1, 2. ¿Keyej itaixpantijkauan Jiova kiitaj ke moneki kuali motakentiskej? (Xikonita taixkopin ipeujyan tamachtilis.)

SE PERIÓDICO tein mokixtia ompa Holanda ika tajtoj keniuj takentiyayaj seki taixyekananij itech se taneltokalis keman mochiuak se ininnechikol. Kijtoj ke miakej takentiyayaj kemej yeskia yayaj paxalotij, okachiok porin tel tonaya. Nejin periódico no ininka tajtoj itaixpantijkauan Jiova akin yajkaj se ueyi nechikol, uan kijtoj ke yejuan amo ijkon motakentiayaj. Kijtoj ke okichpipil uan takamej kiuikayaj corbata uan saco. No kijtoj ke siuapipil uan siuamej kiuikayaj kueyit tein axkan mokuij, sayoj ke nion tel ueyak nion tel tokotstik. Miakpa, itaixpantijkauan Jiova kinueyitaliaj porin kuali motakentiaj. Tatitanil Pablo kijtoj ke itatojtokakauan Cristo moneki motakentiskej “ika taixejekolis”, porin yejua nejon tein mochia maj kichiuakan itekitikauan Dios (1 Tim. 2:9, 10). Maski Pablo kinyolmajxitijtoya siuamej, nejin no moneki kitakamatiskej takamej.

² Tiitekitikauan Dios tikitaj ke moneki kuali timotakentiskej  porin Dios akin tiktekitiliaj no kiita ke motelneki (Gén. 3:21). Jiova yejua ueyi Taixyekankej itech nochi tein onkak. Uan Biblia senkis kinextia ke yejuatsin tanauatia keniuj kineki maj motakentikan itekitikauan. Yejua ika tilmaj tein tikixpejpenaskej amo sayoj moneki tikuelitaskej tejuan, ta okachi moneki maj kiuelita Jiova, toDios uan toTekiuaj.

3. ¿Keniuj techpaleuia tanauatil tein kiselij Moisés maj tikmatikan keniuj moneki timotakentiskej?

³ Itech tanauatil tein kiselij Moisés moajsiaj tanauatilmej tein kinpaleuiaya israelitas maj amo monejnemiltianij kemej akin nemiaj itech altepemej tein kinyoualouayaj kampa tel auilnemiaj. Tanauatil kinextiaya ke Jiova tel amo kiuelita maj se kikui tilmaj tein teouijmaka se kimatis akoni takat uan akoni siuat (xikonixtajtolti Deuteronomio 22:5). Tanauatil tein kiselij Moisés techmachtia ke Jiova amo kiuelita tilmaj tein kichiua maj takamej moitakan kemej siuamej, maj siuamej moitakan kemej takamej, nion tein kichiua maj ouij se kimati akonimej takamej uan akonimej siuamej.

4. ¿Toni uelis kinpaleuis tokniuan maj kuali kiixpejpenakan keniuj motakentiskej?

⁴ Tayolmajxitilismej tein moajsij itech Biblia uelis techpaleuiskej maj kuali tikixpejpenakan keniuj timotakentiskej. Nejin tayolmajxitilismej moneki tiktakamatiskej maski kampa yeski tinemiskej, maski tel tonas oso taseseyas. Amo moneki maj senkis ixyeto toni tilmaj uelis timotaliliskej uan toni amo. Sayoj moneki tiktakamatiskej tayolmajxitilismej tein moajsij itech Biblia, tein techkaua maj timotalilikan tein tikuelitaj. Maj tikitakan seki tayolmajxitilis tein uelis techpaleuis maj tikmatikan toni kinemilia Dios keman tikixpejpenaskej keniuj timotakentiskej (Rom. 12:1, 2).

5, 6. ¿Keniuj moneki kiitaskej totaken oksekin?

⁵ Jiova kichiuak maj tatitanil Pablo kijkuilouani nejin tayolmajxitilis tein motelneki tein moajsi itech 2 Corintios 6:4 (xikonixtajtolti). Kemej timotakentiaj kinextia keniuj timonejnemiltiaj uan kichiua maj oksekin kuali techitakan oso amo (1 Sam. 16:7). Kemej tiitekitikauan Dios, moneki amo timotaliliskej teisa sayoj porin ika kuali timomachiliaj oso porin tikuelitaj. Tayolmajxitilismej tein moajsij itech Biblia moneki techpaleuiskej maj amo tikixpejpenakan tilmaj tein kopitstik oso tein kichiua maj moita tonakayo. Amo akin moneki mopinaujmatis nion maj okseko tachia keman kiitas keniuj titakentokej.

