1. ¿Toni moneki tiksentokaskej tikchiuaskej akin timoauijkejya?

KOMO timoauijkejya, nejon kijtosneki ke tiknextijkejya ininixpan miakej ke titakuaujtamatij iuan Jiova uan ke tiknekij tiktekitiliskej iuan inechikol. * Sayoj ke, moneki tiksentokaskej titakuaujtamatiskej ke inechikol Jiova kichiujtok tekit tein yejuatsin kineki maj mochiua itech nejin tonalmej.

2, 3. ¿Toni eyi taman kinextia Jiova itech inechikol?

² Itech nejin tonalmej, tikitaj ikualneskayouan Jiova, tein kiixtalijtok kichiuas uan itanauatiluan ijkon kemej kiixyekana inechikol. Maj tikitakan eyi taman tein kinextia Jiova itech inechikol.

³ Yekinika, “Dios amo kinchichikojtasojta in tagayot” (Hech. 10:34). Jiova kitemakak iKonetsin maj toka momikili porin techtasojta (Juan 3:16; 1 Tim. 2:6). Kemej kineki maj miakej kinpaleui inemilis Jesús tein kitemakak, kichiua maj itekitikauan kinmatiltikan nochin akin kinekiskej kinkakiskej tein kichiuas iTekiuajyo. Ojpatika, Jiova kiuelita maj onka yolseuilis uan maj amo se xexeliujto (1 Cor. 14:33, 40). Yejua ika itekitikauan amo xexeliujtokej uan kitemouaj maj onka yolseuilis. Expatika, Jiova ‘toUeyi Tamachtijkauj’ (Is. 30:20, 21). Yejua ika, itekitikauan kinmachtiaj oksekin tein kijtoua iTajtol itech nechikolmej uan itech tanojnotsalis. ¿Keniuj monextij nejin eyi taman itech nechikol tein moajsia itech yekinika siglo? ¿Keniuj monextia axkan? ¿Uan keniuj techpaleuia yektikatsin espíritu akin tiktekitiliaj Jiova iuan inechikol?

4. Kemej kijtoua Hechos 1:8, ¿toni kinnauatij Jesús itatojtokakauan maj kichiuanij, uan toni nepaleuil kiseliskiaj?

⁴ Itech yekinika siglo. Tein Jesús kiteixmatiltij kichiuak  maj nochin taltikpakneminij kichianij okachi kuali nemiskej satepan (Luc. 4:43). Kinnauatij itatojtokakauan maj kisentokanij kichiuanij tekit tein kipeualtijka uan maj tanojnotsanij “nonouiyampa de nochi senmanauak” (xikonixtajtolti Hechos 1:8). Sayoj ke amo ueliskia ininselti kichiuaskej. Monekia kinpaleuis yektikatsin espíritu, tein Jesús kiniluijka ke kinualtitaniliskia (Juan 14:26; Zac. 4:6).

5, 6. ¿Keniuj yektikatsin espíritu kinpaleuij itatojtokakauan Jesús?

⁵ Itatojtokakauan Jesús kiselijkej yektikatsin espíritu itech Pentecostés itech xiuit 33. Ika inepaleuil nejon espíritu, niman peuak tanojnotsaj uan miakej niman kiselijkej inintamachtilis (Hech. 2:41; 4:4). Uan keman peuak kintajyouiltiaj, amo moujkej, ta kitajtanijkej Dios maj kinpaleui. Yejuan kitataujtijkej: “Xitechonmaka ne yolchikaualis para ma tejuan amo tiyolmouikan de tiktetapouiske motajtoltsin”. Keman kitamitataujtijkej, kiselijkej yektikatsin espíritu uan kisentokakej “tanojnotstinenke ika in Tajtoltsin de Dios ika ueyi yolchikaualis” (Hech. 4:18-20, 29, 31).

⁶ Sayoj ke itatojtokakauan Jesús no kipiakej okseki ouijkayomej. Kemej neskayot, amo onkayaj miak Amatajkuilolmej uan amo kipiayaj amaixmej tein kimelauayaj iTajtol Dios kemej axkan tikpiaj. Uan monekia kinnojnotsaskej akin tajtouayaj okseki tajtolmej. Maski ijkon, uelik kichiujkej tein moitaya ke amo ueliskia mochiuas: kemej itech 30 xiujmej tanojnotskajya “tech nochi in senmanauak” (Col. 1:6, 23).

7. ¿Keniuj kimatiaj itekitikauan Jiova panoua cien xiujmej achto toni kinekia yejuatsin maj kichiuanij, uan toni kichiujkej?

