1. ¿Keniuj xa momachiliaj ichankauan se tokniuj keman kikalankixtiaj itech nechikol?

KEMAN se tokniuj kikalankixtiaj itech nechikol, ichankauan xa semi motayokoltiaj. Se tokniuj siuat akin monotsa Hilda * kijtoua: “Nonamik momikilij 41 xiujmej satepan ke timonamiktijkaj, uan niknemilij ke amo onkaya okse taman tein ueliskia okachi nechtayokoltis. Sayoj ke keman nookichpil kikalankixtijkej itech nechikol uan kinkaujteuak inamik uan ikoneuan, okachiok nechtayokoltij”.

2, 3. Kemej kinextia Salmo 78:40, 41, ¿keniuj momachilia Jiova keman itekitikauan kikauaj?

² Jiova xa semi kiyolkokoj keman miakej ángeles akin katkaj ichankauan kikaujkej (Jud. 6). Uan xa no semi kiyolkokoj maj israelitas, akin semi kintasojtaya, miakpa kiixnamikinij (xikonixtajtolti Salmo 78:40, 41). Komo se mochankauj kikauak Jiova, uelis tiontakuaujtamatis ke yejuatsin no tayokoya. Kiajsikamati ke tiontajyouijtok uan mitsoniknelia porin mitsonyolchikaua uan mitsonpaleuia.

³ Itech nejin tamachtilis tikitaskej keniuj uelis tikseliskej inepaleuil Jiova keman se tochankauj kikalankixtiaj itech nechikol. Uan no tikitaskej keniuj uelis tikinpaleuiskej tokniuan akin se ininchankauj kikalankixtijkej itech nechikol. Sayoj ke achto maj ika titajtokan se taman tein amo moneki tiknemiliskej.

4. ¿Keniuj momachiliaj miakej tetatmej keman se ininkoneuj kikaua Jiova?

⁴ Miakej tetatmej motajtaniaj keniuj ueliskia okachi kipaleuiskej se ininkoneuj akin kikauak Jiova. Se tokniuj takat akin monotsa Luke kijtoj nejin satepan ke iokichpil kikalankixtijkej itech nechikol: “Niknemiliaya ke notajtakol katka. Hasta nitajtakochitaya.  Kemansa nichokaya uan semi amo kuali nimomachiliaya”. Elizabeth, se tokniuj siuat akin iokichpil no kikalankixtijkaj itech nechikol kisentokaya kinemiliaya: “¿Toni amo kuali nikchiuak? Nikmachiliaya ke amo semi nimochikaujka nikpaleuis nookichpil maj kitasojtani Jiova”.

5. ¿Akoni itajtakol komo se tokniuj kikaua Jiova?

⁵ Moneki tikelnamikiskej ke Jiova techkaua maj toselti tikixtalikan toni tikchiuaskej. Yejua ika tisejsemej ueli tikixpejpenaj ox tiktakamatiskej oso amo. Seki telpochmej uan ichpochmej inintatuan amo kinkauilijkej se kuali neskayot. Maski ijkon, kiixtalijkej kitekitiliskej Jiova uan amo kikauaj. Oksekin, inintatuan mochikaujkej kinpaleuiskej maj kitasojtanij Jiova, sayoj ke satepan kikaujkej. Tein melauj, tisejsemej moneki tikixpejpenaskej ox tiktekitiliskej Jiova oso amo (Jos. 24:15). Yejua ika, tetatmej, komo nanmokoneuj kikauak Jiova, amo xiknemilikan ke nanmotajtakol.

6. ¿Keniuj xa momachilia se telpoch oso se ichpoch keman ipopaj oso imomaj kikaua Jiova?

⁶ Kemansa, tepopaj oso temomaj kikaua Jiova, uan xa hasta kinkaujteua ichankauan (Sal. 27:10). Ikoneuan uelis semi kintayokoltis nejin porin semi kipoujkaitayaj uan kiitayaj kemej se kuali neskayot. Esther kijtoua keniuj momachilij keman ipopaj kikalankixtijkej itech nechikol: “Semi nichokaya porin nikajsikamatia ke amo yolik kikaujtiaj Jiova, ta ke senkis kiixtalijka amo kitekitilisok. Semi niktasojta nopopaj. Yejua ika, keman kikalankixtijkej itech nechikol nochipa nimotekipachojtoya porin niknekia maj kuali yeto. Kemansa hasta semi nimomojmoujtiaya”.

7. ¿Keniuj kinita Jiova telpochmej uan ichpochmej akin ininpopaj oso ininmomaj kikalankixtijkej itech nechikol?

