Seki tajkuilolmej achto kiteajsikamatiltiaj ke “Tajtoltsin de Dios” tein Pablo ika tajtoj yejua kemej Dios kiteixmatiltia itanejnekilis, kemej tikajsij itech Biblia.

Itech toamaixuan, miakpa titamachtiaj ika Hebreos 4:12 ke Biblia ueli kinpaleuia taltikpakneminij maj mopatakan. Uan nejon melauak. Sayoj ke no kuali maj tikajsikamatikan toni ika tajtojtoya Pablo keman kijkuiloj nejin tajkuilol. Yejua kinyoleujtoya tokniuan hebreos maj tapaleuikan maj mochiua itanejnekilis Dios. Miak taman tein poui itech itanejnekilis momelauayaj itech iTajtol Dios. Itech nejin tajkuilol, Pablo ininka tajtoj israelitas akin Dios kinmakixtij Egipto. Yejuan kichiayaj kalakiskej itech “se tal kampa meya leche uan nekti”, tein Dios motenkaujtoya kinmakas. Ompa yekmelauj ueliskia moseuiskej (Éx. 3:8; Deut. 12:9, 10).

Yejua nejon katka itanejnekilis Dios. Sayoj ke israelitas amo kinextijkej ke takuaujtamatiaj iuan Jiova uan amo kitakamatkej, yejua ika tel miakej akin ijkuak nemiaj amo kalakkej itech ineseuilis Dios (Núm. 14:30; Jos. 14:6-10). Maski ijkon, Pablo kijtoj: “Totajtsin Dios techtenilijtok ok de ke ma tikselikan ne yolseuilis de Dios” (Heb. 3:16-19; 4:1). Moyekita ke nejon netenkaualis poui itech nochi tein Dios kiixtalijtok kichiuas. Ijkon kemej tokniuan hebreos, tejuan no ueli tikixtajtoltiaj nejon tein Dios kiixtalijtok kichiuas uan titapaleuiskej. Pablo kijtoj tajtolmej tein moajsij itech Génesis 2:2 uan Salmo 95:11, uan ika kiyeknextij ke nejon netenkaualis moajsi itech iTajtol Dios.

Techyolpaktia tikmatiskej ke “Totajtsin Dios techtenilijtok ok de ke ma tikselikan ne yolseuilis”. Titakuaujtamatij ke yekmelauj uelis tikalakiskej itech ineseuilis Dios, kemej kijtoua Biblia. Yejua ika tikchiuaj nochi tein tiuelij. ¿Keniuj? Amo tiktemouaj tiktakamatiskej tanauatil tein kiselij Moisés nion tikchiuaskej tein kuali sayoj porin tiknekij maj Dios techseli, ta titapaleuiaj ika miak pakilis maj mochiua itanejnekilis Dios uan tiksentokaskej tikchiuaskej nejon porin titakuaujtamatij iuan yejuatsin. Tel miakej taltikpakneminij itech nochi taltikpak peuanij momachtiaj Biblia uan ijkon kimatij tein Dios kijtouani ke kiixtalijtok kichiuas. Nejin kinpaleuiani tel miakej maj kipatakan ininamo kuali tachiualisuan, maj kinextikan takuaujtamatilis uan maj moauikan. Nochi nejin kinextia ke “in Tajtoltsin de Dios kipia uelilis uan kitemaka nemilis”. Tein Dios kijtouani itech Biblia ke kiixtalijtok kichiuas techpaleuianiya uan kisentokas techpaleuis.