⁷ Itech nejin tonalmej. Jiova kisentoka kinixyekana itekitikauan uan kinmaka chikaualis. Okachi kinixyekana ika iTajtol tein kichiuak maj moijkuilo ika iespíritu. Ompa ijkuiliujtok tein Jesús kichiuak itech tanojnotsalis uan keman kinnauatij itatojtokakauan maj kisentokanij kichiuanij tekit tein kipeualtijka (Mat. 28:19, 20). Itech metsti julio xiuit 1881, amaix La Atalaya kijtoj: “Keman Jiova techixpejpenak, amo kichiuak porin kinekia maj techueyitalikan oso maj timotomintikan, ta kinekia maj tikuikan nochi tein tikpiaj uan maj ika tikteixmatiltikan tatiochiualismej tein kiualkuis iTekiuajyo”. Itech se folleto tein kisak itech xiuit 1919 itech tajtol inglés tein motokaytij A quienes se les confía la obra, moijtoj: “Moita ke se ueyi tekit, sayoj ke iaxka toTekotsin, uan ika inepaleuil, uelis tikchiuaskej”. Ijkon kemej tokniuan itech yekinika siglo, nejin tokniuan tanojnotskej ika yolchikaualis porin takuaujtamatiaj ke yektikatsin espíritu kinpaleuiskia maj kinnojnotsanij tataman taltikpakneminij. Tejuan no titakuaujtamatij ke yektikatsin espíritu techpaleuis.

8, 9. ¿Keniuj inechikol Jiova kiteixmatiltiani iTajtol?

⁸ Inechikol Jiova kiteixmatiltiani iTajtol ika miak tataman nepaleuilmej. Tokniuan kikuiaj “Foto-Drama de la Creación”, amaixmej, tepos kampa kitaliayaj discos tein kipiayaj tanojnotsmej, carros tein kintaliliayaj uejueyi bocinas, kipanoltiayaj tamachtilis itech radio, uan yankuixtok, computadoras uan Internet. Uan no, tein tamachtia Biblia motajtolkepani itech miak tajtolmej kemej amo keman mochiujtoya. ¿Keyej mochiua nejin? Porin tapaleuia maj nochin taltikpakneminij kikakikan itech inintajtol tatiochiualismej tein kiualkuis iTekiuajyo Dios. Jiova amo techichikotasojta uan kijtoj ke motanojnotsaskia itech “nochi paísme uan intsalan nochi tataman tagayot uan intsalan nochi tataman pueblojuani uan [...] ten tajtoaj ika tataman tajtolis” (Apoc. 14:6, 7). Yejuatsin kineki maj nochin kikakikan tein kichiuas iTekiuajyo.

 ⁹ ¿Uan toni panoua iniuan taltikpakneminij akin amo ueli tikinnojnotsaj, xa porin nemij kampa amo ueli tipanouaj porin moajsij tajpianij oso kuali tatsaktok? Jiova kipaleuij inechikol maj ueli kinnojnotsa nejin taltikpakneminij keman peuak motanojnotsa kampa miakej panouaj. Kemej neskayot, itech xiuit 2001, tokniuan Oloch Taojtokaltianij kiixtalijkej maj tokniuan akin nemij Francia peuanij kikuinij carritos uan okseki taman kampa ueliskia kitaliskej amaixmej, uan satepan tokniuan akin nemij itech okseki altepemej no peuak ijkon tanojnotsaj. Nejin semi tapaleuij. Itech xiuit 2011, peuak mochiua okse taman tanojnotsalis kampa ika panouaj miakej itech altepet Nueva York (Estados Unidos). Itech nejon xiuit, tokniuan kikaujkej 102,129 libros uan 68,911 revistas, uan 4,701 taltikpakneminij tajtankej se nemachtil ika Biblia. Nejon kinextij ke Jiova tapaleuijtoya ika iyektikatsin espíritu. Yejua ika, Oloch Taojtokaltianij kiixtalijkej maj tokniuan itech nochi taltikpak peuanij kikuinij carritos uan okseki taman kampa ueliskia kitaliskej amaixmej.

10. ¿Toni uelis tikchiuaskej tein techpaleuis maj okachi kuali titanojnotsakan uan maj okachi kuali titamachtikan?

¹⁰ Tein uelis tikchiuaskej. Jiova techmachtia itech nechikolmej keniuj titanojnotsaskej. Yejua ika, maj tikchiuakan tein ompa techmachtia. Maj nochipa titanojnotsatij iniuan tokniuan akin ixyetok iniuan titanojnotsaskej. Komo moneki okachi kuali titanojnotsaskej oso okachi kuali titamachtiskej, yejuan uelis techpaleuiskej uan techyolchikauaskej ika ininneskayo. Maj tiksentokakan titanojnotsakan maski tikpiaskej ouijkayomej. Kemej techelnamiktia tajkuilol kampa mokixtia nejin tamachtilis, amo toselti ueli tikchiuaj tein Dios kineki, ta iyektikatsin espíritu techpaleuia (Zac. 4:6). Tein melauj, nejin tekit iaxka Dios.