⁷ Telpochmej uan ichpochmej, komo nanmopopaj oso nanmomomaj kikalankixtijkej itech nechikol, no semi techtayokoltia. Uan uelis nantakuaujtamatiskej ke Jiova kimati keniuj nanmomachiliaj. Yejuatsin namechtasojta uan kiyolpaktia kiitas ke nankisentokaj nankitekitiliaj. Uan tejuan no techyolpaktia tikitaskej nejon. No xikelnamikikan ke tein kiixtalijkej kichiuaskej nanmotatuan amo nanmotajtakol. Kemej tikitakejya, Jiova techkaua maj toselti tikixpejpenakan ox tiktekitiliskej. Uan akin motemaktijya uan moauijya ‘tanankilis ika tein kichiua’ iixpan Dios (Gál. 6:5, TNM).

8. ¿Toni uelis kichiujtoskej ichankauan akin kikalankixtijkej itech nechikol? (No xikonita recuadro “ Jiova kineki xionmokepa”).

⁸ Keman se mochankauj kikaua Jiova, tejuatsin tikonchia maj se tonal mokepa. ¿Toni uelis tikonchiujtos hasta maj ejko nejon tonal? Xikonsentoka xikonchiua tein mitsonpaleuis maj motakuaujtamatilis kisentoka chikauak. Komo tikonchiua nejon, tikonkauilis se kuali neskayot okseki mochankauan uan xa hasta akin kikalankixtijkej itech nechikol. Uan no, nejon mitsonpaleuis xikonxiko tayokol tein tikonmachilia. Maj tikitakan seki taman tein uelis tikonchiuas, tein mitsonpaleuis maj motakuaujtamatilis kisentoka chikauak.

9. ¿Toni mitsonpaleuis maj motakuaujtamatilis kisentoka chikauak? (No xikonita recuadro “ Tajkuilolmej tein mitsonyolchikauaskej”).

⁹ Xikonchiua nochi tein mitsonpaleuis maj motakuaujtamatilis kisentoka chikauak.  Moneki xikonsentoka xikontemo okachi kuali tionmouikas iuan Jiova tejuatsin uan mochankauan. ¿Keniuj uelis tikonchiuas nejin? Moneki nochipa xikonixtajtolti iTajtol Dios uan itech xiontanemili, uan no moneki nochipa xionyoui nechikolmej. Joanna, se tokniuj siuat akin ipopaj uan iikniuj siuat kikaujkej Jiova, kijtoua: “Semi niyolseui keman nikixtajtoltia itech Biblia tein kichiujkej seki taltikpakneminij kemej Abigaíl, Ester, Job, José uan Jesús. Ininneskayo nechyolchikaua uan nechpaleuia maj kuali nimomachili. Tonekuikatiluan tein kisaj itech JW Broadcasting no semi nechyolchikauaj”.

10. Kemej kinextia Salmo 32:6-8, ¿toni uelis tikchiuaskej komo semi timotekipachojtokej?

¹⁰ Xikontapoui Jiova, toDios akin semi techtasojta, nochi tein mitsontekipachoua. Xikonsentoka xikontataujti keman semi tiontayokoxtos. Xikontataujti maj mitsonpaleui xikonita tein panotok kemej yejuatsin kiita uan maj mitsonpaleui xikonmati toni uelis tikonchiuas (xikonixtajtolti Salmo 32:6-8). Xa ouij mitsonkisas tikontapouis keniuj tionmomachilia. Sayoj ke yejuatsin kuali mitsonajsikamati. Semi mitsontasojta uan kineki xikontapoui nochi tein mitsontekipachoua (Éx. 34:6; Sal. 62:7, 8).

11. Kemej kinextia Hebreos 12:11, ¿keyej moneki titakuaujtamatiskej itech tamelaualis tein Jiova kitemaka? (No xikonita recuadro “ Jiova kinextia ke techtasojta keman se tokniuj kikalankixtiaj”).

¹¹ Xikontakamati tein kiixtaliskej tayekananij. Kemej Jiova semi techtasojta, kiixtalij maj se tokniuj akin tajtakolchiuak kikalankixtikan itech nechikol, porin nejon kipaleuia yejua uan no kinpaleuia okseki tokniuan itech nechikol (xikonixtajtolti Hebreos 12:11). Seki tokniuan xa kijtoskej ke tayekananij amo kuali tein kichiujkej, sayoj ke xikonelnamiki ke nejon tokniuan xa amo kinekiskej kijtoskej ke akin kikalankixtijkej kichiuak tein amo kuali. Tein melauj, amo tikmatij nochi tein panok. Yejua ika,  maj titakuaujtamatikan ke tayekananij akin kimelaujkej tajtakolchiujkej mochikaujkej kitakamatiskej tein Biblia kijtoua uan tamelauaskej kemej Jiova kineki (2 Crón. 19:6).

