1. ¿Toni ika tajtoj Jesús iniuan imomachtijkauan youak achto ke kimiktiskiaj?

KEMAN Jesús moajsia iniuan imomachtijkauan youak achto ke kimiktiskiaj, ika tajtoj netasojtalis panoua treinta. Kiniluij ke monekia motasojtaskej se uan okse (Juan 15:12, 17). Kemej nejon netasojtalis motelitaskia, kinixnextiskia kemej yekmelauj itatojtokakauan (Juan 13:34, 35). Netasojtalis tein Jesús ika tajtoj amo sayoj se taman tein se kimachilia, ta se kualneskayot tein kipia chikaualis uan teolinia maj se kinpaleui oksekin maski amo teyi se kiselis. Yejua kijtoj: “Tetasojtalis ten kachi ueyi yejua nijin: Moneki ma se kitemaka inemilis para ijkon kinpaleuis oksekin itasojikniuan. Uan namejuan nanmochiutinemij nannotasojikniuan, komo namejuan nankitakamatijtinemij nochi ten namechnauatilij” (Juan 15:13, 14).

2. 1) ¿Toni kinixnextia itekitikauan Dios axkan? 2) ¿Toni netajtanilmej tiknankiliskej itech nejin tamachtilis?

² Itekitikauan Dios kinixnextia yekmelauj netasojtalis, kinpaleuiaj oksekin maski amo kintaxtauiaj uan kuali mouikaj (1 Juan 3:10, 11). Timochikauaj ijkon timotasojtaskej maski tikayomej itech okse altepet oso xolal, titajtouaj okse tajtol  oso tataman kemej techiskaltijkej. Sayoj ke xa timotajtaniskej: “¿Keyej motelneki axkan netasojtalis? ¿Keniuj techyolchikauaj Jiova uan Jesús? Uan ¿keniuj uelis tikchiuaskej kemej Jesús uan tiknextiskej netasojtalis tein teyolchikaua?” (1 Cor. 8:1).

3. ¿Keniuj kinijtakoua taltikpakneminij nejin tonalmej tein semi ouijkej?

³ Kemej nejin tonalmej semi ouijkej, tikpanouaj miak “kuejmolmej uan tayokol” (Sal. 90:10; 2 Tim. 3:1-5). Miakej tel tajyouijtokej uan yejua ika amo kinekijok yoltoskej. Sejse xiuit, panoua 800,000 taltikpakneminij momiktiaj, tein kijtosneki ke itech 40 segundos momiktia se. Tetayokoltij tikijtoskej ke hasta seki tokniuan ijkon momachilianij uan momiktianij.

4. ¿Akonimej akin ininka tajtoua Biblia kijtojkej ke amo kinekiajok yoltoskej?

⁴ Ne uejkauj, seki itekitikauan Dios tel tayokoyakej uan hasta kinekiaj momikiliskej. Kemej neskayot, kemej Job semi tajyouijtoya kijtoj ke kitauelitaya inemilis uan hasta kijtoj ke kinekia mikis (Job 7:16; 14:13). Kemej amo panok tein Jonás kichiaya, tel amo kuali momachilij uan kijtoj: “Axkan, Jiova, nimitstataujtia xinechkuili nonemilis, porin okachi kuali maj nimiki uan amo maj niyolto” (Jon. 4:3). Uan se tonal, kemej tanauatijkej Elías tel amo kuali momachiliaya kiluij Dios: “¡Hasta nikanya! Axkan, Jiova, xinechkuili nonemilis” (1 Rey. 19:4). Sayoj ke, Jiova kintasojtaya nejin itekitikauan tatakamatinij uan kinekia maj yoltonij. Yejuatsin amo kiniluij ke amo kuali tein kimachiliayaj, ta kinpaleuij maj kinekinij kisentokaskej yoltoskej uan maj kisentokanij kitekitilianij.

5. ¿Keyej tokniuan moneki kiitaskej ke tikintasojtaj?

