SEMANAUAK taltikpak, tayekananij semi kipatiuitaj tekit tein kichiuaj itech inechikol Dios. Uan tinochin techyolpaktia tikpiaskej ininnepaleuil. Sayoj ke yankuixtok kiniluijkej tayekananij akin xiuejkejya maj kinmakanij tayekananij akin ayamo xiuejkej seki tekimej tein okachi ouijkej.

Yankuik tanauatil kijtoua ke tokniuan takalpanouanij uan akin tamachtiaj itech se taman tamachtilis kikauaskej nejon tekit keman kiajxitiskej 70 xiujmej. Uan no, tayekananij akin kiajxitiskej 80 xiujmej kinkauiliskej akin ayamo xiuejkej seki tekimej kemej kinixyekanaskej Taixyekananij itech Sucursal oso oloch tayekananij itech nechikol. ¿Keniuj kiitanij nejin tokniuan akin xiuejkejya nejin tein moixtalij? Kinextianij ke amo kikauaj Jiova uan inechikol.

Ken, akin ajsitoyaya cuarenta y nueve xiujmej kinixyekanak seki Taixyekananij itech Sucursal, kielnamiki: “Keman nikmatik tein moixtalij, amo nikixnamikik. Tein melauj, nejon kualkampa nikiluijka Jiova ke monekia se taixyekankej akin amo semi xiuej”. Miakej tokniuan akin xiuejkejya itech nochi taltikpak tanemiliaj kemej Ken. Nochin nejin tayekananij kinyolpaktiaya kinpaleuiskej tokniuan, uan  yejua ika sekin yekinika tepitsin motayokoltijkej.

Esperandio, akin kinixyekanaya oloch tayekananij itech inechikol, kijtoua ke yekinika tepitsin tayokoyak. Sayoj ke no kijtoua ke kipia miak tataman kokolismej, uan ke monekia okachi moyekpias. Yejua kisentoka kitekitilia Jiova ika nochi iyolo uan tokniuan kiitaj kemej se tatiochiualis.

¿Uan tokniuan akin uejkaujya tekititoyaj kemej takalpanouanij? Allan, akin takalpanoj treinta y ocho xiujmej, kijtoua ke semi kimoujkakakik keman kimatiltijkej nejon tanauatil. Sayoj ke kijtoua ke se kinmachtis takamej akin ayamo xiuejkej semi tapaleuia, uan kisentoka kitekitilia Dios ika nochi iyolo.

Russell, akin takalpanoj uan tamachtij itech tataman tamachtilismej tein motemaka itech inechikol Dios cuarenta xiujmej, kijtoua ke yekinika yejua uan inamik motayokoltijkej. Kijtoua: “Semi techyolpaktiaya tikchiuaskej tekit tein tikpiayaj uan tikmachiliayaj ke tiksentokayaj tikpiayaj chikaualis”. Axkan, nejin tokniuan kisentokaj kitekitiltiaj nochi inintaixmatilis itech nechikol kampa tapaleuiaj, uan tokniuan semi yolpakij maj iniuan yetokan.

Tejuan xa amo timomachilianij kemej nejin tokniuan. Maski ijkon, techpaleuis maj tikinajsikamatikan komo tikitaj se taman tein mochiuak ne uejkauj uan moajsi itech 2 Samuel.

Maj tikelnamikikan keman Absalón kiixnamikik ipopaj, tekiuaj David. Yejua monekik kisas Jerusalén uan cholos Mahanaim, itonalkisayampa ueyiat Jordán. David uan takamej akin iuan yetoyaj amo kipiayajok tein ika moixpanoltiskej ompa. ¿Toni panok?

Eyi takamej akin ompakauin nemiaj ika miak pakilis kinuikilijkej tapechmej, takual uan seki taman tein monekia. Semej katka Barzilai (2 Sam. 17:27-29). Keman tamik itaixnamikilis Absalón, David uelik mokepak Jerusalén, uan Barzilai kiuikak hasta ueyiat Jordán. David kiluij maj iuan yani Jerusalén uan kiluij ke kimakaskia tein kikuaskia, maski Barzilai amo kipolouaya porin kipiaya miak tomin (2 Sam. 19:31-33). David xa kipatiuitaya ikualneskayouan uan tayolmajxitilis tein ueliskia kimakas porin xiuejya katka. Yeskia se ueyi tatiochiualis nemis uan tekitis ichan tekiuaj.

Sayoj ke, Barzilai kiajsikamatia ke amo uelia kichiuayaok miak taman, uan kiluij David ke kemej kipiayaya 80 xiujmej amo ueliaok kiixejekouaya “tein kuali uan tein amo kuali” (2 Sam. 19:35). ¿Toni kijtosnekia? Itech nochi inemilis, Barzilai xa kiselijkaya miak tamatilis. Uan xa kisentokaya kitemakaya kuajkuali tayolmajxitilismej, ijkon kemej “tayekananij” akin xiuejkejya miak xiujmej satepan kiyolmajxitijkej Rehoboam (1 Rey. 12:6, 7;  Sal. 92:12-14; Prov. 16:31). Yejua ika, Barzilai xa ika tajtojtoya tein amo uelia kichiuayaok porin xiuejya katka. Hasta kijtoj ke amo kiyekyekouayaok teisa uan amo yektakakiaok (Ecl. 12:4, 5). Yejua ika kiluij David maj kiuikani Jerusalén telpoch Kimham, akin xa katka ikoneuj (2 Sam. 19:36-40).

