1, 2. ¿Toni tein amo kuali ueliskia techchiuiliskej?

 JESÚS ika tajtoj se siuatsin akin amo kipiayaok itakatsin akin kiitato se juez para maj kipaleui porin kichiuiliayaj tein amo kuali. Imomachtijkauan Jesús kuali kiajsikamatiaj nejon siuatsin porin itech nejon tonalmej miakej kinchiuiliayaj tein amo kuali (Luc. 18:​1-5). Tejuan no ueli tikajsikamatij keniuj momachiliaya porin tinochin kemansa no techchiuiliaj tein amo kuali.

² Axkan miakej techikoitaj, kinchiuiliaj tein amo kuali oksekin uan kiixnejnekij tein amo ininaxka. Kemej miakej kichiuaj nejin, tikmatij ke no uelis techchiuiliskej tein amo kuali (Ecl. 5:8). Sayoj ke xa okachi techyolkokos keman se tokniuj techchiuilis nejon. Maski tikmatij ke tokniuan amo kiixnamikij tamachtilis tein melauak, yejuan tajtakolejkej uan kemansa no uelis techchiuiliskej tein amo kuali. Sayoj ke tein Jesús kichiuak keman kitajyouiltijkej akin kiixnamikiaj uelis techmachtis miak taman. Komo timochikauaj tikintapojpoluiskej akin techixnamikij keman techchiuiliaj tein amo kuali, ¿ueliskia no ijkon tikchiuaskej iniuan tokniuan? Uan, ¿keniuj momachilia Jehová keman se tokniuj oso aksa techchiuilia tein amo kuali? ¿Kiita tein techpanoua?

3. ¿Keniuj tikmatij ke Jehová kiita tein techchiuiliaj?

³ Jehová amo kiuelita maj techchiuilikan tein amo kuali uan kiita keman ijkon techchiuiliaj. “Jehová kiuelita maj mochiua tein kuali yetok” (Sal. 37:28). Jesús kijtoj ke Dios “kiitas maj nimantsin kinpaleuikan” itekitikauan keman monekis (Luc. 18:​7, 8). Uan amo uejkaua kiixpolos tein techtajyouiltia uan amo kikauas maj techchiuilikanok tein amo kuali (Sal. 72:​1, 2).

4. ¿Keniuj techpaleuia Jehová?

 ⁴ Moneki timochiaskej hasta maj Jehová kiixpolo nochi tein techtajyouiltia, maski ijkon yejuatsin techpaleuia maj tikmatikan toni moneki tikchiuaskej keman techchiuiliskej tein amo kuali (2 Ped. 3:13). Techmachtia toni moneki tikchiuaskej para amo timokuejmolkalakiskej keman techtajyouiltiaj. Uan no, tein Jesús kichiuak uelis semi techpaleuis. Jehová no techyolmajxitia itech Biblia tein uelis tikchiuaskej keman techchiuiliskej tein amo kuali.

MAJ AMO NIMAN TIKUALANIKAN

5. ¿Toni moneki tikchiuaskej keman techchiuiliskej tein amo kuali?

⁵ Xa timoyolkokojtokej uan timotekipachojtokej porin techchiuilijkej tein amo kuali (Ecl. 7:7). Job uan Habacuc akin kuali kitekitilijkej Jehová no ijkon momachilijkej (Job 6:​2, 3; Hab. 1:​1-3). Maski kemansa ijkon timomachiliskej, moneki timoyekpiaskej para amo tikchiuaskej tein amo moneki.

6. ¿Toni techmachtia tein kichiuak Absalón? (No xikonita taixkopin).

⁶ Komo aksa akin tiktasojtaj oso tejuan techchiuiliaj tein amo kuali, xa tiknekiskej timomakepaskej. Sayoj ke komo ijkon tikchiuaj, xa okachi timokuejmolkalakiskej. Maj tiknemilikan tein kichiuak Absalón, semej ikoneuan tekiuaj David. Yejua semi kualanik keman kimatik ke itakpaikniuj Amnón ika mauiltijka iikniuj Tamar. ITanauatil Moisés kijtouaya ke Amnón monekia mikis (Lev. 20:17). Se kiajsikamati keyej Absalón tel kualantoya, sayoj ke amo kinamikia maj yejua kimiktiani Amnón (2 Sam. 13:​20-23, 28, 29).