⁶ Komo timotaliliaj tilmaj tein kuali  moita, tichipaujkej uan kuali tichijchiujtiyouij, taltikpakneminij xa okachi kipoujkaitaskej nechikol kampa tipouij uan no techpoujkaitaskej tejuan kemej tiitekitikauan Jiova. Hasta xa kinekiskej okachi kiixmatiskej Dios akin tikueyichiuaj uan tein tamachtia Biblia.

7, 8. ¿Kemanian motelneki maj kuali timotakentikan?

⁷ Moneki timotakentiskej kemej tikueyitaliskej Jiova uan tikualnextiskej tamachtilis tein tikteixmatiltiaj. Ijkon tiknextiskej ke tikpoujkaitaj toDios akin yektik, tokniuan uan akin tikinnojnotsaj (Rom. 13:8-10). Motelneki maj kuali timotakentikan, okachiok keman tiyouij nechikolmej oso titanojnotsatij. Tilmaj tein timotaliliskej moneki kinextis ke tikueyichiuaj Dios (1 Tim. 2:10). Melauak ke seki tilmaj kinamiki maj timotalilikan kansaika, sayoj ke xa amo kinamiki maj tikuikan okseko. Yejua ika, kampa yeski tinemiskej, tiitaixpantijkauan Jiova moneki timotakentiskej kemej amo kinkuejmolos oksekin.

⁸ (Xikonixtajtolti 1 Corintios 10:31.) Keman tiyouij uejueyi nechikolmej, totilmaj moneki kuali moitas.  Moneki amo timotaliliskej tilmaj tein amo kuali moita tein kikuij miakej akin amo kitekitiliaj Jiova. Achto ke tiyaskej ueyi nechikol uan satepan ke tamis, keman tiajsiskej kampa timokauatij uan keman tikisaskej moneki maj totilmaj amo kinexti ke sayoj tipaxalotij oso ke amo timoyekchijchiuaj. Ijkon, amo timopinaujmatiskej tikijtoskej ke tiitaixpantijkauan Jiova uan uelis titanojnotsaskej keman yeski.

9, 10. ¿Keyej moneki tikelnamikiskej tein kijtoua Filipenses 2:4 keman tikixpejpenaj keniuj timotakentiskej?

⁹ (Xikonixtajtolti Filipenses 2:4.) ¿Keyej moneki tiknemiliskej keniuj tokniuan kiitaskej tilmaj tein timotaliliaj? Se taman yejua ke itekitikauan Dios mochikauaj kitakamatiskej nejin tayolmajxitilis: “Xiktajtamikan nijinkes tataman chiualisme: Ma amo xiauilnentinemikan iuan oksekin siuame oso taka ten amo namouan pouij keme namikuani. Uan no amo xitanemilikan ika tamachilisme ten kualkui tajtakol” (Col. 3:2, 5). Achto ke mochiuaskiaj itaixpantijkauan Jiova, seki tokniuan auilnemiaj uan xa mochikaujtokejok moijkuaniliskej amo kuali tanejnekilismej. Komo amo kuali tikixpejpenaj tein timotaliliaj, nejon uelis kichiuas maj kinouijmaka kitakamatiskej tein Biblia tayolmajxitia uan maj moijkuanilikan nejon amo kuali tanejnekilis (1 Cor. 6:9-11). ¿Melauj ke amo tiknekij maj pano nejon?

¹⁰ Keman tiyetokej iniuan tokniuan, tiyetokej iniuan taltikpakneminij akin chipaujkanemij, amo iniuan akin kitemouaj auilnemiskej. Yejua ika, moneki kuali timotakentiskej keman tiyetoskej itech Kali kampa tiMosentiliaj uan keman timoixpetaniaj iniuan tokniuan. Melauak ke ueli tikixpejpenaj toni tilmaj timotaliliskej. Sayoj ke no moneki tikixpejpenaskej tilmaj tein kinpaleuis oksekin maj tanemilikan, maj tajtokan uan maj kichiuakan tein Dios kiita ke chipauak (1 Ped. 1:15, 16). “Naken tetasojtatinemi, yejua ne amo kinpinautia [oksekin] ika nitajtoluan uan amo no kinemilijtinemi sayo ten niaxka.” (1 Cor. 13:4, 5.)

11, 12. ¿Keniuj techpaleuia Eclesiastés 3:1, 17 maj kuali titaixejekokan?

