1, 2. ¿Toni “kuali tekit” kichiuaj tayekananij?

 KOMO tiontekititokya kemej tapaleuijkej, xa tionmochikaujtok tikonchiuas okseki taman tein mitsonpaleuis xionmochiua tayekankej. ¿Tikonuelitaskia tikonchiuas nejon “kuali tekit” tein kichiuaj tayekananij? (1 Tim. 3:1).

² ¿Toni tekit kichiua se tayekankej? Semi tanojnotsa iniuan tokniuan itech nechikol, kinyekpia uan kinmachtia tokniuan. Uan ika tein kijtoua uan kichiua, kinpaleuia maj okachi iuan takuaujtamatikan Jehová. Yejua ika Biblia kijtoua ke nejin takamej akin tel tekitij kemej yeskia “tatiochiualismej” (Efes. 4:8).

3. ¿Toni moneki kichiuas se tokniuj takat para mochiuas tayekankej? (1 Timoteo 3:​1-7; Tito 1:​5-9).

³ ¿Toni moneki kichiuas se tokniuj takat para mochiuas tayekankej? Keman tejuatsin tikontemoua se tekit xa sayoj moneki tionuelis seki taman. Sayoj ke para maj se tokniuj takat mochiua tayekankej amo sayoj moneki maj ueli kichiua seki taman, maski kuali tamachtis oso kuali tanojnotsas amo sayoj ika nejon mochiuas tayekankej, ta no moneki kichiuas seki taman tein moijtoua itech 1 Timoteo 3:​1-7 uan Tito 1:​5-9 (xikonixtajtolti). Itech nejin tamachtilis tikitaskej seki taman tein ika tajtoua nejin versículos: toni moneki kichiuas se tokniuj takat para maj kuali ika tajtokan, keniuj uelis kuali kinixyekanas ichankauan, uan keniuj uelis okachi tapaleuis itech nechikol.

 MAJ KUALI IKA TAJTOKAN

4. ¿Toni moneki kichiuas se tokniuj takat para maj amo kijijtokan uan maj kuali ika tajtokan?

⁴ Para maj aksa ueli mochiua tayekankej, “moneki kuali nemis para maj amo akin kijijto”. Nejin kijtosneki ke tokniuan itech nechikol kuali ika tajtoskej porin kichiua tein kuali uan amo akin kijtouilis ke kichiua tein amo kuali. Uan no, “maj kuali ika tajtokan akin amo taneltokaj”. Akin amo kitekitiliaj Jehová xa ipa amo kiuelitaskej tein kineltoka, sayoj ke amo keman moneki kijtouiliskej ke takajkayaua oso ke amo yolkuali (Dan. 6:​4, 5). Xionmotajtani: “¿Nechitaj tokniuan itech nechikol uan akin amo momachtiaj ke niyolkuali uan ke amo nitakajkayaua?”.

5. ¿Toni kijtosneki maj se ‘kiuelita tein kuali’?

⁵ ‘Semi se kiuelitas tein kuali’ kijtosneki maj se kiita tein kuali tein kichiuaj oksekin uan maj tikiniluikan. No kijtosneki se kiuelitas se kinpaleuis oksekin uan maj se kichiua maski amo kichiaskej (1 Tes. 2:8). ¿Keyej se tayekankej semi moneki maj kiuelita tein kuali? Porin kipaleuis maj yolpaki keman kikuis itiempo para kinyekpias tokniuan uan kuali kichiuas tekit tein kipia itech nechikol (1 Ped. 5:​1-3). Maski kipias miak tekit, semi yolpakis kinpaleuis oksekin (Hech. 20:35).

6. ¿Keniuj aksa kinextia ke kuali kinselia oksekin? (Hebreos 13:​2, 16; no xikonita taixkopin).

