1. ¿Keyej sayoj Jiova kinamiki maj tikueyichiuakan?

SAYOJ Jiova kinamiki maj tikueyichiuakan porin techchijchiuak uan techmakak nemilis (Apoc. 4:11). Sayoj ke, maski tiktasojtaj uan tikpoujkaitaj, onkak seki taman tein uelis kichiuas maj amo sayoj tikueyichiuakan Jiova kemej kinamiki. Moneki tikajsikamatiskej keniuj uelis panos nejon. Sayoj ke, achto maj tikitakan toni kijtosneki sayoj Jiova tikueyichiuaskej.

2. Kemej kijtoua Mateo 4:10, ¿toni amo tikchiuaskej komo sayoj Jiova tikueyichiuaj?

² Keman itech Biblia kijtoua semi se kitasojtas Jiova, kijtosneki sayoj se kiueyichiuas yejuatsin. Maj amo tikauakan maj teisa nion aksa kichiua maj amo tiktasojtakan Dios (xikonixtajtolti Mateo 4:10).

3. ¿Toni kichiua maj tikueyichiuakan Jiova?

³ Tikueyichiuaj Jiova porin timomachtianij keniuj tamati. Tikmoujkaitaj kualneskayomej tein kinextia. Tikmatij toni kitasojta uan toni kitauelita, uan tejuan no ijkon tikchiuaj. Tikajsikamatij tein kiixtalijtok toka kichiuas uan tikpaleuiaj keman timonejnemiltiaj kemej technauatia. Semi tikpatiuitaj maj techkaua maj ueli timouikakan iuan (Sal. 25:14). Ijkon kemej okachi tikixmatij, okachi timotokiaj iuan toTachijchiujkauj (Sant. 4:8).

4. 1) ¿Toni kikui Amokuali uan ika kitemoua maj amo sayoj Jiova tikueyichiuakan? 2) ¿Toni tikitatij itech nejin tamachtilis?

 ⁴ Amokuali taixyekana nikan taltikpak uan ika nejon kitemoua maj tiktayekanaltikan tein amo kuali tein tiknejnekij (Efes. 2:1-3; 1 Juan 5:19). Kineki maj tiktasojtakan okseki taman uan maj amo sayoj Jiova tikueyichiuakan. Maj tikitakan ome taman tein ika uelis kichiuas. Yekinika, kitemoua maj tiknejnekikan timotomintiskej. Uan ojpatika, kitemoua maj amo kuali tikixpejpenakan tein ika timoixpetaniskej.

5. ¿Keyej moneki timoyekpiaskej amo tiktelnejnekiskej tomin?

⁵ Tinochin tiknekij tikpiaskej tein tikuaskej, tein ika timotakentiskej uan kani tinemiskej. Sayoj ke, moneki timoyekpiaskej maj amo peua tiknejnekikan timotomintiskej. Axkan miakej ‘xijxikuintinemij ika tomin san’ uan kinejnekij kipiaskej miak taman (2 Tim. 3:2). Jesús kimatia ke itatojtokakauan ueliskiaj kinejnekiskej motomintiskej, yejua ika kijtoj: “Amo aken uelis kintekitilis ome patrones, porin [...] kitauelitas se patrón uan kitasojtas in okse, oso kimouistilis se patrón uan amo kiueyichiuas in okse. Amo aken uelis kintekitilis [...] Totajtsin Dios uan in ricojyot” (Mat. 6:24). Akin kiueyichiua Dios uan no miak tiempo mochikaua kisentilis tomin, kemej yeskia kintekitilijtok ome tekomej. Amo sayoj Jiova kiueyichiua.

6. ¿Toni techmachtia tein Jesús kiniluij tokniuan ompa Laodicea?