⁵ Maski miakej tokniuan amo mosenkauaj, miakej kipanouaj uejueyi ouijkayomej uan moneki maj tikintasojtakan uan maj tikinyolseuikan. Sekin kintajyouiltiaj uan kinkejkelouaj. Oksekin kinijijtouaj kampa tekitij oso semi sioujtokej porin moneki tekitiskej okachi horas oso semi kinkuasioujtia inintekiuj. Uan oksekin kipanouaj kuejmolmej iniuan ininchankauan, xa porin ininnamik akin amo itaixpantijkauj Jiova nochipa kinijijtoua. Nejin uan okseki kuejmolmej kichiua maj miakej tokniuan kimachilikan ke amo kipiajok chikaualis uan maj kinemilikan ke amo teyi chiuanimej. ¿Toni uelis kinpaleuis?

6. ¿Keniuj kinyolchikaua Jiova itekitikauan?

⁶ Jiova kinyekmatiltia itekitikauan ke kintasojta uan ke kisentokas kintasojtas nochipaya. Israelitas xa semi kinyolchikauak keman Jiova kiniluij: “Nimitspatiuitak, nimitspoujkaitak, uan nimitstasojtak”. No kiniluij: “Amo ximoui, porin nejua niyetok mouan” (Is. 43:4, 5). Tejuatsin uelis tikonyekmatis ke Dios mitsontasojta uan semi mitsonpatiuita. * Jiova motenkaua iniuan itekitikauan: “Yejuatsin kipia chikaualis uan temakixtis. Motelyolpaktis motech ika ueyi yolpakilis” (Sof. 3:16, 17).

7. ¿Keniuj inetasojtalis Jiova tamati kemej netasojtalis tein se temomaj kipialia ikonetsin? (Xikonita taixkopin ipeujyan tamachtilis.)

⁷ Jiova motenkaua kinyolchikauas uan kinyolseuis itekitikauan itech tein yeski kuejmol tein kipiaskej. Itech  amatajkuilol Isaías, yejuatsin kijtoj: “Nanchichiskej uan namechnapalojtiyas, uan namechyekpias ika netasojtalis itech ikesuan. Kemej se temomaj kiyolseuia iokichpil, ijkon niksentokas namechyolseuis” (Is. 66:12, 13). Maj tiknemilikan keniuj momachilia se konetsin keman imomaj kinapaloua oso iuan mauiltia. Jiova ijkon kineskayotia ueyi netasojtalis tein kinpialia itekitikauan. Maj nochipa tikelnamikikan ke yejuatsin semi techpatiuita (Jer. 31:3).

8, 9. ¿Keniuj techyolchikaua inetasojtalis Jesús?

⁸ Moajsi okse taman tein kinextia ke Jiova techtasojta. Juan 3:16 kijtoua: “Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin [...] para ma nochi ne ten iuantsin takuautamatiske, yejuan nojonkes ma amo ixpoliuikan. Ta, ma kipiakan ne yek nemilis nachipa”. Uan Jesús kinextij ke semi techtasojta keman toka momikilij. ITajtol Dios kijtoua ke “in tajyouilis nion no in ouijkayot” uelis “techtsinkixtis itech ne itetasojtalistsin de Cristo” (Rom. 8:35, 38, 39).

⁹ Kemansa tikpanouaj kuejmolmej tein techsioujtiaj, kichiuaj maj tiyolkuetauikan oso maj amo techyolpaktiok tiktekitiliskej Jiova. Sayoj ke komo tikelnamikij ke Cristo semi techtasojta uelis techpaleuis maj titaxikokan (xikonixtajtolti 2 Corintios 5:14, 15). Nejin netasojtalis techolinia maj tiknekikan tiksentokaskej tiyoltoskej uan tiktekitilijtoskej Jiova. No techpaleuis maj amo timosenkauakan hasta keman mochiuas se tetsauit, techtajyouiltiskej, amo panos tein tikchiayaj oso semi timotekipachojtoskej.

10, 11. ¿Akoni moneki kinyolseuis akin yolkuetaujtokej? Xikonmelaua.

¹⁰ Jiova no techyolchikaua ika netasojtalis inintechkopa tokniuan itech nechikol. Keman tikintasojtaj tokniuan, tiknextiaj ke tiktasojtaj Dios. Timochikauaj tikinpaleuiskej maj kiitakan ke Jiova kintelpatiuita uan kintasojta (1 Juan 4:19-21). Tatitanil Pablo kijtoj: “Ximoyolmajxitikan uan ximoyolchikauakan se uan okse [...] ijkon keme nankichiutokke ya” (1 Tes. 5:11). Kemaj,  amo sayoj tayekananij, ta tinochin uelis tikinyolseuiskej uan tikinyolchikauaskej tokniuan ijkon kemej kichiuaj Jiova uan Jesús (xikonixtajtolti Romanos 15:1, 2).