12. ¿Keniuj kinpaleuiani sekin porin tatakamatij keman Jiova kimelaua se tokniuj?

¹² Komo tayekananij kiixtalijkej kikalankixtiskej itech nechikol se mochankauj uan tiontatakamati, xa uelis tikonpaleuis mochankauj maj mokepa iuan Jiova. Elizabeth, akin ika titajtojkej itech párrafo 4, kijtoua: “Semi ouij nechkisak senkis amo nitajtosok iuan nookichpil, akin ueyia katka. Sayoj ke keman mokepak iuan Jiova, kijtoj ke semi kipaleuij maj kikalankixtianij itech nechikol. Uan satepan kijtoj ke kimachtijka miak taman. Nejon kichiuak maj niktasojkamati itamelaualis Jiova”. Inamik, akin monotsa Mark, kijtoua: “Xiujmej satepan, tookichpil nechiluij ke se taman tein kipaleuij maj mokepani iuan Jiova yejua ke senkis amo titajtouayaj iuan. Semi nimotasojkamati porin Jiova techpaleuij maj titatakamatinij”.

13. ¿Toni uelis mitsonpaleuis xikonxiko tayokol tein tikonmachilia?

¹³ Xiontajto iniuan tokniuan akin kuali iniuan tionmouika, akin kiajsikamatij keniuj tionmomachilia. No xionmouika iniuan tokniuan akin semi kuali mouikaj iuan Jiova akin uelis mitsonpaleuiskej amo xionmosenkaua (Prov. 12:25; 17:17). Joanna, akin ika titajtojkej itech párrafo 9, kijtoua: “Nikmachiliaya ke noselti nietoya. Sayoj ke semi nechpaleuij nitajtos iniuan tokniuan akin kuali iniuan nimouika”. Sayoj ke ¿toni uelis tikonchiuas komo se tokniuj mitsoniluia teisa tein kichiua okachi amo kuali xionmomachili?

14. ¿Keyej moneki ‘timoijyouilijtiaskej se uan okse uan timotapojpoluijtiaskej’?

¹⁴ Amo xionkualani iniuan tokniuan. Tein melauj, amo taixejekol tikchiaskej maj nochin nochipa techiluikan tein tikuelitaskiaj tikakiskej (Sant. 3:2). Kemej tinochin titajtakolejkej, kemansa sekin xa amo kimatiskej toni mitsoniluiskej, oso hasta mitsoniluiskej teisa tein mitsonyolkokos. Xikonelnamiki tein tayolmajxitij tatitanil Pablo: “Ximoijyouilijtiyakan se uan okse in tataman de namotamachilisuan. Uan no ximotapojpoluijtiyakan se uan okse [...] kuak se aksa kiyolxokolia” (Col. 3:13). Se tokniuj siuat akin se ichankauj kikalankixtijkaj itech nechikol kijtoua: “Jiova nechpaleuiani maj nikintapojpolui tokniuan akin kinekiaj nechyolchikauaskej, sayoj ke nechyolkokojkej”. Axkan maj tikitakan keniuj okseki tokniuan uelis kinpaleuiskej akin se ininchankauj kikalankixtijkej itech nechikol.

15. ¿Keniuj uelis tikinpaleuiskej tokniuan akin se ininchankauj yankuixtok kikalankixtijkej itech nechikol?

¹⁵ Maj tikualtakamej iniuan tokniuan akin se ininchankauj kikalankixtijkej itech nechikol uan maj tikinnextilikan ke tikintasojtaj. Se tokniuj siuat akin monotsa Míriam kijtoua ke tepitsin mouia yas nechikolmej satepan ke iikniuj takat kikalankixtijkej itech nechikol. Kijtoua: “Nikmouiliaya tein oksekin kijtoskiaj. Sayoj ke miakej tokniuan akin kuali iniuan  nimouika no tayokoxtoyaj, sayoj ke amo kualantoyaj iuan nokniuj. Yejuan nechpaleuijkej maj amo nikmachiliani ke noselti nietoya”. Okse tokniuj siuat kielnamiki: “Keman tookichpil kikalankixtijkej itech nechikol, miakej tokniuan techyolseuikoj. Sekin kijtojkej ke amo kimatiaj toni techiluiskej. Sekin nouan chokakej uan oksekin nechtajkuilouilijkej. Tein kichiujkej semi nechpaleuij”.

16. ¿Keniuj tokniuan itech nechikol uelis kisentokaskej kinpaleuiskej tokniuan akin se ininchankauj kikalankixtijkej itech nechikol?

