1, 2. ¿Keniuj tein kijtoua Eclesiastés 11:6 mouika ika tanojnotsalis?

ITECH seki altepemej, miakej kinekij kimatiskej okachi keman kinmatiltiaj tein kichiuas iTekiuajyo Dios. Nejon semi kinyolchikaua. Sayoj ke itech okseki altepemej, taltikpakneminij amo semi kinekij ika tajtoskej Dios oso Biblia. Maski techkakiskej oso amo, Jiova kineki maj tiksentokakan titanojnotsakan hasta keman kijtos ke amo motanojnotsasok.

² Keman ejkos tonal tein Jiova kiixtalij, amo motanojnotsasok uan ejkosya “in tamilis” (Mat. 24:14, 36). Hasta maj ejko nejon tonal, ¿toni techpaleuis maj amo timomaseuikan, kemej kijtoua Eclesiastés 11:6? (Xikonixtajtolti). *

3. ¿Toni tikitaskej itech nejin tamachtilis?

³ Itech tamachtilis tein achto tikitakej, ika titajtojkej naui taman tein techpaleuis maj kuali titanojnotsakan (Mat. 4:19). Itech nejin tamachtilis tikitaskej eyi taman tein techpaleuis maj tiknekikan tiksentokaskej titanojnotsaskej maski tein yeski tikpanoskej. Timomachtiskej keyej moneki maj tiktayekanaltikan tanojnotsalis, maj amo tiyolijsiuikan uan maj chikauak totakuaujtamatilis.

4. ¿Keyej moneki tiktayekanaltiskej tekit tein Jiova techmakak?

⁴ Jesús kijtoj toni panoskia itech itamian tonalmej uan keniuj  yeskiaj taltikpakneminij. No kijtoj ke nejon ueliskia kichiuas maj itatojtokakauan amo kitayekanaltikanok tanojnotsalis. Yejua ika, kiniluij: “Xitachixtokan” (Mat. 24:42). Axkan no onkak seki taman kemej tein onkaya itech itonaluan Noé, tein kichiuak maj taltikpakneminij amo kikakinij tein kinnejmachtij (Mat. 24:37-39; 2 Ped. 2:5). Yejua ika, tiknekij tiktayekanaltiskej tekit tein Jiova techmakak.

5. Kemej kijtoua Hechos 1:6-8, ¿hasta kani motanojnotsaskia?

⁵ Itech nejin tonalmej, moneki tiktayekanaltiskej tikteixmatiltiskej tein kichiuas iTekiuajyo Dios. Jesús kijtoj ke miakkan motanojnotsaskia uan kisentokaskia hasta satepan ke momikiliskia (Juan 14:12). Satepan ke momikilij, seki itatojtokakauan oksepa peuak kintemouaj pescados. Keman oksepa nemik, kichiuak maj seki itatojtokakauan kinajsinij miakej pescados. Ijkuak senkis kinajsikamatiltij ke se tanojnotsas uan se kinpaleuis oksekin maj mochiuakan itatojtokakauan okachi tayekantok ke okse tekit (Juan 21:15-17). Keman yaya mokepatia iluikak, kiniluij ke tanojnotsalis tein kipeualtijka mochiuaskia itech okseki altepemej, amo sayoj ompa Israel (xikonixtajtolti Hechos 1:6-8). Xiujmej satepan, kinextilij tatitanil Juan tein panoskia “itech itonal toTajtsin”. * Juan kiitak ke se ángel kiteixmatiltiaya “Tajtoltsin de Dios ten kualkui ne nemakixtilis [...] intsalan nochi paísme uan intsalan nochi tataman tagayot uan intsalan nochi tataman pueblojuani uan [...] ten tajtoaj ika tataman tajtolis” (Apoc. 1:10, TNM; 14:6). Nejin kinextia ke Jiova kineki maj titanojnotsakan hasta keman kijtos ke amo motanojnotsasok.

6. ¿Toni techpaleuis maj tiktayekanaltikan tanojnotsalis?

