Panoua se xiuit kichijchiujtoyaj se estación de radio tein monotsaya WBBR ompa Staten Island (Nueva York). Achto kintekkej koujmej uan satepan kichijchiujkej se ueyi kali kampa nemiskiaj nochin akin tekitiskiaj uan okse kampa kitaliskiaj nochi tein kikuiaj para radio. Keman matankej, tokniuan peuak kitemouaj teposmej tein monekia para kikuiskejya radio. Sayoj ke seki taman kinouijmakaskia kichiuaskej.

Tokniuan kiitakej ke semi ouij katka kitaliskej antena tein okachi ueyi. Ueyak katka kemej 91 metros uan monekia kiixtapalpiloskej itech ome postes de kouit tein uejkapan katkaj 61 metros. Keman yaya kipilotijya, amo uelik kichiujkej. Sayoj ke takuaujtamatkej ke Jehová kinpaleuiskia uan uelik kipilojkej. Calvin Prosser, akin no ompa tekitik, kijtoj: “Komo niman ueliskia tikchiuaskej xa tikijtoskiaj: ‘Xikitakan tein tikchiujkej’”. Sayoj ke tokniuan kijtojkej ke Jehová kinpaleuijka. Maski ijkon, no kinouijmakaskia kichiuaskej okseki taman.

Radio ayamo semi moixmatia, yejua ika amo niman kiajsiaj teposmej tein monekia kikouaskej. Sayoj ke tokniuan amo monekik uejka yaskej para kiajsiskej se tepos tein katka kemej se radio tein oksekin kichijchiujkaj. Amo kikoujkej se micrófono, ta kikuikej tein kipiaya se teléfono. Uan se youak itech metsti febrero kiitakej ox kualtiaya nejon tepos. Kemej kinekiaj maj mokaki teisa itech radio, peuak cantarouaj nekuikatilmej. Se tokniuj akin monotsaya Ernest Lowe uetskaya keman kielnamikia tein panok keman tokniuan cantarojtoyaj  uan tokniuj Rutherford kinnotsak. Yejua kinkaktoya itech iradio ompa Brooklyn, tein uejka katka kemej 25 kilómetros.

Tokniuj Rutherford kijtoj: “¡Amo xitakuejsojtokan! Mokaki kemej yeskia mistomej moteuijtokej”. Yejua ika tokniuan niman kiseuijkej radio, maski mopinaujmatiaj kimatiaj ke ueliskia kikuiskejya nejon tepos.

Itech 24 de febrero xiuit 1924, keman yekinika kikuikej radio, tokniuj Rutherford kijtoj ke kikuiskiaj para kichiuaskej tein toTekiuaj Cristo kinnauatijka. Kijtoj ke nejin tepos tapaleuiskia maj oksekin kiajsikamatikan Biblia uan tein moijtojka ke panoskia itech tonalmej keman tatamitiya. Nejin kinpaleuiskia nochin maski kipiaskiaj okse taneltokalis.

Yekinika tamachtilis tein mokakik itech radio semi tapaleuij. Nejin estación de radio kikuikej 33 xiujmej para kipanoltiskej tamachtilis tein kikixtiaya ixolal Jehová.

Itech metsti julio xiuit 1924, akin momachtiayaj Biblia mosentilijkej itech se ueyi nechikol ompa Columbus (Ohio). Mosentilijkej miakej tokniuan akin ualeuayaj itech miak altepemej, uan uelik kikakkej tanojnotsmej itech tajtolmej alemán, árabe, francés, griego, húngaro, tajtolmej tein tajtouaj ompa Europa, inglés, italiano, lituano, polaco, ruso uan ucraniano. Seki tanojnotsmej mopanoltijkej itech radio, uan tokniuan kiniluijkej sekin akin kikixtiayaj periódico maj mojmostaj kijkuilouanij seki tamachtilismej tein mopanoltijkaj itech ueyi nechikol.

Akin monechikojkaj itech ueyi nechikol, panoua 5 mil tanojnotskej nochi tonal den jueves 24 de julio. Kixelojkej kemej 30 mil amaixmej uan peuak kinmachtiaj miakej. Amaix The Watch Tower kijtoj ke okachi yolpakkej nejon tonal.

