1. ¿Toni kijtosneki keman Biblia kijtoua ke ‘moneki maj Dios techixyekanaʼ uan keniuj nejon techpaleuia maj tiyolpakikan?

 YEKMELAUJ se yolpakis amo se teisa tein se kimachilia sayoj seki tonalmej, ta uelis uejkauas nochipaya. Itech se tepet Jesús tamachtij keniuj uelis yekmelauj se yolpakis. Kijtoj: “Yolpakij akin kiajsikamatij ke moneki maj Dios kinixyekana” (Mat. 5:3). Jesús kimatia ke tejuan tichijchiujtokej kemej tiknejnekiskej tikixmatiskej uan tikueyichiuaskej toTachijchiujkauj Jehová. Yejua nejin kijtosneki keman Biblia kijtoua ke ‘moneki maj Dios techixyekana’. Uan kemej Jehová se “Dios akin yolpaki”, akin tiktekitiliaj no uelis tiyolpakiskej (1 Tim. 1:11).

2, 3. 1) ¿Akonimej kijtoj Jesús ke no uelis yolpakiskej? 2) ¿Toni tikitaskej itech nejin tamachtilis uan keyej motelneki?

² ¿Yekmelauj tiyolpakiskej sayoj komo amo tikpiaj kuejmolmej? Amo. Itech se tepet Jesús kijtoj se taman tein se kimojkaita. Kijtoj ke uelis yolpakiskej hasta “akin tayokoyaj” porin kinyolkokoua se tajtakol tein kichiujkej oso porin kipanotokej ouijkayomej. Jesús no kijtoj ke uelis yolpakiskej “akin kintajyouiltianij porin kichiuaj tein kuali yetok” oso akin kinuijuikaltiaj porin kitojtokaj (Mat. 5:4, 10, 11). Sayoj ke, ¿keniuj uelis tiyolpakiskej maski tikpanotoskej nochi nejon?

³ Jesús amo tamachtij ke uelis yekmelauj tiyolpakiskej komo amo tikpiaj kuejmolmej, ta komo timokauaj maj Dios techixyekana uan timotokiaj iuan (Sant. 4:8). ¿Keniuj  uelis tikchiuaskej? Itech nejin tamachtilis tikitaskej eyi taman tein techpaleuis maj yekmelauj tiyolpakikan.

4. ¿Toni yekinika taman moneki tikchiuaskej para uelis yekmelauj tiyolpakiskej? (Salmo 1:1-3).

⁴ YEKINIKA: Uelis yekmelauj tiyolpakiskej komo tikixtajtoltiaj uan timomachtiaj Biblia. Jesús kijtoj ke iTajtol Dios kemej yeskia takual. Tejuan uan tapialmej moneki titakuaskej para tiyoltoskej. Sayoj ke, sayoj tejuan ueli tikixtajtoltiaj iTajtol Dios uan moneki tikchiuaskej. Jesús kijtoj: “Amo sayoj ika takual moneki se yoltos, ta ika nochi tein kijtoua Jehová” (Mat. 4:4). Yejua ika moneki mojmostaj tikixtajtoltiskej Biblia. Salmista kijtoj: “Yolpaki takat akin […] kiyolpaktia kitakamatis itanauatil Jehová, kiixtajtoltia uan itech tanemilia youal uan tonal” (xikonixtajtolti Salmo 1:1-3).

5, 6. 1) ¿Toni uelis timomachtiskej itech Biblia? 2) ¿Keniuj techpaleuia komo tikixtajtoltiaj Biblia?

⁵ Kemej Jehová techtasojta techiluia itech Biblia keniuj uelis tiyolpakiskej. Kemej neskayot, techiluia keyej techchijchiuak, keniuj uelis kuali timouikaskej iuan uan toni moneki tikchiuaskej para techtapojpoluis totajtakoluan. No techiluia ke techmakas miak taman tein kualtsin satepan (Jer. 29:11). Keman timomachtiaj nochi nejin, tiyolpakij.