11. ¿Keniuj sentekitikej oloch taojtokaltianij itech yekinika siglo porin amo kinekiaj maj ixolal Dios moxexelouani?

¹¹ Itech yekinika siglo. Oloch taojtokaltianij, akin yetoyaj Jerusalén, sentekitiaj porin kinekiaj maj onkani yolseuilis itech ixolal  Dios uan maj amo xexeliujtonij (Hech. 2:42). Kemej neskayot, kemej itech xiuit 49, seki tokniuan kinemiliayaj ke takamej monekiaok moneskayotiskej itech ininnakayo komo kinekiaj kitekitiliskej Jiova uan oksekin kinemiliayaj ke amo monekiaok. Oloch taojtokaltianij kitemojkej kiyektaliskej nejon kuejmol ika inepaleuil yektikatsin espíritu. Komo tokniuan kisentokaskiaj kipiaskiaj tataman tanemilil, amo ueliskia kuali motanojnotsas. Maski oloch taojtokaltianij katkaj judíos, amo kikaujkej maj kinixyekanani tein kineltokayaj judíos oso inintamachtijkauan, ta kitemojkej maj iTajtol Dios uan iespíritu kinixyekanani (Hech. 15:1, 2, 5-20, 28). ¿Toni panok? Jiova kitiochiuak tein kiixtalijkej, itech nechikol kisentokakej kipiakej yolseuilis uan amo moxexelojkej, uan kisentokakej tanojnotskej (Hech. 15:30, 31; 16:4, 5).

12. ¿Toni kinextia ke itech inechikol Dios onkak yolseuilis uan amo xexeliujtokej?

¹² Itech nejin tonalmej. Inechikol Jiova kisentokani kitemouani maj onka yolseuilis itech ixolal Dios uan maj amo xexeliujtokan. Itech xiuit 1895, amaix La Atalaya 15 de noviembre itech tajtol inglés, kipiaya se tamachtilis tein motokaytiaya “Decentemente y con orden”, tein mokixtij itech 1 Corintios 14:40. Ompa kijtouaya: “Tatitanilmej miakpa kiyolmajxitijkej nechikol tein yekinika moajsik maj amo moxexelouanij [...]. Moneki tiksentokaskej tiktakamatiskej tein moijkuiloj “para tejuan ika timomachtiske” (Rom. 15:4). Ijkon kemej kichiujkej tokniuan itech yekinika siglo, inechikol Jiova itech nejin tonalmej kitemoua maj onka yolseuilis itech ixolal Dios uan maj amo xexeliujtokan. Kemej neskayot, komo tikpiaskiaj Nemachtil ika amaix Tanejmachtijkej itech okse nechikol, xa hasta se tein moajsi itech okse altepet, tikmatiskiaj keniuj kiixyekanaskiaj uan katiyejua tamachtilis moitaskia. Niman kuali timomachiliskiaj. Sayoj iespíritu Dios ueli kichiua maj amo tixexeliujtokan (Sof. 3:9, nota).

13. Ika tein kijtoua Santiago 3:17, ¿toni moneki timotajtaniskej?

¹³ Tein uelis tikchiuaskej. Jiova kineki maj ‘nochipa tikpixtinemikan ne yolseuilis se uan okse’ (Efes. 4:1-3). Yejua ika, maj timotajtanikan: “¿Nitapaleuia maj onka yolseuilis  itech nechikol uan maj nochin kuali timouikakan? ¿Nikintakamati tokniuan akin taixyekanaj? ¿Ueli takuaujtamatij nouan okseki tokniuan, okachiok komo nikpia tekimej itech nechikol? ¿Niman niajsi kansaika uan nikuelita nikinpaleuis oksekin?” (xikonixtajtolti Santiago 3:17). Komo tiknemiliaj ke uelis okachi kuali tikchiuaskej semej nejin taman, maj tikiluikan Jiova maj techpaleui ika iyektikatsin espíritu. Komo tikauaj maj iespíritu Jiova techpaleui maj tiknextikan okachi kualneskayomej uan maj techixyekana itech tein tikchiuaj, tokniuan okachi techtasojtaskej uan techpatiuitaskej.

