1. Xikonmelaua keniuj kinita Jiova akin amo moueyinekij.

JIOVA kintasojta akin amo moueyinekij. Sayoj akin yekmelauj amo moueyinekij uelis yeskij itasojikniuan. Uan “nekes ten moueyimatinemij” Dios sayoj kinuejkaixmati (1 Ped. 5:5). Kemej tinochin tiknekij tikyolpaktiskej Jiova uan maj techtasojta, moneki timochikauaskej amo timoueyinekiskej.

2. ¿Toni tikitatij itech nejin tamachtilis?

² Itech nejin tamachtilis, tiknankilitij eyi netajtanilmej. 1) ¿Toni kijtosneki amo timoueyinekiskej? 2) ¿Keyej moneki amo timoueyinekiskej? 3) ¿Keyej uelis techouijmakas tiknextiskej? Kemej tikitatij, amo sayoj kiyolpaktia Jiova maj amo timoueyinekikan, ta no semi techpaleuia (Prov. 27:11; Is. 48:17).

3. ¿Toni kijtosneki amo se moueyinekis?

³ Amo se moueyinekis kijtosneki amo se kinemilis ke okachi se ueyichiujkej ke oksekin. Biblia kinextia ke akin amo moueyineki kiajsikamati ke Jiova okachi ueyichiujkej uan no ke oksekin okachi kuali kichiuaj teisa (Filip. 2:3, 4).

4, 5. ¿Keyej aksa akin moita ke yolyemanik tein melauj uelis moueyinekis?

⁴ Sekin uelis moitas ke amo moueyinekij. Xa amo semi tajtouaj oso kualtakamej uan tepoujkaitaj porin inintatuan ijkon kinmachtijkej. Sayoj ke tein melauj xa moueyinekij.  Ejkos tonal keman kinextiskej keniuj yekmelauj tamatij (Luc. 6:45).

⁵ Uan moajsij oksekin akin amo kinouijmaka tajtoskej uan kijtouaj tein kinemiliaj, sayoj ke nejon amo kijtosneki ke moueyinekij (Juan 1:46, 47). Sayoj ke, akin ijkon tamatij moneki mochikauaskej amo kinemiliskej ke nochi kimatij kichiuaskej. Maski tataman kemej titamatij, tinochin moneki timochikauaskej amo timoueyinekiskej.

6. Kemej kijtoua 1 Corintios 15:10, ¿toni techmachtia ineskayo tatitanil Pablo?

⁶ Maj tikitakan ineskayo tatitanil Pablo. Jiova kichiuak maj tapaleuiani maj miakkan mochiuanij yankuik nechikolmej. Xa yejua akin okachi miakkan tanojnotsak ke okseki tatitanilmej. Maski ijkon, amo moueyinekik, ta kijtoj: “Kachi amo niueyichiuke keme in oksekin itatitaniluan de Cristo. Uan no hasta amo nechnamiki ma nechpouakan keme itatitanil de Cristo porin nejua nikintajyouiltiaya in taneltokani” (1 Cor. 15:9). Yejua ika kijtoj ke kuali mouikaya iuan Jiova porin yejuatsin kiiknelij uan amo porin kimatia kichiuas miak taman (xikonixtajtolti 1 Corintios 15:10). Pablo techkauilij se kuali neskayot porin keman kintajkuilouilij corintios kinextij ke amo moueyinekia maski ompa sekin kijijtouayaj (2 Cor. 10:10).

7. ¿Keniuj kinextij se tokniuj akin semi kiixmatiaj ke amo moueyinekia?

⁷ Miakej itaixpantijkauan Jiova kinyolchikauani kiixtajtoltiskej tein kipanok tokniuj Karl Klein, akin pouia iniuan Oloch Taojtokaltianij. Tokniuj Klein kinextij ke amo moueyinekia keman kijtoj ke kipiaya kuejmolmej uan ke kiouijmakaya kichiuas seki taman.  Kemej neskayot. Keman yekinika tanojnotsato kajkalpan itech xiuit 1922 semi kiouijmakak, yejua ika kemej ome xiuit amo tanojnotsak. Satepan keman tapaleuijtoya Betel, seki tonalmej kualanik iuan se tokniuj porin kiyolmajxitij. Uan no, kemej semi motekipachouaya kokolispeujka. Sayoj ke no kiyolpaktij kichiuas miak taman itech itekiyo Dios. ¿Melauj ke nejin tokniuj akin semi kiixmatiaj monekik amo moueyinekis uan kijtos tein kiouijmakaya kichiuas? Miakej tokniuan kielnamikij tokniuj Klein uan tein kichiuak. *

8. ¿Keniuj 1 Pedro 5:6 techpaleuia maj tikmatikan ke Jiova kiyolpaktia akin amo moueyineki?