⁶ Tikmatij ke Biblia techyolmajxitia miak taman tein techpaleuia uan tiyolpakij keman tikchiuaj. Yejua ika, komo timotekipachojtokej porin tikpiaj  kuejmolmej, maj okachi tikixtajtoltikan Biblia uan maj itech titanemilikan. Jesús kijtoj: “¡Yolpakij akin kikakij itajtol Dios uan kichiuaj!” (Luc. 11:28).

7. ¿Keniuj uelis okachi techpaleuis tein timomachtiaj itech Biblia?

⁷ Keman tikixtajtoltiskej Biblia moneki maj amo ijsiujka tikchiuakan, ta moneki techyolpaktis. ¿Toni kijtosneki nejin? Maj tiknemilikan ke aksa techchijchiuilij se tapalol tein semi tikueliliaj. Sayoj ke kemej tiijsiujtokej uan itech titanemilijtokej okseki taman, ijsiujka tikuaj uan nion tikyekouaj. Keman tiktamiajya, tiknemiliaj ke semi ijsiujka titakuajkej uan ke okachi kuali yeskia maj yolik titakuanij para kuali tikyekoskiaj. Keman tikixtajtoltiaj Biblia no uelis ijkon techpanos. Komo ijsiujka tikchiuaj amo ueli tikyekitaj tein Jehová techmachtia. Yejua ika, moneki maj amo ijsiujka tikixtajtoltikan, ta maj tiknemilikan keniuj mochiuak tein tikixtajtoltijtokej, kemej yeskia maj tikinkakikan akin tajtouaj uan maj itech titanemilikan nochi tein tikixtajtoltiaj. Komo ijkon tikchiuaj, okachi tiyolpakiskej.

8. ¿Keniuj kichiua tekit tein kimakakej “takeual takuaujtamach uan tamatkej”? (No xikonita nota).

⁸ Jesús kiixtalij “takeual takuaujtamach uan tamatkej” maj techmaka tamachtilis keman moneki uan semi kuali techmachtia (Mat. 24:45). * Nochi tamachtilis mokixtia itech Biblia (1 Tes. 2:13). Nochi nejin techpaleuia maj tikmatikan keniuj tanemilia Jehová kemej kijtoua Biblia. Yejua ika tikixtajtoltiaj amaixmej Tanejmachtijkej, ¡Taijxitilis!, uan tamachtilismej tein kisaj itech jw.org. No timomachtiaj tein moitas itech nechikolmej sejse semana uan mejmetstika tikitaj tamachtilis tein mokixtia itech JW Broadcasting^®. Komo tikchiuaj nochi nejin uelis tikchiuaskej ojpatika taman tein techpaleuis maj yekmelauj tiyolpakikan.

9. ¿Toni ojpatika taman moneki tikchiuaskej para uelis yekmelauj tiyolpakiskej?

⁹ OJPATIKA: Uelis yekmelauj tiyolpakiskej komo tiktakamatij itanauatiluan Jehová. Akin kijkuiloj se salmo kijtoj: “Yolpaki akin kimojkatoka Jehová, akin nentinemi itech iojuan” (Sal. 128:1). Tikmojkatokaskej Jehová kijtosneki semi tikpoujkaitaskej uan amo tiknekiskej tikchiuaskej teisa tein amo kiuelita (Prov. 16:6). Yejua ika, timochikauaj tiktakamatiskej tein moijtoua itech Biblia. Ompa Jehová kijtoua toni tein kuali uan tein amo kuali (2 Cor. 7:1). Komo tikchiuaj tein yejuatsin kiyolpaktia uan tikixtopeuaj tein kitauelita, okachi tiyolpakiskej (Sal. 37:27; 97:10; Rom. 12:9).

