TAMACHTILIS 41
Keniuj uelis tikpaleuiskej akin tikmachtiaj maj moaui (yekinika taxelol)
“Namejuan se amat tein iaxka Cristo tein tejuan tikijkuilojkej kemej itekitikauan Dios” (2 COR. 3:3, TNM).
NEKUIKATIL 78 Maj titamachtikan iTajtol Dios
TEIN MOITAS *
Nochin tokniuan itech se nechikol yolpakij keman kiitaj ke moauia se akin momachtijtoya Biblia akin semi kitasojtaj. (Xikonita párrafo 1).
1. ¿Keniuj 2 Corintios 3:1-3 techpaleuia maj tikitakan ke se ueyi tatiochiualis tikpaleuiskej maj moaui se akin momachtia Biblia? (Xikonita taixkopin ipeujyan amaix).
¿KENIUJ timomachiliaj keman itech tonechikol moauia se akin momachtijtoya Biblia? Xa semi tiyolpakij (Mat. 28:19). Uan komo tejuan tikmachtijkej, okachiok tiyolpakij (1 Tes. 2:19, 20). Keman akin momachtijtokej Biblia moauiaj, kinextiaj ke akin kinmachtij uan okseki tokniuan semi kinpaleuijkej. Yejua ika uelis tikijtoskej ke yejuan kemej yeskiaj amamej kampa amo sayoj kuali ika tajtouaj tokniuj akin kinmachtij, ta no nochin tokniuan itech nechikol (xikonixtajtolti 2 Corintios 3:1-3, TNM).
2. 1) ¿Toni moneki timotajtaniskej, uan keyej? 2) ¿Toni se nemachtil ika Biblia? (Xikonita nota).
2 Techyolpaktia tikmatiskej ke itech naui xiujmej tein panokej, motemakakej mejmetstika itech nochi taltikpak kemej 10,000,000 nemachtilmej ika Biblia. * Uan kemej 280,000 moauijkej xijxiujtika. Kemej tikitaj, moajsijok miakej akin momachtijtokej Biblia uan uelis moauiskej. ¿Keniuj uelis tikinpaleuiskej? Jiova amo yolijsiui uan yejua ika taltikpakneminij uelisok mochiuaskej itaixpantijkauan. Kemej amo miak tonalmejok mokauaj, maj timochikauakan tikinpaleuiskej maj moauikan (1 Cor. 7:29a; 1 Ped. 4:7).
3. ¿Toni tikitaskej itech nejin tamachtilis?
3 Kemej tokniuan Oloch Taojtokaltianij kiitakej ke moneki se kinpaleuis miakejok akin momachtijtokej Biblia maj moauikan, tajtankej itech nochi kalmej Betel toni uelis tapaleuis maj se kichiua nejin. Itech nejin tamachtilis uan tein kisentoka, tikitaskej toni tayolmajxitijkej seki tokniuan takalpanouanij, misioneros uan precursores (Prov. 11:14; 15:22). * Yejuan kijtojkej tein uelis tikchiuaskej kemej tamachtianij uan tein uelis kichiuaskej akin tikinmachtiaj. Itech nejin tamachtilis tikitaskej makuil taman tein moneki kichiuaskej akin momachtijtokej Biblia uan ijkon uelis moauiskej uan keniuj uelis tikinpaleuiskej.
MAJ MOMACHTI NOCHI SEMANAS
Maj tiktajtanikan akin tikmachtiaj xa uelis timotaliskej uan okachi ika titajtoskej Biblia. (Xikonita párrafos 4 hasta 6).
4. ¿Toni xa amo panos komo se akin momachtia ikaltenoj amo semi mochikaua momachtis?