⁸ Okachi timochikauaj amo timoueyinekiskej porin nejon kiyolpaktia Jiova, tatitanil Pedro ika tajtoj nejon (xikonixtajtolti 1 Pedro 5:6). Uan no, itech amatajkuilol “Ven, sé mi seguidor” kijtoua: “Semi amo kuali maj se moueyineki. Dios kiixtopeua akin moueyineki, yejua ika maski ueli kichiua miak taman amo uelis kitekitilis. Sayoj ke, akin amo moueyineki maski amo ueli kichiua miak taman Jiova uelis semi kitekitiltis”. Uan no kijtoua ke toDios “semi kiyolpaktis techtiochiuas komo no tiknextiaj ke amo timoueyinekij”. * Senkis tikmatij ke tein okachi kuali yejua maj se kiyolpakti Jiova (Prov. 23:15).

9. ¿Keyej tikuelitaj tiyetoskej iniuan akin amo moueyinekij?

⁹ Amo sayoj kiyolpaktia Jiova maj amo timoueyinekikan, ta no semi techpaleuia. Komo amo timoueyinekij oksekin kinekiskej yetoskej touan. Uelis tikajsikamatiskej nejon komo tiknemiliaj iniuan akonimej tikuelitaj tiyetoskej (Mat. 7:12). ¿Melauj ke amo tikuelitaj iniuan tiyetoskej akin nochipa kichiuaj tein kinekij uan amo kiuelitaj kichiuaskej tein oksekin kiniluiaj? Sayoj ke, tikuelitaj tiyetoskej iniuan tokniuan akin teajsikamatij, tetasojtaj, teikneliaj uan amo moueyinekij (1 Ped. 3:8). Komo kuali timomachiliaj tiyetoskej iniuan akin amo moueyinekij, taixejekol maj oksekin no kuali momachilikan touan komo amo timoueyinekij.

10. ¿Keniuj amo timoueyinekiskej techpaleuia maj kuali timomachilikan?

 ¹⁰ Amo se moueyinekis no techpaleuia maj kuali timomachilikan. Kemansa tikitaskej oso tikpanoskej seki taman tein tiknemiliskej ke amo kuali yetok. Yejua ika, tekiuaj Salomón kijtoj: “Nikinitani takeualmej youij ika caballo uan ueyichiuanimej metsnejnemij kemej takeualmej” (Ecl. 10:7). Amo nochipa kinueyitaliaj akin uelij kichiuaj miak taman uan kemansa okachi kinueyitaliaj akin amo uelij kichiuaj miak taman. Sayoj ke Salomón kiajsikamatik ke okachi kuali maj amo se kikaua maj nejon teyolkoko (Ecl. 6:9). Komo amo timoueyinekij, okachi amo timoyolkokoskej komo amo mochiua tein tiknekij.

11. ¿Keyej moneki amo timoueyinekiskej keman techyolmajxitiaj?

¹¹ Mojmostaj uelis tiknextiskej ke amo timoueyinekij. Maj tikitakan kemanian. Keman techyolmajxitiaj. Maj tikelnamikikan ke komo aksa mochikaua techyolmajxitis xa porin kemaj timoueyipolouaj. Xa yekinika amo tikseliskej tayolmajxitilis uan amo tikuelitaskej kemej technojnotsa oso hasta tikijijtoskej. Sayoj ke komo amo timoueyinekij timochikauaskej titanemiliskej kemej moneki.

12. Kemej kijtoua Proverbios 27:5, 6, ¿keyej moneki tiktasojkamatiskej maj aksa techyolmajxiti? Xikonijto se neskayot.

¹² Akin amo moueyineki kitasojkamati maj kiyolmajxitikan. Maj tikijtokan ke timoajsij itech Kali kampa tiMosentiliaj uan titajtojtokej iniuan seki tokniuan. Ompa, semej ichtaka techiluia ke tikpiaj tepitsin takual itech totanuan. Tein melauj timopinaujmatij. Sayoj ke timotasojkamatij porin techiluij. Uan tiktasojkamatiskiaj maj aksa achtook techiluiani. No ijkon, monekiskia tiktasojkamatiskej maj se tokniuj moyolchikaua uan maj techyolmajxiti keman moneki. Maj amo tiknemilikan ke techtauelita, ta ke techtasojta kemej se totasojikniuj (xikonixtajtolti Proverbios 27:5, 6; Gál. 4:16).

