1. ¿Toni techmakani Jesús?

 AMO akin semi kinpaleuiani oksekin ijkon kemej Jesús kichiuani. Keman yetoya nikan taltikpak, kikuik ichikaualis uan kichiuak milagros para kinpaleuis miakej (Luc. 9:​12-17). Uan techmakak tein okachi kipia ipatiuj keman motemakak maj kimiktikan (Juan 15:13). Uan satepan ke oksepa nemik kisentoka techpaleuia. Uan ijkon kemej Jesús motenkaujka kichiuas, kitajtaniani Jehová maj ika ichikaualis techyolseui uan maj techmachti (Juan 14:​16, 17). Uan no, itech nechikolmej Jesús techmachtia keniuj titamachtiskej noyampa uan tikinchiuaskej imomachtijkauan (Mat. 28:​18-20).

2. ¿Akonimej kintemakak Jesús kemej “tatiochiualismej”? (Efesios 4:​7, 8).

² Jesús no techtayokoliani okse taman. Tatitanil Pablo kijkuiloj ke keman Jesús yajki iluikak, “kintemakateuj [takamej] kemej tatiochiualismej” (xikonixtajtolti Efesios 4:​7, 8). Yejua kimelauak ke Jesús kinixtalij nejin takamej para maj kichiuakan tataman tekimej itech nechikol (Efes. 1:​22, 23; 4:​11-13). Axkan, sekin de nejin “tatiochiualismej” yejuan tapaleuianij itech nechikol, tayekananij uan takalpanouanij itech circuito. a Maski ijkon, yejuan no tajtakolejkej uan mopolouaj (Sant. 3:2). Sayoj ke Jesús kichiua maj nejin takamej akin kemej yeskia tatiochiualismej techpaleuikan.

3. Xikonmelaua keniuj uelis tikinpaleuiskej takamej akin Jesús kintemakak kemej tatiochiualismej.

³ Jesús kintemakateuj nejin takamej “kemej tatiochiualismej” para maj tayolchikauakan itech nechikolmej (Efes. 4: 12). Tinochin uelis tikinpaleuiskej maj kichiuakan nejin tekit tein motelneki. Para okachi tikajsikamatiskej, maj ininka titanemilikan tokniuan akin kichijchiuaj se Kali kampa tiMosentiliaj. Sekin tapaleuiaj maj kichijchiuakan nejin kali, oksekin kinpaleuiaj akin tekititokej, kintamakaj oso kichiuaj okseki taman para tapaleuiskej. No ijkon kichiuaj tayekananij, tapaleuianij itech nechikol uan takalpanouanij itech circuito keman kichiuaj tataman tekimej, uan tinochin uelis tikinpaleuiskej ika tein tikijtouaj uan tein tikchiuaj. Maj tikitakan keniuj techpaleuia tekit tein kichiuaj nejin takamej uan keniuj uelis tikintasojkamatiliskej yejuan uan Jesús porin techpaleuiaj.

TOKNIUAN TAPALEUIANIJ SEMI TEKITIJ

4. ¿Toni tekimej kichiuayaj tokniuan tapaleuianij itech yekinika siglo?

⁴ Itech yekinika siglo, sekin tokniuan takamej kinixtaliayaj kemej tapaleuianij (1 Tim. 3:8). Nesi ke yejuan ‘akin tapaleuiayajʼ akin tatitanil Pablo ininka tajtoj itech 1 Corintios 12:28. Xa yejuan tapaleuiayaj ika miak taman para maj tayekananij uelinij tamachtianij uan maj kinyolchikauanij tokniuan. Xa tapaleuiayaj maj moijkuilouanij amatajkuilolmej oso xa kikouayaj tein mokuiskia para mochiuas nejon tekit.

5. ¿Toni tekimej kichiuaj tokniuan tapaleuianij?

