1. ¿Keniuj Pablo kinitaya tokniuan tapaleuianij?

 TOKNIUAN tapaleuianij itech nechikol kichiuaj se tel kuali tekit. Tatitanil Pablo kitasojkamatia tekit tein kichiuayaj nejon takamej. Yejua ika, keman kintajkuilouilij tokniuan de Filipos, kintajpaloj tayekananij uan no tapaleuianij (Filip. 1:1).

2. ¿Keniuj kiita Luis tekit tein kichiua kemej tapaleuijkej?

² Miakej tokniuan takamej kiuelitaj tekitiskej kemej tapaleuianij itech nechikol. Sekin okichpipilok uan sekin xiuejkejya. Devan kipiaya 18 xiujmej keman kiixtalijkej kemej tapaleuijkej, uan Luis kipiayaya panoua 50 xiujmej. ¿Keniuj kiita Luis tekit tein kichiua? Yejua kijtoua: “Semi niyolpaki ijkon nikinpaleuis tokniuan itech nonechikol. Yejuan kinextiaj ke nechtasojtaj, uan axkan nejua no ueli nikinnextilia ke nikintasojta”. Miakej tokniuan tapaleuianij no ijkon momachiliaj.

3. ¿Toni ika titajtoskej itech nejin tamachtilis?

³ Tokniuj takat, komo tionmoauijya uan ayamo tiontekiti kemej tapaleuijkej, ¿no ueliskia ijkon tiontapaleuis? ¿Keyej monekiskia tikonixtalis nejon? ¿Uan toni kijtoua Biblia ke moneki tikonchiuas? Itech nejin tamachtilis ika titajtoskej nejin. Sayoj ke achto maj tikitakan toni tekit kichiua se tapaleuijkej.

 ¿TONI TEKIT KICHIUA SE TAPALEUIJKEJ?

4. ¿Toni tekit kichiua se tapaleuijkej? (No xikonita taixkopin).

⁴ Dios ika ichikaualis kinixtalia nejin takamej akin moauijkejya para maj kinpaleuikan tayekananij itech miak tataman tekit tein motelneki. Sekin kiitaj maj tokniuan kimatikan kani tanojnotsaskej uan maj kipiakan amaixmej tein kitemakaskej keman tanojnotsatiuij. Miakej tachipauaj uan kiyektaliaj tein moneki itech Kali kampa tiMosentiliaj. Oksekin kinpaleuiaj tokniuan para kimatiskej kani motaliskej oso kitaliaj videos itech nechikolmej. Tokniuan tapaleuianij kitayekanaltiaj kuali mouikaskej iuan Jehová, kitasojtaj uan kitakamatij. Uan no, semi kintasojtaj tokniuan (Mat. 22:​37-39). ¿Toni moneki kichiuas se tokniuj takat para maj mochiua tapaleuijkej itech nechikol?

5. ¿Keniuj se tokniuj takat uelis mochiuas tapaleuijkej?

⁵ Itech Biblia kijtoua toni moneki kichiuas se takat para mochiuas tapaleuijkej (1 Tim. 3:​8-10, 12, 13). Komo tikonneki tionmochiuas tapaleuijkej para tikonpaleuis oksekin, moneki tionmomachtis tein Biblia tajtani uan tionmochikauas tikonchiuas. Sayoj ke achto moneki tikonitas keyej tikonneki ijkon tiontapaleuis.

¿KEYEJ TIKONNEKI TIONMOCHIUAS TAPALEUIJKEJ?

6. ¿Keyej tikonneki tikonpaleuis tokniuan? (Mateo 20:28; no xikonita taixkopin).

⁶ Jesucristo technextilij keyej moneki titapaleuiskej. Yejua kitasojtaya iTajtsin uan oksekin. Yejua ika, kichiuaya nochi tein uelia para kinpaleuis maski monekia kichiuas tein kichiuayaj takeualmej (xikonixtajtolti Mateo 20:28; Juan 13:​5, 14, 15). Komo tejuatsin no tiontetasojta, Jehová mitsontatiochiuis uan mitsonpaleuis maj mitsonixtalikan kemej tapaleuijkej itech nechikol (1 Cor. 16:14; 1 Ped. 5:5).

7. ¿Keyej amo kuali yetok maj se tokniuj kitemo kipias se tekit itech nechikol para maj kiueyitalikan?