4 Miakej tokniuan kinmachtiaj taltikpakneminij ininkaltenoj. Maski nejin tapaleuia maj kinekikan kimatiskej okachi, miakpa amo uejkauaj keman kinmachtiaj uan xa amo nochi semanas momachtiaj. Seki tokniuan kintajtaniaj taltikpakneminij inintapoual uan kinnotsaj oso kintajkuilouiliaj achto ke oksepa kinkalpanotiuij, porin ijkon kitemouaj maj kinekikan momachtiskej. * Tokniuan uelis kichiujtoskej nejin miak metsti. Sayoj ke moneki tikajsikamatiskej ke nejon taltikpakneminij xa amo motemaktiskej nion moauiskej komo amo mochikauaj okachi momachtiskej.
5. ¿Toni tamachtij Jesús itech Lucas 14:28-33 tein uelis techpaleuis keman titamachtiaj ika Biblia?
5 Se tonal, Jesús tamachtij ika ome neskayomej toni moneki kichiuas se taltikpaknenkej komo kineki yeski itatojtokakauj. Ika tajtoj se taltikpaknenkej akin kineki kichijchiuas se “uejkapan tepan” uan se tekiuaj akin moteuiti iuan okse tekiuaj. Kijtoj ke akin kineki kichijchiuas “uejkapan tepan” moneki motalis uan kiixejekos “kanachi tomin monekis”, uan ke tekiuaj no moneki motalis uan kiitas ox itateuijkauan uelis tataniskej (xikonixtajtolti Lucas 14:28-33). Jesús kimatia ke akin kineki mochiuas itatojtokakauj no moneki kuali kinemilis toni moneki kichiuas achto. Uelis tikpaleuiskej akin tikmachtiaj maj kimati toni moneki kichiuas komo tikyolchikauaj maj momachti nochi semanas. ¿Keniuj uelis tikchiuaskej nejin?
6. ¿Toni uelis tikchiuaskej komo tiknekij okachi tikpaleuiskej akin tikmachtiaj ika Biblia?
6 Yekinika, maj okachi tiuejkauakan keman tikmachtiskej ikaltenoj. Kemej neskayot, maj amo ika titajtokan sayoj se tajkuilol itech Biblia keman tikalpanoskej. Keman tikitaskej ke taltikpaknenkej kiuelita maj okachi uejkauak tikmachtikan, maj tiktajtanikan xa uelis timotaliskej kansaika uan tiksentokaskej titajtoskej. Tein technankilis techpaleuis maj tikitakan ox kipatiuita momachtis Biblia. Uan komo tiknekij tikpaleuiskej maj okachi niman kiajsikamati tein momachtijtok, hasta ueliskia tiktajtaniskej ox kiuelitaskia momachtis ojpa semana. Maj tikitakan okse taman tein no moneki kichiuas akin momachtijtok Biblia.
MAJ ACHTO MOMACHTI TEIN TIKITASKEJ
Maj kuali timomachtikan achto ke tikitatiuij akin tikmachtiaj uan maj tiknextilikan keniuj momachtis. (Xikonita párrafos 7 hasta 9).
7. ¿Keniuj moneki timomachtiskej achto ke titamachtitiuij?
7 Moneki maj kuali timomachtikan achto ke titamachtitiuij. Yekinika uelis tikixtajtoltiskej nochi tamachtilis uan tiktemojtiaskej tajkuilolmej. Maj tikitakan katiyejua tanemililmej tayekantokej. Maj itech titanemilikan itokay tamachtilis, tajtolmej tijtiltik tein moajsij ipeujyan seki párrafos, netajtanilmej, tajkuilolmej tein kijtouaj “xikonixtajtolti”, taixkopimej uan videos tein uelis tiknextiskej. Ompa, maj itech titanemilikan akin tikmachtiaj uan keniuj uelis tikmelauiliskej tamachtilis kemej uelis kiajsikamatis uan kichiuas (Neh. 8:8; Prov. 15:28a).
8. Kemej kijtoj tatitanil Pablo itech Colosenses 1:9, 10, ¿toni moneki tikchiuaskej keman tikpiaskej se nemachtil ika Biblia?
