1, 2. 1) ¿Toni ueliskia timotajtaniskej? 2) ¿Toni tikitaskej itech nejin tamachtilis?

 TINOCHIN, titelpochmej oso tixiuejkejya kemansa timotajtaniaj ox Jehová techpatiuita uan ox kuali yetoya tein tikixtalijkaj tikchiuaskej. Xa se telpoch ayamo kineki moauis porin amo kiyekmati ox Jehová kiita tein kichiujtok. Oso xa se tokniuj takat kiixtalijka okachi kitekitilis Jehová keman katka telpoch uan amo kitanis miak tomin, sayoj ke kemej axkan kipia ichankauan kiita ke amo kiajsi tomin para kintekipanos, uan xa motajtania ox kuali yetoya tein kiixtalijka kichiuas. Oso xa se tokniuj siuat akin xiuejya uan amo chikauakok motayokoltia porin amo ueli tekitiok kemej achto. Xa kemansa tionmotajtaniani nejin: “¿Kiita Jehová tein nikchiua? ¿Kipatiuita nochi tein nikchiuani para niktekitilis? ¿Kiita ke ueliok niktekitilia?”.

² Keman ijkon titanemiliaj xa peuas amo semi titakuaujtamatiskejok iuan Jehová uan hasta amo tiktekitiliskejok. Itech nejin tamachtilis tikitaskej keniuj Biblia techpaleuia  komo tiknemiliaj ke Jehová amo kiita tein tikchiuaj, ke amo kuali yetoya tein tikixtalijkaj tikchiuaskej oso komo tikmachiliaj ke amo ueli tiktekitiliajok Jehová.

¿TONI UELIS TIKCHIUASKEJ KOMO PEUA TIKNEMILIAJ TEIN AMO TECHPALEUIA?

3. ¿Toni uelis tikchiuaskej komo peua tiknemiliaj tein amo techpaleuia?

³ Komo peua tiknemiliaj tein amo techpaleuia, moneki tiktemoskej itech Biblia tein techpaleuis maj amo ijkon titanemilikanok. Komo ijkon tikchiuaj, okachi iuan titakuaujtamatiskej Jehová uan okachi iuan timouikaskej, nejon techpaleuis maj ‘semi titakuaujtamatikan’ (1 Cor. 16:13).

4. Kemej kijtoua 1 Tesalonicenses 5:​21, ¿keniuj uelis tikyekitaskej nochi?

⁴ (Xikonixtajtolti 1 Tesalonicenses 5:21). Biblia techyolmajxitia nejin: “Xikyekitakan nochi”. ¿Keniuj uelis tikchiuaskej? Komo amo tikyekmatij teisa, maj tikitakan tein Biblia kijtoua. Se telpoch xa amo kiyekmati ox Jehová kiita tein kichiujtok, ¿kipaleuis komo nochipa ijkon tanemilijtok? Amo, yejua ika moneki kiyekitas nochi tein kijtoua Biblia para kimatis toni kinemilia Jehová.

5. ¿Keniuj uelis “tikakiskej” tein techiluia Jehová?

⁵ Keman tikixtajtoltiaj Biblia kemej yeskia Jehová technojnotstoskia. Sayoj ke para “tikakiskej” tein techiluia keman teisa amo tikyekmatij, moneki tikchiuaskej okse taman. Moneki tiktemoskej uan timomachtiskej textos tein ika tajtoua tein techtekipachoua uan uelis tikajsiskej komo tiktemouaj tamachtilismej itech toamaixuan (Prov. 2:​3-6). Moneki tiktajtaniskej Jehová maj techpaleui maj tikajsikan tamachtilis tein tiktemojtokej. Maj tiktemokan textos uan tamachtilis tein uelis techpaleuis. No uelis timomachtiskej tein kinpanok seki itekitikauan Jehová ne uejkauj akin no ijkon momachilijkej.

6. ¿Keniuj techpaleuiaj nechikolmej maj tikmatikan toni tikchiuaskej?

⁶ No kemej yeskia “tikakij” Jehová keman tiouij nechikolmej. Komo nochipa timonechikouaj, xa tikakiskej se tanojnots oso tein aksa tanankilis tein techyolchikauas porin amo tikyekmatiaj teisa (Prov. 27:17). Axkan maj timomachtikan seki taman tein miakpa timotajtanianij uan toni uelis tikchiuaskej.

“¿KIITA JEHOVÁ TEIN NIKCHIUA?”

7. ¿Toni xa timotajtaniskej?

⁷ Xa kemansa tionmotajtaniani ox Jehová kiita tein tikonchiua. Komo tikonnemilia ke Jehová amo mitsonpatiuita, xa tikonnemilis ke amo keman uelis iuan tionmouikas Dios akin semi ueyichiujkej. Tekiuaj David xa no ijkon kinemilij. Kimojkaitaya maj Jehová techpatiuita uan maj toka motekipacho, uan yejua ika kitajtanij: “Jehová, ¿toni chiujkej takat oso siuat para tikelnamiktos, toni chiujkej akin yolik kemej takat para tikyekpias?” (Sal. 144:3). Maj tikitakan kani uelis tikajsiskej tanankilil.

