1. ¿Toni techiluia Jehová ke uelis tikseliskej?

 JEHOVÁ techiluia ke uelis tinemiskej nochipaya. Seki itekitikauan kichiaj nemiskej iluikak uan amo keman momikiliskejok (1 Cor. 15:50, 53). Uan oksekin kichiaj nemiskej nochipaya nikan taltikpak kampa yolpakiskej uan amo kokolispeuaskejok (Apoc. 21:3, 4). Tinochin tikpatiuitaj tein tikchiaj tikseliskej, xa ne iluikak oso nikan taltikpak.

2. ¿Keyej tikmatij ke mochiuas tein tikchiaj?

² Keman Biblia ika tajtoua tein tikchiaj, kiteajsikamatiltia ke tikyekmatij ke mochiuas tein kuali. Uan tikmatij ke mochiuas porin Jehová techiluia (Rom. 15:13). Tikmatij tein motenkaua uan ke nochipa kichiua tein kijtoua (Núm. 23:19). Titakuaujtamatij ke Jehová kineki uan ueli kichiua nochi tein motenkaua. Tein tikchiaj amo sayoj moajsi itech totanemilil, ta onkak miak taman tein kinextia ke yekmelauj mochiuas.

3. ¿Toni tikitaskej itech nejin tamachtilis? (Salmo 27:14).

³ ToTajtsin Jehová techtasojta uan kineki maj iuan titakuaujtamatikan (xikonixtajtolti Salmo 27:14). Komo senkis titakuaujtamatij itech tein Jehová kijtoua ke kichiuas, tikxikoskej ouijkayomej uan tiyeskij tiyolchikaujkej uan tiyolpakiskej. Itech nejin tamachtilis tikitaskej keniuj techpaleuia tein tikchiaj. Yekinika tikitaskej keyej moijtoua ke kemej yeskia se tepos tein ika motsikoua barco uan kemej se teposkuatsakuiloni. Uan satepan tikitaskej keniuj uelis okachi titakuaujtamatiskej ke mochiuas tein tikchiaj.

4. ¿Keyej tein tikchiaj kemej yeskia se tepos tein ika motsikoua barco? (Hebreos 6:19).

⁴ Itech amat tein tatitanil Pablo kintitanilij tokniuan hebreos, kijtoj ke tein tikchiaj kemej yeskia se tepos tein ika  motsikoua barco (xikonixtajtolti Hebreos 6:19). Pablo miakpa yajtinemik itech ueyiat uan kimatia ke tepos tein ika motsikoua barco semi tapaleuia. Se tonal keman yaya itech se barco, peuak chikaujkaejeka uan kiitak ke akin ompa tekitiaj kipankajkaujkej nejin teposmej para amo moteloskiaj itech uejueyi temej (Hech. 27:29, 39-41). No ijkon, tein tikchiaj kemej yeskia se tepos tein ika motsikoua barco, porin techpaleuia maj amo tikauakan Jehová keman tikpanouaj ouijkayomej tein kemej yeskiaj chikaujkaejekat. Kemej tikchiaj okachi kuali tinemiskej, techpaleuia maj tiyolseujtokan. Maj tikelnamikikan ke Jesús kijtoj ke techtajyouiltiskej (Juan 15:20). Keman itech titanemiliaj tein tikchiaj techpaleuia maj tiksentokakan tiktekitilikan Jehová.

5. ¿Keniuj tein kichiaya Jesús kipaleuij keman yaya kimiktitij?

⁵ Maj tikitakan keniuj tein kichiaya Jesús kipaleuij maj amo kikauani Dios maski kimatia ke semi kitajyouiltiskiaj keman kimiktiskiaj. Itech Pentecostés xiuit 33, tatitanil Pedro ika tajtoj se salmo tein kinextiaya ke Jesús yolseujtoskia uan takuaujtamatiskia: “Nejua nitakuaujtamattinemis mouan, porin amo tinechkauas itech Miketekoch, nion tikauas maj uejueliui inakayo motekitikauj akin amo mitskaua. […] Tikchiuas maj semi niyolpaki moixpan” (Hech. 2:25-28; Sal. 16:8-11). Maski Jesús kimatia ke momikiliskia, senkis kineltokaya ke Dios kichiuaskia maj oksepa nemi uan ke mokepaskia iluikak para yetoskia iuan iTajtsin (Heb. 12:2, 3).