⁶ Takat akin ‘kuali kinselia oksekinʼ amo sayoj kineki kinpaleuis itasojikniuan, ta no oksekin (1 Ped. 4:9). Se amatajkuilol kijtoua ke takat akin kuali teselia, yolkuali iniuan hasta akin amo kinixmati uan yolpaki keman kinyoleua ichan. Xionmotajtani: “¿Nechixmatij ke kuali nikinselia nochan tokniuan itech nechikol?” (xikonixtajtolti Hebreos 13:​2, 16). Takat akin kuali teselia yolkuali iniuan nochin akin kikalpanouaj, kemej akin pobres uan akin kitemakatij se tanojnots itech inechikol. No ijkon kichiuaj iniuan akin mochikauaj kinyolchikauaskej tokniuan kemej akin takalpanouaj itech circuito (Gén. 18:​2-8; Prov. 3:27; Luc. 14:​13, 14; Hech. 16:15; Rom. 12:13).

7. ¿Keniuj se tokniuj tayekankej kinextia ke amo kitelnejneki motomintis?

⁷ ‘Maj amo […] kitelnejneki motomintisʼ. Nejin kijtosneki ke amo moneki kitemos kipias miak taman. Maski kipias tomin oso amo, moneki okachi kitayekanaltis kitekitilis Jehová (Mat. 6:33). Moneki kikuis  itiempo, ichikaualis uan okseki taman tein kipia para kiueyichiuas Jehová, kinyekpias ichankauan uan tapaleuis itech nechikol (Mat. 6:24; 1 Juan 2:​15-17). Xionmotajtani: “¿Nikita ke motelneki tomin? ¿Niyolpaki ika tein nikpia para nimoixpanoltis? ¿Oso nochipa nikneki nikpias okachi tomin uan okseki taman?” (1 Tim. 6:​6, 17-19).

8. ¿Keniuj kinextia aksa ke ‘kuali kiixejekoua nochi tein kichiuaʼ uan ‘ueli motsakuiliaʼ?

⁸ ‘Kuali kiixejekoua nochi tein kichiuaʼ uan ‘ueli motsakuiliaʼ, aksa kinextia nejin keman amo motelpanoltia hasta keman takua uan tatayi. No ijkon kichiua keman kuali motasaltia uan kiteki itson kemej moneki, uan no keman kuali kiixpejpena toni ika moixpetanis. Amo kichiua kemej akin amo kitekitiliaj Jehová (Luc. 21:34; Sant. 4:4). Amo niman kualani maski oksekin kichiuiliaj tein amo kuali. Tayekankej amo moneki ‘tauanas’ nion maj kiixmatikan kemej aksa akin tel tayi. Xionmotajtani: “¿Niknextia ke kuali nikixejekoua nochi tein nikchiua uan ueli nimotsakuilia?”.

9. ¿Toni kijtosneki maj aksa ‘yektalnamikto’ uan maj ‘kichiua nochi kemej moneki’?

⁹ Tayekankej akin ‘yektalnamikiʼ, kiita toni kijtoua Biblia achto ke kichiuas teisa. Keman itech tanemilia keniuj uelis kichiuas tein kijtoua Biblia, okachi kiajsikamati tein uelis kichiuas uan kuali taixpejpena. Amo ijsiujka taixpejpena, ta achto kitemoua nochi tein moneki kimatis (Prov. 18:13). Ijkon kinextia ke tanemilia kemej Jehová keman kiixtalia teisa. Uan no, ‘kichiua nochi kemej monekiʼ, nejin kijtosneki ke kiyekchiua nochi uan nochipa ajsi kualkan kampa moneki yas. Ijkon nochin iuan takuaujtamatij uan kiitaj ke tatakamati. Oksekin kuali ika tajtoskej keman kichiuas nochi tein timomachtijkej. Axkan maj tikitakan tein Biblia kijtoua ke moneki kichiuas se tayekankej para kuali kinixyekanas ichankauan.

MONEKI KUALI KINIXYEKANAS ICHANKAUAN

10. ¿Toni moneki kichiuas se takat para kinextis ke “kuali kinixyekana ichankauan”?

¹⁰ Komo se tokniuj akin monamiktijya kineki mochiuas tayekankej, isiuatsin uan ichankauan no moneki maj kuali ininka tajtokan, yejua ika moneki ‘kuali kinixyekanas ichankauan’. Oksekin moneki kiixmatiskej ke kuali kinixyekana, ke kintasojta uan kuali kinyekpia. Moneki iniuan taueyichiuas, kiitas maj yakan nochi nechikolmej uan maj mochikauakan tanojnotsaskej. ¿Keyej semi moneki maj kichiua nejin? Porin tatitanil Pablo kijtoj: “Komo se takat amo kimati keniuj kinixyekanas ichankauan, ¿keniuj kinyekpias akin pouij itech inechikol Dios?” (1 Tim. 3:5).