8. Kemej kijtoua 1 Samuel 16:​6, 7, 10-12, ¿toni kiita Jehová?

⁸ Biblia kinextia ke Jehová kinpatiuita akin oksekin kinitaj ke amo ueyichiuanimej. Jehová kititanik Samuel ichan Jesé para maj kiixtaliani kemej tekiuaj ompa Israel semej de ikoneuan. Keman Jesé kinuikilij Samuel chikome ikoneuan amo kiuikilij David akin katka xokoyot. a Sayoj ke  Jehová kiixpejpenka David (xikonixtajtolti 1 Samuel 16:​6, 7, 10-12). ¿Keyej? Porin kuali kiixmatia uan kimatia ke semi kitasojtaya.

9. ¿Keyej uelis tikonneltokas ke Jehová moka motekipachoua? (No xikonita taixkopin).

⁹ Xikonnemili tein Jehová kichiuani para mitsonnextilis ke moka motekipachoua. Yejuatsin mitsonyolmajxitia kemej okachi mitsonpaleuis (Sal. 32:8). Nejin kinextia ke Jehová kuali mitsonixmati (Sal. 139:1). Keman tikonchiuas tein Jehová mitsonyolmajxitis uan tikonitas ke mitsonpaleuia okachi tikonneltokas ke moka motekipachoua (1 Crón. 28:9; Hech. 17:​26, 27). Jehová kiita nochi tein tikonchiua para tikontekitilis uan tikontakamatis, uan no kiita tein kuali tein tikonchiua (Jer. 17:10). Yejuatsin kineki kuali mouikas mouan uan semi yolpakis komo no tikonneki iuan tionmouikas (1 Juan 4:19).

“¿KUALI YETOYA TEIN NIKIXTALIJKA NIKCHIUAS?”

10. Keman tikelnamikij tein tikixtalijkaj tikchiuaskej, ¿toni xa uelis timotajtaniskej?

¹⁰ Kemansa, aksa xa kinemilis ox kuali yetoya tein kiixtalijka kichiuas ne uejkauj. Xa kinekia okachi kitekitilis Jehová, yejua ika amo kinekik kiselis se kuali tekit oso kitanis miak tomin. Sayoj ke axkan xa kiita ke sekin akin kiixtalijkaj tel tekitiskej kipiaj tomin uan kuali nemij, yejua ika xa motajtania: “¿Yekmelauj kuali yetoya maj nikixtaliani okachi niktekitilis Jehová oso okachi kuali ninemiskia komo nikixpejpenaskia nikchiuas okse taman?”.

11. ¿Keyej motekipachouaya akin kijkuiloj Salmo 73?

¹¹ Komo no tionmotajtaniani nejin, xikonnemili keniuj momachilij akin kijkuiloj Salmo 73. Yejua kinitaya ke akin amo kitekitiliayaj Jehová amo kokolispeuayaj, tominpiayaj  uan moitaya ke amo teyi kintekipachouaya (Sal. 73:​3-5, 12). Kemej kinitaya ke semi yolpakiaj salmista kinemilij ke nenkaj kitekitilijtoya Jehová. Yejua kijtoj ke “motekipachouaya nochin tonal” porin sayoj kinemilijtoya tein amo kipaleuiaya (Sal. 73:​13, 14). ¿Toni kichiuak?

12. Kemej kijtoua Salmo 73:​16-18, ¿toni kipaleuij salmista maj yektanemili?

¹² (Xikonixtajtolti Salmo 73:​16-18). Salmista yajki itech kaltsin kampa kiueyichiuayaj Jehová. Uan ompa uelik yektanemilij uan kiajsikamatik ke maski moitaya ke sekin kuali nemiaj, amo kichiayaj tein kuali satepan. Yejua ika moyolchikauak uan kiitak ke okachi kuali yetoya maj kitekitiliani Jehová, nejon kipaleuij maj yolseujto uan maj kisentoka kitekitili (Sal. 73:​23-28).

13. ¿Toni uelis tikonchiuas para amo tikonnemilisok tein amo mitsonpaleuia? (No xikonita taixkopimej).

¹³ Ijkon kemej salmista, tejuatsin no uelis tikonchiuas teisa para amo tikonnemilisok tein amo mitsonpaleuia. ¿Keniuj? Xikonelnamiki ke tikonyolpaktia Jehová uan tikonpia okseki tatiochiualismej, uan ke akin amo kitekitiliaj, yejuatsin amo kinpaleuia. Miakej akin amo kitekitiliaj Jehová amo kichiaj tein kuali satepan, yejua ika kinemiliaj ke okachi moneki maj kipiakan se kuali tekit uan maj kualtsin nemikan. Sayoj ke Jehová amo sayoj mitsontatiochiuia axkan, ta no motenkaua ke mitsontatiochiuis satepan (Sal. 145:16). Uan no, amo tikonmati keniuj tionnemiskia axkan komo tikonixtaliskia tikonchiuas okse taman. Sayoj ke xikonmati ke komo tikonixtalia tikonchiuas teisa porin  tikontasojta Jehová uan oksekin, nochipa tikonpias tein kuali tein mitsonyolpaktis.