13. ¿Keniuj tiknextiaj ke amo timoueyinekij keman okseki tokniuan kiseliaj tekimej itech nechikol?

¹³ Keman okseki tokniuan kiseliaj tekimej itech nechikol. Se tayekankej akin itokay Jason kijtoua: “Keman oksekin kiseliaj seki tekimej itech nechikol, kemansa  nimotajtania keyej amo nejua nechmakakej”. ¿No ijkon timomachilianij? Semi kuali maj tiknekikan okachi tiktekitiliskej Jiova (1 Tim. 3:1). Sayoj ke moneki maj timoyekpiakan ika tein tiknemiliaj porin komo amo peuas timoueyinekiskej. Kemej neskayot, se tokniuj takat uelis kinemilis ke sayoj yejua okachi ueli kichiua se tekit. Oso se tokniuj siuat xa kinemilis ke inamik okachi ueli kichiua teisa. Komo amo timoueyinekij amo ijkon titanemiliskej.

14. ¿Toni techmachtia tein kichiuak Moisés keman oksekin kiselijkej tekimej?

¹⁴ Maj tikitakan toni kichiuak Moisés keman oksekin kiselijkej tekimej uan toni techmachtia. Yejua semi kipatiuitaya kiixyekanas xolal Israel. Sayoj ke, keman Jiova kinixtalij oksekin maj kipaleuikan amo kualanik (Núm. 11:24-29). No kinextij ke amo moueyinekia keman kikauak maj oksekin kipaleuianij maj kinmelaua israelitas (Éx. 18:13-24). Nejon tapaleuij maj okachi ijsiujka momelauanij ininkuejmoluan israelitas. Moisés kiitaya ke okachi monekia maj israelitas kuali yetonij uan amo tekit tein kipiaya. ¿Melauj ke se kuali neskayot? Maj tikelnamikikan ke Jiova okachi techtekitiltis porin tiyolyemankej uan amo porin tiuelij tikchiuaj miak taman. Kemej kijtoua 1 Pedro 5:5, “Dios kinpaleuijtinemis [...] ten moyolyemankamatinemij”.

15. ¿Toni kinpanouani miakej tokniuan?

¹⁵ Keman mopata seki taman. Yankuixtok, miakej tokniuan akin miak xiujmejya kitekitilianij Jiova monekini kichiuaskej okse taman tekit. Kemej neskayot, itech xiuit 2014 akin takalpanouayaj itech distrito iuan ininnamik kinmakakej okse taman tekit. Uan no, itech nejon  xiuit moixtalij ke tokniuan takalpanouanij keman kiajxitiskej 70 xiujmej amo takalpanoskejok. Uan tokniuan takamej akin kipiaj 80 xiujmej oso okachi amo uelisok kinixyekanaskej oloch tayekananij itech nechikol. Uan seki xiujmej achto, miakej betelitas kintitankej maj tapaleuitij kemej precursores. Oksekin amo uelijok kitekitiliaj Dios nochi tonalmej porin kokolispeujkej, monekik kinpaleuiskej ininchankauan oso okseki taman.

16. ¿Keniuj seki tokniuan kinextianij ke amo moueyinekij?

¹⁶ Nejin tokniuan kinouijmakak kikauaskej tekit tein kichiuayaj. Kikauaskej semi kintayokoltij. Miakej, miak xiujmejya kitekitilijtoyaj Dios nochi tonalmej. Sayoj ke satepan momatkej. ¿Keyej? Porin kitasojtaj Jiova. Amo motenkaujkej ke kitekitiliskiaj Dios sayoj komo kipiayaj tekit tein kinekiaj (Col. 3:23). Yolpakij kisentokaskej kitekitiliskej Jiova itech tein yeski tekit. Nejin tokniuan ‘kipanoltiliaj Dios nochi ninyolkuejmololis’ porin kimatij ke yejuatsin ininka motekipachoua (1 Ped. 5:6, 7).

17. ¿Keyej tiktasojkamatij maj iTajtol Dios technauati maj amo timoueyinekikan?

¹⁷ Semi tiktasojkamatij maj iTajtol Dios technauati maj amo timoueyinekikan. Nejon techpaleuia tejuan uan no oksekin. Amo timoueyinekiskej techpaleuia maj kuali timomachilikan uan tein okachi kuali, techpaleuia maj okachi timotokikan iuan toTajtsin Dios. Semi tiyolpakij tikmatiskej ke maski Jiova okachi Ueyichiujkej, kintasojta uan kinpatiuita itekitikauan akin amo moueyinekij (Is. 57:15).