Tokniuan no kielnamikiskiaj tein panok viernes 25 de julio itech nejin ueyi nechikol, ijkuak tokniuj Rutherford kiixtajtoltij se amat kampa kijtouaya tein amo kuali tein kichiuayaj akin taixyekanayaj itech taneltokalis. Tokniuj kijtoj ke akin taixyekanayaj itech taneltokalis, akin tanamakayaj uan políticos amo kikauayaj maj oksekin kimatikan toni kiixtalijtok kichiuas Dios itech iTaixyekanalis. Yejua no kijtoj ke amo kuali yetoya tein kichiuayaj porin kipaleuiayaj Sociedad de Naciones, uan  ke takajkayauayaj keman kijtouayaj ke ijkon Dios kiixyekana taltikpak. Akin momachtiayaj Biblia monekia yeskij yolchikaujkej para kitematiltiskej nejin.

Satepan amaix The Watch Tower kijtoj ke nejin ueyi nechikol tein mochiuak ompa Columbus tapaleuij para maj tokniuan okachi takuaujtamatinij uan kinyolchikauak maj tanojnotsanij maski kinixnamikiskiaj. Leo Claus, akin no yetoya itech ueyi nechikol, kijtoj: “Satepan ke tamik ueyi nechikol, tinochin tiknekiaj tikinmatiltiskej oksekin tein moijtojka”.

Itech metsti octubre, akin momachtiayaj Biblia peuak kixelouaj miak tratados kampa ijkuiliujtoya tein tokniuj Rutherford kiixtajtoltijka. Nejin kijtouaya ke akin taixyekanayaj itech taneltokalis kichiuayaj tein amo kuali. Itech xolaltsin Cleveland (Oklahoma), tokniuj Frank Johnson kitamixeloj tratados kampa tanojnotsaya 20 minutos achto ke kikuitikisaskiaj okseki tokniuan. Amo ueliskia ompaka mochias porin akin ompa nemiaj tel kualantoyaj porin tanojnotstoya uan kitojtokatinemiaj. Yejua ika kalakito itech se tiopan tein ompaka moajsia. Kemej amo akin yetoya kikauak se tratado itech iBiblia akin ompa tamachtiaya uan kampa motaliayaj akin yayaj takakitij, uan ijsiujka kisak de ompa. Uan uelik yajkiok itech ome tiopamej kampa no kinkauak tratados.

Frank motaloj uan ijsiujka yajki kampa kikuitikisaskiaj. Yajki motatito taikampa de se gasolinera uan desde ompa kiitstoya ox kitojtokayajok. Yejuan ompaka panokej itech se carro, sayoj ke amo kiitakej. Niman keman yajkej, ajsikej tokniuan akin ompaka tanojnotstinemiaj uan Frank iniuan yajki.

Semej tokniuan kielnamiki: “Keman tikisteujkej de nejon xolal, tipanokej kampa yetoyaj nejon eyi tiopamej. Itech ikaltenoj sejse tiopan moajsiaj kemej 50 akin ompa mosentiliayaj. Sekin kiixtajtoltijtoyaj tratado uan oksekin kinextilijtoyaj akin tamachtiaya. Kemej tikisteujkej keman monekia, amo teyi techpanok. Tiktasojkamatilijkej Jehová porin techpaleuij maj titanojnotsakan uan maj amo techajsinij”.

Itech okseki altepemej akin momachtiayaj Biblia no moyolchikaujkej uan tanojnotskej. Ompa Francia, tokniuj Józef Krett kinnojnotsak akin ualeuayaj de Polonia akin tekitiaj itech minas. Moixtalij maj kitemakani se tanojnots tein motokaytiaya “Akin momikilijkejya oksepa nemiskej”. Keman tayoleujkej itech nejon xolal, se tiopixkat kiniluij akin yayaj tiopan maj amo kikakitij nejon tanojnots. Sayoj ke yejuan amo kikakkej. Uan panoua 5 mil kikakitoj tanojnots uan hasta no ompa yetoya tiopixkat. Tokniuj Krett kiluij tiopixkat maj kimelauani ke no yekmelauj katka tein kineltokaya, sayoj ke yejua amo kinekik. Tokniuj kikauak nochi amaixmej tein kiuikaya uan kijtoj ke akin ompa yetoyaj kinekiaj okachi kiixmatiskej iTajtol Dios (Amós 8:11).