¹¹ Seki tokniuan akin moteltayokoltiaj oso moteltekipachouaj xa monekis maj kinpaleui se tapajtijkej oso maj tayitokan pajti (Luc. 5:31). Tayekananij uan okseki tokniuan kimatij ke yejuan amo tapajtianij. Sayoj ke, kimatij ke motelneki kitakamatiskej nejin tanauatil: “Xikinyolchikauakan nekes ten yolkuetautinemij [...]. Uan xikinpaleuijtiyakan nekes ten amo kipiaj ueyi takuautamatilis. Uan no xikinijyouilijtiyakan nochi in ouijkayot ten ne tokniuan kichiuaj” (1 Tes. 5:14). Moneki maj tinochin tikintasojtakan uan maj tikinajsikamatikan akin yolkuetaujtokej uan maj amo tiyolijsiuikan iniuan. No moneki maj tikinyolseuikan ika netasojtalis. Maj timotajtanikan: “¿Nimochikaua nikinyolchikauas oksekin? ¿Keniuj uelis okachi kuali nikinpaleuis tokniuan?”.

12. Xikonijto keniuj kipaleuij se tokniuj siuat ininnetasojtalis tokniuan.

¹² ¿Keniuj uelis kinpaleuis akin tel tayokoyaj komo tikintasojtaj? Se tokniuj siuat kayot Europa kijtoua: “Kemansa, niknemilia nimomiktis. Sayoj ke nikinpia akin nechpaleuiaj. Nonechikol nechmakixtiani. Tokniuan nochipa nechyolchikauaj uan nechtasojtaj. Amo nochin kimatij ke nikpia kokolis tein kichiua maj niteltayokoya, sayoj ke nochin nochipa motemakaj nechpaleuiskej. Seki namikuanij nechyekpiaj kemej yeskiaj notatuan. Yejuan nochipa nechpaleuiaj yeski tonayan oso youak”. Melauak ke amo nochin uelis ijkon tapaleuiskej. Sayoj ke onkak miak taman kemej tinochin uelis tikinpaleuiskej tokniuan. *

13. ¿Keniuj uelis tikinyolchikauaskej tokniuan?

¹³ Maj kuali titekakikan (Sant. 1:19, TNM). Tiknextiaj ke tiktasojtaj aksa keman tikakij uan timochikauaj tiknemiliskej keniuj timomachiliskiaj komo tejuan ijkon timoajsiskiaj. Ika nejmachkayot maj tikchiuilikan netajtanilmej tein techpaleuiskej maj okachi kuali tikajsikamatikan. Toixko moneki kinextis ke yekmelauj ika timotekipachouaj. Komo tokniuj kineki techtapouis nochi tein kipanoua, maj tikakikan ika nejmachkayot uan maj amo tiktakotonaltikan. Ijkon xa okachi kuali tikajsikamatiskej keniuj momachilia. Uan no, yejua okachi touan takuaujtamatis uan okachi kinekis kikakis tein tikiluiskej. Keman tiknextiaj ke yekmelauj ininka timotekipachouaj oksekin, semi tikinyolseuiaj.

14. ¿Keyej moneki amo tiknemiliskej tein amo kuali?

¹⁴ Maj amo tiknemilikan tein amo kuali. Komo aksa akin tel tayokoxtok kimachilia ke amo tikyekitaj, okachi tayokoyas. Uan maski yekmelauj tiknekiskej tikpaleuiskej, okachi ouij techkisas tikyolchikauaskej. Komo tiknemiliaj tein amo kuali tiknextiskej ika tein tikijtouaj. Biblia kijtoua: “Tajtol tein amo se kinemilia tamati kemej ijkuak tetsoponiaj ika se espada, sayoj ke inintajtoluan tamatinij tepajtia” (Prov. 12:18). Komo amo tiknemiliaj tein tikijtouaj uelis  tikyolxokoliskej aksa maski amo tiknekij. Uelis tikyolchikauaskej aksa komo senkis tiktemouaj tikajsikamatiskej tein kipanotok (Mat. 7:12).

15. ¿Ika toni nepaleuil tein kitelpia ipatiuj uelis tikinyolseuiskej oksekin?