Tein mopatak tein ika motajtoua ipeujyan nejin tamachtilis kinextia se taman kemej tanemiliaya Barzilai. Itech tein kipanok nejin itekitikauj Dios monekik moitas inemilis uan tein uelia kichiuaya sayoj se taltikpaknenkej. Sayoj ke itech totonaluan moneki tanemiliskej itech tein okachi kinpaleuis miakej tayekananij itech nochi taltikpak.

Nejin tayekananij akin xiuejkejya niman kiajsikamatinij nepaleuil tein kiualkui nejin tein mopatak. Komo kinkauiliaj akin ayamo xiuejkej tekit tein kipiayaj, itech inechikol Dios moajsiskej akin kichiuaskej tekit tein kisentoka moskaltia. Miakpa, nejin tokniuan kinmachtianij akin ayamo xiuejkej, ijkon kemej xa Barzilai kichiuak iuan ikoneuj oso kemej kichiuak tatitanil Pablo iuan Timoteo (1 Cor. 4:17; Filip. 2:20-22). Nejin tokniuan akin ayamo xiuejkej kinextianij ke yejuan “takamej kemej netetayokolilmej” uan ke ueli tel tapaleuiaj itech inechikol Dios (Efes. 4:8-12, TNM; no xikonita Números 11:16, 17, 29).

Itech nochi taltikpak, miakej tokniuan akin kinkauilianij oksekin seki inintekiuj kitemouanij keniuj okachi kitekitiliskej Jiova.

Marco, akin katka takalpanojkej diecinueve xiujmej, kijtoua: “Kemej axkan ninemi, ueli okachi niktemoua nikinpaleuis ininnamik tokniuan siuamej akin pouij itech tonechikol uan amo itaixpantijkauan Jiova”.

Geraldo, akin veintiocho xiujmej katka takalpanojkej, kijtoua: “Nonamik uan nejua tikixtalianij tikchiuaskej yankuik taman, kemej tikinpaleuiskej tanojnotsanij akin amo monechikouajok uan tikintemoskej okachi akin tikinmachtiskej ika Biblia”. Kijtoua ke axkan kitemakatokej kaxtol nemachtilmej uan ke miakej tokniuan akin amo monechikouayajok oksepa yajtokej nechikolmej.

Allan, akin ika titajtojkej yekinika, kijtoua: “Axkan senkis ueli tiktayekanaltiaj tanojnotsalis. Semi techyolpaktia titanojnotsaskej kampa miakej panouaj, itech tanamakaloyamej uan kampa ika tinemij. Omen akin nemij kampa ika tejuan tinemij touan yanij itech Kali kampa tiMosentiliaj”.

¿Tejuatsin semej nejin tokniuan akin kiselijya miak tamatilis uan se yankuik tekit itech inechikol Dios? Komo ijkon, uelis tiontekitis iuan Jiova keman tikonpaleuis akin ayamo xiuejkej ika tamatilis tein tikonseliani. Russell, akin ika titajtojkej achto, kijtoua: “Jiova kinmachtijtok uan kinmakatok tekimej tokniuan akin ayamo xiuejkej akin chikaujkej uan ueli kichiuaj miak taman. Nochin tokniuan semi kinpaleuia yolpakilis tein ika kinmachtiaj uan kinixyekanaj ichkamej” (xikonita kampa kijtoua “ Xikonpaleui telpochmej maj kiixtalikan okachi tapaleuiskej”).

Komo yankuixtok mopatak tekit tein tikonpiaya, xikonpia se kuali tanemilil. Tekit tein tikonchiuani ika nochi moyolo kinpaleuiani miakej, uan uelis tikonsentokas tiontapaleuijtos. Miakej mitsontasojtaj uan kisentokaskej mitsontasojtaskej.

Uan tein okachi moneki, Jiova nochipa kielnamikis nochi tein tikonchiuani. Yejuatsin motenkauak ke “amo keman kelkauatiu de keniu namejuan nanmotekitiltijke para Dios. Uan [...] keniu nankitasojtajtinemij Dios kuak namejuan nankinpaleuijtiualayaj in taneltokani yolchipauke. Uan namejuan nankinpaleuijtiyoue  ok in taneltokani hasta axkan” (tejuan tiktalilijkej cursivas; Heb. 6:10). Nejin tajtolmej techelnamiktiaj ke yejuatsin amo sayoj kielnamiki tein tikchiujkej achto. Kemej semi mitsontasojta, Jiova amo kielkaua tein tikonchiuani uan tein tikonsentoka tikonchiua porin tikonneki tikonyolpaktis.

¿Uan komo amo mopatani tekit tein tikpiaj? Maski ijkon, no uelis techpaleuis nejin. ¿Keyej?

Porin axkan xa tikixmatij semej nejin tokniuan akin xiuejya akin mopatak tekit tein kipiaya uan uelis semi techpaleuis itamatilis. Maj tikiluikan maj techyolmajxiti. Uan no, maj tikitakan keniuj ika tatakamatilis kitekitiltia itamatilis itech tekit tein kipia axkan.

Komo tixiuejkejya uan mopatak tekit tein tikpiayaj oso tejuan akin uelis tiktemoskej ininnepaleuil nejin tokniuan, maj tikelnamikikan ke Jiova kipatiuita inintatakamatilis akin kitekitilianij miak xiujmejya uan ijkon kisentokaj.