Kampa ika se kalakteuaya itech templo, no ompaka se kalakia para se ajsis itech cuarto tein monotsa Santo. Traducción del Nuevo Mundo tein kisak achto de 2023, itech 2 Crónicas 3:4 kijtouaya: “Kampa se kalakteuaya kipiaya 20 molikmej de patauak ijkon kemej kali uan de uejkapan kipiaya 120”. Seki biblias no kijtouaj ke kampa se kalakteuaya katka uejkapan “120 molikmej”. ¡Nejon kijtosnekia ke katka uejkapan 53 metros!

Sayoj ke desde xiuit 2023, mopatak tein kijtouaya nejin versículo itech Traducción del Nuevo Mundo, uan axkan kijtoua ke kipiaya 20 molikmej de uejkapan, kemej chiknaui metros. a Maj tikitakan keyej mopatak tein kijtouaya nejin versículo.

Itech 1 Reyes 6:3 amo kijtoua kanachi ika uejkapan katka kampa se kalakteuaya. Itech nejin versículo, Jeremías kijtoj kanachi de ueyak uan de patauak katka kampa se kalakteua sayoj ke amo kijtoj kanachi de uejkapan katka. Satepan, itech okse capítulo tein kisentoka ika tajtoj okseki taman tein kipiaya templo, kemej ueyi tanque de cobre, majtakti carritos uan ome kalikximej de cobre tein moajsiaj kalixpankopa (1 Rey. 7:​15-37). Komo kampa se kalakteuaya yekmelauj uejkapan katka panoua 50 metros uan okachi moitaya ke nochi templo, ¿keyej Jeremías amo kijtoj nejon? Satepan, seki motelmachtianij judíos kijkuilojkej ke kampa se kalakteuaya amo katka okachi uejkapan ke nochi itemplo Salomón.

Seki motelmachtianij amo kineltokaj maj kampa se kalakteuaya uejkapan katka 120 molikmej porin tepamit amo taxikoskia. Ne uejkauj keman kinchijchiuayaj uejueyi kalmej de tet uan ladrillo, kampa se kalakteuaya, itsintan kichijchiuayaj semi patauak uan ijkon kemej pankistiaya motokotsojtiaya ijkon kemej katkaj templos de Egipto. Sayoj ke itemplo Salomón amo ijkon chijchiujtoya. Seki motelmachtianij kinemiliaj ke tepamit katka tilauak kemej chikuasen molikmej oso 2,7 metros. Theodor Busink se akin kuali kiixmati keniuj mochijchiuayaj kalmej ne uejkauj, kijtoj: “Kampa se kalakteuaya amo uejkapan katka 120 molikmej porin tepamit tein ompa kipiaya amo semi tilauak katka”.

Xa keman kijkuilojkej 2 Crónicas 3:4 amo kiyekijkuilojkej. Maski itech nejin versículo seki biblias tein moijkuilojkej ne uejkauj kijtouaj “120”, okseki biblias tein takuaujtamachmej kijtouaj “20 molikmej” kemej itech Códice alejandrino (tein kisak itech siglo quinto) uan Códice ambrosiano (tein kisak itech siglo sexto). ¿Keyej xa mopolojkej keman kijkuilojkej? Porin itech hebreo tajtol cien uan molik amo semi mopata kemej moijkuilouaj. Yejua ika, akin kijkuiloj nejin xa kijkuiloj “ciento veinte” uan amo “veinte molikmej”.

Maski timochikauaj tikajsikamatiskej seki taman uan tikmelauaskej keniuj chijchiujtoya itemplo Salomón, okachi tiknekij tikajsikamatiskej toni kiixnextiaya nejon templo: iueyi templo Jehová. Semi timotasojkamatij porin yejuatsin kinyoleuak nochin itekitikauan para maj kiueyichiuakan itech itemplo (Heb. 9:​11-14; Apoc. 3:12; 7:​9-17).