7. ¿Toni kinemiliaya salmista keman kiitaya ke sekin kichiuayaj tein amo kuali?

⁷ Keman tikitaj ke akin kichiuaj tein amo kuali amo teyi kinpanoua, xa tiknemiliskej ke nenkaj komo tikchiuaj tein kuali yetok. Maj itech titanemilikan salmista, yejua kiitaya ke akin amo yolkualmej kisentokayaj yolpakiaj maski kintajyouiltiayaj oksekin. Yejua kijtoj: “Ijkon kichiuaj akin amo yolkualmej, akin amo teyi kintekipachoua” (Sal. 73:12). Amo kuali momachiliaya keman kiitaya ke oksekin kichiuayaj tein amo kuali uan kinemilij ke nenkaj katka maj kisentokani kitekitiliani Jehová. Yejua kijtoj: “Keman niknekia nikajsikamatis, semi nechtekipachouaya...” (Sal. 73:​14, 16). Uan no kijtoj: “Nejua yaya niati itech okse ojti, kemej yeskia yaya  niuetsiti” (Sal. 73:2). Nejin no kipanok se tokniuj akin monotsa Alberto. a

8. ¿Toni kichiuak se tokniuj keman kichiuilijkej tein amo kuali?

⁸ Alberto kipantijkaj ke kiichtekka tomin tein mosentiliaya itech nechikol maski amo melauj katka. Yejua ika amo katkaok tayekankej, uan tokniuan akin kimatkej amo kipoujkaitayajok. Yejua kijtoua keniuj momachiliaya: “Nikualantoya uan nimoyolkokouaya”. Kemej semi moyolkokouaya kikauak Jehová uan makuil xiuit amo yajkiok nechikolmej nion tanojnotsakok. Tein kipanok nejin tokniuj techmachtia tein uelis panos komo titelkualanij keman techchiuiliaj tein amo kuali.

MAJ TIKCHIUAKAN KEMEJ JESÚS

9. ¿Toni tein amo kuali kixikoj Jesús? (No xikonita taixkopimej).

⁹ Jesús techmachtij keniuj uelis tikchiuaskej kemej yejua. Miakej kichiuilijkej tein amo kuali. Sekin ichankauan amo kineltokayaj ke yejua katka Mesías uan kijtouayaj ke kuatapolojka. Akin taixyekanayaj itech taneltokalis kijtouilijkej ke iniuan tekitia amo kuali ejekamej. Uan soldados romanos ika mokejkelojkej, kimagakej uan kimiktijkej (Mar. 3:​21, 22; 14:55; 15:​16-20, 35-37). Maski ijkon, taxikoj uan amo momakepak.  ¿Toni techmachtia tein kichiuak?

10. ¿Toni kichiuak Jesús keman kichiuiliayaj tein amo kuali? (1 Pedro 2:​21-23).

¹⁰ (Xikonixtajtolti 1 Pedro 2:​21-23). b Jesús tel kuali technextilij toni moneki tikchiuaskej keman oksekin techchiuiliskej tein amo kuali. Yejua kimatia kemanian tajtos uan kemanian amo (Mat. 26:​62-64). Keman kitakajkayauiliayaj, kemansa kiixtaliaya amo teyi kijtos (Mat. 11:19). Uan keman tajtouaya, amo kinuijuikaltiaya, amo kinijijtouaya nion kinmojmoujtiaya akin kitauelitayaj. Jesús nochipa kimatia toni kichiuas porin “kikauak nochi imako juez akin kiixtalia nochi kemej moneki”. Kimatia ke Jehová kiitaya nochi tein amo kuali tein kichiuiliayaj uan takuaujtamatia ke kiyektaliskia nochi keman kiixtalijkaya.

11. ¿Kemanian moneki kuali tikixejekoskej ox titajtoskej oso amo? (No xikonita taixkopimej).