⁶ Techpaleuis maj tiktayekanaltikan tanojnotsalis komo itech titanemiliaj nochi  tein Jiova toka kichiua. Kemej neskayot, techmaka miak tamachtilis: tein kisa itech amat uan itech tepos, tein ueli sayoj se kikaki, videos uan JW Broadcasting. Maj tiknemilikan nejin: itech jw.org tikajsij tamachtilis itech panoua mil tataman tajtolmej (Mat. 24:45-47). Axkan, taltikpakneminij motauelitaj porin kinpaleuiaj tataman tekiuajyomej, kipiaj tataman taneltokalismej uan porin sekin tominpiaj uan oksekin amo. Sayoj ke itekitikauan Dios, akin moajsij panoua ocho millones amo xexeliujtokej. Kemej neskayot, viernes 19 metsti abril xiuit 2019, itaixpantijkauan Jiova itech nochi taltikpak uelik kiitakej se video tein ika tajtouaya tajkuilol itech Biblia tein moixtajtoltij nejon tonal. Nejon youak mosentilijkej 20,919,041 taltikpakneminij uan kielnamikkej imikilis Jesús. ¿Melauj ke se ueyi tatiochiualis tikitaskej nejin uan ompa timoajsiskej? Komo itech titanemiliaj, techolinis maj tiktayekanaltikan tikteixmatiltiskej iTekiuajyo Dios.

7. ¿Keniuj komo tikchiuaj kemej Jesús techpaleuis maj tiktayekanaltikan tanojnotsalis?

⁷ No techpaleuis maj tiktayekanaltikan tanojnotsalis komo tikchiuaj kemej Jesús. Yejua amo kikauak maj nion teyi kichiuani maj amo kitayekanaltianok tanojnotsalis (Juan 18:37). Amo kikauak maj Satanás kitanejnektiani keman kiluij ke kimakaskia “nochi in pueblojme [...] uan ninricojyo”, nion kinekik maj taltikpakneminij kiixtalianij kemej tekiuaj (Mat. 4:8, 9; Juan 6:15). Amo kitemoj motomintis nion kipias miak taman, nion mouik maski semi kiixnamikiaj (Luc. 9:58; Juan 8:59). Keman tikpanoskej ouijkayomej, tiksentokaskej tiktayekanaltiskej tanojnotsalis komo tikchiuaj kemej Jesús, ijkon kemej tayolmajxitij Pablo, porin amo tisiouiskej nion timosenkauaskej (Heb. 12:3).

8. ¿Toni kijtosneki amo se yolijsiuis, uan keyej semi moneki axkan?

⁸ Amo se yolijsiuis kijtosneki se kichias maj mopata teisa tein panotok. Komo tikchixtokej maj tami teisa tein amo kuali tein tikpanotokej oso maj mochiua teisa tein uejkaujya tikchixtokej, moneki amo tiyolijsiuiskej. Tanauatijkej Habacuc kinekia maj tami tein amo kuali tein mochiujtoya Judá (Hab. 1:2). Itatojtokakauan Jesús kinemiliayaj ke iTekiuajyo Dios peuaskiaya taixyekanaskia uan kichiuaskia maj romanos amo kinixyekananijok (Luc. 19:11). Uan tejuan tikchiaj tonal keman Jiova kiixpolos tein amo kuali uan kichiuas maj nikan taltikpak sayoj nemikan akin tatakamatij (2 Ped. 3:13). Sayoj ke, moneki amo tiyolijsiuiskej uan tikchiaskej maj ejko tonal tein Jiova kiixtalij. Maj tikitakan seki taman kemej Jiova techmachtia maj amo tiyolijsiuikan.

9. ¿Keniuj kinextia Jiova ke amo yolijsiui?

⁹ Jiova amo keman yolijsiui. Keman Noé kichijchiuak arca uan “tanojnotstinemia ika ten melauak tajtoltsin”, Jiova kikauak maj panouanij xiujmej hasta maj matamini (2 Ped. 2:5; 1 Ped. 3:20). Kikakik Abrahán keman miakpa kichiuilij netajtanilmej porin yejuatsin kiixtalijka kinixpolos akin nemiaj Sodoma uan Gomorra (Gén. 18:20-33). Miak xiujmej kinpaleuij israelitas maski yejuan miakpa amo kitakamatkej (Neh. 9:30, 31). Uan axkan tikitaj ke amo yolijsiui porin kinchia maj moyolnonotsakan oso moyolnemilikan taltikpakneminij akin kineki maj kuali iuan mouikakan (Juan 6:44; 1 Tim. 2:3, 4; 2 Ped. 3:9). Tein Jiova kichiua techmachtia ke amo moneki tiyolijsiuiskej keman titanojnotsaj uan tikinmachtiaj oksekin. No techmachtia maj amo tiyolijsiuikan ika se neskayot tein moajsi itech iTajtol. Maj tikitakan katiyejua.

10. ¿Toni techmachtia neskayot tein ika motajtoua itech Santiago 5:7, 8?