8 Keman timomachtiskej achto ke titamachtitiuij, no maj ika titajtokan akin tikmachtiaj itech tonetataujtil. Maj tiktajtanikan Jiova maj techpaleui maj tikuikan Biblia kemej uelis tikpaleuiskej maj kineki kichiuas tein momachtia (xikonixtajtolti Colosenses 1:9, 10). Maj tiknemilikan xa onkak teisa tein ouij kikisas kiajsikamatis oso kineltokas. Maj amo tikelkauakan ke tiknekij tikpaleuiskej maj moaui.
9. ¿Keniuj uelis tikpaleuiskej maj momachti achto akin tikmachtiaj?
9 Tikchiaj maj nemachtil ika Biblia kipaleui akin tikmachtiaj maj kipatiuita tein Jiova uan Jesús kichiuanij, uan maj kineki kimatis okachi (Mat. 5:3, 6). Akin tikmachtiaj okachi kiajsikamatis tamachtilis komo keman tikmachtiaj amo tanemilijtok itech okseki taman. Yejua ika, maj tikiluikan ke semi kipaleuis komo achto kiixtajtoltia tamachtilis tein tikitaskej uan kinemilia keniuj uelis kitakamatis. Uelis tiknextiliskej keniuj kichiuas komo iuan timomachtiaj se tamachtilis. * Maj tiknextilikan keniuj kiajsis tanankilil uan maj kiixpejpena sayoj seki tajtolmej tein kipaleuis maj kielnamiki tanankilil. Ompa, maj tikiluikan maj tanankili kemej kiajsikamatik. Ijkon tikmatiskej ox kuali kiajsikamatik tamachtilis. Maj tikitakan expatika taman tein moneki tiknextiliskej maj kichiua akin tikmachtiaj.
MAJ MOJMOSTAJ TAJTO IUAN JIOVA
Maj tiknextilikan akin tikmachtiaj keniuj kitataujtis Jiova. (Xikonita párrafo 10 uan 11).
10. ¿Keyej akin tikmachtiaj moneki mojmostaj kiixtajtoltis Biblia, uan keniuj okachi kipaleuis tein kiixtajtoltia?
10 Akin tikmachtiaj semi kipaleuis komo iuan timomachtiaj nochi semanas, sayoj ke no kipaleuis komo iselti kichiua seki taman mojmostaj. Moneki kinojnotsas Jiova uan kikakis. Uelis kikakis komo mojmostaj kiixtajtoltia Biblia (Jos. 1:8; Sal. 1:1-3). Maj tiknextilikan keniuj kikuis programa tein moajsi itech jw.org tein kinextia toni ixyetok moixtajtoltis itech Biblia mojmostaj, tein uelis se kiamakixtis. * Okachi kipaleuis tein kiixtajtoltis itech Biblia komo tikyolchikauaj maj kinemili keniuj tein kiixtajtoltia kipaleuia maj okachi kiixmati Jiova uan keniuj uelis kichiuas tein momachtia (Hech. 17:11; Sant. 1:25).
11. ¿Toni kipaleuis akin tikmachtiaj maj ueli kichiua netataujtil, uan keyej moneki nochipa kichiuas?
11 Maj tikyolchikauakan akin tikmachtiaj maj tajto iuan Jiova keman mojmostaj kitataujtis. Keman peuas timomachtiskej iuan uan keman timatamiskej, maj tikchiuakan netataujtil ika nochi toyolo uan maj tiktajtanikan Jiova maj kipaleui. Nejon kipaleuis maj no ijkon kitataujti Jiova uan maj kichiua itokaykopa Jesucristo (Mat. 6:9; Juan 15:16). Semi kipaleuis maj motoki iuan Dios komo mojmostaj kikaki keman kiixtajtoltis Biblia, uan komo iuan tajtoua keman kichiuas netataujtil (Sant. 4:8). Komo kichiua nejin, kipaleuis maj kineki motemaktis uan maj moaui. ¿Toni okse taman no kipaleuis?
MAJ KUALI MOUIKA IUAN JIOVA
12. ¿Keniuj uelis tikpaleuiskej akin tikmachtiaj maj kuali mouika iuan Jiova?