¹⁵ Maj tikuikan iTajtol Dios (xikonixtajtolti Romanos 15:4, 5). Biblia ualeua imako Dios akin techpaleuia maj titaxikokan uan techyolchikaua, yejua ika amo tikmoujkaitaj maj ompa tikajsikan tajtolmej tein teyolseuiaj. BIBLIOTECA ITECH TEPOS Watchtower uan Nepaleuil tein ika momachtiaj itaixpantijkauan Jiova techpaleuiskej maj kuali tiktekitiltikan Biblia. Ompa tikajsij tajkuilolmej uan amaixmej tein ika uelis tikinyolseuiskej tokniuan.

16. ¿Toni kualneskayomej techpaleuiskej maj tikyolchikauakan aksa akin tel tayokoxtok?

¹⁶ Maj tikualtakamej uan maj titetasojtakan. Jiova, “Totajtsin Dios nachipa techyoliknelijtinemi uan [...] techyolseuijtinemi” uan “techyoliknelia” akin tiktekitiliaj (xikonixtajtolti 2 Corintios 1:3-6; Luc. 1:78; Rom. 15:13). Pablo kuali kinextij nejin kualneskayomej porin kichiuak kemej Jiova. Yejua kijkuiloj: “Timochiuke tiyolyemanke namouan ijkon keme se tenan ten kinyektasojpia ipiluan. Uan tejuan semi tamechyoltasojtayaj. Ika ya nojon tiknekiaj tamechmaktiske amo sayo in Tajtoltsin de Dios ten kualkui ne makixtilis [...], no tiknekiaj tamechmaktiliske tonemilis [...] porin namejuan nanmochiuke semi nantotasojikniuan” (1 Tes. 2:7, 8). Komo no titetasojtaj kemej Dios, uelis tikyolseuiskej se tokniuj akin kitajtanij Dios maj kipaleui.

17. ¿Keniuj moneki tikinitaskej tokniuan uan ijkon uelis tikinyolchikauaskej?

¹⁷ Maj amo tikchiakan maj tokniuan amo mopolokan. Amo taixejekol maj tikchiakan maj amo mopolokan, porin amo tiyolpakiskej (Ecl. 7:21, 22). Maj tikelnamikikan ke Jiova kimati ke amo nochi ueli tikchiuaj. Komo tikchiuaj kemej yejuatsin, amo tiyolijsiuiskej iniuan oksekin (Efes. 4:2, 32). Maj amo tikinajsikamatiltikan ke amo mochikauaj kuali kitekitiliskej Jiova nion maj tikiniluikan ke amo kichiuaj kemej oksekin. Okachi kuali, maj tikinyolchikauakan uan maj tikiniluikan tein kuali tein kichiujtokej. Nejon kinpaleuis maj kitekitilikan Jiova ika yolpakilis (Gál. 6:4).

18. ¿Keyej tiknekij tikinyolchikauaskej tokniuan ika netasojtalis?

¹⁸ Jiova semi kinpatiuita nochin itekitikauan. Uan Jesús no kinpatiuita (Gál. 2:20). Semi tikintasojtaj tokniuan uan tiknekij tikinyekpiaskej. Yejua ika, “ma tiksentokakan ne ojtsin [...] ten kualkui yolseuilis [...] para ijkon timoyekyolmajxitijtiyoue tech totakuautamatilis” (Rom. 14:19). Tiktelnekij tiyetoskejya itech Xochital, kampa amo teyi kichiuasok maj tiknekikan timosenkauaskej. Amo onkasok kokolis, neteuilis, amo timomikiliskejok porin titajtakouanij, amo akin techtajyouiltisok, amo tikpiaskejok kuejmolmej iniuan tochankauan nion tiyolkuetauiskejok. Keman tamis mil xiuit, taltikpakneminij amo kipiaskejok tajtakol. Jiova kinselis kemej ikoneuan nikan taltikpak akin amo kikauaskej keman mochiuas tayejyekolis tein ika tamis, uan ompa “Totajtsin Dios techyankuikatalikiu nochi tejuan tiikoneuan, uan ijkon tikseliske ne iueyikualtsiyo” (Rom. 8:21). Maj tiksentokakan tiknextijtokan netasojtalis tein teyolchikaua uan maj timosenpaleuikan tikalakiskej itech yankuik taltikpak tein kualtsin yeski.