 ¹⁰ (Xikonixtajtolti Santiago 5:7, 8). Ininneskayo “taka den tayuntajuiaj” oso tatokanij, techmachtia maj amo tiyolijsiuikan. Melauj ke seki tatokmej niman moskaltiaj, sayoj ke okseki okachi uejkauaj, okachiok tein kitemakaj takilot. Ompa Israel, satepan ke tatokayaj panouaya chikuasen metsti hasta keman onkayaya takilot. Tatokayaj keman peuaya kiouia, kemej itajkotian octubre, uan kitekiaj takilot satepan ke amo semi kiouiaok, kemej itajkotian abril (Mar. 4:28). Tiknextiskej tamatilis komo amo tiyolijsiuij ijkon kemej se akin tatoka. Sayoj ke nejin xa ouij yeski.

11. ¿Keniuj techpaleuis itech tanojnotsalis komo amo tiyolijsiuij?

¹¹ Kemej titajtakolejkej, niman tiknekij maj moita tein uelik tikchiujkej. Sayoj ke komo se taltikpaknenkej kineki maj motemaka takilot kampa tatoka, moneki kichiuas miak taman: moneki tachkuas, tatokas, tameuas uan kiatekis itatok. No ijkon panoua keman titamachtiaj. Xa monekis tikchiuaskej miak taman uan ijkon uelis tikinpaleuiskej akin tikinmachtiaj maj tetasojtakan uan maj amo tachikoitakanok. Komo amo tiyolijsiuij, amo timosenkauaskej keman taltikpakneminij amo techkakiskej. Sayoj ke no moneki amo tiyolijsiuiskej keman kuali techkakij uan kinekij kimatiskej okachi. Amo ueli tikchikaujkauiaj akin tikmachtiaj maj takuaujtamati. Kemansa, hasta itatojtokakauan Jesús amo niman kiajsikamatkej tein kinmachtiaya (Juan 14:9). Maj tikelnamikikan ke maski ueli titanojnotsaj uan titamachtiaj, sayoj Dios ueli kinpaleuia taltikpakneminij maj takuaujtamatikan (1 Cor. 3:6).

12. ¿Keniuj tiknextiaj ke amo tiyolijsiuij keman tikinnojnotsaj tochankauan?

¹² Uelis ouij techkisas amo tiyolijsiuiskej keman tikinnojnotsaj tochankauan. Tein kijtoua  Eclesiastés 3:1, 7 uelis techpaleuis. Ompa kijtoua: “Ixyetok [...] keman amo teyi se kijtos uan keman se tajtos”. Maski tein tikchiuaj uelis tapaleuis maj tochankauan kinekikan techkakiskej, nochipa keman uelis, maj tikintapouikan tein Biblia tamachtia (1 Ped. 3:1, 2). Nochipa timochikauaj titanojnotsaskej uan titamachtiskej, sayoj ke maj amo tiyolijsiuikan, nion keman tikinnojnotsaj oksekin nion keman tikinnojnotsaj tochankauan.

13, 14. ¿Akonimej akin amo yolijsiujkej techkauiliaj se kuali neskayot?

¹³ Itekitikauan Dios akin nenkej ne uejkauj uan itech totonaluan techkauiliaj se kuali neskayot. Maski Habacuc kinekia maj ixpoliuia tein amo kuali, amo yolijsiuik, ta ika takuaujtamatilis kijtoj: “Niksentokas niijkatos kampa nitajpia” (Hab. 2:1). Tatitanil Pablo kijtoj ke kinekia kitamichiuasya tekit tein kipiaya. Maski ijkon, amo yolijsiuik, ta kisentokak kiteixmatiltij “yankuik Tajtoltsin ten kualkui ne teiknelilis de Dios” (Hech. 20:24).

¹⁴ Maj tikitakan tein kinpanok se tokniuj takat uan inamik. Yejuan kiselijkej tamachtilis tein motemaka Galaad uan tapaleuitoj itech se altepet kampa amo onkakej miakej itaixpantijkauan Jiova uan kampa miakej amo kineltokaj Cristo. Amo miakej kinekiaj momachtiskej Biblia. Sayoj ke, tokniuan akin iniuan kiselijkaj tamachtilis uan tapaleuitoj itech okseki altepemej kintapouiayaj ke akin kinmachtiayaj ika Biblia moauiayaj. Maski ijkon, yejuan kisentokayaj tanojnotsayaj maski amo miakej kinkakiaj. Chikueyi xiujmej satepan, semej akin kimachtiayaj mochiuak itaixpantijkauj Jiova. ¿Toni kinextia tein kichiujkej itekitikauan Dios ne uejkauj uan itech totonaluan? Ke kisentokakej tekitikej uan amo momaseuijkej, uan Jiova kintatiochiuij porin amo yolijsiujkej. Yejua ika, maj tikchiuakan kemej akin “takuautamatinemij uan kiyolikaxikojtinemij nochi tataman tajyouilis para ijkon kiselijtiyoue nochi tatiochiualisme tenika Dios moyektenkauka ya de techtayokolis” (Heb. 6:10-12).

