Eclesiastés 5:8 techtanemililtia porin kijtoua: “Amo xikmoujkaita komo itech moxolal ika mauiltiaj akin kipanoua tatasojtilis uan mochiua tein amo melauak. Porin nejon taixyekankej kiitstok se akin okachi ueyichiujkej ke yejua, uan moajsij oksekin akin okachi ueyichiuanimej ke yejuan”.

Keman sayoj tejuan tikixejekouaj toni kijtosnekij nejin tajtolmej, uelis tiknemiliskej ke sayoj ininka tajtoua tekiuanij. Sayoj ke, komo okachi itech titanemiliaj, techajsikamatiltia se taman tein kichiua Jiova tein semi techyolseuia.

Eclesiastés 5:8 ika tajtoua se tekiuaj akin ininka mauiltia akin kipanouaj tatasojtilis uan kinchiuilia tein amo kuali. Nejon takat monekiskia kielnamikis ke xa kiitstok se akin okachi ueyichiujkej oso se akin kipia okachi tanauatil. Tein melauj, xa moajsij oksekin akin kipiaj okachi tanauatil. Sayoj ke, itech tekiuajyomej, xa nochin nejon taixyekananij kichiuaj tein amo kuali uan nejon kintajyouiltia akin kinixyekanaj.

Sayoj ke, maski ouij tein tikpanotoskej, techyolseuia tikmatiskej ke Jiova kinitstok hasta uejueyi tayekananij itech tekiuajyomej. Uelis tiktataujtiskej maj techpaleui uan tikauaskej imako tein techtekipachoua (Sal. 55:22; Filip. 4:6, 7). Tikmatij ke “iixtololouan Jiova tachixtinemij itech nochi taltikpak uan ijkon kinpaleuis ika ichikaualis akin kitekitiliaj ika nochi ininyolo” (2 Crón. 16:9).

Kemej tikitaj, Eclesiastés 5:8 kinextia se taman tein panoua itech tekiuajyomej: ke nochipa moajsi se akin kipia okachi tanauatil. Uan tein okachi moneki, techelnamiktia ke Jiova okachi ueyi taixyekankej itech iluikak uan taltikpak. Axkan taixyekantok itechkopa iKonetsin, Jesucristo, Tekiuaj itech iTekiuajyo. Jiova, akin nochi ueli kichiua uan kiita nochi, nochipa kichiua tein melauak, uan iKonetsin no ijkon kichiua.