej tikitaskej ke semi kualtsin timoajsiskej iniuan tokniuan?

¹⁶ Komo tikinpatiuitaj nochin tokniuan itech nochi taltikpak, techpaleuis maj tiksentokakan timoajsikan kemej yeskia itech se xochital. Uelis tikchiuaskej nejin komo tikitaj tein kuali tein kichiuaj tokniuan uan amo ininnepololuan (Juan 17:20, 21). ¿Keyej motelneki ijkon tikchiuaskej? Maj itech titanemilikan nejin. Kampa koujtaj onkak miak tataman koujmej. No ijkon, itech nechikolmej moajsij tokniuan akin tatamamej kemej yeskia nejon koujmej (Is. 44:4; 61:3). Maj amo tikauakan maj nejon techtsakuili tikitaskej ke koujtaj takualtsinkan.  Tein kijtosneki ke maski tinochin timopolouaj, maj amo tikauakan maj nejon techtsakuili tikitaskej ke semi kualtsin timoajsiskej iniuan tokniuan.

17. ¿Keniuj uelis titapaleuiskej tisejsemej maj nochin tokniuan okachi kuali mouikakan?

¹⁷ ¿Keniuj uelis titapaleuiskej tisejsemej maj nochin tokniuan okachi kuali mouikakan? Moneki timochikauaskej kuali timouikaskej iniuan (Mat. 5:9; Rom. 12:18). Keman tejuan yekinika tiktemouaj kuali timouikaskej iniuan oksekin, titapaleuiaj maj nejin xochital okachi kualtsin moita. Tikelnamikij ke nochin tokniuan akin moajsij itech nechikol, Jehová kichiuak maj iuan motokikan (Juan 6:44). Maj tiknemilikan keniuj Jehová semi yolpaki keman kiita ke timochikauaj titapaleuiskej maj nochin tokniuan okachi kuali mouikakan, porin yejuatsin semi kinpatiuita (Is. 26:3; Ageo 2:7).

18. ¿Itech toni moneki titanemiliskej uan keyej?

¹⁸ ¿Keniuj uelis okachi techpaleuis nochi tein kuali tein Jehová techmaka? Maj itech titanemilikan tein timomachtiaj itech Biblia uan itech amaixmej. Komo ijkon tikchiuaj, tiknextiskej kualneskayomej tein techpaleuiskej maj okachi tikintasojtakan tokniuan (Rom. 12:10). Keman itech titanemiliaj tein kuali tein Dios techmaka axkan, techpaleuia maj okachi kuali timouikakan iuan. Uan keman itech titanemiliaj tein kuali tein techmakas satepan, techpaleuia maj tikneltokakan ke uelis tiktekitiliskej nochipaya. Nochi nejin kichiuas maj okachi tiyolpakikan keman tiktekitiliskej Jehová.

19. 1) Kemej kijtoua Isaías 30:18, ¿toni uelis senkis tikneltokaskej? 2) ¿Toni techpaleuis maj titaxikokan uan maj tiyolpakikan?

¹⁹ Jehová senkis techpaleuis keman kiixpolos nochi tein amo kuali (Is. 30:18). Kemej yejuatsin “se Dios akin kichiua tein kuali yetok”, senkis tikneltokaj ke kiixtalijya kemanian kiixpolos Satanás uan nochi tein kiixyekana, uan amo kikauas maj pano nion se tonal (Is. 25:9). Jehová uan tejuan amo tiyolijsiuij uan tiksentokaj tikchiaj maj ejko tonal keman senkis techmakixtis. Kemej nejon tonal ayamo ejko, senkis tikixtaliaj nochipa tiktataujtiskej Jehová porin tikpiaj nejon tatiochiualis. No senkis tikixtaliaj timomachtiskej iTajtol, tikchiuaskej tein ompa kijtoua uan itech titanemiliskej tein kuali tein techmakani axkan uan tein techmakas satepan. Komo tiksentokaj tikchiuaj nochi nejin, Jehová techpaleuis maj titaxikokan uan maj tiyolpakikan keman tiktekitiliaj.