1. ¿Keniuj moneki timomachiliskej porin tikpiaj takuaujtamatilis?

AMO nochin taltikpakneminij kipiaj takuaujtamatilis (2 Tes. 3:2). Sayoj ke Jiova kinmaka takuaujtamatilis nochin akin kiueyichiuaj (Rom. 12:3; Gál. 5:22). Moneki tiktasojkamatiskej maj Jiova techmaka takuaujtamatilis.

2, 3. 1) ¿Toni tatiochiualismej tikseliaj porin titakuaujtamatij? 2) ¿Toni netajtanilmej tiknankiliskej?

² Jiova kitemakak iKonetsin uan ijkon nochin akin iuan takuaujtamatiskej uelis kintapojpoluis. Komo titakuaujtamatij iuan Jesús, ueli timochiuaskej tiitasojikniuan Jiova uan tinemiskej nochipaya (Juan 6:44, 65; Rom. 6:23). Jiova techmakani miak taman tein kuali. Maski titajtakouanij uan technamiki timomikiliskej, yejuatsin kiitak ke uelis tikchiuaskej tein kuali (Sal. 103:10). Yejua ika techmachtij tein kichiuak Jesús uan keniuj techpaleuia inemilis tein kitemakak. Keman titakuaujtamatkej iuan Jesús uan timochiujkej tiitatojtokakauan, peuak tikchiaj tikseliskej nemilis nochipaya (xikonixtajtolti 1 Juan 4:9, 10).

³ Sayoj ke ¿toni okachi uelis tikmatiskej ika tein kijtosneki takuaujtamatilis? Komo tiknekij tikpiaskej takuaujtamatilis, ¿sayoj moneki tikmatiskej tein Dios toka kichiuani uan tein kichiuas satepan? No  moneki tikchiuaskej okse taman. Maj tikitakan toni.

4. ¿Toni tiknekiskej tikchiuaskej komo titakuaujtamatij?

⁴ Komo titakuaujtamatij iuan Jiova uan Jesús, amo sayoj timokauaskej ika tein tikmatij ke kichiuanij uan tein toka kichiuaskej. Tiknejnekiskej ika nochi toyolo tinemiskej kemej yejuan techmachtiaj uan tikinpaleuiskej oksekin maj kinixmatikan. Tatitanil Pablo kijtoj: “Komo namejuan nankiyekijtoaj senteixteno ke Jesucristo Yejuatsin namotekotsin, uan no komo nantakuautamatij ika nochi namoyolojuan ke Dios kipankixtij yoltok [...], ijkuakon Dios namechmakixtis de namotajtakoluan. Uan komo nantakuautamatij iuan Cristo ika nochi namoyolojuan, ijkuakon Dios namechpouas ke nanyolchipauke [...]. Uan no komo nankiyekijtoaj ke Jesucristo Yejuatsin namotekotsin, ijkuakon Dios namechmakixtia ya de namotajtakoluan” (tejuan tiktalilijkej cursivas; Rom. 10:9, 10; 2 Cor. 4:13).

5. 1) ¿Keyej motelneki se takuaujtamatis? 2) Xikonmelaua ika se neskayot toni techpaleuis maj tikpiakan chikauak totakuaujtamatilis.

⁵ Komo tiknekij tinemiskej nochipaya itech yankuik taltikpak, moneki tikpiaskej takuaujtamatilis uan tiksentokaskej tikchikauaskej. Takuaujtamatilis tamati kemej se xochit. Komo tiknekij maj se xochit kuali moskalti, moneki nochipa tikatekiskej. Komo amo tikatekiaj, kuetauis uan uakis. No ijkon, moneki tikyekitaskej maj totakuaujtamatilis chikauak moajsi uan maj kisentoka moskalti (Luc. 22:32; 2 Tes. 1:3; Tito 2:2; Heb. 3:12).