6. ¿Toni kijtoj se tokniuj ika tein tikchiaj tikseliskej?

⁶ Tein tikchiaj tikseliskej kinpaleuiani miakej tokniuan maj taxikokan keman kipanouaj ouijkayomej. Maj tikitakan tein kipanok Leonard Chinn, se tokniuj takat akin nemia Inglaterra. Keman mochiuak Yekinika Ueyi Neteuilis, kitsakkej porin amo kinekik mochiuas soldado. Ome metsti amo kikaujkej maj tajto iniuan oksekin uan satepan kiteltekitiltijkej. Leonard kijkuiloj: “Tein nechpanok nechmachtij ke tein tikchiaj semi techpaleuia maj titaxikokan. Tein kichiuak Jesús, tatitanilmej, tanauatianij uan tein Biblia kijtoua ke mochiuas, techpaleuia maj tikchiakan tein kuali uan maj titaxikokan”. Tein tikchiaj tikseliskej kipaleuij Leonard uan no uelis techpaleuis tejuan.

7. ¿Keniuj techpaleuia keman tikxikouaj ouijkayomej? (Romanos 5:3-5; Santiago 1:12).

⁷ Okachi titakuaujtamatij ke mochiuas tein tikchiaj keman tikxikouaj ouijkayomej tein tikpanouaj uan keman tikitaj ke Jehová techpaleuia uan ke kiyolpaktia tein tikchiuaj (xikonixtajtolti Romanos 5:3-5; Santiago 1:12). Yejua ika, axkan okachi titakuaujtamatij itech tein tikchiaj ke keman peuak timomachtiaj. Satanás kineki maj timoteltekipachokan keman tikpanouaj ouijkayomej, sayoj ke Jehová techpaleuia maj titaxikokan.

8. ¿Keyej tein tikchiaj kemej yeskia se teposkuatsakuiloni? (1 Tesalonicenses 5:8).

⁸ Biblia no kijtoua ke tein tikchiaj kemej yeskia se teposkuatsakuiloni (xikonixtajtolti 1 Tesalonicenses 5:8). Se soldado moneki mokuatalilis teisa para amo kikuakokoskej. Itech neteuilis tein tikpiaj iuan Satanás moneki tikyekpiaskej totanemilil porin yejua kineki maj tiknemilikan uan maj tikchiuakan tein amo kuali. Ijkon kemej tein mokuatalilia se soldado kipaleuia itsontekon, tein tikchiaj  tikseliskej kiyekpia totanemilil para maj amo tikauakan Jehová.

9. ¿Toni kichiuaj akin amo kichiaj kiseliskej teisa satepan?

⁹ Kemej tikchiaj tinemiskej nochipaya, techpaleuia maj kuali titaixpejpenakan. Sayoj ke, komo sayoj itech titanemiliaj tein tejuan tiknejnekij uelis amo itech titanemiliskejok tein tikchiaj. Maj itech titanemilikan tein kinpanok seki tokniuan akin nemiaj Corinto. Yejuan amo kineltokayajok ke mikemej oksepa nemiskej ijkon kemej Dios motenkaujka (1 Cor. 15:12). Pablo kijtoj ke akin amo kineltokayaj ke mikemej oksepa nemiskej, sayoj kitayekanaltiayaj tein kinejnekiaj (1 Cor. 15:32). Axkan miakej amo kineltokaj tein Dios motenkaua kichiuas, yejua ika sayoj kitemouaj moyolpaktiskej uan kichiuaskej tein kinejnekij. Sayoj ke tejuan titakuaujtamatij itech tein Dios motenkaua ke kichiuas satepan. Tein tikchiaj kemej yeskia se teposkuatsakuiloni tein kiyekpia totanemilil uan techpaleuia maj amo sayoj totech titanemilikan, porin nejon uelis kichiuas maj amo kuali timouikakanok iuan Jehová (1 Cor. 15:33, 34).