“¿KIITA JEHOVÁ KE UELIOK NIKTEKITILIA?”

14. ¿Toni kinpanoua seki itekitikauan Jehová uan toni xa motajtaniaj?

¹⁴ Sekin itekitikauan Jehová amo ueli semi kitekitiliajok kemej kinekiskiaj porin xiuejkejya, mokokouaj oso amo ueli kichiuaj seki taman. Yejua ika xa kimachiliaj ke Jehová amo kinpatiuitaok uan motajtaniaj: “¿Kiita Jehová ke ueliok niktekitilia?”.

15. ¿Toni kimatia akin kijkuiloj Salmo 71?

¹⁵ Akin kijkuiloj Salmo 71 no ijkon momachiliaya. Yejua kiluij Jehová: “Amo xinechkaua keman tantokya nochikaualis” (Sal. 71:​9, 18). Sayoj ke maski ijkon momachiliaya, kimatia ke komo kisentokaya kitekitiliaya Jehová, yejuatsin kiixyekanaskia uan kipaleuiskia. Salmista kiitaka ke Jehová semi yolpaki keman kiita ke sekin mochikauaj kitekitiliskej maski amo ueli kichiuaj nochi tein kinekiskiaj (Sal. 37:​23-25).

16. ¿Keniuj ueli kitekitiliaj Jehová akin xiuejkejya? (Salmo 92:​12-15).

¹⁶ Komo tejuatsin tionxiuejya, xikonnemili keniuj mitsonita Jehová, yejuatsin uelis mitsonpaleuis xikonsentoka xikontekitili maski amo ueli tikonchiuaok miak taman (xikonixtajtolti Salmo 92:​12-15). Amo sayoj xikonnemilijto tein amo ueli tikonchiua, ta xikonnemili tein kemaj ueli tikonchiua. Uelis tikonyolchikauas oksekin keman kiitaskej tein tikonchiua uan komo ininka tionmotekipachoua. Uelis tikoniluis oksekin keniuj mitsonpaleuiani Jehová uan toni tein motenkaua itech Biblia semi tikonneki maj mochiua. Uan amo xikonelkaua ke semi tapaleuia keman ininka  tionmotataujtia oksekin (1 Ped. 3:12). Maski tikpanotoskej miak taman, tinochin uelis tiktekitiliskej Jehová uan tikinpaleuiskej oksekin.

17. ¿Keyej amo moneki tikitaskej tein kichiuaj oksekin uan tein tejuan tikchiuaj?

¹⁷ Komo tionmoyolkokoua porin amo ueli tikontekitiliaok Jehová kemej tikonnekiskia. Xikonelnamiki ke yejuatsin kipatiuita nochi tein tikonchiua. Xa no tikonnekis tikonitas tein oksekin kichiuaj uan tein tejuatsin tikonchiua, sayoj ke amo xikonita nejon. ¿Keyej? Porin Jehová amo keman ijkon kichiua (Gál. 6:4). Se tonal, María kimetstekilij Jesús aceite tein kualtsin ajuiyak uan patiyoj (Juan 12:​3-5). Uan itech templo, se siuatsin pobre akin momikilijkaya itakatsin kipantalij ome centavitos tein amo semi kipiaya ipatiuj (Luc. 21:​1-4). Sayoj ke Jesús amo kiitak ke se okachi kitemakaka ke okse, ta kiitak ke nochin omen kinextijkej ke semi takuaujtamatiaj. Jesús senkis kichiuak kemej iTajtsin. Yejua ika uelis tikonmatis ke Jehová kiita nochi tein tikonchiua porin iuan tiontakuaujtamati uan tikontasojta, uan semi kipatiuita maski tikonnemilia ke amo ueli tikonchiua miak taman.

18. ¿Toni uelis tikonchiuas para amo tikonnemilis tein amo mitsonpaleuia? (No xikonita recuadro “ Biblia uelis mitsonyolchikauas para amo tikonnemilisok tein amo mitsonpaleuia”).

¹⁸ Tinochin kemansa tiknemiliaj tein amo techpaleuia, sayoj ke Biblia uelis techpaleuis maj amo ijkon titanemilikanok. Yejua ika xikontemo tein mitsonyolseuis para amo tionmoyolkokojtosok. Jehová kuali mitsonixmati, kipatiuita nochi tein tikonixtalij tikonchiuas para tikontekitilis uan motenkaua mitsontatiochiuis. Amo keman xikonelkaua ke Jehová semi kitasojta uan ika motekipachoua sejse itekitikauj.