TAMACHTILIS 37
Maj timokauakan maj Jiova techixyekana
“Kachi ok moneki ma timotemaktijtiyakan imako Totajtsin Dios.” (HEB. 12:9)
NEKUIKATIL 9 ¡Jiova toTekiuaj!
TEIN MOITAS *
1. ¿Keyej moneki timokauaskej maj Jiova techixyekana?
MONEKI timokauaskej maj Jiova techixyekana *. Kemej yejuatsin techchijchiuak, kinamiki techiluis toni moneki tikchiuaskej (Apoc. 4:11). Sayoj ke no moneki tiktakamatiskej porin yejuatsin okachi kuali taixyekana. Miakej kipianij tanauatil uan kinixyekananij oksekin. Sayoj ke, Jiova yejua taixyekankej akin okachi tamatkej, tetasojtakej, teajsikamati uan akin okachi teiknelia (Éx. 34:6; Rom. 16:27; 1 Juan 4:8).
2. ¿Keyej moneki timokauaskej maj Jiova techixyekana kemej kijtoua Hebreos 12:9-11?
2 Jiova kineki maj tiktakamatikan amo porin tikmouiliaj, ta porin tiktasojtaj uan tikitaj kemej toTajtsin akin techtasojta. Keman Pablo kintajkuilouilij hebreos, kijtoj ke moneki timokauaskej maj toTajtsin techixyekana porin kemej yejuatsin techmachtia techpaleuia (xikonixtajtolti Hebreos 12:9-11).
3. 1) ¿Keniuj timokauaj maj Jiova techixyekana? 2) ¿Katiyejua netajtanilmej tiknankilitij?
3 Timokauaj maj Jiova techixyekana keman timochikauaj tiktakamatiskej itech nochi uan timochikauaj amo totech titakuaujtamatiskej (Prov. 3:5). Komo tikixmatij keniuj tamati Dios, okachi amo ouij timokauaskej maj techixyekana porin itech nochi tein kichiua tikitaj ikualneskayouan (Sal. 145:9). Ijkon kemej okachi tikixmatiskej Jiova, okachi tiktasojtaskej. Uan komo tiktasojtaj, amo moneki techiluis nochi tein moneki tikchiuaskej uan tein amo. Ta timochikauaskej tiktasojtaskej tein kuali uan tiktauelitaskej tein amo kuali, ijkon kemej Jiova kichiua (Sal. 97:10). Sayoj ke, kemansa uelis techouijmakas tiktakamatiskej. ¿Keyej? Uan ¿keniuj uelis tayekananij, tepopauan uan temomauan kitojtokaskej ineskayo taixyekankej Nehemías, tekiuaj David uan María, imomaj Jesús? Itech nejin tamachtilis tiknankilitij nejin netajtanilmej.
KEYEJ KEMANSA OUIJ TIMOKAUASKEJ MAJ JIOVA TECHIXYEKANA
4, 5. Kemej kijtoua Romanos 7:21-23, ¿keyej kemansa ouij timokauaskej maj Jiova techixyekana?
4 Se taman keyej techouijmaka timokauaskej maj Jiova techixyekana yejua porin titajtakouanij. Yejua ika, miakpa amo tiknekij titatakamatiskej. Keman Adán uan Eva kiixnamikkej Dios uan kikuajkej takilot tein kiniluijka maj amo kikuakan, yejuan kiixtalijkej toni kichiuaskiaj (Gén. 3:22). Axkan, miakej amo no mokauaj maj Dios kinixyekana, ta yejuan kiixtaliaj toni kuali uan toni amo.
5 Hasta akin tikixmatij uan tiktasojtaj Jiova, xa techouijmakaok tikchiuaskej tein yejuatsin kineki. Tatitanil Pablo kipanok nejon (xikonixtajtolti Romanos 7:21-23). Ijkon kemej yejua, tiknekij tikchiuaskej tein Dios kiita ke kuali. Sayoj ke moneki nochipa timochikaujtoskej porin titajtakouanij.
