1. ¿Keyej miakej amo kimatij toni kineltokaskej?

ITECH miak taneltokalismej kijtouaj ke kichiuaj kemej Cristo uan ke kiueyichiuaj Dios kemej yejuatsin kiyolpaktia. Yejua ika miakej taltikpakneminij amo kimatij toni kineltokaskej uan motajtaniaj: “¿Moajsi sayoj se taneltokalis tein melauak, oso kiyolpaktiaj Dios nochi taneltokalismej?”. Uan tejuan, ¿senkis tikneltokaj ke tiitaixpantijkauan Jiova titamachtiaj tein melauak, uan ke Dios sayoj kiyolpaktia kemej tejuan tikueyichiuaj? ¿Yekmelauj uelis tikneltokaskej nejin? Maj tikitakan seki taman tein techpaleuis.

2. ¿Keyej tatitanil Pablo senkis takuaujtamatia ke tein kineltokaya yejua tein melauak? (1 Tesalonicenses 1:5).

² Tatitanil Pablo senkis takuaujtamatia ke tein kineltokaya yejua tein melauak (xikonixtajtolti 1 Tesalonicenses 1:5). Uan amo kineltokaya nejon sayoj porin kichiuaya maj kuali momachili, ta porin kuali momachtiaya iTajtol Dios. Kineltokaya ke “nochi in Tajkuilolamatsitsin nochi yejuan Dios kichiuak ika ichikaualisuan” (2 Tim. 3:16). Keman momachtij, Pablo kiajsik miak taman tein kinextiaya ke Jesús katka Mesías akin moijtojka ke ualaskia. Sayoj ke judíos akin taixyekanayaj itech taneltokalis amo kineltokakej nejon. Maski kijtouayaj ke kinpaleuiayaj taltikpakneminij maj kiixmatinij Dios, kichiuayaj tein yejuatsin kitauelita (Tito 1:16). Sayoj ke Pablo amo kiixpejpenak toni kineltokas uan toni amo, ta tamachtij uan kichiuak ‘nochi ne tamachtilis ten Dios kimonekiltia’ (Hech. 20:27).

3. ¿Moneki tikpiaskej itanankililuan nochi tonetajtaniluan komo tiknekij titakuaujtamatiskej ke tein tikneltokaj yejua tein melauak? (No xikonita recuadro “ Itachijchiualisuan uan itanemililuan Jiova semi miakej uan amo ueli tikinpouaj”).

³ Sekin kinemiliaj ke itech taneltokalis tein melauak monekiskia  monankilis nochi netajtanilmej tein se kipia, hasta netajtanilmej tein amo monankiliaj itech Biblia. ¿Taixejekol maj tiknemilikan nejon? Maj tikitakan ineskayo Pablo. Maski kiniluij tokniuan “Ximoyekixejekoltijtiyakan ika in tanextililisme ten namechmakaj”, no kijtoj ke moajsia miak taman tein yejua amo kiajsikamatia (1 Tes. 5:21). Pablo kijtoj ke tikajsikamatij “seki san tamachilis de Dios” uan ke “tepitsin san tikyekajsikaixmatij in tamachilisme” (1 Cor. 13:9, 12). Pablo amo nochi kimatia, uan tejuan amo no. Sayoj ke kiajsikamatia tamachtilismej tein tayekantokej. Kimatia miak taman tein kipaleuiaya maj takuaujtamati ke tein kineltokaya yejua tein melauak.

4. ¿Toni techpaleuis maj titakuaujtamatikan ke tein tikneltokaj yejua tein melauak, uan toni tikitaskej itech nejin tamachtilis?

⁴ ¿Toni techpaleuis maj titakuaujtamatikan ke tein tikneltokaj yejua tein melauak? Se taman, komo tikitaj keniuj Jesús kiueyichiuak Dios uan keniuj tikueyichiujtokej tiitaixpantijkauan Jiova. Itech nejin tamachtilis tikitaskej ke akin yekmelauj kichiuaj kemej Cristo 1) amo kinueyichiuaj tiotsitsin, 2) kipoujkaitaj itokay Jiova, 3) kipatiuitaj tamachtilis tein melauak uan 4) semi motasojtaj.

5. ¿Keniuj Jesús kiueyichiuak Dios, uan keniuj uelis tikchiuaskej kemej yejua?