6. ¿Keniuj Hebreos 11:1 kimelaua toni kijtosneki takuaujtamatilis?

⁶ Biblia ome taman kemej kimelaua toni kijtosneki takuaujtamatilis itech Hebreos 11:1 (xikonixtajtolti). Yekinika kijtoua ke “kuak titakuautamatij iuan Dios, ijkuakon timoyekmatiltiaj ya ke se tonal tikselijtiue nochi ne ten axkan tikyolikachixtokke”. Itech tein tikchixtokej pouij tatiochiualismej tein Dios motenkaua kiualkuis satepan. Kemej neskayot, tikyekmatij ke nochi tein amo kuali ixpoliuis uan ke onkas se yankuik taltikpak. Uan ojpatika, kijtoua ke ijkuak titakuaujtamatij, timoyekmatiltiaj ke yekmelauj moajsi nochi tein amo tikitstinemij. Seki taman tein yekmelauj moajsi sayoj ke amo tikitaj yejua Jiova, Jesucristo, ángeles uan Tekiuajyot tein moajsi iluikak (Heb. 11:3). ¿Keniuj tiknextiaj ke yekmelauj titakuaujtamatij itech tein Dios motenkaua uan itech tein amo tikitaj? Tiknextiaj kemej timonejnemiltiaj uan ika tein tikijtouaj uan tikchiuaj.

7. ¿Keniuj techpaleuia ineskayo Noé maj tikajsikamatikan tein kijtosneki se takuaujtamatis? (Xikonita taixkopin ipeujyan tamachtilis.)

⁷ Ineskayo Noé techpaleuia maj tikajsikamatikan tein kijtosneki se takuaujtamatis. Tatitanil Pablo kijtoj ke “Dios kinejmachtij Noé ke mochiuati miak tataman tajyouilis ke ayamo uelis kitaske” (tejuan tiktalilijkej cursivas). Kemej Noé kinekia kiyolpaktis Dios, “kichijchiuak se ueyi barco tenika uelis kinmakixtis ichankauan” (Heb. 11:7). Noé takuaujtamatik itech tein Jiova kiluijka ke panoskia, yejua ika kichijchiuak se ueyi arca. Akin nemiaj kampa ika yejua nemia xa kitajtaniayaj keyej kichijchiujtoya. Uelis tikyekmatiskej ke Noé kinmelauilij keyej, porin Biblia kijtoua ke “tanojnotstinemia ika ten melauak tajtoltsin” (2 Ped. 2:5). Kinmatiltij ke Dios kiualkuiskia se tetsaujkakiouit tein ika kiixpoloskia tein amo kuali. Xa hasta kiniluij tajtolmej tein Jiova kiluijka: “Nikixtalij nikixpolos nochi tein yoltok, porin itech taltikpak tel onkak tateuilis”. Jiova no kiluijka Noé: “Nikualkuiti se tetsaujkakiouit itech taltikpak, uan ika nejon nikixpoloti iluikaktampa nochi tein mijyotijtok. Nochi tein moajsi itech taltikpak momikilis”. Ompa, Noé xa  kinmelauilij taltikpakneminij tein monekia kichiuaskej komo kinekiaj makisaskej. Jiova kiluijka: “Moneki tikalakis itech arca” (Gén. 6:13, 17, 18).

8. ¿Toni kijtoj Santiago keman ika tajtoj takuaujtamatilis?