6, 7. ¿Toni no uelis kichiuas maj techouijmaka timokauaskej maj Jiova techixyekana? Xikonijto se neskayot.
6 No uelis techouijmakas timokauaskej maj Jiova techixyekana porin xa techmauani tein momattokej kichiuaskej uan kemej tanemiliaj kampa timoskaltijkej. Miakej techiluiskej miak taman tein amo mouika ika tein Dios tamachtia, yejua ika moneki tiksentokaskej timochikauaskej amo titanemiliskej kemej yejuan. Maj tikitakan se neskayot.
7 Miakkan, kinchikaujkauiaj telpochmej uan ichpomej maj kitemokan kitaniskej miak tomin. Yejua nejon tein kipanok se tokniuj akin itokay Mary. * Achto ke kiixmatiskia Jiova, momachtij itech okachi ueyi kaltamachtiloyan tein moajsi itech ialtepeuj. Ikalyetouanij kichikaujkauijkej maj kitemo se tekit kampa kuali tataniskia uan tein ika kiixmatiskiaj. Uan yejua no kinekia nejon. Sayoj ke keman kiixmatik Jiova uan peuak kitasojta amo kitayekanaltijok nejon. Maski ijkon, kijtoua: “Kemansa, nikajsi se tekit kampa ueliskia niktanis miak tomin sayoj ke amo ueliskiaok niktekitilis Jiova kemej nikchiua. Kemej nechiskaltijkej, nechouijmakaok nikixtopeuas. Moneki niktataujtis Jiova maj nechpaleui maj amo nikseli se tekit tein ueliskia kichiuas maj amo niktayekanalti itekiyo” (Mat. 6:24).
8. ¿Toni tikitatij axkan?
8 Kemej tikitakejya, timokauaskej maj Jiova techixyekana techpaleuia. Sayoj ke no, keman mokauaj maj Jiova kinixyekana akin kipiaj tanauatil kemej tayekananij, tepopauan uan temomauan uelis kinpaleuiskej oksekin. Axkan maj tikitakan ininneskayo sekin akin Biblia ininka tajtoua tein techmachtiskej keniuj tiktekitiltiskej tanauatil tein tikpiaj kemej Jiova kineki.
TEIN KINMACHTIA TAYEKANANIJ INESKAYO NEHEMÍAS
Tayekananij tapaleuiaj maj tayekyeto itech Kali kampa tiMosentiliaj, ijkon kemej Nehemías tapaleuij maj moyekchijchiua tepamit tein kiyoualouaya Jerusalén (xikonita párrafos 9 hasta 11) *
9. ¿Toni ouijkayot kiixnamikik Nehemías?
9 Jiova kiniluiani tayekananij maj kinyekpiakan itekitikauan (1 Ped. 5:2). Tayekananij uelis kiitaskej keniuj Nehemías kiixyekanak ixolal Jiova. Kemej katka taixyekankej ompa Judá, kipiaya ueyi tanauatil (Neh. 1:11; 2:7, 8; 5:14). Maj tikitakan toni ouijkayot kiixnamikik. Kimatik ke judíos kichiujtoyaj tein amo kuali itech templo uan no amo kinpaleuijtoyaj levitas ika tomin kemej ixyetoya itech Tanauatil. Uan no, amo kichiujtoyaj tein ixyetoya maj mochiua itech tonal sábado uan seki takamej monamiktijkaj iniuan siuamej akin amo kiueyichiuayaj Jiova. ¿Toni kichiuak Nehemías? (Neh. 13:4-30.)
10. ¿Toni kichiuak Nehemías keman kiixnamikik ouijkayomej?
10 Maski Nehemías kipiaya tanauatil, amo kinchikaujkauij judíos maj kichiuakan tein yejua kinemiliaya. Ta, kitataujtij Jiova maj kiyekana uan kimachtij xolal itanauatiluan Dios (Neh. 1:4-10; 13:1-3). Uan no, katka yolyemanik uan hasta tekitik iniuan iikniuan keman moyekchijchiuak tepamit tein kiyoualouaya Jerusalén (Neh. 4:15).