10. Kemej kijtoua Romanos 12:2, ¿toni moneki tikchiuaskej?

¹⁰ (Xikonixtajtolti Romanos 12:2). Aksa xa kimattok ke Jehová kinamiki kiixtalis toni tein kuali uan tein amo kuali. Sayoj ke amo sayoj moneki kimatis nejon, ta no moneki kitakamatis itanauatiluan. Kemej neskayot, aksa xa kimattok ke tekiuanij kinnamiki kiixtaliskej keniuj se kinejnemiltis se carro, sayoj ke xa amo kineki kitakamatis nejon uan kinejnemiltia icarro kemej yejua kineki. No ijkon, tein tikchiuaj kinextis ox yekmelauj  tikitaj ke tein Jehová technauatia yejua tein okachi kuali (Prov. 12:28). David ijkon kiitaya, porin kiluij Jehová: “Tinechixmatiltia ojti tein teajxitia kampa se nemi. Moixpan semi se yolpaki; moyekmakopa onkas yolpakilis nochipaya” (Sal. 16:11).

11, 12. 1) ¿Toni amo moneki tikchiuaskej keman timotekipachojtoskej oso timotayokoltijtoskej? 2) ¿Keniuj techpaleuia tein kijtoua Filipenses 4:8 maj kuali tikixpejpenakan tein ika timoixpetaniskej?

¹¹ Keman timotekipachojtokej oso timotayokoltijtokej, xa tiknekiskej tikchiuaskej teisa tein ika tikelkauaskej tein tikpanotokej. Uan nejon kuali yetok. Sayoj ke moneki timoyekpiaskej para amo tikchiuaskej teisa tein Jehová kitauelita (Efes. 5:10-12, 15-17).

¹² Itech amat tein tatitanil Pablo kinijkuilouilij tokniuan akin nemiaj Filipos, kiniluij maj tanemilianij itech nochi tein Dios kiita ke kuali yetok, nochi tein chipauak, nochi tein kichiua maj se tetasojta uan nochi tein kuali (xikonixtajtolti Filipenses 4:8). Maski Pablo amo ika tajtojtoya tein ika se moixpetania, tein kijtoj moneki techpaleuis maj kuali tikixpejpenakan toni ika timoixpetaniskej. Maj tikchiuakan nejin, kampa nesi tajtol “nochi” itech nejin versículo, maj tikpatakan ika tajtolmej “tatsotson”, “películas”, “amatajkuilolmej” oso “videojuegos”. Nejin techpaleuis maj tikmatikan toni kiyolpaktia Dios uan toni amo. Tiknekij tiktakamatiskej tein Jehová tanauatia (Sal. 119:1-3). Komo tikchiuaj nejin, amo techkuejmolos totanemilil uan uelis tikchiuaskej okse taman tein techpaleuis maj yekmelauj tiyolpakikan (Hech. 23:1).

13. ¿Toni expatika taman techpaleuis maj yekmelauj tiyolpakikan? (Juan 4:23, 24).

¹³ EXPATIKA: Moneki tiktayekanaltiskej tikueyichiuaskej Jehová. Kemej Jehová techchijchiuak kinamiki maj tikueyichiuakan (Apoc. 4:11; 14:6, 7). Yejua ika, moneki tiktayekanaltiskej tikueyichiuaskej kemej yejuatsin kineki. Nejin kijtosneki ke tikueyichiuaj porin ‘techixyekana ika ichikaualis uan porin tikixmatij tein melauakʼ (xikonixtajtolti Juan 4:23, 24). Tiknekij maj ichikaualis Dios techpaleui maj tikueyichiuakan ijkon kemej kijtoua Biblia. Moneki tiktayekanaltiskej tiktekitiliskej maski tinemiskej kampa tekiuanij amo techkauaj maj titaueyichiuakan. Itech nejin tonalmej panoua 100 tokniuan tsaktokej sayoj porin kitekitiliaj Jehová. * Maski ijkon, yolpakij porin mochikauaj motataujtiskej, momachtiskej uan kiteixmatiltiskej Jehová uan iTaixyekanalis. Keman techijijtouaj oso techtajyouiltiaj, tiyolpakij porin Jehová techpaleuia maj titaxikokan uan porin tikmatij ke techtatiochiuis (Sant. 1:12; 1 Ped. 4:14).

14. ¿Toni kipanok se telpoch kayot Tayikistán uan keyej?