¹¹ Keman techchiuiliskej tein amo kuali, uelis tikchiuaskej kemej Jesús uan achto kuali tiknemiliskej toni tikijtoskej. Kemansa amo moneki tikijtoskej oso tikchiuaskej teisa porin tein techchiuilijkej amo tel fiero. Oso uelis tikixtaliskej amo teyi tikijtoskej porin komo tikchiuaj okachi timokuejmolkalakiskej (Ecl. 3:7; Sant. 1:​19, 20). Sayoj ke kemansa xa monekis tiktenpaleuiskej aksa akin kichiuilijtokej tein amo kuali oso xa monekis tikijtoskej tein melauak tein tikneltokaj (Hech. 6:​1, 2). Uan keman titajtoskej moneki tiknextiskej ke titapoujkaitaj uan ke tiyolnejmachmej (1 Ped. 3:15). c

12. ¿Keniuj uelis tikauaskej nochi “imako juez akin kiixtalia nochi kemej moneki”?

 ¹² No uelis tikchiuaskej kemej Jesús keman tikauaskej nochi “imako juez akin kiixtalia nochi kemej moneki”. ¿Keniuj? Komo aksa kinemilia tein amo kuali de tejuan oso techchiuilia tein amo kuali, uelis titakuaujtamatiskej ke Jehová nochi kimati. Kemej tikmatij ke Jehová kiyektalis nochi, nejon techpaleuia maj titaxikokan keman techchiuiliaj tein amo kuali. Keman titakuaujtamatij iuan Jehová uan tikchiaj maj yejua kimelaua nochi, amo tikualantokej nion titetauelitstokej. Komo tikualanij xa tikchiuaskej tein amo kuali, amo tiyolpakiskejok uan amo kuali timouikaskejok iuan Jehová (Sal. 37:8).

13. ¿Toni uelis techpaleuis maj tiksentokakan titaxikokan keman techchiuiliaj tein amo kuali?

¹³ Amo ueli senkis tikchiuaj kemej Jesús porin kemansa xa tikchiuaskej oso tikijtoskej teisa tein satepan techyolkokos (Sant. 3:2). Uan seki taman tein techchiuilijkej xa kisentokas techtajyouiltis uan techyolkokos hasta keman Dios kiixpolos nochi tein amo kuali. Komo ijkon mitsonpanotok, xikonelnamiki ke Jehová kimati keniuj tionmomachilia. Uan Jesús, akin no tajyouij porin kichiuilijkej tein tel amo kuali, kiajsikamati nochi tein tikonmachilia (Heb. 4:​15, 16). Jehová amo sayoj techmachtia ika tein kipanok iKonetsin, ta no techyolmajxitia ika Biblia kampa techiluia toni tikchiuaskej keman techchiuiliskej tein amo kuali. Maj tikitakan ome versículos tein kipia amatajkuilol Romanos.

“XIKAUAKAN MAJ DIOS KINEXTI IUEYI KUALANYO”

14. ¿Keniuj ‘tikauaj maj Dios kinexti iueyi kualanyo’? (Romanos 12:19).

¹⁴ (Xikonixtajtolti Romanos 12:19). Tatitanil Pablo kinyolmajxitij tokniuan maj ‘kikauakan maj Dios kinexti iueyi kualanyo’. Uan tejuan tikchiuaj nejin keman tikauaj maj yejua Jehová kiita kemanian uan keniuj kinmelauas akin techtajyouiltiaj. Yejua nejon tein kichiuak John keman se tokniuj kichiuilij tein amo kuali. John kijtoj: “Monekia nimochikauas amo nikualanis para amo nikchiuas tein amo kuali, sayoj ke katka ouij. Romanos 12:19 nechpaleuij maj amo niyolijsiui uan maj iuan nitakuaujtamati Jehová”.

15. ¿Keyej semi kuali komo timochiaj maj Jehová kiyektali tein techpanotok?