11. Kemej kijtoua 1 Tesalonicenses 2:7, 8, ¿keniuj tayekananij moneki taixyekanaskej itech nechikol?
11 Axkan tayekananij xa amo kiixnamikij ouijkayomej kemej tein kiixnamikik Nehemías. Sayoj ke, uelis kichiuaskej kemej yejua. Kemej neskayot, tekitij chikauak uan ijkon kinpaleuiaj tokniuan. Uan amo moueyinekij porin kipiaj tanauatil, ta tapaleuiaj ika netasojtalis itech nechikol (xikonixtajtolti 1 Tesalonicenses 2:7, 8). Kemej yolyemankej uan tetasojtaj amo kinchikaujkanojnotsaj oksekin. Andrew, akin miak xiujmejya tapaleuiani kemej tayekankej kijtoua: “Nikitani ke keman se tayekankej kualtakat uan tetasojtakej, tokniuan okachi yolpakij. Nejon tein tayekananij kinextiaj kinolinia tokniuan maj tatakamatikan”. Uan Tony, akin no miak xiujmejya tapaleuiani kemej tayekankej, kijtoua: “Nimochikaua nikchiuas tein kijtoua Filipenses 2:3 uan nikinitas oksekin ke okachi ueyichiuanimej ke nejua. Nejon nechpaleuia maj amo nitanajnauati itech nechikol”.
12. ¿Keyej tayekananij moneki amo moueyinekiskej?
12 Jiova amo moueyineki uan tayekananij no moneki ijkon kichiuaskej. Maski yejuatsin akin okachi ueyichiujkej, moixpiloua uan kiajokui “akin amo ueli mopaleuia” (Sal. 18:35; 113:6, 7). Tein melauj, kintauelita akin moueyinekij (Prov. 16:5).
13. ¿Keyej tayekananij moneki kuali kinemiliskej tein kijtouaj?
13 Tayekananij akin mokauaj maj Jiova kinixyekana moneki ‘moyeknenepilijmatiskej’ oso kuali kinemiliskej tein kijtouaj. Komo amo kichiuaj, uelis amo kuali kinankiliskej aksa komo amo kinpoujkaita (Gál. 5:14, 15; Sant. 1:26). Andrew, akin achto ika titajtojkej, kijtoua: “Kemansa, niknekini amo kuali niknankilis se tokniuj akin nikmachilij ke amo nechpoujkaitak. Sayoj ke nitanemilis itech sekin akin ininka tajtoua Biblia akin kitakamatkej Jiova, nechpaleuiani maj nikita keyej moneki amo nimoueyinekis uan niyeski niyolnejmach”. Tayekananij akin mokauaj maj Jiova kinixyekana tetasojtaj uan kualtakamej keman tajtouaj iniuan tokniuan hasta iniuan okseki tayekananij (Col. 4:6).
TEIN KINMACHTIA TEPOPAUAN INESKAYO TEKIUAJ DAVID
14. ¿Toni kinnauatiani Jiova tepopauan uan toni kichia maj kichiuakan?
14 Jiova kinnauatiani tepopauan maj kinixyekanakan ininkalyetouanij, maj kinmachtikan uan maj kinmelauakan ininkoneuan (1 Cor. 11:3; Efes. 6:4). Sayoj ke moneki kuali kitekitiltiskej inintanauatil porin tanankiliskej iixpan Jiova akin kiixtalij kalyetouanij (Efes. 3:14, 15). Tepopauan kinextiaj ke mokauaj maj Dios kinixyekana keman kitekitiltiaj tanauatil tein kipiaj kemej yejuatsin kiyolpaktia. Kiitaskej ineskayo tekiuaj David uelis kinmachtis miak taman.
Inetataujtiluan se tepopaj monekiskia kinextis ke amo moueyineki (xikonita párrafo 15 uan 16) *
15. ¿Keyej ineskayo tekiuaj David kinmachtia tein kuali akin tepopauan?