⁵ Kemej Jesús semi kitasojtaya Jiova, sayoj yejuatsin kiueyichiuak, keman yetoya ompa iluikak uan keman ualajka nikan taltikpak (Luc. 4:8). Uan kinmachtij itatojtokakauan maj no ijkon kichiuanij. Nion Jesús nion itatojtokakauan kiueyichiujkej Dios ika tiotsitsin. Kemej Dios se espíritu, taltikpaknenkej amo uelis kichiuas nion se taman tein ika uelis kiixnextis (Is. 46:5). ¿Uan uelis  tikinchijchiuaskej tein kinixmatij kemej santos uan tikintajtaniskej maj techpaleuikan? Itech ojpatika tanauatil tein moajsi itech Majtakti Tanauatilmej, Jiova kijtoj: “Amo ximochijchiuili nion se tiotsin uan nion se taman tein moita kemej teisa tein onkak iluikak, itech taltikpak oso itech at. Amo ximoixpilo ininixpan” (Éx. 20:4, 5). Akin kinekij kiyolpaktiskej Dios, kiajsikamatij ke yejuatsin amo kineki maj tikinueyichiuakan tiotsitsin.

6. ¿Katiyejua neskayot kitojtokaj itaixpantijkauan Jiova?

⁶ Akin momachtiaj tein panok ne uejkauj kijtouaj ke itech yekinika siglo, itatojtokakauan Cristo sayoj kiueyichiuayaj Dios. Kemej neskayot, se amatajkuilol kijtoua ke yejuan nion kinemiliskiaj kitaliskej tiotsitsin kampa taueyichiuayaj. Itech nejin tonalmej, tiitaixpantijkauan Jiova tikchiuaj kemej itatojtokakauan Cristo itech yekinika siglo. Amo tikintataujtiaj “santos”, ángeles nion tiktataujtiaj Jesús. Amo no tiktajpalouaj bandera nion tikchiuaj okseki taman tein ika tikueyichiujtoskiaj toaltepeuj. Maski oksekin kitemoskej maj tikchiuakan nejon, senkis tikixtaliaj tiktakamatiskej tein kijtoj Jesús: “Xikmouistiliti in Totekotsin to Dios” (Mat. 4:10).

7. ¿Toni tein kichiuaj itech okseki taneltokalismej amo kichiuaj itaixpantijkauan Jiova?

⁷ Itech nejin tonalmej, miakej taltikpakneminij semi kiuelitaj kintojtokaskej taixyekananij itech taneltokalismej akin semi kinixmatij, hasta kemej yeskia kinueyichiuaj. Miakej mosentiliaj itech inintiopan, kikouaj amatajkuilolmej tein kijkuilouaj uan kinpaleuiaj ika miak tomin. Sekin kineltokaj nochi tein kiniluiaj. ¡Komo kiitaskiaj Jesús, xa amo semi yolpakiskiaj kemej yolpakij keman kinitaj nejon taixyekananij! Sayoj ke akin tiktekitiliaj Jiova kemej yejuatsin kiyolpaktia, amo tiktojtokaj nion se taltikpaknenkej. Maski tikinpoujkaitaj akin techixyekanaj, tiktakamatij nejin tein Jesús tamachtij: “Namejuan nochi naniknime” (Mat. 23:8-10). Amo tikinueyichiuaj taltikpakneminij, maski yeskij taixyekananij itech taneltokalis oso tekiuanij. Uan keman kitemouaj kichiuaskej teisa tein ika kinekij kinpaleuiskej taltikpakneminij, amo tikinpaleuiaj nion tikinixnamikij. Tiitaixpantijkauan Jiova senkis amo tikchiuaj kemej miakej akin kijtouaj ke kichiuaj kemej Cristo (Juan 18:36).

8. ¿Keniuj tikmatij ke Jiova kineki maj tikueyitalikan itokay uan maj tikteixmatiltikan?

⁸ Se tonal, Jesús kichiuak nejin netataujtil: “Notajtsin Dios, xikueyipanchiua motokaytsin”. Jiova chikauak ualpantajtoj uan kiluij ke kiueyitaliskia itokay (Juan 12:28). Itech xiujmej keman Jesús tanojnotsak nikan taltikpak, kiueyitalij itokay iTajtsin (Juan 17:26). Yejua ika, akin yekmelauj kichiuaj kemej Cristo no kinyolpaktia kikuiskej itokay Dios uan kiteixmatiltiskej.

9. ¿Keniuj kinextijkej itatojtokakauan Cristo itech yekinika siglo ke kipoujkaitayaj itokay Dios?

⁹ Itech yekinika siglo, tepitsin satepan ke peuak moajsi nechikol kampa kichiuaj kemej Cristo, Jiova “kinyoliknelij in taka ten amo poutinemij keme judíos. Uan [...] kinijitak sekin [...] ma mochiuakan ipueblojkauan para kitasojtaske itokaytsin” (Hech. 15:14). Nejon itatojtokakauan Cristo kinyolpaktiaya kikuiskej itokay Dios uan kiteixmatiltiskej. Kikuikej itokay Dios keman tanojnotsayaj uan keman kijkuilojkej amatajkuilolmej tein moajsij itech Biblia. * Ijkon kinextijkej ke katkaj “ipueblojkauan” Dios akin kiteixmatiltiayaj itokay (Hech. 2:14, 21).

