1. ¿Keyej akin xiuejkejya uelis techmachtiskej miak taman?

 TINOCHIN moneki maj techpaleuikan para maj kuali titaixpejpenakan. Tayekananij uan okseki tokniuan akin kuali kitekitiliaj Jehová uelis techpaleuiskej. Maski sekin xiuejkejya, moneki tikinkakiskej uan amo tiknemiliskej ke tein techyolmajxitiaj amo techpaleuiaok. Jehová kineki maj tikitakan tein kichiuaj akin xiuejkejya para maj techmachtikan. Yejuan miak xiujmejya momachtianij, kiajsikamatij miak taman uan tel tamattokej (Job 12:12).

2. ¿Toni timomachtiskej itech nejin tamachtilis?

² Ne uejkauj, Jehová kichiuak maj seki takamej akin xiuejkejya kinixyekananij uan kinyolchikauanij itekitikauan. Maj inintech titanemilikan Moisés, David uan tatitanil Juan. Yejuan nenkej itech tataman xiujmej uan tataman tein kinpanok. Keman yaya momikilitijya, kinyolmajxitijkej akin okachi telpochmej katkaj. Nejin eyi takamej akin xiuejkejya katkaj uan amo keman kikaujkej Jehová kijtojkej ke semi moneki maj tiktakamatikan Dios. Jehová kichiuak maj moijkuilo tein kijtojkej para techpaleuis. Maski tixiuejkejya oso titelpochmejok tinochin uelis techpaleuis tein tayolmajxitijkej (Rom. 15:4; 2 Tim. 3:16). Itech nejin tamachtilis tikitaskej toni kijtojkej nejin eyi takamej akin xiuejkejya katkaj achto ke momikiliskiaj uan toni techmachtia tein kijtojkej.

“YEJUA KICHIUAS MIAK TONALMEJ XINEMI”

3. ¿Keniuj Moisés kitekitilij Dios uan keniuj kinpaleuij israelitas?

³ Keman Moisés nemik nochipa kitekitilij Jehová. Katka tanauatijkej, juez, tajkuilojkej uan taixyekankej. Yejua kimatia  kichiuas miak taman. Kinixyekanak israelitas keman kiskej de Egipto uan kiitak miak milagros tein Jehová kichiujka. Dios kichiuak maj kijkuilo yekinika makuil amatajkuilolmej tein kipia Biblia, no kijkuiloj Salmo 90 uan xa Salmo 91. Uan xa no yejua kijkuiloj amatajkuilol Job.

4. ¿Akonimej kinekik kinyolchikauas Moisés uan keyej?

⁴ Keman kipiaya 120 xiujmej, tepitsin achto ke momikiliskia, Moisés kinsentilij israelitas para kinelnamiktis nochi tein kiitakaj uan tein kinpanoka. Miak xiujmej achto, seki israelitas kiitakaj milagros tein Jehová kichiujka uan keniuj kintatsakuiltijka egipcios (Éx. 7:​3, 4). Kiitakaj keniuj Jehová kitajkoxelojka mar Rojo uan keniuj nejnenkej ompa uan satepan kiitakej keniuj Jehová kiixpoloj faraón uan itateuijkauan (Éx. 14:​29-31). Keman yetoyajya taluakyan Jehová kinyekpiak uan kinmakak tein kinpolouaya (Deut. 8:​3, 4). Uan keman israelitas yaya kalakitijya itech tal tein motenkaujka kinmakas, Moisés no kinyolchikauak achto ke momikiliskia. a

5. Achto ke Moisés momikiliskia, ¿toni kiniluij israelitas ke ueliskia kiseliskej? (Deuteronomio 30:​19, 20).

⁵ ¿Toni kiniluij Moisés? (Xikonixtajtolti Deuteronomio 30:​19, 20). Moisés kinelnamiktij israelitas ke ueliskia kichiaskej tein kuali. Jehová kintatiochiuiskia uan kichiuaskia maj nemikan miak xiujmej itech tal tein motenkaujka kinmakas. Ompa takualtsinkan katka uan moteltachiuaya. Moisés kijtoj nejin keman ika tajtoj nejon tal: “Itech nejon tal yetokej uejueyi uan kuajkuali xolalmej tein amo tejua tikinchijchiuak. Ompa no onkakej kalmej tein pexontokej ika miak taman tein kuali tein amo tikinchijchiuak, talkoyokmej tein amo tikinchijchiuak uan uvajkoujmej uan olivojkoujmej tein amo tikintokak” (Deut. 6:​10, 11).

6. ¿Keyej Dios kikauak maj okseki altepemej moinaxkatilianij israelitas?