⁵ ¿Toni tekimej kichiuaj tokniuan tapaleuianij axkan? (1 Ped. 4:10). Sekin xa kipouaj tomin tein mosentilia itech nechikol, kiitaj maj tanojnotsanij kipiakan amaixmej uan kiitaj kani motanojnotsas. Xa kitaliaj videos uan tatsotson itech nechikolmej, kiniluiaj tokniuan kanika motaliskej, oso kiyekpiaj Kali kampa tiMosentiliaj para maj amo uejueliui. Nochi nejin tapaleuia maj tiyolpakikan keman timosentiliaj uan maj motanojnotsa kemej ixyetok (1 Cor. 14:40). Uan no, kinixtaliaj seki tokniuan tapaleuianij para maj techmachtikan itech nechikol Tonemilis uan toTanojnotsalis uan maj kipanoltikan tanojnotsmej. Uan no kinixtaliaj maj kipaleuikan akin kiixyekana se grupo, uan kemansa se tokniuj tayekankej kiluia maj iuan youi keman kiyolchikauati se tokniuj.

6. ¿Keyej tikpatiuitaj tein kichiuaj tokniuan tapaleuianij?

⁶ ¿ Keyej semi tikpatiuitaj tekit tein kichiuaj tokniuan tapaleuianij? Maj tikitakan tein kijtouanij seki tokniuan. Se tokniuj siuat de Bolivia akin monotsa Beberly b, kijtoua: “Kemej itech nechikol tikinpiaj tokniuan tapaleuianij, ueli niyolpaki keman timonechikouaj. Tein kichiuaj nechpaleuia maj ueli nimokuikati, maj nitanankili, maj nikinkaki tanojnotsmej uan maj ueli nikita videos uan taixkopimej. Yejuan kinyekpiaj tokniuan uan kinpaleuiaj akin amo uelij mosentiliaj maj kikakikan nechikol desde ininchan. Keman tami nechikol, tachipauaj uan kipouaj tomin tein mosentilia uan kiitaj maj tikpiakan amaixmej tein techpoloua. ¡Semi nikintasojkamatilia!”. Leslie akin nemi Colombia uan itakatsin tayekankej, kijtoua: “Tokniuan tapaleuianij semi kipaleuiaj notakatsin. Komo yejuan amo kichiuaskiaj nejin tekimej, notakatsin kipiaskia okachi tekit. Semi nikintasojkamatilia porin yejuan kiuelitaj kitekitiliskej Jehová uan porin kiuelitaj tapaleuiskej”. Tejuan no semi tiktasojkamatij tein kichiuaj (1 Tim. 3:13).

7. ¿Keniuj uelis tiknextiskej ke tiktasojkamatij tein kichiuaj tokniuan tapaleuianij? (No xikonita taixkopin).

⁷ Maski xa semi tiktasojkamatij nochi tein kichiuaj tokniuan tapaleuianij, Biblia kijtoua maj tikinnextilikan ke tikintasojkamatiliaj (Col. 3:15). Maj tikitakan keniuj  kinextia ke motasojkamati se tokniuj tayekankej de Finlandia akin monotsa Daavid, yejua kijtoua: “Niktitanilia se amatsin tokniuj tapaleuijkej oso nikijkuilouilia se versículo, uan nikiluia keniuj tein kichiuak nechyolchikauak oso keyej niktasojkamatilia”. Pascal uan Jael, akin nemij Nueva Caledonia, kinelnamikij tokniuan tapaleuianij keman kitataujtiaj Jehová, yejuan kijtouaj: “Semi tiktasojkamatilianij Jehová porin itech tonechikol yetokej tokniuan tapaleuianij, uan tiktataujtianij maj kinpaleui”. Jehová kikaki nejon netataujtilmej uan ijkon nochin tokniuan kuali yetokej (2 Cor. 1:11).

TAYEKANANIJ ITECH NECHIKOL “CHIKAUAK TEKITIJ”

8. ¿Keyej Pablo kijtoj ke tayekananij itech yekinika siglo semi tekitiaj? (1 Tesalonicenses 5:​12, 13).