¹⁴ Seki tokniuan kipanouanij ouijkayomej, sayoj ke yolpakinij porin kichiuanij nejin eyi taman tein tikitakej. Maj tikitakan tein kipanok Yovidón Boboyónov, se tokniuj telpoch akin kipia 19 xiujmej uan nemi Tayikistán. Kemej  amo kinekik mochiuas soldado, itech 4 metsti octubre xiuit 2019 kikixtitoj de ichan. Tsaktoya seki metsti uan kiitakej kemej yeskia kichiujka tein amo kuali. Itech miak altepemej motematiltij nejin tein amo kuali tein kichiuilijtoyaj. Kijtojkej ke kimagakej porin kinekiaj maj motenkaua teisa uan maj motalili ininuniforme soldados. Satepan kiixtalijkej ke kinamikia tsaktos uan kiuikakej kampa kinteltekitiltiayaj. Hasta ke tekiuaj itech nejon altepet kijtoj maj kikixtianijya. Keman kipanok nochi nejin, Yovidón amo kikauak Jehová uan kisentokak yolpakik. ¿Toni kipaleuij? Kiitak ke monekia kichiuas tein kipaleuiskia maj kisentoka kuali mouika iuan Jehová.

15. ¿Keniuj kisentokak momachtij Yovidón keman tsaktoya?

¹⁵ Keman Yovidón tsaktoya kisentokak momachtij maski amo kipiaya Biblia nion amaixmej. ¿Keniuj kichiuak? Keman tokniuan kiuikiliayaj tein kikuaskia kijkuilouiliayaj itech bolsas taxelol tein moixtajtoltiaya sejse tonal. Ijkon, Yovidón uelia kiixtajtoltiaya Biblia mojmostaj uan itech tanemiliaya. Keman kisak kiniluij nejin akin ayamo kipanotoyaj se ueyi ouijkayot: “Axkan ke kuali nanyetokej, ximochikauakan okachi namotokiskej  iuan Jehová. Yejua ika motelneki xikixtajtoltikan Biblia uan amaixmej”.

16. ¿Toni kichiuak Yovidón?

¹⁶ Tokniuj Yovidón kitakamatik itanauatiluan Jehová. Amo kinemilij nion kichiuak tein amo kuali, ta tein Jehová kinekia uan tein yejuatsin kiita ke okachi moneki. Kiitaya uan itech tanemiliaya tein Jehová kichijchiuak. Mojmostaj kualkan kikakia keniuj kualtsin mokuikatiayaj totomej uan youak kiitaya metsti uan sitalimej. Yejua kijtoj: “Nochi nejin kichiuaya maj niyolpaki uan maj kuali nimomachili”. Keman tikpatiuitaj nochi tein Jehová techmaka, tiyolpakij uan nejon techpaleuia maj titaxikokan.

17. ¿Keniuj tein kijtoua 1 Pedro 1:6, 7 uelis kipaleuis aksa akin kipanotok se taman kemej tein kipanok Yovidón?

¹⁷ Yovidón no kitayekanaltij kiueyichiuas Jehová. Kimatia ke semi monekia maj amo kikaua. Jesús kijtoj: “Xikueyichiua moDios Jehová, uan sayoj yejua xiktekitili” (Luc. 4:8). Soldados uan akin kinixyekanayaj kinekiaj maj Yovidón kikaua Jehová. Sayoj ke yejua nochipa kitataujtiaya Jehová uan kitajtaniaya maj kipaleui maj taxiko uan maj amo kikaua. Maski kichiuilijkej miak taman tein amo kuali, Yovidón taxikoj. Yejua ika axkan yolpaki, porin okachi takuaujtamati ke achto ke kiuikaskiaj, kitsakuaskiaj uan kimagaskiaj (xikonixtajtolti 1 Pedro 1:6, 7).

18. ¿Keniuj uelis tiksentokaskej tiyolpakiskej?

¹⁸ Jehová kimati keniuj uelis yekmelauj tiyolpakiskej. Komo tikchiuaj eyi taman tein tikitakej itech nejin tamachtilis uelis tiksentokaskej tiyolpakiskej maski tikpanoskej ouijkayomej. Ijkon, no uelis tikijtoskej nejin: “¡Yolpaki xolal tein iDios yejua Jehová!” (Sal. 144:15).