⁸ Santiago no ika tajtoj takuaujtamatilis. Xa kijkuiloj tepitsin satepan ke Pablo kijkuiloj amat tein kintitanilij tokniuan hebreos. Santiago kijtoj: “¿Kenin tiuelis xinechnextilis ke tikpia moyolijtik ne ueyi takuautamatilis iuan Cristo, komo amo teyi tikchiutinemi ten kuali? Pues amo tiuelis. Pero nejua kuali nimitsnextilis notakuautamatilis ika por in kuali chiualis ten nikchiutinemi” (Sant. 2:18). Yejua kimelauak ke komo tiknekij tikpiaskej takuaujtamatilis, amo sayoj moneki tikneltokaskej ke nemi Dios. Amokuali ejekamej kineltokaj ke nemi, sayoj ke amo iuan takuaujtamatij, ta senkis kiixnamikij (Sant. 2:19, 20). Tein melauj, taltikpaknenkej akin kipia takuaujtamatilis kineki kiyolpaktis Dios ika ikuali tachiualisuan. Yejua nejon kichiuak Abrahán. Santiago kijkuiloj: “Totajtsin Dios kipouak yolchipauak Abraham, ne touejkautat uan amo kitajtakolkuiltij ok porin, yejua kitemaktij hasta ka mikilis ne nikonetsin Isaac. Uan [...] namejuan nankitstokke ke ne itakuautamatilis Abraham monextijtinemik ika ne tatakamatilis ten kichiuak. Pues no ijkon ne itakuautamatilis Abraham momajxitij ika ne kuali tatakamatilis ten yejua kichiuako”. Satepan, Santiago kiyeknextij ke takuaujtamatilis sayoj nenkaj komo amo se kinextia ika tein se kichiua. Yejua kijtoj: “Ijkon keme se inakayo miket san kuak amo kipia ok niijiyo, no ijkon se itakuautamatilis amo teyi ipatiu komo amo kinextijtinemi itakuautamatilis ika ne kuali tatakamatilis” (Sant. 2:21-23, 26).

9, 10. ¿Toni moneki tikchiuaskej komo tiknekij titakuaujtamatiskej iuan iKonetsin Dios?

⁹ Panoua 30 xiujmej satepan ke Santiago ika tajtoj takuaujtamatilis, Juan kijkuiloj amatajkuilol tein kipia itokay uan eyi amamej. Kemej oksekin akin kijkuilojkej Biblia, Juan kiajsikamatia toni takuaujtamatilis. Yejua miakpa kikuik se tajtol griego tein ueli mokepa kemej “se takuaujtamatis”.

¹⁰ Kemej neskayot, Juan kijtoj: “Nochi nekes ten takuautamatiske iuan ne Ikonetsin Dios, yejuan nojonkes kipiaske ne yek nemilis nachipa. Pero nochi ne naken amo kinekiske yek tatakamatiske iuan Ikonetsin Dios, yejuan nojonkes amo kipiaske ne yek nemilis. Ta, yejuan sayo kiseliske ne ueyi tatsakuiltilis ten Totajtsin Dios kinualtitanilis” (Juan 3:36). Komo tiknekij titakuaujtamatiskej iuan iKonetsin Dios moneki tiktakamatiskej tein technauatia (xikonita kampa kijtoua “Tein okachi momelaua”). Keman tikixtajtoltiaj nochi tein Juan kijkuiloj, tikitaj ke Jesús miakpa tamachtij ke komo tiknekij tinemiskej nochipaya moneki titakuaujtamatiskej iuan uan iuan iTajtsin (Juan 3:16; 6:29, 40; 11:25, 26; 14:1, 12).

11. ¿Keniuj tiknextiaj ke tiktasojkamatij maj Jiova techmachti tein melauak?

¹¹ Ika iyektikatsin espíritu, Jiova techpaleuij maj tikajsikamatikan keniuj yekmelauj tamati yejuatsin uan iKonetsin, uan no ika techpaleuij maj titakuaujtamatikan iniuan (xikonixtajtolti Lucas 10:21). ¿Keniuj tiknextiaj ke tiktasojkamatij tein Jiova kichiuani? Maj nochipa tiktasojkamatilikan porin techkaua maj kuali timouikakan iuan itechkopa Jesús, akin “imako ualeutok totakuautamatilis” uan “techyekyolmajxitijtiu ika totakuautamatilis” (Heb. 12:2). Uan no, moneki tiksentokaskej tikchikauaskej totakuaujtamatilis. ¿Keniuj? Keman tikchiuaskej  netataujtil uan timomachtiskej Biblia nochipa (Efes. 6:18; 1 Ped. 2:2).