⁶ Sayoj ke Moisés no kinnejmachtij israelitas se taman. Komo kinekiaj kisentokaskej ompa nemiskej monekia kitakamatiskej tein kinnauatiaya Jehová. Moisés kinyolchikauak maj ‘kiixpejpenanij nemiskej’ uan ijkon kichiuaskiaj komo kikakiaj Jehová uan ‘amo kikauayaj’. Sayoj ke israelitas amo kitakamatkej. Yejua ika satepan, Dios kinkauak asirios uan satepan babilonios maj moinaxkatilianij uan maj kinuikanij okseko (2 Rey. 17:​6-8, 13, 14; 2 Crón. 36:​15-17, 20).

7. ¿Toni techmachtia tein kijtoj Moisés? (No xikonita taixkopimej).

⁷ ¿Toni techmachtia? Komo tiktakamatij Jehová uelis tinemiskej nochipaya. Ijkon kemej israelitas yaya kalakitijya itech tal tein Dios motenkaujka kinmakas, amo uejkaua tejuan no tinemiskej itech xochital tein Dios motenkauak kichiuas. Tikitaskej ke taltikpak yeski se kualtsin xochital (Is. 35:1; Luc. 23:43). Satanás uan amokuali ejekamej amo nemiskejok (Apoc. 20:​2, 3). Uan nion se taneltokalis kitakajkayauilisok Jehová (Apoc. 17:16). Amo no taixyekanaskejok akin techtajyouiltiaj (Apoc. 19:​19, 20). Uan Jehová amo kikauas maj nion akin takuejmolchiua itech xochital (Sal. 37:​10, 11). Nochin akin nemiskej itech xochital kitakamatiskej  tein Jehová tanauatia. Yejua ika kuali mouikaskej uan yolseujkanemiskej. Nejon tapaleuis maj nochin motasojtakan uan maj takuaujtamatikan iniuan oksekin (Is. 11:9). ¡Tiktelnekijya ijkon tinemiskej! Uan no, komo tiktakamatij Jehová uelis tinemiskej itech xochital nochipaya (Sal. 37:29; Juan 3:16).

8. ¿Keniuj tein Jehová motenkaua kichiuas kipaleuij se misionero? (Judas 20, 21).

⁸ Komo nochipa tikelnamikij ke Dios motenkaua ke tinemiskej nochipaya techpaleuis maj nochipa tiktakamatikan maski tikpiaskej ouijkayomej (xikonixtajtolti Judas 20, 21). No techpaleuis maj amo tiknekikan tikchiuaskej tein amo kuali tein ika ueliskia titajtakoskej. Se tokniuj takat akin miak xiujmej katka misionero ompa África, semi monekik mochikauas amo kichiuas tein kinejnekia. Yejua kijtoj: “Nikajsikamatik ke amo ueliskia ninemis nochipaya komo amo niktakamati Jehová, nejon nechpaleuij maj amo nikchiua tein niknejnekia uan maj okachi niktataujti Jehová maj nechpaleui. Uan yejuatsin nechpaleuij maj niksentoka niktekitili”.

“KUALI KISAS NOCHI TEIN TIKCHIUAS UAN NOCHI TEIN TIKIXTALIS”

9. ¿Toni ouijkayomej kipiak David?

⁹ David katka se kuali tekiuaj. Yejua tatsotsonaya, tateuiaya, katka tajkuilojkej uan tanauatijkej. Uan no kipiak miak ouijkayomej. Miak xiujmej cholojtinemia porin tekiuaj Saúl kinekia kimiktis. Uan keman tekiuajtitoyaya, David oksepa monekik mocholtis para maj iokichpil Absalón amo kimiktiani porin yejua kinekia mochiuas tekiuaj. Maski David kipiak nejon ouijkayomej uan mopoloj, amo keman kikauak Jehová hasta keman momikilij. Jehová kijtoj ke David kiyolpaktiaya, yejua ika semi techpaleuis komo tikakij tein tayolmajxitij David (Hech. 13:22; 1 Rey. 15:5).

10. ¿Keyej David kiyolmajxitij iokichpil Salomón achto ke mochiuaskia tekiuaj?

¹⁰ Maj tikitakan tein tekiuaj David kiluij Salomón akin satepan mochiuaskia tekiuaj. Jehová kiixtalij Salomón maj kichijchiua se templo kampa ueliskia kiueyichiuaskej yejuatsin (1 Crón. 22:5). Kemej mochiuaskia miak tekit, monekia maj Jehová kipaleui Salomón para kiixyekanas ixolal. Maj tikitakan tein David kiyolmajxitij.

11. ¿Toni David kiyolmajxitij Salomón, uan keniuj mochiuak tein kiluij? (1 Reyes 2:​2, 3; no xikonita taixkopimej).