⁸ Itech yekinika siglo tokniuan tayekananij semi tekitiaj (xikonixtajtolti 1 Tesalonicenses 5:​12, 13; 1 Tim. 5:17). Yejuan taixyekanayaj itech sejse nechikol, kichiuayaj nechikolmej uan kisenixtaliayaj toni mochiuaskia. No kinyolchikauayaj uan kinyolmajxitiayaj tokniuan para maj kisentokanij takuaujtamatinij iuan Jehová (1 Tes. 2:​11, 12; 2 Tim. 4:2). No kiitayaj maj yejuan uan ininchankauan kisentokanij takuaujtamatinij iuan Jehová uan maj kualtsin iuan mouikanij (1 Tim. 3:​2, 4; Tito 1:​6-9).

9. ¿Toni tekimej kichiuaj tayekananij axkan?

⁹ Axkan tokniuan tayekananij no semi tekitij. Yejuan no kiteixmatiltiaj kuali tanauatilmej (2 Tim. 4:5). Technextiliaj ke moneki titanojnotsaskej, techmachtiaj keniuj moneki tikchiuaskej uan keniuj titamachtiskej. No kiixtaliaj kani uan keniuj motanojnotsas. Keman kinmelauaj oksekin kinikneliaj uan amo kinchichikouiaj. Keman aksa tajtakolchiua, kiyolmajxitiaj uan kipaleuiaj maj oksepa kuali mouika iuan Jehová, uan no kiitaj maj itech nechikol mochiua tein chipauak (1 Cor. 5:​12, 13; Gál. 6:1). Tokniuan tayekananij tekitij kemej ichkatajpianij (1 Ped. 5:​1-3). Tel kuali momachtiaj keman kitemakaj se tanojnots, mochikauaj kinixmatiskej nochin tokniuan itech nechikol uan kinkalpanouaj para kinyolchikauaskej. Uan no, sekin tayekananij tapaleuiaj keman mochijchiuaj uan moyektaliaj Kalmej kampa tiMosentiliaj, no tapaleuiaj keman mochiua se ueyi nechikol. Sekin tekitij iniuan Tayekananij akin Tetajtouiaj itech Tapajtiloyamej, iniuan Oloch Tokniuan tein Kinkalpanouaj akin Mokokouaj uan kichiuaj okseki taman. ¡Kichiuaj miak taman para techpaleuiskej!

10. ¿Keyej tikintasojtaj tokniuan tayekananij?

¹⁰ Jehová ipa kijtojkaya ke ichkatajpianij kualtsin kinyekpiaskiaj ichkamej uan ke yejuan ‘amo mouiskiajok nion moujkanemiskiajok’ (Jer. 23:4). Yejua nejon tein kipanok se tokniuj siuat de Finlandia akin monotsa Johanna keman inan tel kokolispeuak. Yejua kijtoua: “Semi nechouijmaka nikiniluis oksekin keniuj nimomachilia. Sayoj ke se tokniuj tayekankej akin amo semi nikixmatia, kuali nechkakik, nouan motataujtij uan nechiluij ke Jehová nechtasojta. Maski amo nikyekelnamiki toni nechiluij, nechpaleuij maj amo nimotekipachook. Nikmati ke Jehová kititanik para maj nechpaleui keman okachi niknekia”. ¿Uan tejuatsin? ¿Keniuj mitsonpaleuianij tayekananij akin yetokej itech monechikol?

11. ¿Keniuj uelis tikinnextiliskej tokniuan tayekananij ke tiktasojkamatij nochi tein kichiuaj? (No xikonita taixkopin).

¹¹ Jehová kineki maj tikinnextilikan tayekananij ke tikintasojtaj ‘porin semi tekitij’ (1 Tes. 5:​12, 13). Henrietta, akin no nemi Finlandia, kijtoua: “Tayekananij semi kiuelitaj kinpaleuiskej oksekin. Sayoj ke nejon amo kijtosneki ke nochipa kemantij  uan ke tel chikaujtokej oso ke amo kipiaj kuejmolmej. Yejua ika kemansa nikiniluia: ‘Nikneki xikmati ke tejuatsin se kuali titayekankej’”. Uan se tokniuj de Turquía akin monotsa Sera, kijtoua: “Moneki tikinyolchikauaskej tayekananij para maj kisentokakan kichiuakan inintekiuj. Yejua ika nikinijkuilouilia amatsitsin, nikinyoleua maj takuatij oso iniuan nitanojnotsa”. Uan tejuatsin, ¿tikonneki tikontasojkamatilis se tokniuj tayekankej porin semi mitsonpaleuiani? ¿Keniuj uelis tikonnextilis ke tikontasojkamatilia? (1 Cor. 16:18).