15 Jiova amo sayoj kinauatij David maj kinixyekana ikalyetouanij, ta nochi xolal Israel. Kemej katka tekiuaj kipiaya ueyi tanauatil. Sayoj ke amo nochipa kuali kitekitiltij uan kichiuak ueyi tajtakolmej (2 Sam. 11:14, 15). Maski ijkon, kinextij ke kinekia maj Jiova kiixyekana porin mokauak maj kimelaua. Keman motataujtij, kitapouij nochi tein kimachiliaya uan mochikauak kichiuas tein yejuatsin kiyolmajxitij (Sal. 51:1-4). Uan no, amo moueyinekik porin mokauak maj kiyolmajxitianij takamej uan no siuamej (1 Sam. 19:11, 12; 25:32, 33). Ika nochi tein kipanok kiajsikamatik toni monekia kichiuas uan kitayekanaltij kitekitilis Jiova.
16. ¿Toni uelis kinmachtis tepopauan ineskayo tekiuaj David?
16 Maj tikitakan toni uelis namechmachtis akin nantepopauan ineskayo tekiuaj David. Kuali xiktekitiltikan tanauatil tein Jiova namechmakani. Xikijtokan keman nanmopoloskej uan xikchiuakan tein namechyolmajxitiskej ika Biblia. Ijkon, nanmonamik uan nanmokoneuan namechpoujkaitaskej porin amo nanmoueyinekij. Uan no, keman iniuan nanmotataujtiskej xiktapouikan Jiova nochi tein nankimachiliaj. Ijkon nanmokalyetouanij kiitaskej ke nochipa nankitemouaj inepaleuil Jiova. Uan okachi xiktayekanaltikan nankitekitiliskej Dios (Deut. 6:6-9). Nanmokuali neskayot yejua tein okachi uelis kinpaleuis nanmokalyetouanij.
TEIN KINMACHTIA TEMOMAUAN INESKAYO MARÍA
17. ¿Toni tekit kinmakani Jiova akin temomauan?
17 Jiova no kinmakani akin temomauan se tekit tein motelneki uan tanauatil tein ika kinixyekanaskej ininkoneuan (Prov. 6:20). Kemej kinixyekanaskej uelis kinpaleuis itech nochi ininnemilis (Prov. 22:6). Maj tikitakan toni uelis kinmachtis akin temomauan ineskayo María, imomaj Jesús.
18, 19. ¿Toni uelis kinmachtis temomauan ineskayo María?
18 María kuali momachtiaya iTajtol Dios. Semi kipoujkaitaya Jiova uan kuali mouikaya iuan. Kichiuak nochi tein kinauatij maski inemilis senkis mopataskia (Luc. 1:35-38, 46-55).
Keman se temomaj sioujtok oso kualantok, xa moneki okachi mochikauas kinextis ke kintasojta ikalyetouanij (xikonita párrafo 19) *
19 Maj tikitakan toni uelis namechmachtis akin nantemomauan ineskayo María. Yekinika, ximomachtikan Biblia uan ximotataujtikan, ijkon nankisentokaskej kuali nanmouikaskej iuan Jiova. Ojpatika, xikpatakan tein monekis uan ijkon nankiyolpaktiskej. Kemej neskayot, xa nanmotatuan niman kualaniaj uan namechtsatsajtsiliayaj. Yejua ika, xa nankinemiliaj ke ijkon moneki nankiniskaltiskej nanmokoneuan. Uan maski nankimatijya keniuj Jiova kineki xikiniskaltikan, xa namechouijmaka amo nankualaniskej, okachiok keman nansioujtokej oso keman amo namechtakamatij Efes. 4:31). Ijkuak, okachiok moneki ximotataujtikan. Se temomaj akin itokay Lydia kijtoua: “Kemansa, monekini semi nimotataujtis uan ijkon amo niktsatsajtsilis nokoneuj keman amo nechtakamati. Hasta monekini nimotsakuilis keman nitajtojtok uan ichtaka niktataujtis Jiova maj nechpaleui. Nimotataujtis nechpaleuia maj niyolseui” (Sal. 37:5).