11, 12. ¿Keyej para yeski tayekankej se tokniuj takat moneki maj ichankauan kichiuakan tein kuali? (No xikonita taixkopin).

¹¹ Komo tokniuj kinpia ikoneuan akin konemejok uan ayamo kiajxitiaj 18 xiujmej, moneki maj ‘kitakamatikan uan maj kichiuakan tein kuali’. Keman kinmachtis moneki kinnextilis ke kintasojta. Nochin konemej kiuelitaj uetskaskej uan mauiltiskej, sayoj ke komo kuali kinmachtiaj, no tatakamatiskej, tapoujkaitaskej uan kichiuaskej tein kuali. Uan no, tepopaj moneki kinpaleuis ikoneuan maj kuali mouikakan iuan Jehová, maj mochikauakan kichiuaskej tein kijtoua Biblia uan maj kiixtalikan moauiskej.

¹² ‘Moneki yeski se takat akin ikoneuan taneltokaj, maj amo eliuistikan nion maj taixnamikikan’. Sayoj ke, ¿toni panoua komo ikoneuj se tokniuj akin taixyekana itech nechikol kichiua se ueyi tajtakol? Komo tepopaj  amo kuali kimachtij uan kisenkauak, xa amo uelis yeskiok tayekankej itech nechikol (xikonita amaix La Atalaya 15 de octubre xiuit 1996, página 21, párrafos 6, 7).

MAJ TAPALEUIKAN ITECH NECHIKOL

13. ¿Keniuj aksa kinextia ke “amo moueyimati” nion ‘kitemoua maj nochipa mochiua tein kinemilia’?

¹³ Tokniuan takamej akin kichiuaj tein Biblia kijtoua semi tapaleuiaj itech nechikol. Tokniuj takat akin ‘amo kitemoua maj nochipa mochiua tein kinemilia’ kinpaleuia oksekin maj yolseujkanemikan. Komo tejuatsin amo tikontemoua maj nochipa mochiua tein tikonnemilia, tikonkakis tein oksekin kijtouaj uan tikonajsikamatis. Keman tionmonechikos iniuan tayekananij, ¿tikonpaleuis maj mochiua tein yejuan kiixtaliaj komo amo kitapanauilia tein kijtoua Biblia? Se tayekankej ‘amo moneki moueyimatis’. Nejin kijtosneki ke amo moneki kitemos maj mochiua nochipa tein yejua kineki, ta kiajsikamati ke moneki kikakis tein oksekin kinemiliaj (Gén. 13:​8, 9; Prov. 15:22). Amo moneki “motajtolteuis” nion ‘niman kualanis’. Nejin kijtosneki ke kinpoujkaita oksekin uan amo motajtolteuia, ta yolkuali iniuan. Kemej yolseujkanemi mochikauas nochipa kuali mouikas iniuan oksekin hasta keman kipias se ueyi kuejmol (Sant. 3:​17, 18). Kemej tajtoua kinextia ke kualtakat uan nejon kinpaleuia oksekin maj yolseujtokan hasta akin techixnamikij (Juec. 8:​1-3; Prov. 20:3; 25:15; Mat. 5:​23, 24).

14. ¿Keyej se tokniuj takat akin “yekin peuak taneltoka” amo uelis yeski tayekankej, uan keniuj kinextia ke “amo kikaua Dios”?

¹⁴ Se tokniuj takat amo uelis yeski tayekankej komo “yekin peuak taneltoka”. Moneki panos tiempo para okachi kuali mouikas iuan Jehová uan momachtis kuali kikuis Biblia para kiixtalis tein kichiuas. Ijkon kemej Jesús moneki maj yolyemanik uan maj amo yolijsiui, ta moneki mochias hasta maj Jehová kimaka okachi tekimej itech nechikol (Mat. 20:23;  Filip. 2:​5-8). Uan no, kinextia ke “amo kikaua Dios” keman kitakamati uan keman kichiua tein yejuatsin tanauatia itechkopa inechikol (1 Tim. 4:15).