¹¹ Keman tikixpejpenaj keniuj timotakentiskej, tiitekitikauan Dios tikmatij ke “nochi ixyetok tonal keman mochiuas teisa” (Ecl. 3:1, 17). Amo sayoj se taman tilmaj uelis timotaliliskej komo timoajsij kampa tel tona oso taseseya oso tikchiujtoskej okseki taman. Sayoj ke itanauatiluan Jiova amo keman mopataj (Mal. 3:6).

¹² Itech altepemej kampa tel tona uelis teouijmakas se kiajsis tilmaj tein kuali moita. Tokniuan takamej uan siuamej kitasojkamatij maj amo timotalilikan tilmaj tein tel kopitstik oso tein tel kakapaxtik tein kichiua maj moita tonakayo (Job 31:1). Hasta komo  timoakalakitij kansaika, moneki timotaliliskej tilmaj tein kuali tepiki (Prov. 11:2, 20). Miakej akin amo kitekitiliaj Jiova motaliliaj tilmaj tein kitelnextia ininnakayo. Sayoj ke tejuan moneki tikyekitaskej maj totilmaj kiueyitali Jiova, Dios akin yektik.

13. ¿Keyej moneki tikelnamikiskej tayolmajxitilis tein moajsi itech 1 Corintios 10:32, 33 keman tikixpejpenaj keniuj timotakentiskej?

¹³ Moajsi okse tayolmajxitilis tein motelneki tein moneki tiktakamatiskej keman tikixpejpenaj tilmaj tein timotaliliskej. Moneki tikyekitaskej maj amo tikuejmolokan inintanemilil oksekin (xikonixtajtolti 1 Corintios 10:32, 33). Moneki amo timotaliliskej tilmaj tein uelis kinkuejmolos tokniuan takamej uan siuamej, oso akin amo kitekitiliaj Jiova. Tatitanil Pablo kijkuiloj: “Cada senme de tejuan ma tikinpaleuijtiyakan ne tokniuan taneltokani ika nijin kuali tanextililis ten yekin namechilij para ijkon kachi ok yejuan uelis momajxitijtiyaske de nintakuautamatilis”. Uan satepan kijtoj keyej: “Porin kuali tikmatij ke in Cristo amo moyolpaktijtinemik de yejua san” (Rom. 15:2, 3). Jesús kiitaya ke kichiuas itanejnekilis Dios uan kinpaleuis oksekin okachi tayekantoya ke tein yejua kiuelitaya. Tejuan no ijkon moneki titanemiliskej. Yejua ika, amo keman timotaliliskej tilmaj tein tikuelitaskej tejuan sayoj ke uelis kichiuas maj sekin amo kikakikan tamachtilis tein tikteixmatiltiaj.

14. ¿Keniuj tetatmej uelis kinmachtiskej ininkoneuan maj kipoujkaitakan Dios ika tilmaj tein motaliliaj?

¹⁴ Tetatmej moneki kinmachtiskej ininkoneuan maj kitakamatikan tein Biblia tayolmajxitia. Yejua ika, kitemouaj maj yejuan uan ininkoneuan motakentikan uan mochijchiuakan kemej kiyolpaktiskej Jiova (Prov. 22:6; 27:11). ¿Keniuj tetatmej uelis kinmachtiskej ininkoneuan maj kipoujkaitakan toDios uan itanauatiluan? Keman kinkauiliskej se kuali neskayot uan ika netasojtalis kinnextiliskej keniuj uan kani kiajsiskej tilmaj tein kuali moita. Tetatmej no moneki kinmachtiskej ininkoneuan ke okachi tayekantok maj kiixpejpenakan tilmaj tein kiueyitalis Jiova, Dios akin kiixnextiaj, uan amo sayoj maj kiixpejpenakan tilmaj tein kiuelitaj.

15. ¿Toni uelis techpaleuis maj kuali titaixpejpenakan?

¹⁵ Biblia techpaleuia maj tikixpejpenakan tikchiuaskej tein kiueyitalis Dios. Maski ijkon, itech totaken moita tein tikuelitaj timotaliliskej. Kemej tikuelitaj timochijchiuaskej uan tilmaj tein timokouiliaj uelis yeski taman ke tein kikuij oksekin. Sayoj ke totilmaj nochipa moneki yeski chipauak uan maj amo tel soltik, kemej kinamikis kampa tiyaskej uan maj kuali moita kampa tinemij.

16. ¿Keyej amo nenkaj yeski komo timochikauaj kuali timotakentiskej?