(20. ¿Toni kinouijmaka kichiuaskej seki temomauan uan toni uelis kinpaleuis?
20 Uan no seki temomauan kinouijmaka kinnextiliskej ininkoneuan ke kintasojtaj (Tito 2:3, 4). Nejon panoua porin keman katkaj nojnelmej inintatuan amo kinnextilijkej ke kintasojtayaj. Sayoj ke yejuan amo moneki ijkon kichiuaskej. Temomauan akin mokauaj maj Jiova kinixyekana, xa monekis momachtiskej kinnextiliskej ininkoneuan ke kintasojtaj. Xa kinouijmakas kipataskej tein kinemiliaj, tein kimachiliaj uan tein kichiuaj, sayoj ke uelis kichiuaskej. Ijkon, yejuan uan ininkalyetouanij okachi yolpakiskej.
MAJ TIKSENTOKAKAN TIMOKAUAKAN MAJ JIOVA TECHIXYEKANA
21, 22. Kemej kijtoua Isaías 65:13, 14, ¿keniuj techpaleuia timokauaskej maj Jiova techixyekana?
21 Tekiuaj David kimatia ke semi kipaleuiaya mokauas maj Jiova kiixyekana. Kijkuiloj: “Tein Jiova tanauatia melauak, kichiua maj se yolpaki; itanauatil Jiova chipauak, tetachialtia”. Uan no kijtoj: “Nejon kinejmachtiani motekitikauj; se kitakamatis teualkuilia se ueyi taxtauil” (Sal. 19:8, 11). Axkan, ueli tikitaj keniuj nemij akin mokauaj maj Jiova kinixyekana uan akin amo. Akin mokauaj maj Dios kinixyekana ‘yolpakkatsajtsij porin kuali moajsi ininyolo’ (xikonixtajtolti Isaías 65:13, 14).
22 Keman tayekananij, tepopauan uan temomauan mokauaj maj Jiova kinixyekana okachi kuali nemij, ininkalyetouanij okachi yolpakij uan tokniuan itech nechikol okachi kuali mouikaj. Uan tein okachi kuali, kiyolpaktiaj Jiova (Prov. 27:11). ¡Nejon yejua tein okachi techyolpaktia!
NEKUIKATIL 123 Maj tiktakamatikan inechikol Dios
^ párr. 5 Itech nejin tamachtilis tikitatij keyej moneki maj timokauakan maj Jiova techixyekana. No tikitatij keniuj tayekananij, tepopauan uan temomauan akin Jiova kinmakani tanauatil uelis kitojtokaskej ineskayo taixyekankej Nehemías, tekiuaj David uan María, imomaj Jesús.
^ párr. 1 TEIN OKACHI MOMELAUA: Miakej amo kuali kiitaj mokauaskej maj kinixyekanakan porin sayoj kinchikaujkauiaj maj tatakamatikan, sayoj ke tejuan amo ijkon tikitaj porin tikixpejpenanij tiktakamatiskej Dios.
^ párr. 7 Itech nejin tamachtilis mopatakej seki tokaymej.
^ párr. 62 TEIN NESI ITECH TAIXKOPIMEJ: Se tayekankej iuan ikonetsin tapaleuiaj itech Kali kampa tiMosentiliaj, ijkon kemej Nehemías tapaleuij maj moyekchijchiua tepamit tein kiyoualouaya Jerusalén.
^ párr. 64 TEIN NESI ITECH TAIXKOPIMEJ: Se tepopaj motataujtijtok iniuan ikalyetouanij uan kitapouia Jiova nochi tein kimachilia.
^ párr. 66 TEIN NESI ITECH TAIXKOPIMEJ: Se okichpiltsin miak horas mauiltijtoni ika videojuegos uan amo kichiua tein imomaj kinauatia oso itarea. Imomaj maski sioujtok, kimelaua ika netasojtalis.