15. ¿Motelneki maj tayekananij kitemakakan tel kuali tanojnotsmej?

¹⁵ Biblia kijtoua ke tayekankej “moneki kimatis keniuj tamachtis”. ¿Kijtosneki nejin ke moneki kitemakas tel kuali tanojnotsmej? Amo, porin amo nochin tayekananij ueli kichiuaj nejon, sayoj ke keman tanojnotsaj uan kinyolchikauaj tokniuan nochipa kuali kikuij Biblia para tamachtiskej uan tayolchikauaskej (no xikonita 1 Corintios 12:​28, 29 uan Efesios 4:11). Maski ijkon, tokniuj akin kineki mochiuas tayekankej moneki mochikauas kuali tamachtis. ¿Keniuj uelis kichiuas?

16. ¿Keniuj se tokniuj takat uelis okachi kuali tamachtis? (No xikonita taixkopin).

¹⁶ “Nochipa moneki kikuis tajtol tein melauak”. Keman se tayekankej tamachtia senteixtenoj uan keman kiyolmajxitia aksa, kiita maj kisa itech Biblia nochi tein kijtoua. Yejua ika moneki kuali momachtis Biblia uan toamaixuan (Prov. 15:28; 16:23). Keman momachtia, kuali kiita keniuj toamaixuan kimelauaj versículos. Uan keman tamachtia, mochikaua kinpaleuis oksekin maj okachi kitasojtakan Jehová uan maj kinekikan kichiuaskej tein momachtiaj. Okachi kuali tamachtis komo kiniluia maj kiyolmajxitikan okseki tayekananij akin miak xiujmejya tapaleuijtokej uan komo kichiua tein kiluiaj (1 Tim. 5:17). Tayekananij moneki kimatiskej keniuj ‘kinyolchikauaskejʼ tokniuan maski kemansa monekis kinyolmajxitiskej oso hasta ‘kinnextiliskej ke amo kuali’ tein kichiujtokej. Sayoj ke moneki yeskij yolkualmej nochipa keman kichiuaskej nejon. Komo kualtakamej uan teikneliaj uan nochi tein tamachtiaj kikixtiaj itech iTajtol Dios, kuali tamachtiskej porin kichiujtoskej kemej Jesús akin tel kuali tamachtiaya (Mat. 11:​28-30; 2 Tim. 2:24).

 XIKONSENTOKA XIONMOCHIKAUA

17. 1) ¿Toni uelis kinyolchikauas tokniuan tapaleuianij maj kisentokakan mochikauakan para mochiuaskej tayekananij? 2) ¿Toni moneki kielnamikiskej tayekananij keman kiitaskej ox aksa uelisya mochiuas tayekankej? (Xikonita recuadro “ Tayekananij, kuali xikitakan ox aksa uelisya mochiuas tayekankej”).

¹⁷ Sekin tokniuan tapaleuianij xa kinemiliskej ke amo keman uelis mochiuaskej tayekananij porin moneki kichiuaskej miak tamanok. Sayoj ke moneki kielnamikiskej ke nion Jehová nion inechikol kichiaj maj tel kuali kichiuakan nochi nejin (1 Ped. 2:21). Uan no, ichikaualis Jehová kinpaleuis maj ueli kichiuakan nejin tekit (Filip. 2:13). Uan tejuatsin, ¿tikonuelitaskia okachi kuali tikonchiuas oso tikonnextis seki taman tein timomachtijkej? Komo ijkon, xikontataujti Jehová, xikontemo tamachtilismej uan xikontajtani tayekananij keniuj uelis okachi kuali tikonchiuas teisa.

18. ¿Toni moneki kichiuaskej nochin tokniuan tapaleuianij?

¹⁸ Nochin tokniuan hasta akin tayekananijya moneki kisentokaskej kichiuaskej tein timomachtijkej itech nejin tamachtilis (Filip. 3:16). Uan komo tiontekititokya kemej tapaleuijkej, xikonsentoka xikonchiua tein moneki para tionmochiuas tayekankej. Xikonilui Jehová maj mitsonmachti uan maj mitsonpaleui para okachi tikontekitilis uan tiontapaleuis itech nechikol (Is. 64:8). Jehová mitsontatiochiuis komo tionmochikaua tionmochiuas tayekankej.