10. ¿Toni kinextia ke itaixpantijkauan Jiova yejuan “ipueblojkauan” Dios akin kiteixmatiltiaj itokay?

 ¹⁰ Maj tikitakan tein kinextia ke itaixpantijkauan Jiova yejuan “ipueblojkauan” Dios akin kiteixmatiltiaj itokay. Itech nejin tonalmej, miakej taixyekananij itech taneltokalismej kichiuanij miak taman porin amo kinekij maj taltikpakneminij kimatikan ke Dios kipia itokay. Kikixtilianij ininBiblias itokay Dios uan kemansa amo kinkauanij akin mosentiliaj itech inintiopan maj kikuikan. * Sayoj ke nochin kimatij ke sayoj itaixpantijkauan Jiova kipoujkaitaj itokay Dios kemej kinamiki. Nion se taneltokalis kiteixmatiltia itokay Dios kemej tejuan tikchiuaj. Tiitaixpantijkauan Jiova, uan timochikauaj tikchiuaskej tein totokay kijtosneki (Is. 43:10-12). Biblia Traducción del Nuevo Mundo tikamakixtianij panoua 240 millones. Nejin Biblia kipia itokay Jiova itech versículos kampa oksekin akin kitajtolkepkej Biblia kikixtilijkej. Uan tikchijchiuaj amaixmej kampa mokui itokay Jiova itech panoua 1,000 tataman tajtolmej.

11. ¿Keniuj kinextijkej ke kipatiuitayaj tamachtilis tein melauak itatojtokakauan Cristo itech yekinika siglo?

¹¹ Jesús kipatiuitaya tamachtilis tein melauak, tein kijtosneki, akoni Dios uan toni kiixtalijtok kichiuas. Ika tein kichiuak, kinextij ke kineltokaya nejon tamachtilis uan kinmatiltij oksekin (Juan 18:37). Akin yekmelauj  kichiuayaj kemej Jesús no semi kipatiuitayaj nejon tamachtilismej (Juan 4:23, 24). Tein melauj, tatitanil Pedro kijtoj ke akin yekmelauj kichiuayaj kemej Cristo moajsiaj itech “in yek melau ojtsin de Dios” (2 Ped. 2:2). Itatojtokakauan Cristo itech yekinika siglo semi kipatiuitayaj tamachtilis tein melauak, uan yejua ika kiixtopeujkej tamachtilismej, tachiualismej uan tanemililmej tein amo mouikayaj ika tamachtilis tein melauak (Col. 2:8). No ijkon, akin yekmelauj kichiuaj kemej Cristo itech nejin tonalmej “chipaukanentinemij itech in yek melauak Tajtoltsin de Dios” porin mochikauaj maj nochi tein kineltokaj uan tein kichiuaj mouika ika iTajtol Jiova (3 Juan 3, 4).

12. ¿Toni kichiuaj tokniuan Oloch Taojtokaltianij keman kiitaj ke moneki mopatas seki taman, uan keyej kichiuaj?

¹² Itaixpantijkauan Jiova amo kijtouaj ke senkis kiixmatij nochi tein Biblia tamachtia. Kemansa kiitanij ke mopolojkej kemej kimelauayaj se tamachtilis oso kemej kiixtalijkaj maj mochiua teisa itech nechikol. Sayoj ke amo moneki tikmoujkaitaskej nejin, porin Biblia kinextia ke itekitikauan Dios okachi kuali kiajsikamatiskiaj tamachtilis tein melauak ijkon kemej panoskiaj tonalmej (Col. 1:9, 10). Jiova yolik kiteixmatiltijtiuj tamachtilis tein melauak, yejua ika moneki amo tiyolijsiuiskej uan timochiaskej hasta maj okachi kuali moajsikamati (Prov. 4:18). Keman tokniuan Oloch Taojtokaltianij kiitaj ke moneki mopatas kemej moajsikamatia se tamachtilis oso kemej mochiuaya teisa, niman kipataj. Itech miak taneltokalismej kampa kijtouaj ke kichiuaj kemej Cristo, kipataj seki taman porin kinekij kinyolpaktiskej akin iniuan mosentiliaj oso porin kinekij maj oksekin kuali kinitakan. Sayoj ke tiitaixpantijkauan Jiova tikchiuaj porin tiknekij okachi timotokiskej iuan Dios uan porin tiknekij tikueyichiuaskej kemej Jesús tamachtij (Sant. 4:4). Keman tikpataj seki taman, amo tikchiuaj porin taltikpakneminij kipatakej kemej kiitayaj teisa oso kemej tanemiliayaj, ta porin okachi kuali tikajsikamatkej tein Biblia tamachtia. Tikpatiuitaj tamachtilis tein melauak (1 Tes. 2:3, 4).