⁶ Tepitsin achto ke ajsiskia xiuit 100 itech totonaluan, akin pouiaj itech nechikol ompa Laodicea kijtouayaj ke tominpiayaj uan ke kipiayaj miak taman uan amo teyi  kinpolouaya. Sayoj ke iixpan Jiova uan Jesús kemej yeskia amo teyi kipiayaj, katkaj teikneltijkej, ixpopoyomej uan moajsiaj xipetstikej. Jesús amo kinmelauak porin kipiayaj tomin, ta porin okachi kitayekanaltiayaj tominpiaskej uan amo kuali mouikaskej iuan Jiova (Apoc. 3:14-17). Komo tikitaj ke tejuan no tiknejnekij tikpiaskej miak taman, maj niman tiktemokan tikyektaliskej (1 Tim. 6:7, 8). Komo amo tikchiuaj, amo sayoj tiktasojtaskej Jiova uan amo kiselis totaueyichiualis porin tajtani maj sayoj yejua tikueyichiuakan (Mar. 12:30). ¿Toni ueliskia kichiuas maj tiknejnekikan tikpiaskej tomin?

7-9. ¿Toni techmachtia tein kipanok se tayekankej akin itokay David?

⁷ Maj tikitakan tein kipanok David, se tokniuj tekitikej akin kayot Estados Unidos. Yejua kijtoj ke itech empresa kampa tekitia, kimakakej okachi ueyi tekit uan hasta moixmatik kemej akin okachi kuali tekitia itech nochi altepet. Yejua kijtoua: “Ijkuak niknemiliaya ke ijkon Jiova nechtatiochiuijtoya”. Sayoj ke ¿yekmelauj ijkon katka?

⁸ David kiitak ke tekit tein kipiaya kichiujtoya maj amo kuali mouikaok iuan Jiova. Yejua kijtoua: “Itech nechikolmej uan hasta itech tanojnotsalis sayoj nitanemilijtinemia itech tekit. Niktania miak tomin, sayoj ke okachi nimotekipachouaya uan hasta amo kuali nimouikayaok iuan nonamik”.

⁹ Ijkuak, David kiitak ke monekia kitayekanaltis tein okachi monekia. Kijtoua: “Nikixtalij nikpatas tein nikchiuaya”. Yejua ika kiixtalij kipatas horas tein  tekitia uan kiixpantilij akin kitekitiliaya. Nejon kichiuak maj kikuilianij tekit. ¿Toni kichiuak? Yejua kijtoua: “Mostika, niktemakak amat tein ika nitajtania nitapaleuis kemej precursor auxiliar miak metsti”. Yejua uan inamik peujkej tekitij itech tachipaualis, ijkon ueliaj motekipanouayaj. Satepan David peuak tekiti kemej precursor regular uan amo uejkauak inamik no ijkon kichiuak. Kiixpejpenkej se tekit tein miakej amo kiuelitaj, sayoj ke yejuan amo ijkon kiitaj. Maski amo semi tatanij kemej achto, mejmetstika kipiaj tein ika moixpanoltiskej. Kinekij kitayekanaltiskej itekiyo Dios uan kiitanij ke Jiova amo keman kinsenkaua akin ijkon kichiuaj (Mat. 6:31-33).

10. ¿Keniuj uelis tikyekpiaskej toyolo?

¹⁰ Tikpiaskej miak taman oso amo, moneki tikyekpiaskej toyolo. Tikyekpiaj keman amo tiknejnekij timotomintiskej uan keman amo tiktayekanaltiaj tekit tein tikpiaj. Maj timotajtanikan: “Itech nechikolmej oso itech tanojnotsalis, ¿sayoj nitanemilijtok itech tekit? ¿Nochipa nechtekipachoua keniuj nimoixpanoltis satepan? ¿Amo kuali nimouikaok iuan nonamik porin niktayekanaltia niksentilis tomin oso okseki taman? ¿Nikseliskia se tekit tein oksekin amo kiuelitaj uan ijkon ueliskia okachi niktekitilis Jiova?” Ijkon tikmatiskej toni tiktayekanaltiaj (1 Tim. 6:9-12). Keman timochiuiliskej nejon netajtanilmej maj tikelnamikikan ke Jiova techtasojta uan ke motenkaua: “Amo keman nimitssekokauas uan nion no nimitssenkauas”. Yejua ika, tatitanil Pablo kijtoj: “Amo ximotekauilikan de xiktasojtatinemikan kachi ok intomin” (Heb. 13:5, 6).