¹¹ ¿Toni kiluij David? (Xikonixtajtolti 1 Reyes 2:​2, 3). David kiluij iokichpil ke komo kitakamatia Jehová kuali taixyekanaskia uan yejuatsin kitatiochiuiskia. Uan Jehová miak xiujmej kipaleuij  (1 Crón. 29:​23-25). Salomón kichijchiuak templo, kijkuiloj seki amatajkuilolmej tein kipia Biblia uan tein kijtoj no moijkuiloj itech okseki amatajkuilolmej. Miakej kiixmatkej porin katka tamatkej uan tominpiaya (1 Rey. 4:34). David kiluijka Salomón ke kuali kisaskia nochi tein kichiuaya komo kitakamatia Jehová. Sayoj ke, keman Salomón xiuejya katka peuak kinueyichiua tatadiosmej. Jehová amo kiuelitak tein kichiuak Salomón, yejua ika amo kipaleuijok maj mochiua tamatkej para kuali kiixyekanas ixolal (1 Rey. 11:​9, 10; 12:4).

12. ¿Toni techmachtia tein kijtoj David?

¹² ¿Toni techmachtia? Keman tiktakamatij Jehová yejuatsin techtatiochiuia uan techpaleuia (Sal. 1:​1-3). Jehová amo motenkaua ke kichiuas maj tikpiakan miak tomin oso maj semi techixmatikan kemej Salomón. Sayoj ke komo tiktakamatij, techixyekanas uan techpaleuis maj kuali titaixpejpenakan (Prov. 2:​6, 7; Sant. 1:5). Tein Jehová techyolmajxitia uelis techpaleuis maj kuali tikixpejpenakan toni tekit tikchiuaskej, ox tiksentokaskej okachi timomachtiskej, ox tiktayekanaltiskej tiktaniskej miak tomin uan toni ika timoixpetaniskej. Komo tikchiuaj tein techyolmajxitia techpaleuis maj tiksentokakan kuali iuan timouikakan uan maj tinemikan nochipaya (Prov. 2:​10, 11). Tikinpiaskej totasojikniuan akin techpaleuiskej uan uelis tiyolpakiskej iniuan tochankauan.

13. ¿Toni kipaleuij Carmen maj yolpaki?

¹³ Carmen, akin nemi Mozambique, kinemiliaya ke okachi yolpakiskia komo okachi momachtiaya. Yejua ika kiixtalij yas universidad uan momachtis keniuj kinchijchiuas kalmej. Yejua kijtoua: “Semi nikuelitaya tein nimomachtijtoya, sayoj ke no semi nechkuiliaya tiempo uan nechsioujtiaya. Peuaya nimomachtiaya desde 7:30 kualkan hasta las 6 tiotak. Amo uelia niayaok nechikolmej uan amo semi kuali nimouikayaok iuan Jehová. Nimomakak cuenta ke amo nikchiujtoya tein tayolmajxitia Jehová (Mat. 6:24). Yejua kitataujtij Jehová uan kiluij tein kipanotoya uan kitemoj tamachtilis tein kipaleuiskia. ¿Toni panok satepan? Yejua kijtoua: “Satepan ke tayekananij uan nomaj nechyolmajxitijkej, nikixtalij amo niasok universidad  uan niktekitilis Jehová miak tonalmej. Nikmati ke kuali nitaixpejpenak uan semi niyolpaki”.

14. ¿Toni tayolmajxitijkej Moisés uan David?

¹⁴ Moisés uan David kitasojtayaj Jehová uan kimatiaj ke semi moneki maj se kitakamati. Achto ke momikiliskiaj kinyolchikaujkej oksekin maj kichiuanij kemej yejuan uan maj amo kikauanij Jehová. Nochin omen tanejmachtijkej ke akin kikauaskiaj Jehová amo kuali iuan mouikaskiajok uan amo kintatiochiuiskiaok kemej motenkaujka. Uan tein tayolmajxitijkej no techpaleuia tejuan. Xiujmej satepan, okse itekitikauj Jehová no kijtoj ke semi moneki maj amo tikauakan Dios.

“AMO ONKAK OKSE TAMAN TEIN OKACHI NECHYOLPAKTIA”

15. ¿Toni kiitak tatitanil Juan?

¹⁵ Jesucristo semi kitasojtaya tatitanil Juan (Mat. 10:2; Juan 19:26). Iuan tanojnotsak Jesús, kiitak milagros tein kichiuak uan iuan yetoya keman semi tajyouij. Iuan yetoya keman kikoujpampilojkej uan satepan kiitak keman oksepa nemik. No kiitak keman miakej peuak kichiuaj kemej Cristo itech yekinika siglo: desde keman amo miakej katkaj hasta keman ‘kuali tanauatilmej moteixmatiltijkaya itech nochi taltikpak’ (Col. 1:23).

16. ¿Akonimej kinpaleuiani cartas tein kijkuiloj Juan?