15. ¿Keyej totakuaujtamatilis kichiua maj tiknekikan tiksentokaskej titanojnotsaskej?

¹⁵ Kemej itech titakuaujtamatij tein tikteixmatiltiaj, tiknekij maj miakej kikakikan. Titakuaujtamatij ke Dios kichiuas tein kijtoua itech iTajtol (Sal. 119:42; Is. 40:8). Tikitanij keniuj mochiuani seki taman tein itech Biblia moijtojka ke panoskia. No tikitanij keniuj taltikpakneminij okachi kuali nemij keman peua kitakamatij tein Biblia tayolmajxitia. Nochi nejin kichiua maj okachi tikneltokakan ke nochin moneki kikakiskej tein kichiuas iTekiuajyo Dios.

16. 1) ¿Keniuj Salmo 46:1-3 kinextia ke komo titakuaujtamatij iuan Jiova tiksentokaskej titanojnotsaskej? 2) ¿Keniuj no techpaleuia komo titakuaujtamatij iuan Jesús?

¹⁶ No titakuaujtamatij iuan Jiova, akin techmachtia tein tikteixmatiltiaj, uan iuan Jesús, akin Jiova kiixtalij kemej Tekiuaj itech iTekiuajyo (Juan 14:1). Jiova nochipa techpaleuis uan techmakas chikaualis maski tein yeski panos (xikonixtajtolti Salmo 46:1-3). Uan no, tikneltokaj ke Jesús, akin moajsi iluikak, kiixyekana tanojnotsalis ika chikaualis uan tanauatil tein Jiova kimakak (Mat. 28:18-20).

17. Xikonijto se neskayot tein kinextia keyej moneki tiksentokaskej titanojnotsaskej.

¹⁷ Takuaujtamatilis kichiua maj okachi tikneltokakan ke Jiova techtiochiuas komo tiksentokaj titanojnotsaj, uan kemansa kichiuas kemej amo tiknemiliayaj (Ecl. 11:6). Kemej neskayot, mojmostaj miakej panouaj kampa ika moajsij carritos uan mesas tein kipiaj amaixmej. ¿Yekmelauj tapaleuia ijkon se tanojnotsas?  ¡Kemaj! Itech amaix ITekiyo Dios tein Tikchiuaj noviembre 2014, ika motajtoj se ichpoch akin momachtijtoya universidad uan kinekia kijkuilos se amat kampa ininka tajtoskia itaixpantijkauan Jiova. Amo kiajsik nion se Kali kampa tiMosentiliaj, sayoj ke ompa universidad kiitak se mesa tein kipiaya toamaixuan. Ompa kiajsik amaixmej tein kipaleuiskiaj maj kijkuilo amat tein kinekia. Satepan moauij, uan axkan precursora regular. Ineskayo kichiua maj tiknekikan tiksentokaskej titanojnotsaskej, porin kinextia ke moajsijok akin moneki kikakiskej tein kichiuas iTekiuajyo Dios.

18. ¿Keniuj tikmatij ke amo motanojnotsasok keman Jiova kiixtalijtok?

¹⁸ Uelis tikneltokaskej ke Jiova kijtos maj amo motanojnotsaok keman monekis. Maj tiknemilikan tein panok itech itonaluan Noé. Jiova kinextij ke nochipa kichiua teisa keman moneki. Kemej ciento veinte xiujmej achto kiixtalij kemanian peuaskia Tetsaujkakiouit. Miak xiujmej satepan, kinauatij Noé maj kichijchiuani arca. Noé chikauak tekitik kemej cuarenta oso cincuenta xiujmej. Maski taltikpakneminij amo kikakkej, kisentokak kinnejmachtij hasta keman Jiova kijtoj ke tapialmej monekiaya kalakiskej itech arca. Ompa, “Jiova tatsakuak” keman monekia (Gén. 6:3; 7:1, 2, 16).

19. ¿Toni uelis tikchiaskej komo amo timomaseuiaj?

¹⁹ Amo uejkaua, Jiova kiixtalis maj amo motanojnotsaok. Ompa, kiixpolos tein Satanás kiixyekana uan kichiuas maj moajsi yankuik taltikpak kampa sayoj nemiskej akin kitakamatij. Hasta maj ejko nejon tonal, maj tikchiuakan kemej Noé, Habacuc uan okseki itekitikauan Dios akin amo momaseuijkej. Maj tiktayekanaltikan tanojnotsalis, maj amo tiyolijsiuikan uan maj titakuaujtamatikan iuan Jiova uan ke kichiuas tein kijtoj.