11. ¿Toni uelis kichiuas tein ika se moixpetania?

¹¹ Jiova kineki maj tiyolpakikan uan tein ika timoixpetaniaj uelis tapaleuis. Hasta Biblia kijtoua ke “amo onkak okse taman tein okachi kipaleuia takat, ta maj takua uan maj tatayi uan maj yolpaki ika chikauak tekit tein kichiua” (Ecl. 2:24). Sayoj ke, miak taman tein taltikpakneminij ika moixpetaniaj nion tepitsin tapaleuia porin kichiua maj miakej kiselikan oso kitasojtakan tein iTajtol Dios kijtoua ke amo kuali yetok.

12. Kemej kijtoua 1 Corintios 10:21, 22, ¿keyej moneki kuali tikixpejpenaskej tein ika timoixpetaniaj?

 ¹² Tejuan tiknejnekij sayoj tikueyichiuaskej Jiova, yejua ika amo uelis titakuaskej itech “imesa Jiova” uan itech “ininmesa amokuali ejekamej” (xikonixtajtolti 1 Corintios 10:21, 22, TNM). Miakpa, keman titakuaj iuan aksa kinextia ke kuali iuan timouikaj. Komo timoixpetaniaj ika tateuilis, naualot, auilnemilis uan okseki amo kuali tanejnekilismej uan tachiualismej, kemej yeskia titakuajtoskiaj iniuan akin kitauelitaj Dios. Komo ijkon tikchiuaj, timoijtakouaj tejuan uan no tokuali uikalis iuan Jiova.

13, 14. 1) ¿Keniuj tein ika timoixpetaniaj kemej yeskia takual? 2) Kemej kijtoua Santiago 1:14, 15, ¿keyej amo moneki tikpiaskej amo kuali tanejnekilis?

¹³ Maj tikitakan keniuj tein ika timoixpetaniaj kemej yeskia takual. Keman titakuaj, tejuan tikixpejpenaj toni tikuaskej. Sayoj ke, keman tiktolouajya, tonakayo peua kitekitiltia uan tejuan nion teyi ueliok tikchiuaj. Keman tikuaj tein tepaleuia techchikaua, sayoj ke keman tikuaj tein amo tepaleuia tikokolispeuaj. Amo niman moita ox tein tikuaj techijtakoua oso techpaleuia.

¹⁴ No ijkon, keman tikixpejpenaj toni ika timoixpetaniskej, tejuan tikixtaliaj toni tikalakiaj itech totanemilil. Tein ika timoixpetaniaj kipata kemej titanemiliaj uan tein tikmachiliaj. Komo timoixpetaniaj ika tein kuali techpaleuia uan komo timoixpetaniaj ika tein amo kuali, techijtakouaj (xikonixtajtolti Santiago 1:14, 15). Xa amo niman tikitaskej keniuj techijtakoua neixpetanilis tein amo kuali, sayoj ke satepan moitas. Yejua ika Biblia technejmachtia: “Amo ximoyolkajkayauakan [...] porin amo aken uelis kikejkelos Dios. [...] Takan se tagat motekitiltia ika tataman tachiualisme, ten kualkui tajtakol, ijkuakon ne tagat kiselis taxtauil ten kualkui in mikilis” (Gál. 6:7, 8). Yejua ika, semi moneki maj amo timoixpetanikan ika tein Jiova kitauelita (Sal. 97:10).

15. ¿Toni techmakani Jiova?

