KEMAN mochiuak Ojpatika Ueyi Neteuilis se takat akin kinixyekanaya soldados nazis kintsajtsilij seki itaixpantijkauan Jehová: “Komo nansemej amo nankinekij namoteuiskej iniuan akin kayomej Francia uan Inglaterra, ¡nochin namikiskej!”. Maski ompakauin moajsiaj miakej soldados nazis akin kipiayaj tein ika ueliskia kinmiktiskej, tokniuan amo kinekkej kitapanauiliskej itanauatiluan Jehová. ¡Semi yolchikaujkej katkaj! Tein kichiujkej kinextia tein tikixtalijtokej tikchiuaskej nochin itaixpantijkauan Jehová: amo titapaleuiaj keman mochiua se neteuilis. Maski techiluiaj ke uelis techmiktiskej, amo timokalakiaj keman sekin takuejmolchiuaj uan taixnamikij.

1. NOCHIN ITEKITIKAUAN DIOS SEKOSAN KAYOMEJ KATKAJ

Ne uejkauj, Jehová kinixpejpenak israelitas para maj mochiuanij ixolal. Kijtoj ke yejuan katkaj ‘iaxkauan akin okachi kinpatiuitaya itech nochi okseki xolalmej’ (Éx. 19:5). Dios kiixtalij kani nemiskiaj. Yejua ika, keman kinnauatiaya maj kinteuitij okseki xolalmej amo kinteuiayaj nion kinmiktiayaj okseki israelitas. *

Axkan, itekitikauan Jehová ualeuaj ‘itech nochin altepemej, uejueyi kalyetonij, xolalmej uan tajtouaj tataman tajtolmej’ (Apoc. 7:9). Komo yaskiaj tateuitij, kinixnamikiskiaj uan hasta ueliskia kinmiktiskej okseki itekitikauan Dios.

 2. JEHOVÁ KINNAUATIAYA ISRAELITAS MAJ YAKAN TATEUITIJ

Ne uejkauj, Jehová kiixtaliaya kemanian uan keyej monekia tateuitiuij. Kemej neskayot, yejuatsin kiixtalijka kintatsakuiltis cananeos porin kinueyichiuayaj amokuali ejekamej, auilnemiaj uan kinmiktiayaj ininkoneuan para kinmaktiliskej inintiotsitsin. Yejua ika, kintitanik israelitas maj kinteuitij. Jehová kinnauatij maj kinixpolouanij akin nemiaj itech nejon tal tein motenkaujka kinmakas, ijkon israelitas amo kichiuaskiaj kemej yejuan (Lev. 18:24, 25). Keman ompa nemiajya, kemansa Jehová kinkauak maj moteuianij iniuan akin kinixnamikiaj (2 Sam. 5:17-25). Sayoj ke amo keman kinkauak maj yejuan kiixtalianij kemanian yaskiaj tateuitiuij. Keman yayaj tateuitij maski Jehová amo kinnauatijka, kinpanouaya tein amo kuali (Núm. 14:41-45; 2 Crón. 35:20-24).

Axkan, Jehová amo kinnauatia taltikpakneminij maj yakan tateuitij. Yejuan tateuiaj amo para kichiuaskej tein Dios kineki, ta kitayekanaltiaj okseki taman. Xa tateuiaj porin kinekij okachi uejka taixyekanaskej, porin kinekij okachi tomin oso porin kinekij maj mochiua tein yejuan kinemiliaj. Oksekin kijtouaj ke tateuiaj itokaykopa Dios para kipaleuiskej tein kineltokaj oso para kinixpoloskej akin kiixnamikij Dios. Sayoj ke Jehová amo no kiyolpaktia tein kichiuaj. Yejuatsin kijtoua ke kinyekpias itekitikauan uan kinixpolos akin kiixnamikij itech se neteuilis tein amo uejkaua mochiuas: Armagedón (Apoc. 16:14, 16). Ijkuak, amo tateuiskej itekitikauan nikan taltikpak, ta sayoj itateuijkauan ne iluikak (Apoc. 19:11-15).

3. ISRAELITAS AMO KINMIKTIAYAJ AKIN KINEXTIAYAJ KE TAKUAUJTAMATIAJ IUAN JEHOVÁ

Ne uejkauj, israelitas kemansa kinikneliayaj akin kinextiayaj ke takuaujtamatiaj iuan Jehová. Sayoj ke kinmiktiayaj akin yejuatsin kiixtalijka maj kinmiktikan. Maj tikitakan ome neskayomej. Maski Jehová tanauatijka maj kiixpolokan Jericó, israelitas amo kimiktijkej Rahab uan ichankauan porin yejua takuaujtamatik (Jos. 2:9-16; 6:16, 17). Satepan, amo kinmiktijkej akin nemiaj  Gabaón porin kinextijkej ke kimojkatokayaj Dios (Jos. 9:3-9, 17-19).