TOKNIUAN TAKALPANOUANIJ TAYOLCHIKAUAJ ITECH NECHIKOLMEJ

12. ¿Akonimej no kinixtalij Jesús maj tayolchikauakan itech nechikolmej? (1 Tesalonicenses 2:​7, 8).

¹² Jesús no kinixtalij okseki tokniuan para maj tapaleuikan itech nechikolmej. Itech yekinika siglo, kichiuak maj tokniuan tayekananij ompa Jerusalén kintitanikan Pablo, Bernabé uan oksekin tokniuan para maj kinkalpanotij nechikolmej (Hech. 11:22). ¿Keyej? Para maj kinyolchikauanij tokniuan itech nechikolmej ijkon kemej kichiuaj tokniuan tapaleuianij uan tayekananij (Hech. 15:​40, 41). Yejuan kikaujkaj miak taman uan hasta motemakakej maj kinmiktikan para kinmachtiskej uan kinyolchikauaskej oksekin (xikonixtajtolti 1 Tesalonicenses 2:​7, 8).

13. ¿Toni tekimej moneki kichiuaskej tokniuan takalpanouanij itech circuito?

¹³ Tokniuan takalpanouanij moneki miakkan yajtinemiskej. Sekin moneki yaskej miak horas para ajsiskej kampa takalpanotij porin nechikolmej ueuejka moajsij. Sejse semana kitemakaj miak tanojnotsmej, kinkalpanouaj tokniuan para kinyolchikauaskej, kipiaj nechikol iniuan precursores, iniuan tayekananij uan kichiuaj nechikol achto ke tanojnotsatiuij. No kiitaj  keniuj mochiuaskej uejueyi nechikolmej tein uejkauaj se tonal uan eyi tonal uan momachtiaj para kipanoltiskej tanojnotsmej. Uan no yejuan kiixyekanaj nemachtil tein kiseliaj precursores, kichiuaj nechikol iniuan nochin precursores itech inincircuito, uan no moneki kichiuaskej seki taman tein Betel kinnauatia, uan kemansa moneki niman kichiuaskej.

14. ¿Keyej tikpatiuitaj tein kichiuaj tokniuan takalpanouanij itech circuito?

¹⁴ ¿Keniuj kinpaleuia tokniuan itech nechikolmej tein kichiuaj takalpanouanij? Se tokniuj takat akin nemi Turquía, kijtoua: “Tein kichiua tokniuj keman techkalpanoua, semi nechyolchikaua maj okachi nieto iniuan tokniuan uan maj nikinpaleui. Nikinixmatini miakej tokniuan takalpanouanij, sayoj ke nion akin kinextiani ke amo kemanti oso ke amo kineki nouan tajtos”. Johanna, akin ika titajtojkej itech párrafo 10 iuan tanojnotsato se tokniuj takalpanojkej sayoj ke amo akin uelik kinojnotskej. Yejua kijtoua: “Maski ijkon, nochipa nikelnamiktos nejon tonal. Ome nokniuan siuamej yankuixtok mokalpatakaj uan semi nikintemouaya. Tokniuj takalpanojkej semi nechyolchikauak uan nechpaleuij maj nikajsikamati ke maski axkan amo uelis tisenyetoskej iniuan tochankauan uan totasojikniuan, itech xochital tikpiaskej miak tiempo para tisenyetoskej”. Timiakej tikelnamikij tein kichiuanij tokniuan takalpanouanij uan keniuj techpaleuianij (Hech. 20:​37–21:1).