¹⁶ Maj tiksentokakan tikinpaleuikan tokniuan akin se ininchankauj kikalankixtijkej itech nechikol. Ika tein kipanotokej, okachi moneki kimachiliskej ke tikintasojtaj uan moneki tikinyolchikauaskej (Heb. 10:24, 25). Kemansa, seki tokniuan akin se ininchankauj kikalankixtijkej itech nechikol kiitanij ke seki tokniuan amo no kinnotsajok, kemej yeskia yejuan no kinkalankixtijkej. ¡Maj amo keman tikchiuakan nejon! Okachiok moneki maj tikinyolchikauakan telpochmej uan ichpochmej akin ininpopaj oso ininmomaj kikalankixtijkej itech nechikol. María, se tokniuj siuat akin inamik kikalankixtijkej itech nechikol uan kinkaujteuak, kijtoua: “Seki tokniuan akin kuali iniuan nimouika techitakoj, techtakualchiuijkej uan nechpaleuijkej maj nimomachti iniuan nokoneuan. Nechajsikamatkej uan nouan chokakej. Uan no nechtajtouijkej keman sekin nechtakajkayauilijkej. Yejuan semi nechyolchikaujkej” (Rom. 12:13, 15).

17. ¿Keniuj tokniuan tayekananij uelis kinyolseuiskej tokniuan akin tayokoxtokej?

¹⁷ Tokniuan tayekananij, nochipa keman uelis, xikinyolchikauakan tokniuan akin se ininchankauj kikalankixtijkej itech nechikol. Namejuan okachi moneki nankinyolseuiskej tokniuan akin ininchankauan kikaujkej Jiova (1 Tes. 5:14). Xiktemokan nankinyolchikauaskej achto ke peuas nechikol uan keman tamis. Xikinkalpanotij ininchan uan xikchiuakan netataujtil iniuan. No uelis iniuan nankisaskej tanojnotsalis oso kemansa uelis nankinyoleuaskej maj namouan taueyichiuakan kemej kalyetouanij. Tokniuan tayekananij moneki kinyekpiaskej tokniuan akin tayokoxtokej uan kinnextiliskej ke kinikneliaj uan ke kintasojtaj (1 Tes. 2:7, 8).

18. Ika tein kijtoua 2 Pedro 3:9, ¿toni kineki Jiova maj kichiuakan akin kikaujkej?

¹⁸ Jiova “amo kineki ma senme ixpoliuikan. Ta, Yejuatsin kimonekiltia ke tinochin ma timoyolnemilikan de totajtakoluan para tikpiaske ne nemakixtilis” (xikonixtajtolti 2 Pedro 3:9). Maski se tokniuj kichiuas se ueyi tajtakol, Jiova kisentoka kipatiuita inemilis. Xikonelnamiki ke Jiova toka kitemakak inemilis iKonetsin akin semi kitasojta. Ika netasojtalis, yejuatsin kitemoua kinpaleuis maj mokepakan nochin akin kikaujkej. Uan kichia maj kiixtalikan kichiuaskej, kemej kinextia neskayot kampa Jesús ika tajtoj telpoch akin kiauilchiuak itomin (Luc. 15:11-32). Miakej akin kikaujkaj Jiova mokepkej, uan tokniuan itech nechikol kuali kinselijkej. Elizabeth, akin ika titajtojkej achto, semi yolpakik keman iokichpil mokepak. Yejua kijtoua: “Semi nikintasojkamatilia nochin akin techyolchikaujkej maj amo timosenkauanij”.

19. ¿Keyej uelis tiksentokaskej titakuaujtamatiskej iuan Jiova?

¹⁹ Nochipa uelis titakuaujtamatiskej iuan Jiova. Yejuatsin amo keman techiluis maj tikchiuakan teisa tein amo techpaleuis. Jiova se tePopaj kualtakat uan teiknelijkej, akin semi kintasojta nochin akin kitasojtaj uan kiueyichiuaj. Maj titakuaujtamatikan ke Jiova amo techkauas keman tikpanoskej uejueyi ouijkayomej (Heb. 13:5, 6). Mark, akin ika titajtojkej itech párrafo 12, kijtoua: “Jiova amo keman techkauak. Yejuatsin nochipa techpaleuia keman tikpanouaj ouijkayomej”. Dios kisentokas techmakas “chikaukauelilis [tein] ualeutok imako” (2 Cor. 4:7). Kemaj, uelis tiksentokaskej titakuaujtamatiskej uan amo timosenkauaskej hasta komo se tochankauj kikaua Jiova.