¹⁵ Miakej itekitikauan Jiova kiuelitaj kiitaskej JW Broadcasting^®, canal itech televisión tein moita itech Internet. Se tokniuj siuat akin itokay Marilyn kijtoj: “Nejin canal nechpaleuiani maj okachi niyolpaki uan ueli nikita nochi. Keman nimomachilia noselti oso nikneki nimosenkauas, nochipa nikajsi se tanojnots oso se tamachtilis itech taueyichiualis kualkampa tein nechyolchikaua. Nejon okachi nechtokia iuan Jiova uan inechikol. JW Broadcasting senkis kipatani nonemilis”. ¿Tiktekitiltijtokej nejin tein Jiova techmakatok? Uan amo sayoj nejon, ta no ompa ueli tikitaj videos, tikakij programas ika audio uan nekuikatilmej.

16, 17. ¿Keyej moneki timotsakuiliskej amo miak tiempo timoixpetaniskej uan keniuj uelis tikchiuaskej?

¹⁶ Amo sayoj moneki tikitaskej toni ika timoixpetaniaj, ta no kanachi tiempo tikuij, porin komo amo timoyekpiaj okachi tiempo timoixpetaniskej uan amo semi tiktekitiliskejok Jiova. Miakej kinouijmaka motsakuiliskej. Kemej neskayot, Abigail se tokniuj akin kipia 18 xiujmej, kijtoua: “Keman itech se tonal semi nitekiti, nechpaktia nimoseuis uan nikitas televisión. Sayoj ke komo amo nimoyekpia uelis miak horas nikitstos”. Uan se telpoch akin itokay Samuel kijtoua: “Kemansa, miak horas nikitstok videos tein amo uejueykej itech  Internet. Nipeua ika se, uan keman nikita panokya eyi oso naui horas nikitstok”.

¹⁷ ¿Keniuj uelis timotsakuiliskej amo miak tiempo timoixpetaniskej? Yekinika maj tikitakan kanachi tiempo timoixpetaniaj. Maj tikijkuilokan itech se calendario kanachi horas itech semana tikitaj televisión, Internet oso timoixpetaniaj ika celular uan tableta. Komo tikitaj ke miak horas ika timoixpetaniaj, maj tikijkuilokan keniuj kuali tikuiskej totiempo. Maj tikijkuilokan tein okachi tayekantok uan satepan horas tein timoixpetaniskej. Uan maj tiktajtanikan Jiova maj techpaleui maj tikchiuakan kemej tikixtalijkej. Ijkon tikpiaskej tiempo uan amo tisioujtoskej keman monekis timomachtiskej Biblia, titaueyichiuaskej kemej kalyetouanij, tiyaskej nechikolmej, titanojnotsaskej uan titamachtiskej. Uan no, amo techkuejmolos totanemilil keman timoixpetaniskej.

18, 19. ¿Keniuj uelis tiknextiskej ke sayoj Jiova tikueyichiuaj?

¹⁸ Satepan ke tatitanil Pedro kijkuiloj keman Satanás ixpoliuis uan nochi tein kiixyekana uan keman mochiuas se yankuik taltikpak, kijtoj: “Notasojikniuan, xikyolikachixtiyakan nochi nijin [...]. Uan ximofuerzajuijtiyakan de xichipaukanemikan para [...] Yejuatsin namechajsikiu nanyolseukanentinemij uan amo nanmomautokke ika tajtakol uan ma amo no teyi mochiuto tajtakol namopan” (2 Ped. 3:14). Keman tikchiuaj nejon uan timochikauaj kuali timonejnemiltiskej uan tikpiaskej chipauak totaneltokalis, tiknextiaj ke sayoj Jiova tikueyichiuaj.

¹⁹ Satanás uan akin kinixyekana kisentokaskej kitemoskej maj amo tiktayekanaltikan tein okachi moneki (Luc. 4:13). Sayoj ke, maski tikpanoskej tataman ouijkayomej amo tikauaskej maj teisa oso aksa kichiua maj amo tiktasojtakanok Jiova. Senkis tikixtaliaj sayoj Jiova tikueyichiuaskej, kemej yejuatsin kinamiki.