⁷ Noyampa semi kuali kiitaj akin ininselti moueyitaliaj. Sayoj ke itech inechikol Jehová amo ijkon panoua. Tokniuj akin kichiua kemej Jesús, tetasojta uan amo kitemoua taixyekanas oso kinextis ke okachi ueyichiujkej ke oksekin. Komo se akin kiuelita moueyitalis kiixtaliskiaj maj  taixyekana itech nechikol, xa amo kinekiskia kichiuas seki taman tein ika kinpaleuis itekitikauan Jehová. Uelis kinemilis ke seki tekimej sayoj kichiuaj akin amo ueyichiuanimej (Juan 10:12). Jehová amo keman kinpaleuis akin sayoj kinekij maj kinueyitalikan (1 Cor. 10:​24, 33; 13:​4, 5).

8. ¿Toni kiniluij Jesús itatitaniluan?

⁸ Kemansa, hasta akin tel kuali iuan mouikayaj Jesús kinekiaj kichiuaskej seki tekimej, sayoj ke amo porin yekmelauj kinekiaj tapaleuiskej. Yejua nejon tein kinpanok Santiago uan Juan. Yejuan kitajtanijkej Jesús maj kinmakani se ueyi tekit keman taixyekantoskiaya. Jesús amo kiniluij ke kuali yetoya tein tajtantoyaj, ta nochin 12 kiniluij: “Akin kinekis yeski ueyichiujkej moneki kintekitilis oksekin, uan akin kinekis namechyekanas moneki yeski inintakeual nochin” (Mar. 10:​35-37, 43, 44). Tokniuan akin mochikauaj tekitiskej porin yekmelauj kinekij tapaleuiskej, kichiuaskej miak taman tein kuali itech nechikol (1 Tes. 2:8).

¿KENIUJ UELIS OKACHI TIKONNEKIS TIONTAPALEUIS?

9. ¿Toni uelis tikonchiuas para tikonnekis okachi tikonpaleuis oksekin?

⁹ Tejuatsin tikontasojta Jehová uan tikonneki tikonpaleuis tokniuan. Sayoj ke, xa amo tikonneki tiontekitis kemej tapaleuijkej itech nechikol porin amo tikonneki tikonchiuas nochi tekit tein yejuan kichiuaj. ¿Toni uelis mitsonpaleuis? Xikonnemili keniuj semi tionyolpakis keman tikonpaleuis tokniuan. Jesús kijtoj: “Okachi se yolpaki keman se kitemaka ke ijkuak temakaj” (Hech. 20:35). Jesús kichiuaya nejin, yejua ika semi yolpakia kinpaleuis oksekin. Uan tejuatsin no uelis tionyolpakis kemej yejua.

10. ¿Keniuj kinextij Jesús ke semi kiyolpaktiaya kinpaleuis oksekin? (Marcos 6:​31-34).

¹⁰ Jesús semi yolpakia kinpaleuis oksekin (xikonixtajtolti Marcos 6:​31-34). Se tonal, keman Jesús uan itatitaniluan tel sioujtoyajya, yajkej kampa taseltijkan para moseuiskej. Sayoj ke miakej ajsikej achto ke yejuan porin kinekiaj maj kinmachti. Jesús ueliskia kiniluis ke amo porin yejua uan itatitaniluan “nion ueliaj takuayaj”. Jesús no ueliskia kinmachtis sayoj se oso ome taman uan kiniluiskia maj yakan. Sayoj ke kemej yekmelauj kintasojtaya, “peuak kinmachtia miak taman”. Uan ijkon kisentokak hasta keman “tel tiotakya katka” (Mar. 6:35). Amo kinmachtij porin monekia kichiuas, ta porin “semi kinyoliknelij”. Kinekia kinmachtis porin kintasojtaya. Nejin kinextia ke semi kiyolpaktiaya kinpaleuis oksekin.

11. ¿Keniuj Jesús kinpaleuij oksekin? (No xikonita taixkopin).

¹¹ Jesús amo sayoj kinmachtij oksekin, ta no kinpaleuij ika okseki taman. Se tonal kichiuak se milagro uan kimiakiltij tein kikuaskiaj uan kinnauatij imomachtijkauan maj kixejxelouanij (Mar. 6:41). Ijkon tamachtij keniuj kinpaleuiskej oksekin. Uan no, kinnextilij ke no moneki se kinpaleuis oksekin ika tein kinpolos, ijkon kemej kichiuaj tapaleuianij itech nechikol. Tatitanilmej semi yolpakkej porin kipaleuijkej Jesús keman kixejxelojkej takual tein kimiakiltij hasta ke “nochin tamajseujkej uan ixuikej” (Mar. 6:42). Amo sayoj nejon tonal Jesús kitayekanaltij kinpaleuis oksekin, ta nochipa ijkon kichiuak (Mat. 4:23; 8:16). Yejua semi kiyolpaktiaya kinmachtis oksekin uan kinpaleuis ika okseki taman tein kinpolouaya. Tejuatsin no semi tionyolpakis komo tionmochiua tapaleuijkej itech nechikol uan tikonpaleuia oksekin.