15. 1) ¿Keniuj uelis tikchiuaskej tein kijtoua 3 Juan 5-8 uan tiknextiskej ke tikinpatiuitaj tokniuan takalpanouanij itech circuito? (No xikonita taixkopin). 2) ¿Keyej amo moneki tikinelkauaskej ininsiuatsin tokniuan takamej akin taixyekanaj, uan keniuj uelis tikchiuaskej? (No xikonita recuadro “ Maj amo tikinelkauakan ininsiuatsin”).

¹⁵ Tatitanil Juan kiyolchikauak Gayo maj kuali kinseliani tokniuan akin takalpanouayaj  itech nechikolmej para tayolchikauaskej, uan kiluij: “Nimitstataujtia xikinmaka tein kinpolos itech ojti ijkon kemej kiyolpaktis Dios” (xikonixtajtolti 3 Juan 5-8). ¿Keniuj no ijkon uelis tikchiuaskej? Maj tikyoleuakan tokniuj takalpanojkej maj takuati tochan uan maj titanojnotsakan ijkon kemej moixtalis itech nejon semana. Maj tikitakan keniuj Leslie akin ika titajtojkej itech párrafo 6 kinnextilia ke kintasojkamatilia. Yejua kijtoua: “Niktajtania Jehová maj kinmaka tein kinpoloua. Notakatsin uan nejua tikinijkuilouiliaj cartas kampa tikiniluiaj keniuj semi techyolchikauaj keman techkalpanouaj”. Maj tikelnamikikan ke tokniuan takalpanouanij itech circuito no kipiaj ouijkayomej uan no siouij kemej tejuan. Kemansa kokolispeuaj, motekipachouaj uan hasta kinekij mosenkauaskej. Xa komo tejuatsin tikoniluia teisa tein kiyolchikauas oso tikontayokolia teisa, toknitsin akin mitsonkalpanoua xa kiitas ke ijkon Jehová kinankilijtok inetataujtil (Prov. 12:25).

MONEKIJ OKACHI TAKAMEJ AKIN KEMEJ YESKIAJ “TATIOCHIUALISMEJ”

16. ¿Toni moneki maj motajtanikan tokniuan takamej? (Proverbios 3:27).

¹⁶ Itech nochi nechikolmej monekij okachi takamej akin kemej yeskiaj “tatiochiualismej” para maj tapaleuikan. Komo tionmoauijya, ¿uelis ijkon tiontapaleuis? (xikonixtajtolti Proverbios 3:27). ¿Tionmochikaujtok tionmochiuas tapaleuijkej itech nechikol? Uan komo ijkon tiontapaleuijtokya, ¿tionmochikaujtok tionmochiuas tayekankej? c ¿Uelis tikonpatas tein tikonchiujtok para tikonselis Tamachtilis para akin kiteixmatiltiaj iTaixyekanalis Dios? Komo tikonselia nejin tamachtilis, Jesús uelis mitsonmakas okachi tekimej. Komo tikonmachilia ke amo uelis tikonchiuas, xikontapoui Jehová. Xikonilui maj mitsonpaleui ika ichikaualis para tikonchiuas tein yeski tekit tein mitsonmakaskej (Luc. 11:13; Hech. 20:28).

17. ¿Toni kinextia tekit tein kichiuaj akin Jesús kintemakak kemej tatiochiualismej?

¹⁷ Nochi tekit tein kichiuaj takamej akin Jesús kintemakak kemej “tatiochiualismej” kinextia ke yejua techixyekantok itech nejin tonalmej keman tatamitiya (Mat. 28:20). Semi tiktasojkamatiliaj totekiuaj porin semi techtasojta, yolkuali, kimati nochi tein techpoloua uan kinixtalia tokniuan para maj techpaleuikan. Maj tiktemokan keniuj uelis tiknextiskej ke tikintasojkamatiliaj nejin tokniuan. Uan maj nochipa tiktasojkamatilikan Jehová porin yejuatsin techmaka “nochi tatiochiualismej tein kuali uan tein amo teyi kinpoloua” (Sant. 1:17).