10. ¿Keniuj techpaleuia tein tikchiaj tikseliskej maj amo tikneltokakan tein amo melauak?

¹⁰ Teposkuatsakuiloni no techpaleuia maj amo tiknemilikan ke nenkaj komo timochikauaj tikyolpaktiskej Jehová. Kemej neskayot, aksa xa kinemilis: “Nejua amo keman uelis ninemis nochipaya. Amo keman uelis nikchiuas tein Dios kineki maj kichiuakan itekitikauan”. Maj tikelnamikikan ke Elifaz, akin kijtouaya ke kuali mouikaya iuan Job, yejua nejon tein kinekik kiajsikamatiltis. Elifaz kijtoj: “¿Keniuj uelis yeski chipauak takat akin momikilia […]? Xikita, Dios amo takuaujtamati itech iangeluan, uan nion iluikak chipauak iixpan” (Job 15:14, 15). ¡Senkis amo melauak nejon! Maj tikelnamikikan ke Satanás kineki maj ijkon titanemilikan. Yejua kimati ke komo tiksentokaj ijkon titanemiliaj amo titakuaujtamatiskejok itech tein tikchiaj. Yejua ika, maj amo tikneltokilikan Satanás, ta maj itech titanemilikan tein Jehová motenkaua ke kichiuas. Maj nochipa tikelnamikikan ke Jehová kineki maj tinemikan nochipaya uan ke yejuatsin techpaleuis maj ijkon mochiua (1 Tim. 2:3, 4).

11. ¿Keyej moneki tiksentokaskej timochiaskej hasta keman mochiuas tein tikchiaj?

¹¹ Kemansa xa ouij techkisas tiksentokaskej titakuaujtamatiskej itech tein tikchiaj. Xa tiknemiliskej ke uejkaujya tikchixtokej maj Dios kichiua tein motenkauak. Sayoj ke Jehová nochipa nemi uan amo kiita tiempo kemej tejuan tikitaj (2 Ped. 3:8, 9). Yejuatsin kichiuas tein motenkaua keman kiitas ke okachi kuali, sayoj ke xa amo yeski keman tejuan tiknekiskej. ¿Toni techpaleuis maj tiksentokakan titakuaujtamatikan itech tein tikchiaj hasta keman Jehová kichiuas tein motenkaua? (Sant. 5:7, 8).

12. Kemej kijtoua Hebreos 11:1, 6, ¿keniuj mouika tein tikchiaj ika totakuaujtamatilis?

¹² Tiksentokaskej titakuaujtamatiskej itech tein tikchiaj komo kuali timouikaj iuan Jehová, porin yejuatsin akin kijtoua ke mochiuas. Para tikneltokaskej ke mochiuas tein kuali, moneki tikneltokaskej ke Jehová nemi uan ke “kintaxtauia akin semi kitemouaj kiueyichiuaskej” (xikonixtajtolti Hebreos 11:1, 6). Keman okachi  tikneltokaskej ke Jehová nemi, okachi titakuaujtamatiskej ke kichiuas tein motenkauak. Maj tikitakan keniuj uelis okachi kuali timouikaskej iuan uan ijkon tiksentokaskej titakuaujtamatiskej itech tein tikchiaj.

13. ¿Keniuj uelis kuali timouikaskej iuan Dios?

¹³ Maj tiktataujtikan Jehová uan maj tikixtajtoltikan Biblia. Maski amo ueli tikitaj Jehová, uelis kuali timouikaskej iuan. Ueli tiknojnotsaj keman tiktataujtiaj uan titakuaujtamatij ke techkaki (Jer. 29:11, 12). Uan tejuan ueli tikakij Jehová keman tikixtajtoltiaj Biblia uan itech titanemiliaj. Keman tikixtajtoltiaj keniuj kinyekpiak itekitikauan ne uejkauj, okachi titakuaujtamatij itech tein tikchiaj. Nochi tein kijtoua Biblia “moijkuiloj para techmachtis. Uan tikchiaj tein kuali porin itajtol Dios techyolseuia uan techpaleuia maj titaxikokan” (Rom. 15:4).