12. ¿Toni tikchiuaskej komo tikpiaj takuaujtamatilis?

¹² Komo senkis titakuaujtamatij itech tein Jiova motenkaua, nochipa tiknextiskej ika totachiualisuan. Kemej neskayot, tiksentokaskej tikintapouiskej taltikpakneminij tein kichiuas iTekiuajyo Dios uan tikinpaleuiskej maj mochiuakan itatojtokakauan Jesús. Uan no, tiksentokaskej tiktakamatiskej nejin tajkuilol: “Ma tikinpaleuijtiyakan nochi tagayot. Pero no kachi ok ma tikinpaleuijtiyakan in tokniuan taneltokani” (Gál. 6:10). Uan tiksentokaskej timochikauaskej timoijkuaniliskej ‘soltik talnamikilis tein kualkui tajtakol’ porin amo tiknekij tikchiuaskej nion teyi tein kijtakos tokuali uikalis iuan Jiova (Col. 3:5, 8-10).

13. 1) ¿Keyej motelneki se takuaujtamatis iuan Dios? 2) ¿Toni ika kineskayotia Biblia takuaujtamatilis, uan keyej semi kuali nejon neskayot?

¹³ Biblia kijtoua: “Komo se aksa amo takuautamatinemis iuan Dios, ijkuakon amo uelis kiyolpaktijtinemis Dios. Porin komo se yejua kineki se motokitiu iuan Dios, ijkuakon moneki ma kiyekneltoka ke ongak se Dios uan no ma kiyekneltoka ke Dios kinpaleuis nekes ten kiyoltemoske” (Heb. 11:6). Biblia no kinextia ke “se takuautamatiyas iuan Dios” yejua yekinika taman tein moneki kipias se yekmelauj itatojtokakauj Cristo. Yejua ika kineskayotia takuaujtamatilis kemej se tatsineualoni tein ika peua kichijchiuaj se kali (Heb. 6:1). Sayoj ke amo sayoj moneki tikpiaskej takuaujtamatilis, ta no moneki tikpiaskej okseki kualneskayomej tein motelnekij tein techpaleuiskej maj tiksentokakan kuali timouikakan iuan Dios (xikonixtajtolti 2 Pedro 1:5-7; Jud. 20, 21).

14, 15. ¿Keyej okachi moneki se kipias netasojtalis ke takuaujtamatilis?

¹⁴ Akin kijkuilojkej Biblia okachi ika tajtojkej takuaujtamatilis ke okse kualneskayot. ¿Kijtosneki nejin ke takuaujtamatilis yejua kualneskayot tein okachi moneki kipias se itekitikauj Dios? Maj tikitakan.

¹⁵ Pablo kinextij keniuj mouika takuaujtamatilis uan netasojtalis. Yejua kijtoj: “Takan nikpixtinemi ne ueyi ajsika takuautamatilis tenika uelis kinajchiuaj tepeme uan komo amo nikpia tetasojtalis, ijkuakon nejua amo teyi nikualtia” (1 Cor. 13:2). Uan Jesús kijtoj ke se kitasojtas Dios yejua “tanauatiltsin in kachi ueyi de nochi” (Mat. 22:35-40). Netasojtalis techpaleuia maj tikpiakan okseki kualneskayomej tein kiyolpaktiaj Dios.  Kemej neskayot, Biblia kijtoua ke akin tetasojta kineltoka nochi. Nejin kinextia ke netasojtalis techpaleuia maj tikneltokakan oso maj titakuaujtamatikan itech nochi tein Dios techiluia itech Biblia (1 Cor. 13:4, 7).