12. ¿Keyej amo moneki maj tiknemilikan ke amo uelis titapaleuiskej itech nechikol?

 ¹² Komo tikonnemilia ke amo ueli tikonchiua miak taman, amo xionmotekipacho. Kemaj uelis tikonchiuas seki taman tein kinpaleuis tokniuan. Uelis tikontataujtis Dios uan tikonitas tein kijtoua 1 Corintios 12:​12-30. Ompa Pablo kijtoua ke nochin itekitikauan Jehová tapaleuiaj uan amo nenkaj yetokej itech nechikol. Yejua ika amo xionmotekipacho komo ayamo ueli tiontekiti kemej tapaleuijkej itech nechikol. Xikontemo tikonchiuas nochi tein tionuelis para tikontekitilis Jehová uan tikonpaleuis tokniuan. Tayekananij kiitaskej toni ueli tikonchiua achto ke mitsonmakaskej se tekit (Rom. 12:​4-8).

13. ¿Keyej amo semi ouij maj se takat mochiua tapaleuijkej?

¹³ No mitsonyolchikauas xionmochiua tapaleuijkej itech nechikol komo tikonelnamiki ke tinochin tiitekitikauan Dios ipa moneki tikchiuaskej tein Biblia kintajtania tokniuan tapaleuianij. Tinochin moneki kuali timouikaskej iuan Jehová, tiyolpakiskej keman titapaleuiskej uan tinemiskej kemej kiyolpaktia. Sayoj ke ¿toni moneki kichiuas tokniuj takat akin kineki kichiuas okseki tekimej itech nechikol?

TEIN MONEKI TIKONCHIUAS

14. ¿Toni kijtosneki tajtolmej maj “amo teyi kiauilmatikan”? (1 Timoteo 3:​8-10, 12).

¹⁴ Axkan maj tikitakan seki taman tein kijtoua 1 Timoteo 3:​8-10, 12 (xikonixtajtolti). Tapaleuianij moneki maj “amo teyi kiauilmatikan”. Nejin no kijtosneki ke moneki “maj kintakachiuakan” uan maj “yektekitikan”. Sayoj ke amo kijtosneki ke amo uelis uetskaskej oso kijtoskej teisa tein teuetskitij (Ecl. 3:​1, 4). Yejuan amo moneki kiauilmatiskej tekit tein kinmakaskej. Komo nochipa kitamichiuaj uan kiyekchiuaj tekit tein kinmakaj, tokniuan iniuan takuaujtamatiskej uan kintakachiuaskej.

15. ¿Toni kijtosneki tajtolmej “maj amo kikejkepakan tein kijtouaj” uan maj amo “xijxikuimej”?

¹⁵ “Maj amo kikejkepakan tein kijtouaj”. Nejin kijtosneki ke amo moneki takajkayauaskej, ta moneki kitemoskej maj oksekin iniuan takuaujtamatikan. Moneki maj amo xolopijmej, ta maj kichiuakan tein kijtouaj (Prov. 3:32). Maj amo “xijxikuimej”, nejin kijtosneki ke moneki amo takajkayauaskej keman takouaskej oso keman tanamakaskej uan kuali kikuiskej tomin tein tokniuan kitemakaj itech nechikol. Uan amo kuali yetoskia maj kitemokan kuali  mouikaskej iniuan tokniuan sayoj para motomintiskej.

16. 1) ¿Toni kijtosneki maj amo “tel tayikan vino”? 2) ¿Toni kijtosneki “maj amo teyi kinyolkuejmolo”?

¹⁶ “Nion maj tel tayikan vino”. Nejin no kijtosneki ke amo moneki tel tayiskej tayil, nion maj kinixmatikan kemej akin tel tayij. Uan no, moneki “maj amo teyi kinyolkuejmolo” porin yejuan nemij kemej Jehová tanauatia. Tinochin timopolouaj, sayoj ke tinochin uelis kuali timouikaskej iuan Dios uan tiyolseujtoskej.

17. ¿Keniuj se tokniuj takat uelis kinextis ox uelisya kichiuas seki tekimej? (1 Timoteo 3:10; no xikonita taixkopin).