Axkan, akin youij tateuitij kinmiktiaj hasta akin takuaujtamatij iuan Dios, uan kemansa kinmiktiaj hasta akin amo soldados.

4. ISRAELITAS MONEKIA TATEUISKEJ KEMEJ DIOS KIJTOUAYA

Ne uejkauj, Jehová kinnauatij israelitas toni monekia kichiuaskej keman yaskiaj tateuitiuij. Kemej neskayot, kemansa kinnauatiaya maj kiniluianij akin nemiaj itech xolal kampa yayaj tateuitij toni monekia kichiuaskej para amo kinteuiskiaj (Deut. 20:10). Jehová no kinnauatiaya akin yayaj tateuitij ke monekia chipaujkanemiskej, mochipauaskej yejuan uan kampa nemiaj (Deut. 23:9-14). Uan no, kinnauatij maj amo ininka mauiltianij siuamej akin nemiaj itech xolalmej tein moaxkatiliayaj, kemej kichiuayaj tateuianij akin kayomej itech okseki xolalmej. Komo se tateuijkej israelita kinekia monamiktis iuan semej nejon siuamej, monekia mochias se metsti (Deut. 21:10-13).

Axkan, miak altepemej kiixtalianij tanauatilmej para keman mochiuas se neteuilis. Maski ika nejon tanauatilmej kitemouaj kinyekpiaskej akin amo soldados, miakpa amo kitakamatij.

5. DIOS KINPALEUIAYA ISRAELITAS KEMAN YAYAJ TATEUITIJ

Ne uejkauj, Jehová kinpaleuij israelitas, uan miakpa kichiuak milagros para maj tatanikan. Kemej neskayot, kinpaleuij maj moaxkatilianij Jericó, chikauak tsajtsikej kemej Jehová kinnauatij uan tepamit xitinik. Ijkon Jehová kinpaleuij maj amo ouij kinkisani moaxkatiliskej xolal (Jos. 6:20). Uan satepan uelik kintankej amorreos, se altepet tein kinixnamikia. ¿Keniuj kintankej? Jehová “kinpankajkauilij uejueyi tesiuit […]. Okachi miakej momikilijkej ika tesiuit ke ika ininespada israelitas” (Jos. 10:6-11).

AKIN YEKMELAUJ TIKCHIUAJ KEMEJ CRISTO TIKTEMOUAJ KUALI TIETOSKEJ INIUAN OKSEKIN

Kemej tikitakej, tein tikpanouaj tejuan semi taman ika tein kipanouayaj israelitas. Sayoj ke amo sayoj nejon kichiua maj amo titateuikan, ta moajsi okseki taman. Kemej neskayot, Dios kijtojka ke itech itamian tonalmej akin mokauaskiaj maj yejuatsin kinmachti amo kitemoskiaj ueliskej tateuiskej, tein kijtosneki ke nion tapaleuiskiaj itech neteuilis (Is. 2:2-4). Uan no, Jesús kijtojka ke itatojtokakauan amo yeskiaj “kemej akin nemij nikan taltikpak” porin amo mokalakiskiaj keman sekin takuejmolchiuaskia uan taixnamikiskiaj (Juan 15:19).

Cristo no kiniluij itatojtokakauan maj kichiuanij okse taman. Kinmachtij ke monekia kiixtopeuaskej nochi tein ueliskia kichiuas maj tenexikoluikan, maj kualanikan uan tein ueliskia kipeualtis se neteuilis (Mat. 5:21, 22). Uan kinmachtij maj tapaleuikan maj oksekin yolseujkanemikan uan maj kintasojtakan akin kintauelitayaj (Mat. 5:9, 44).

¿Toni techmachtia nejin? Tikyekmatij ke amo tiaskiaj titateuitiuij. Sayoj ke, ¿tepitsin tiktauelitaj se tokniuj itech nechikol? Nejon ueliskia kichiuas maj timoxexelokan oso maj timoteuikan. Yejua ika, maj timochikauakan senkis timokixtiliskej nejon (Sant. 4:1, 11).

Akin tikchiuaj kemej Cristo amo titapaleuiaj keman mochiua se neteuilis, ta timochikauaj kuali timouikaskej uan timotasojtaskej (Juan 13:34, 35). Jehová kiixtalijtok kichiuas maj amo onkaok neteuilismej. Hasta maj ejko nejon tonal maj tiksentokakan tikixtalikan amo titapaleuiskej keman mochiua se neteuilis (Sal. 46:9).