¹⁶ Keman Juan yaya momikilitia, kijkuiloj seki amatajkuilolmej tein kipia Biblia. Kijkuiloj “se tanextililis itechkopa Jesucristo” (Apoc. 1:1). Uan no kijkuiloj Evangelio tein kipia itokay uan eyi cartas. Expatika carta kijkuilouilij se tokniuj takat akin monotsaya Gayo, uan kitasojtaya kemej ikonetsin (3 Juan 1). Ijkuak, xa Juan miakejya kintasojtaya kemej ikoneuan. Tein kijkuiloj nejin tayekankej akin amo keman kikauak Jehová kinyolchikauani miakej imomachtijkauan Jesús hasta axkan.

17. Kemej kijtoua 3 Juan 4, ¿toni kichiua maj se yolpaki?

¹⁷ ¿Toni kijkuiloj Juan? (Xikonixtajtolti 3 Juan 4). Itech expatika carta, Juan kijkuiloj ke semi kiyolpaktiaya kiitas ke tokniuan kitakamattoyaj Dios. Ijkuak, sekin tamachtiayaj tein amo melauj uan kichiuayaj maj tokniuan itech nechikol amo kuali mouikakan. Sayoj ke sekin, kisentokayaj nemiaj itech “ojti tein melauak”. Kitakamatiaj Jehová uan kisentokayaj kichiuayaj  tein kijtoua “itanauatiluan” (2 Juan 4, 6). Nejon tokniuan semi kiyolpaktiayaj Juan uan no Jehová (Prov. 27:11).

18. ¿Toni uelis techmachtis tein kijtoj Juan?

¹⁸ ¿Toni techmachtia? Komo amo tikauaj Jehová nochipa tiyolpakiskej uan oksekin no yolpakiskej (1 Juan 5:3). Tel kualtsin timomachiliaj keman tikmatij ke tikyolpaktiaj Jehová. Yejuatsin semi yolpaki keman amo tikchiuaj tein amo kuali uan tiktakamatij tein technauatia (Prov. 23:15). Ángeles no semi yolpakij (Luc. 15:10). Uan keman tikmatij ke tokniuan kiixtopeuaj tein amo kuali uan amo kikauaj Jehová maski kinixnamikij, no semi tiyolpakij (2 Tes. 1:4). Uan keman ixpoliuis nochi tein kiixyekana Satanás, no semi tiyolpakiskej porin amo keman tikaujkej Jehová.

19. ¿Keniuj kijtoj se tokniuj siuat ke se momachilia keman se tamachtia ika Biblia? (No xikonita taixkopimej).

¹⁹ Semi tiyolpakij keman tikinmachtiaj oksekin tein tamachtia Biblia. Rachel, akin nemi República Dominicana, kiita ke se ueyi tatiochiualis kinmachtis oksekin akoni toDios Jehová. Yejua kinpaleuiani miakej maj no kiueyichiuakan, kijtoua: “Semi niyolpaki keman nikita ke akin nikinmachtia peua kitasojtaj Jehová, peua iuan takuaujtamatij uan kipataj miak taman para kiyolpaktiskej. Nejon okachi teyolpaktia maski semi moneki se mochikauas para se kinpaleuis”.

MAJ TECHPALEUI TEIN KIJTOJKEJ NEJIN TAKAMEJ ACHTO KE MOMIKILISKIAJ

20. ¿Toni tein kichiujkej Moisés, David uan Juan no tikchiuaj tejuan?

²⁰ Moisés, David uan Juan nenkej ne uejkauj. Uan miak taman mopatak kemej nemiaj yejuan uan kemej tinemij axkan. Sayoj ke, miak taman tein kichiujkej no tikchiuaj tejuan. Yejuan kiueyichiuayaj akin yekmelauj Dios, uan tejuan no. Ijkon kemej yejuan, tejuan no tiktataujtiaj Jehová, iuan titakuaujtamatij uan tiktemouaj maj techixyekana. Uan ijkon kemej nejon takamej, tejuan no tikmatij ke Jehová semi kintatiochiuia akin kitakamatij.

21. ¿Toni kiseliskej akin kichiuaskej tein tayolmajxitijkej takamej kemej Moisés, David uan Juan?

²¹ Maj tikchiuakan tein tayolmajxitijkej nejon takamej akin xiuejkejya katkaj uan maj tikchiuakan tein technauatia Jehová. Komo ijkon tikchiuaj, yejuatsin techtatiochiuis uan techpaleuis. Uelis tinemiskej “miak tonalmej”, tein kijtosneki tinemiskej nochipaya (Deut. 30:20). Uan tiyolpakiskej porin tikyolpaktiskej toTajtsin akin kichiua nochi tein motenkaua. Yejuatsin semi techtatiochiuis (Efes. 3:20).