13. ¿Katiyejua kualneskayot okachi kinextiaj akin yekmelauj kichiuaj kemej Cristo, uan keniuj itaixpantijkauan Jiova kinextiaj nejon kualneskayot itech nejin tonalmej?

¹³ Itatojtokakauan Cristo itech yekinika siglo kinixmatiaj porin kinextiayaj miak kualneskayomej, sayoj ke kualneskayot tein okachi kinextiayaj yejua netasojtalis. Jesús kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:34, 35). Itech nejin tonalmej, itaixpantijkauan Jiova akin moajsij itech nochi taltikpak motasojtaj uan kuali mouikaj. Tejuan amo tikchiuaj kemej itech okseki taneltokalismej, ta timoitaj kemej yeskia tikalyetouanij, maski seseko tikayomej uan tataman kemej tinemij. Uan tikitaj nejon netasojtalis itech nechikolmej uan itech uejueyi nechikolmej. Nejon kichiua maj okachi titakuaujtamatikan ke sayoj tejuan tikueyichiuaj Jiova kemej yejuatsin kiyolpaktia.

14. Kemej kijtoua Efesios 4:32, ¿keniuj uelis tiknextiskej ke ‘timotasojtaj ika nochi totanejnekilis’?

¹⁴ Biblia kijtoua: “Nochi ximosepantasojtakan se uan okse ika nochi namotanejnekilis” (1 Ped. 4:8). Se taman kemej ueli tiknextiaj nejon netasojtalis yejua keman timotapojpoluiaj uan amo tikualanij keman oksekin mopolouaj. No tiktemouaj tikinpaleuiskej nochin tokniuan uan tiyeskij tikualtakamej, hasta iniuan akin xa techyolkokojkej (xikonixtajtolti Efesios 4:32). Nejin netasojtalis yejua tein  okachi kinextia ke yekmelauj tikchiuaj kemej Cristo.

15. ¿Itech toni okseki taman no tikchiuaj kemej itatojtokakauan Cristo itech yekinika siglo?

¹⁵ Itech okseki taman kemej tikueyichiuaj Jiova no tikchiuaj kemej itatojtokakauan Cristo itech yekinika siglo. Kemej neskayot, ijkon kemej ixyetok motekitis itech inechikol Jiova. Moajsij tokniuan takalpanouanij, tayekananij uan tapaleuianij itech nechikol (Filip. 1:1; Tito 1:5). Uan no tikixtopeuaj auilnemilis, tikitaj nenamiktilis uan esti kemej Jiova kiita, uan keman se tokniuj tajtakolchiua uan amo moyolnonotsa kikalankixtiaj itech nechikol (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Toni techmachtia tein kijtoua Efesios 4:4-6?

¹⁶ Jesús kijtoj ke miakej kijtoskiaj ke itatojtokakauan, sayoj ke amo nochin kinextiskiaj ke yekmelauj nejon (Mat. 7:21-23). Uan iTajtol Dios no kijtoj ke itech itamian tonalmej miakej sayoj “mopoutinemiske no keme taneltokani” (2 Tim. 3:1, 5). Sayoj ke Biblia senkis kinextia ke “sayo se takuautamatilis” kiyolpaktia Dios (xikonixtajtolti Efesios 4:4-6).

17. ¿Akonimej kichiuaj kemej Jesús uan kiueyichiuaj Dios kemej yejuatsin kiyolpaktia?

¹⁷ ¿Akonimej kiueyichiuaj Dios itech nejin tonalmej kemej yejuatsin kiyolpaktia? Tikitakejya toni kichiuaj akin yekmelauj itatojtokakauan Cristo uan no tikitakej keniuj Jesús kiueyichiuak Dios uan ke itatojtokakauan itech yekinika siglo no ijkon kichiujkej. Yejua ika, nochi kinextia ke sayoj itaixpantijkauan Jiova kiueyichiuaj kemej yejuatsin kiyolpaktia. Se ueyi tatiochiualis timoajsiskej itech inechikol Dios uan tikixmatiskej Jiova uan tein kiixtalijtok kichiuas. Yejua ika, maj tiksentokakan titakuaujtamatikan ke tein tikneltokaj yejua tein melauak.