12 Tamachtilis amo sayoj moneki mokauas itech itanemilil akin tikmachtiaj, ta no moneki ajsis itech iyolo. ¿Keyej? Porin toyolo, tein kiixnextia tein tiknejnekij uan tein tikmachiliaj, yejua tein techolinia maj tikchiuakan teisa. Jesús kinmachtiaya taltikpakneminij miak taman uan yejuan kiuelitayaj maj kinmachti. Sayoj ke kitojtokayaj porin tamachtilis ajsia itech ininyolo (Luc. 24:15, 27, 32). Akin tikmachtiaj moneki kiitas ke Jiova yekmelauj nemi uan ke uelis mochiuas iPopaj, iDios uan iTasojikniuj (Sal. 25:4, 5). Keman tikmachtiskej, maj ika titajtokan ikualneskayouan Jiova (Éx. 34:5, 6; 1 Ped. 5:6, 7). Maj tikchiuakan nejin nochipa keman tikmachtiskej. Maj tikpaleuikan maj kiita ke Jiova semi tetasojta, kualtakat uan teiknelia. Jesús kijtoj ke “kachi ueyi tanauatil uan de kachi kuika ueyi chikaualis” yejua “Xiktasojta moueyitekotsin Totajtsin Dios” (Mat. 22:37, 38). Maj timochikauakan tikpaleuiskej akin tikmachtiaj maj kitasojta Dios.
13. Xikonijto ika se neskayot keniuj uelis tikpaleuiskej akin tikmachtiaj maj kiita ikualneskayouan Jiova.
13 Maj tikiluikan akin tikmachtiaj keyej tiktasojtaj Jiova. Nejin xa kipaleuis maj kiita ke yejua no moneki kuali mouikas iuan uan kitasojtas (Sal. 73:28). Kemej neskayot, maj tiknemilikan ke itech amatajkuilol tein timomachtijtokej oso itech se tajkuilol tikitaj teisa tein semi techyololinia porin kinextia ke Jiova tetasojta, tamatkej, ke kichiua tein melauak oso ke kipia chikaualis. Ijkuak, uelis tikiluiskej akin tikmachtiaj ke nejon se taman tein kichiua maj tiktasojtakan toTajtsin. Axkan maj tikitakan okse taman tein no kipaleuis akin momachtijtok Biblia maj moaui.
MAJ YOUI NECHIKOLMEJ
Maj tikyolchikauakan akin tikmachtiaj maj youi nechikolmej. (Xikonita párrafo 14 uan 15).
14. Kemej kijtoua Hebreos 10:24, 25, ¿toni kipaleuis akin tikmachtiaj maj niman moaui?
14 Tinochin tiknekij maj moauikan akin tikinmachtiaj. Uelis tikinpaleuiskej maj kichiuakan nejon komo tikinyolchikauaj maj yakan nechikolmej. Tokniuan akin miakejya kinmachtianij kijtouaj ke akin niman peua youij nechikolmej yejuan akin okachi niman moauiaj (Sal. 111:1). Sekin kiniluiaj akin kinmachtiaj ke kimatiskej seki taman itech nemachtil tein kiseliskej nochi semanas uan okseki taman itech nechikolmej. Maj tikixtajtoltilikan Hebreos 10:24, 25 akin tikmachtiaj uan maj tikiluikan keyej semi kipaleuis komo youi nechikolmej (xikonixtajtolti). No uelis tiknextiliskej video ¿Keniuj tikchiuaj tonechikoluan? * Maj tikpaleuikan akin tikmachtiaj maj kiixtali yas nochi nechikolmej.
15. ¿Keniuj uelis tikpaleuiskej akin tikmachtiaj maj youi nochi nechikolmej?
