ITECH Mateo 13:24-26, Jesús kijtoj ke iTekiuajyo Dios tamatia kemej ijkuak se takat kitokak kuali xinach italpan. Yejua kijtoj: “Kuak kochtokke ya in tekitini, ijkuakon uala uan kalayik tech nimila se naken kitauelita ne patrón. Uan yejua kitokako se xinach ten takojkokoa kampa ne trigo xinach ten no monejneuilia keme in trigo. Uan kitokteu uan yajki okseko. Uan kuak in trigo moskaltij ya uan peuak chikauaya ya, ijkuakon monextij ya ne amokuali xiuit”. Seki taixmatinij amo kineltokaj ke tein kijtoua nejin neskayot yekmelauj panouaya. Sayoj ke seki amamej tein kipiayaj tekiuanij romanos ne uejkauj kinextiaj ke nejin kemaj panouaya.

Se diccionario tein kimelaua tajtolmej tein kipia Biblia kijtoua ke inintanauatiluan romanos kinextiayaj ke monekia se kitatsakuiltis akin kitokaya amo kuali xiuit itech italpan aksa porin kinekia momakepas. Komo onkaya se tanauatil kemej nejon, kijtosneki ke nejon kemaj panouaya. Alastair Kerr, se takat akin kuali kiixmati tanauatilmej, kimelaua ke itech xiuit 533 itech totonaluan tekiuaj romano Justiniano kichijchiuak se amatajkuilol tein motokaytia Digesto. Nejin amatajkuilol kipia nochi tanauatilmej tein romanos kiixtalijkaj uan kipia tein kijtojkaj akin kuali kiixmatiaj tanauatilmej itech xiujmej 100 hasta 250 itech totonaluan. Amatajkuilol Digesto ika tajtoua se tamatkej akin motokaytiaya Ulpiano, akin ika tajtoj se aksa akin kitokak amo kuali xiuit itech italpan okse uan kijtakoj itatok. No kimelaua ke akin kijtakouiliayaj itatok uelia tajtania maj akin kitokak amo kuali xiuit kitaxtauiani porin kijtakouilij itatok.

Kemej tikitaj, nejin taman panouaya kampa taixyekanayaj romanos. Nejin kinextia ke neskayot tein kijtoj Jesús kemaj uelik panok.