16, 17. 1) ¿Keniuj kinextia Biblia ke takuaujtamatilis uan netasojtalis motelnekij? 2) ¿Katiyejua kualneskayot okachi moneki, uan keyej?

¹⁶ Biblia kinextia ke takuaujtamatilis uan netasojtalis motelnekij. Yejua ika, akin kijkuilojkej Biblia miakpa kiamatalijkej nejin ome kualneskayomej itech sayoj se tajkuilol. Kemej neskayot, Pablo kinyolmajxitij tokniuan: “Ma tikpaleuijtiyakan toyolojuan ika totakuautamatilis uan ika yoltetasojtalis” (1 Tes. 5:8). Pedro kijtoj nejin keman ika tajtoj Jesús: “Namejuan nankitasojtatinemij Jesucristo maski ayamo keman nankitakke. Uan namejuan maski axkan amo nankitstiyoue Cristo pero nantakuautamatij iuan” (1 Ped. 1:8). Santiago kiniluij tokniuan taixpejpenalmej: “Dios kinijitak ya ke in taneltokani pobres den nikan taltikpak ma no kipiakan semi ueyi intakuautamatilis. Uan Dios no kinaxkatilij in taneltokani pobres ne yek nemilis nachipa ten Yejuatsin moyektenkauak ya de kinmaktilis nochi nekes ten kitasojtaj” (Sant. 2:5). Uan Juan kijtoj ke Dios technauatia “ma titakuautamatikan iuan ne tokaytsin den Ikonetsin Dios, uan nijin Yejuatsin in Jesucristo. Uan no ma timosepantasojtakan” (tejuan tiktalilijkej cursivas; 1 Juan 3:23).

¹⁷ Sayoj ke Pablo no kijkuiloj: “Ma titakuautamatiyakan uan ma tikyolikachiakan uan ma titetasojtatiyakan. Uan nijin eyi taman tamachilis amo keman tajtamitiu. Pero in tamachilis ten kachi ueyi, yejua nijin in tetasojtalis” (1 Cor. 13:13). ¿Keyej kijtoj Pablo ke netasojtalis yejua kualneskayot tein okachi ueyi? Porin satepan amo monekisok titakuaujtamatiskej itech tein Dios motenkaua. Tikpiaskejya kualtsin nemilis tein ika tajtoua Biblia. Sayoj ke nochipa monekis tiktasojtaskej Dios uan taltikpakneminij. Netasojtalis tein tikinpialiaj nochipa kisentokas moskaltis.

18, 19. ¿Keniuj tapaleuia maj itekitikauan Dios kipiakan takuaujtamatilis, uan akoni kinamiki maj tikueyichiuakan?

¹⁸ Itekitikauan Dios itech nejin tonalmej kikauaj maj yektikatsin espíritu kinixyekana. Yejua ika takuaujtamatij itech iTekiuajyo Dios uan kipaleuiaj. Uan no, motasojtaj se iuan okse (Gál. 5:22, 23). ¿Toni kiualkuini nejin? Itech nochi taltikpak moajsij panoua chikueyi millones tokniuan akin kipiaj yolseuilis uan kuali mouikaj itech ininnechikoluan. Senkis moita ke takuaujtamatilis uan netasojtalis tel tapaleuiaj.

¹⁹ Nejin kuali uikalis sayoj ueli mochiua ika inepaleuil Jiova. Yejua ika kinamiki maj tikueyichiuakan (Is. 55:13). Semi tiktasojkamatiliaj Jiova porin techpaleuia maj timakisakan porin ‘titakuaujtamattinemij’ (Efes. 2:8). Jiova kisentokas kinpaleuis miakej maj takuaujtamatikan iuan. Uan se tonal, itech nochi taltikpak moajsiskej taltikpakneminij yolmelaujkej, akin amo yeskijok tajtakouanij uan kipiaskej yolpakilis akin kiueyichiuaskej Jiova nochipaya.