14. Kemej moijtoua itech Colosenses 1:9, 10, ¿keniuj kinmachtij Jiova itekitikauan itech yekinika siglo?

¹⁴ Itech yekinika siglo. Jiova kiuelita kinmachtis itekitikauan (Sal. 32:8). Kineki maj kiixmatikan, maj kitasojtakan uan maj nemikan nochipaya. Tamachtilis tein techmaka tapaleuia maj ueli mochiua nejin (Juan 17:3). Ika nechikol tein moajsia itech yekinika siglo, Jiova kinpaleuij itekitikauan maj kiselianij tamachtilis (xikonixtajtolti Colosenses 1:9, 10). No kinpaleuij ika iyektikatsin espíritu, tein Jesús kiniluijka ke kintitaniliskia (Juan 14:16). Yektikatsin espíritu kinpaleuij maj kiajsikamatinij iTajtol Dios uan maj kielnamikinij nochi tein Jesús kijtoj uan kichiuak, tein satepan moijkuiloj itech Evangelios. Nejon taixmatilis kinpaleuij maj mochikauani inintakuaujtamatilis uan maj okachi kitasojtanij Dios, iKonetsin uan okseki tokniuan.

15. ¿Keniuj tikonita ke mochiuani itajtoluan Jiova tein moajsij itech Isaías 2:2, 3?

¹⁵ Itech nejin tonalmej. Jiova kijtojka ke “itech itamian tonalmej”, taltikpakneminij akin kayomej itech tataman altepemej mosentiliskiaj iniuan itekitikauan porin kinekiskiaj maj yejuatsin kinmachti (xikonixtajtolti Isaías 2:2, 3). Axkan tikitaj ke mochiujtok nejin. Ueli tikitaj ke taueyichiualis  tein melauak okachi kuali ke taueyichiualis tein amo melauak. ¡Uan Jiova techmaka miak tamachtilis! (Is. 25:6). Jiova kichiua maj takeual takuaujtamach uan tamatkej techmaka nejin tamachtilis. Uan amo sayoj se taman kemej tikseliaj. Kemej neskayot, ueli tikixtajtoltiaj amaixmej, tikakij tanojnotsmej uan ueli tikitaj videos (Mat. 24:45). Titanemiliaj kemej Elihú, akin kuali mouikaya iuan Job, uan kijtoj ke Dios okachi kuali tamachtijkej (Job 36:22).

16. ¿Toni uelis tikchiuaskej uan ijkon techpaleuis tamachtilis tein Jiova techmaka?

¹⁶ Tein uelis tikchiuaskej. Yektikatsin espíritu techpaleuis maj tikchiuakan tein tikixtajtoltiaj uan tein timomachtiaj itech iTajtol Dios. Maj tiktajtanikan Jiova tein tajtanik salmista: “Xinechmachti Jiova moojtsin. Ninentinemis itech moojtsin tein melauak. Xikchiua maj nikmoujkatoka motokay ika nochi noyolo” (Sal. 86:11). Yejua ika, maj tiksentokakan tikixtajtoltikan uan maj timomachtikan Biblia uan amaixmej tein techmaka inechikol Jiova. Sayoj ke, amo sayoj tiknekij tikpiaskej taixmatilis, ta tiknekij tikneltokaskej ke tein timomachtiaj yejua tein melauak uan tikchiuaskej, uan Jiova techpaleuis ika iespíritu. Maj no tikinyolchikauakan tokniuan, porin yejuan kemej yeskiaj tochankauan (Heb. 10:24, 25). Maj tiktataujtikan Jiova maj techpaleui ika iespíritu maj titanankilikan itech nechikolmej tein tayolchikauas uan maj timochikauakan kuali timomachtiskej keman tikpanoltiskej se tamachtilis itech nechikol. Komo tikchiuaj nochi nejin, tiknextiliskej Jiova uan iKonetsin ke tikintasojtaj tokniuan, akin kinitaj kemej ininichkauan (Juan 21:15-17).

17. ¿Keniuj uelis tiknextiskej ke tiyolpakij titekitiskej iuan inechikol Jiova?

¹⁷ Amo uejkaua, nikan taltikpak sayoj moajsis nechikol tein Dios kiixyekana ika iespíritu. Yejua ika, maj iuan titekitikan ika yolpakilis. Maj tiknextikan ke titetasojtaj kemej Jiova keman tikinmatiltiskej nochin taltikpakneminij tein kichiuas iTekiuajyo. Maj tikchiuakan kemej yejuatsin, uan maj titapaleuikan maj onka yolseuilis itech nechikol uan maj tinochin kuali timouikakan. Uan maj tikakikan toUeyi Tamachtijkauj keman tikixtajtoltiskej uan timomachtiskej nochi tein inechikol techmaka. Ijkon, keman ixpoliuis nochi tein Satanás kiixyekana, amo timouiskej, ta ika yolchikaualis tietoskej iniuan akin no amo kikauaj Jiova uan tekitij iuan inechikol.