15 ¿Toni uelis tikchiuaskej komo akin tikmachtiaj ayamo yani nion se nechikol oso sayoj kemansa youi? Maj tiktapouikan ika yolpakilis teisa tein timomachtijkej itech se nechikol tein yankuixtok tikpiakej. Nejin okachi tapaleuis ke sayoj tikyoleuaskej maj youi. Maj tikmakakan amaix Tanejmachtijkej oso amaix Tein timomachtiaj itech nechikol, uan maj tiknextilikan tein timomachtiskej nejon semana. Ompa, maj tiktajtanikan toni okachi kiuelitaskia kimatis. Tein kiitas uan tein kikakis itech yekinika nechikol tein yas, okachi kuali yeski ke tein kiitak uan tein kikakik itech okse nechikol tein achto yajka itech okse taneltokalis (1 Cor. 14:24, 25). Ompa kinixmatis okseki tokniuan akin kikauaj se kuali neskayot uan akin kipaleuiskej maj moaui.
16. 1) ¿Keniuj uelis tikpaleuiskej maj moaui akin tikmachtiaj? 2) ¿Toni tikitaskej itech tamachtilis tein kisentoka?
16 Kemej tikitakej, ¿keniuj uelis tikpaleuiskej maj moaui akin tikmachtiaj? Uelis tikpaleuiskej maj kiita ke moneki maj se momachti Biblia keman tikyolchikauaskej maj momachti nochi semanas uan maj achto momachti tein tikitaskej. Maj tikmachtikan maj mojmostaj kitataujti Jiova uan maj kuali mouika iuan. Uan maj tikyolchikauakan maj youi nechikolmej. (Xikonita recuadro “ Tein moneki kichiuas akin momachtijtok Biblia”). Sayoj ke, kemej tikitaskej itech tamachtilis tein kisentoka, moajsi makuil taman tein no moneki tikchiuaskej akin titamachtiaj ika Biblia uan ijkon uelis tikpaleuiskej akin tikmachtiaj maj moaui.
NEKUIKATIL 76 Xinechtapoui tein tikmachilia
^ párr. 5 Tikmachtiskej se taltikpaknenkej kijtosneki tikpaleuiskej maj kipata kemej tanemilia, tein kimachilia oso tein kichiua. Mateo 28:19, tajkuilol tein moixtalij mokuis itech xiuit 2020, techelnamiktiani ke moneki tikinmachtiskej oksekin ika Biblia uan tikinpaleuiskej maj kimatikan keniuj mochiuaskej itatojtokakauan Cristo uan moauiskej. Itech nejin tamachtilis uan tein kisentoka, tikitaskej keniuj uelis okachi kuali tikchiuaskej nejin tekit tein semi moneki.
^ párr. 2 TEIN OKACHI MOMELAUA: Komo miakpaya titajtouaj ika Biblia iuan se taltikpaknenkej uan tikuij semej toamaixuan oso ompa tikixtiaj tein tikiluiaj, tikchiujtokej se nemachtil ika Biblia. Uelis tikijkuiloskejya kemej se nemachtil komo satepan ke tiknextilijkej keniuj titamachtiaj ojpaya iuan timomachtiaj uan tiknemiliaj ke kisentokas momachtis.
^ párr. 3 Nejin tamachtilis uan tein kisentoka no kipia tayolmajxitilis tein kisak itech tamachtilis “Dirijamos estudios bíblicos progresivos” itech amaix Nuestro Ministerio del Reino julio de 2004 hasta mayo de 2005.
^ párr. 4 Keman titanojnotsaj, nochipa moneki tiktakamatiskej tanauatilmej tein kiixtalianij tekiuanij tein ika kinyekpiaj taltikpakneminij. Seki taman yejua maj amo se kitematilti kani nemij, inintapoual uan oksekiok.
^ párr. 9 Xikonita video Xikonnextili akin tikonmachtia keniuj momachtis achto ke tikonkalpanos, tein uejkaua naui minuto. Itech JW Library®, xikontemo MULTIMEDIA > NUESTRAS REUNIONES Y MINISTERIO > MEJORE SUS HABILIDADES EN EL MINISTERIO.
^ párr. 10 Xikontemo BIBLIOTECA > LIBROS UAN FOLLETOS.
^ párr. 14 Itech JW Library®, xikontemo MULTIMEDIA > NUESTRAS REUNIONES Y MINISTERIO > AYUDAS PARA LA PREDICACIÓN.