¹⁵ Semi techpaleuia keman tikauiliaj Jehová maj yejua kiyektali tein techpanotok. Keman ijkon tikchiuaj, amo timotekipachouaj nion timoyolkokouaj porin amo ueli tikmelauaj tejuan toselti kuejmol tein tikpiaj. Jehová kineki techpaleuis. Kemej yeskia techiluiskia: “Xinechkauili maj nejua nikyektali nochi tein amo kuali tein mitspanotok”. Jehová motenkaua ke kimelauas kuejmol tein tikpiaj uan ke kichiuas kemej moneki. Komo tikneltokaj ke Jehová kinmelauas akin kichiuaj tein amo kuali ijkon kemej kijtoua, amo tikualantoskejok porin tikmatij ke yejuatsin kichiuas tein kuali. Yejua nejon tein kipaleuij John, akin ika titajtojkej itech okse párrafo. Yejua kijtoua: “Komo nimochia maj Jehová kiyektali kuejmol tein nikpia, okachi kuali moyektalis ke komo nejua noselti nikmelauaskia”.

“XIKSENTOKA XIKCHIUA TEIN KUALI PARA TIKTANIS TEIN AMO KUALI”

16, 17. ¿Keniuj komo timotataujtiaj techpaleuis maj tikchiuakan tein kuali para tiktaniskej tein amo kuali? (Romanos 12:21).

¹⁶ (Xikonixtajtolti Romanos 12:21). Pablo kijtoj: “Xiksentoka xikchiua tein kuali para tiktanis tein amo kuali”. Keman  Jesús tamachtij itech se tepet, kijtoj: “Xikintasojtakan akin namechtauelitaj uan ximotataujtijtokan ininka akin namechtajyouiltiaj” (Mat. 5:44). Uan yejua nejon tein kichiuak. Xa tiknemilianij keniuj Jesús taxikoj keman soldados romanos kikoujpampilojkej. No kipinaujtijkej uan kiteltajyouiltijkej. Sayoj ke amo ueli senkis tikajsikamatij keniuj tel tajyouij. ¡Tel amo kuali tein kichiuilijkej!

¹⁷ Jesús kisentokak kitasojtak iTajtsin uan amo kikauak maski semi tajyouij. Yejua amo kitajtanij Jehová maj kintatsakuilti nejon soldados, ta kiluij: “NoTajtsin, xikintapojpolui, porin amo kimatij tein kichiuaj” (Luc. 23:34). Komo tiktataujtiaj Jehová maj kinpaleui akin techtajyouiltiaj, techpaleuis maj tiyolseujtokan uan maj amo tikualantokanok nion maj tikintauelitstokanok.

18. ¿Keniuj Alberto uan John semi kinpaleuij keman kitataujtijkej Jehová?

¹⁸ Keman ome tokniuan akin achto ininka titajtojkej kitataujtijkej Jehová, kinpaleuij maj taxikokan keman kinchiuilijkej tein amo kuali. Alberto kijtoua: “Ininka nimotataujtij akin nechchiuilijkaj tein amo kuali. Miakpa niktataujtij Jehová maj nechpaleuiani maj nikelkaua tein amo kuali tein nechpanoka”. ¡Axkan Alberto oksepa kuali kitekitilijtok Jehová! John kijtoua: “Miakpa niktataujtij Jehová maj kipaleui tokniuj akin nechchiuilij tein amo kuali uan maj nechpaleuiani maj niktapojpolui. Yejuatsin nechpaleuij maj amo niksentoka niktauelitsto uan maj amo sayoj nikitsto tein amo kuali tein kichiua. No nechpaleuij maj niyolseui”.

19. ¿Toni moneki tikchiuaskej achto ke Dios kiixpolos nochi tein amo kuali? (1 Pedro 3:​8, 9).

¹⁹ Amo tikmatij toni no techchiuiliskej achto ke Dios kiixpolos nochi tein amo kuali. Sayoj ke maski tein yeski techpanos maj tiksentokakan tiktataujtikan Jehová maj techpaleui. Maj timochikauakan tikchiuaskej kemej Jesús keman kitajyouiltijkej uan maj tiksentokakan tikchiuakan tein Biblia tayolmajxitia. Komo ijkon tikchiuaj Jehová techtatiochiuis (xikonixtajtolti 1 Pedro 3:​8, 9).