¹⁶ Kemansa semi ouij kisa se kiajsis tilmaj tein kuali moitas uan tein uelis tikuiskej. Miakkan sayoj kinamakaj tilmaj tein yankuixtok kisak. Yejua ika xa okachi tiuejkauaskej uan monekis miakkan tiktemoskej faldas, blusas, vestidos, trajes uan pantalones tein kualtsin moitas uan tein amo kopitstik.  Nejin no moneki tikelnamikiskej komo tejuan timochijchiuiliaj totaken. Sayoj ke amo nenkajtis chikaujkayot tein tikchiuaskej. ¿Keyej? Yekinika, porin tokniuan kiitaskej uan kitasojkamatiskej maj timochikauakan kualtsin timotakentiskej uan kemej kinamikis. Uan ojpatika, porin tikueyitaliskej toTajtsin akin techtasojta. Tikueyitaliskej Jiova okachi techyolpaktis maski semi techouijmakas tikajsiskej tein uelis timotaliliskej.

17. ¿Toni moneki kiitas se tokniuj akin kinemilia mokauilis itentson hasta ikanko?

¹⁷ ¿Kuali yetok maj tokniuan takamej kikauakan maj inintentson moskalti hasta ininkanko? Tanauatil tein kiselij Moisés kinextiaya ke takamej monekia mokauiliskej inintentson hasta ininkanko. Sayoj ke axkan amo timoyekanajok ika nejin tanauatil nion monekiok tikchiuaskej tein kijtoua (Lev. 19:27; 21:5; Gál. 3:24, 25). Itech seki xolalmej uelis kuali kiitaskej uan kipoujkaitaskej akin kikaua maj itentson moskalti hasta ikanko sayoj ke amo tel ueyak, uan nejon xa amo kichiuas maj taltikpakneminij amo kinekikan kikakiskej keman tanojnotsas. Itech nejon xolalmej seki tokniuan tayekananij uan tapaleuianij mokauiliaj inintentson hasta ininkanko. Maski ijkon, itech nejon xolalmej xa seki tokniuan amo mokauiliaj (1 Cor. 8:9, 13; 10:32). Itech okseki xolalmej takamej amo mokauiliaj inintentson hasta ininkanko uan ompa amo kuali moita maj itaixpantijkauan Jiova mokauilikan. Komo ompa se tokniuj kikaua maj itentson moskalti hasta ikanko, uelis amo kiueyitalijtos Dios uan xa amo uelis kiselis se tekit itech nechikol (1 Tim. 3:2, 7; Rom. 15:1-3).

18, 19. ¿Keniuj techpaleuia Miqueas 6:8?

¹⁸ Semi timotasojkamatij maj Jiova amo senkis kiixtali keniuj timotakentiskej uan timochijchiuaskej oso keniuj amo. Yejuatsin techkaua maj tikixpejpenakan tein taixejekol ika inepaleuil Biblia. Yejua ika hasta keman tikixpejpenaskej keniuj timotakentiskej uan timochijchiuaskej, uelis tiknextiskej ke tiknekij tiyeskij tiyolyemankej keman tiktekitiliaj Dios, kemej kijtoua Miqueas 6:8.

¹⁹ Moneki tiyeskij tiyolyemankej uan tikajsikamatiskej ke Jiova chipauak uan yektik, uan ke tein technauatia yejua tein okachi kuali techixyekana. Komo tiknekij tiyeskij tiyolyemankej, nochipa tiktakamatiskej itanauatiluan. Uan no, komo tiyolyemankej tikpoujkaitaskej tein kimachiliaj uan kinemiliaj oksekin.

20. ¿Toni ika moneki tapaleuis kemej timotakentiaj uan timochijchiuaj?

²⁰ Ika tilmaj tein timotaliliaj moneki senkis tiknextiskej ke tiitekitikauan Jiova. Dios kitalia itanauatiluan, uan tejuan tiktakamatij ika pakilis. Semi kuali tein kichiuaj tokniuan takamej uan siuamej akin kuali mochijchiuaj uan kuali monejnemiltiaj. Yejuan tapaleuiaj maj taltikpakneminij akin kipiaj kuali ininyolo kiselikan itamachtilis Biblia tein temakixtia uan kiueyitaliaj uan kiyolpaktiaj Jiova. Komo kuali tikixpejpenaj keniuj timotakentiskej, tiksentokaskej tikueyitaliskej Dios, akin motakentia “ika ueyiyot uan kualtsinyot” (Sal. 104:1, 2).