¹⁷ “Maj achto kiitakan ox uelis kichiuaskej nejin tekit”. Nejin kijtosneki ke kuali kichiujkejya seki tekimej tein kinmakakaj. Yejua ika, keman tayekananij kinmakaskej se tekit, moneki kichiuaskej nochi tein kiniluiskej uan kemej ixyetok maj mochiua nejon tekit. Moneki kiajsikamatiskej nochi tein moneki kichiuaskej uan kemanian moneki kitamichiuaskej. Komo kuali kichiuaj nochi tekimej tein kinmakaj, tokniuan kiitaskej ke uelis kinmakaskej okachi tekimej. Tayekananij, xikinitakan tokniuan takamej akin moauijkejya akin ueliskia nankinpaleuiskej maj uelikan kichiuakan okseki tekimej (xikonixtajtolti 1 Timoteo 3:10). Ximotajtanikan nejin: ¿Moajsij itech namonechikol seki okichpipil akin moauijkejya uan kipiaj 10 hasta 14 xiujmej oso okachi nojnelmej? ¿Moita ke kuali momachtiaj? ¿Tanankiliaj itech nechikolmej uan mochikauaj tanojnotsaskej? Komo ijkon, uelis nankinmakaskej seki tekimej tein uelis kichiuaskej uan uelis nankiitaskej keniuj kichiuaj nejon tekimej. Ijkon, keman kipiaskej 17 hasta 19 xiujmej, xa uelisya nankinixtaliskej kemej tapaleuianij itech nechikol.

18. ¿Toni kijtosneki maj tapaleuianij amo kichiujtokan “tein ika uelis kinijijtoskej”?

¹⁸ Tapaleuianij no moneki maj amo kichiujtokan “tein ika uelis kinijijtoskej”. Nejin kijtosneki maj amo kichiujtokan nion se tajtakol. Tikmatij ke akin tiktakamatij Cristo uelis techpantiskej teisa. Hasta Jesús ijkon kichiuilijkej uan kijtoj ke akin kitojtokaskiaj no kinijijtoskiaj (Juan 15:20). Maski ijkon, tokniuan akin chipaujkanemij ijkon kemej Jesús, kuali kinitaskej uan kintakachiuaskej itech nechikol (Mat. 11:19).

19. ¿Toni kijtosneki maj kipiakan “sayoj se ininsiuatsin”?

 ¹⁹ Akin kinekiskej tekitiskej kemej tapaleuianij itech nechikol uan monamiktijkejya, moneki kipiaskej “sayoj se ininsiuatsin”. Keman Jehová kinnamiktij Adán uan Eva, kijtoj ke se takat monekiskia yetos iuan sayoj se siuat. Uan yejua nejon tein nochin tokniuan moneki kitakamatiskej (Mat. 19:​3-9). Se tokniuj takat amo keman monekiskia auilnemis (Heb. 13:4). Sayoj ke tokniuj akin monamiktijya no moneki kichiuas okse taman. Moneki amo kikajkayauas isiuatsin nion kinixuelitas okseki siuamej (Job 31:1).

20. ¿Keniuj se takat moneki kinixyekanas ichankauan?

²⁰ Tapaleuianij no moneki “maj kuali kinixyekanakan ininkoneuan uan ininchankauan”. Takamej akin monamiktijkejya moneki kuali kinixyekanaskej ininchankauan. Moneki mosenmachtiskej nochin semanas, sentanojnotsaskej nochipa keman ueliskej uan kinpaleuiskej ininkoneuan maj kuali mouikakan iuan Jehová (Efes. 6:4). Tokniuj akin kuali kinyekpia ichankauan kinextia ke uelis kinyekpias tokniuan itech nechikol (no xikonita 1 Timoteo 3:5).

21. ¿Toni uelis tikonchiuas komo ayamo tiontekiti kemej tapaleuijkej?

²¹ Komo tejuatsin ayamo tiontapaleuijkej itech nechikol, timitsonyolchikauaj xikontataujti Jehová uan xikonita tein kijtoua nejin tamachtilis tein uelis mitsonpaleuis. Xikonita toni moneki kichiuas akin kineki yeski tapaleuijkej uan xionmochikaua tikonchiuas. Xionmochikaua okachi tikontasojtas tokniuan uan xikonnemili keyej tikonneki tikonpaleuis (1 Ped. 4:​8, 10). Ijkon tionyolpakis keman tikonpaleuis tokniuan. ¡Tiknekij maj Jehová mitsonpaleui xiontekiti kemej tapaleuijkej itech nechikol! (Filip. 2:13).