Ompa África, tokniuj Claude Brown tanojnotsato ompa Costa de Oro (kampa axkan moixmati kemej Ghana). Tanojnotsmej uan amaixmej tein kixeloj, tapaleuij maj miakej kiixmatikan tein melauak itech nejon altepet. John Blankson akin momachtiaya keniuj mochijchiua pajti, kikakik se tanojnots tein kitemakak tokniuj Brown uan niman kimatik ke kiajsika tein melauak. Yejua kijtoua: “Semi niyolpakik keman nikmatik tein melauak tamachtia Biblia, uan nochipa ika nikinnojnotsaya oksekin kampa nimomachtiaya”.

 John momachtijkaya ke Biblia amo tamachtia ke Dios se Trinidad, yejua ika yajki tiopan uan kitajtanij se tiopixkat keyej yejua kineltokaya Trinidad. Tiopixkat kualanik uan kiluij: “¡Tejua amo tikchiua kemej Cristo! ¡Tejua tikchiua kemej Satanás! ¡Xiouj okseko!”.

Keman mokepak ichan, John kijkuilouilij tiopixkat se carta kampa kiluij maj mosentilikan kampa miakej yetoskiaj uan maj ika tajtokan Trinidad. Tiopixkat kinankilij uan kinauatij maj kiitati tamachtijkej akin kiixyekanaya nejon escuela kampa yejua momachtiaya. Tamachtijkej kitajtanij John ox kitajkuilouilijka tiopixkat.

John kinankilij: “Kemaj”.

Tamachtijkej kinauatij John maj oksepa kitajkuilouili tiopixkat para kitajtanis maj kitapojpolui. Yejua ika John kijkuiloj nejin:

“Akin nechmachtia nechiluij maj nimitsontajkuilouili para nimitsontajtanis xinechontapojpolui, uan nikchiuas sayoj komo tejuatsin tikonijtoua ke tein tiontamachtia amo melauak”.

Tamachtijkej kisenixitak uan kitajtanij: “Blankson, ¿yekmelauj tikneki tikijkuilouilis nejin?”.

“Kemaj. Sayoj nejon nikneki nikijkuilos”.

“Komo ijkon, timitskixtitij den escuela porin amo uelis tiktekitilis tekiuaj komo tiksentoka tikixnamiki tiopixkat akin taixyekana itech taneltokalis tein yejua kipaleuia”.

“¿Keyej? Ta keman tejuatsin titechonmachtia uan amo tikyekajsikamatij teisa, timitsontajtaniaj”.

“Kemaj”.

“Yejua nejon tein panok. Yejua techmachtijtoya Biblia, uan nejua sayoj niktajtanij se taman. Komo yejua amo ueli nechnankilia, ¿keyej nejua moneki maj niktajtani maj nechtapojpolui?”.

Blankson kisentokak ompa momachtij, uan amo keman kiluij tiopixkat maj kitapojpolui.

Keman amaix The Watch Tower ika tajtoj xiujtekit tein mochiuak, kijtoj: “Uelis tikijtoskej kemej David: ‘Keman nitateuis, tinechpaleuis maj nitaxiko’ (Salmo 18:39). Tein mochiuani itech nochi xiuit semi techyolchikauani, porin tikitanij keniuj Jehová techpaleuiani. Itekitikauan akin amo kikauaj yolpakij kitetapouiskej kuali tanauatilmej”.

Keman tamik xiuit, tokniuan kichiujkej seki taman para okachi tanojnotsaskej ika radio. Kichijchiujkej okse estación de radio ompa Chicago. Nejin yankuik estación monotsaya WORD, tein kijtosneki TAJTOL porin kitetapouiskiaj iTajtol Dios itech radio. Nejin okachi uejka mokakia uan tapaleuiaya maj okachi miakej kikakinij kuali tanauatilmej maski tel uejka moajsiaj. Uan mokakia hasta ajkokopa de Canadá.

Itech xiuit 1925, Jehová kinpaleuij tokniuan maj okachi kiajsikamatikan tamachtilis tein ika tajtoua Apocalipsis capítulo 12. Miakej amo kisentokakej kitekitilijkej Jehová satepan ke momelauak nejon, sayoj ke miakej kemaj yolpakkej keman kiajsikamatkej toni mochiuak ne iluikak uan keniuj nejon kinpaleuiskia itekitikauan Dios nikan taltikpak.