14. ¿Keniuj techpaleuia komo itech titanemiliaj keniuj Jehová kinpaleuianiya oksekin?

¹⁴ Maj itech titanemilikan keniuj Jehová kichiuani tein motenkauani. Maj tikitakan ininneskayo Abrahán uan Sara. Yejuan xiuejkejya katkaj uan amo ueliskiaok kinpiaskej konemej, sayoj ke Jehová kiniluij ke kipiaskiaj se (Gén. 18:10). ¿Keniuj kiitak Abrahán nejon? Biblia kijtoua: “Takuaujtamatia ke yeskia ininuejkaujtat akin nemiskej itech miak altepemej” (Rom. 4:18). Aksa xa kinemiliskia ke amo ueliskia mochiuas nejon, sayoj ke Abrahán takuaujtamatia ke Jehová kichiuaskia tein motenkaujka. Uan yekmelauj mochiuak (Rom. 4:19-21). Neskayomej kemej nejin techmachtia ke nochipa uelis titakuaujtamatiskej ke Jehová kichiuas tein kijtoua maski tejuan tiknemiliskej ke amo ueliskia.

15. ¿Keyej moneki itech titanemiliskej keniuj Jehová techpaleuianiya?

 ¹⁵ Maj itech titanemilikan keniuj Jehová techpaleuianiya tejuan. ¿Kemansa tiknemilianij keniuj mochiuaniya tein Jehová motenkauak touan? Kemej neskayot, Jesús motenkauak ke iTajtsin techpaleuiskia maj ueli timoixpanoltikan (Mat. 6:32, 33). Jesús no kijtoj ke Jehová techmakaskia ichikaualis komo tiktajtaniaj (Luc. 11:13). Jehová kichiuaniya tein motenkauak. Uan xa tikelnamikij okseki taman tein kijtoj ke kichiuaskia. Yejua kijtoj ke techtapojpoluiskia, techyolseuiskia uan techmakaskia tein techpaleuiskia maj kuali timouikakan iuan (Mat. 6:14; 24:45; 2 Cor. 1:3). Komo itech titanemiliaj keniuj Jehová techpaleuianiya, okachi titakuaujtamatiskej ke kichiuas tein motenkaua.

16. ¿Keyej tein tikchiaj tikseliskej se kualtsin netetayokolil?

¹⁶ Jehová techiluia ke uelis tinemiskej nochipaya, uan nejon se kualtsin netetayokolil. Tiknekij ijkon tinemiskejya uan tikmatij ke mochiuas. Tein tikchiaj, kemej yeskia se tepos tein ika motsikoua barco porin techpaleuia keman tikpanouaj ouijkayomej, keman techtajyouiltiaj uan hasta keman techiluiaj ke techmiktiskej. No kemej yeskia se teposkuatsakuiloni porin kiyekpia totanemilil uan techpaleuia maj tikixtopeuakan tein amo kuali uan maj tikchiuakan tein kuali. Tein Biblia kijtoua ke tikseliskej techpaleuia maj okachi timotokikan iuan Dios uan kinextia ke yejuatsin techteltasojta. Semi techpaleuia keman timochikauaj okachi titakuaujtamatiskej itech tein tikchiaj.

17. ¿Keyej tiyolpakij ika tein tikchiaj?

¹⁷ Keman tatitanil Pablo kintajkuilouilij tokniuan akin nemiaj Roma, kiniluij: “Xiyolpakikan porin nankichiaj tein kuali” (Rom. 12:12). Pablo uelia yolpakia porin senkis kimatia ke nemiskia nochipaya ne iluikak komo amo keman kikauaya Jehová. Tejuan no uelis tiyolpakiskej ika tein tikchiaj, porin tikmatij ke Jehová kichiuas tein motenkauak. Kemej kijtoj se salmista: “Yolpaki akin […] takuaujtamati iuan iDios, Jehová, […] akin nochipa kichiua tein kijtoua” (Sal. 146:5, 6).