TAMACHTILIS 40
Kinpaleuiaj “miakej maj kichiuakan tein kuali yetok”
“Akin kinpaleuijtoskej miakej maj kichiuakan tein kuali yetok, miliniskej kemej sitalimej nochipaya” (DAN. 12:3).
NEKUIKATIL 151 Jiova kinnotsas
TEIN MOITAS *
1. ¿Toni tein semi kualtsin panos keman Jesús taixyekantos Mil Xiujmej?
SEMI kualtsin yeski tein panos keman Jesús taixyekantos Mil xiujmej. Peuas oksepa nemiskej nikan taltikpak akin momikilijkej. Komo momikilij aksa akin tiktasojtaj xa semi tiknekij oksepa tikitaskej, uan Jehová no kineki oksepa kiitas (Job 14:15). Itech nochi taltikpak nochin yolpakiskej keman oksepa kinitaskej akin momikilijkej. Kemej tikitakej itech tamachtilis 39, “akin kichiujkej tein kuali” uan ijkuiliujtokejya itech amatajkuilol kampa ixnesij akin nemiskej, “nemiskej nochipaya” (Hech. 24:15; Juan 5:29). Xa miakej akin tikintasojtaj yeskij sekin akin yekinika oksepa nemiskej. * Uan no, “akin amo yolmelaujkej” oksepa nemiskej uan “kiixtaliskej tein kinnamiki kiseliskej”. Yejuan akin amo uelik kiixmatkej Jehová uan amo uelik kitekitilijkej.
2, 3. 1) Kemej kinextia Isaías 11:9, 10, ¿toni kinmachtiskej akin oksepa nemiskej? 2) ¿Toni tikitaskej itech nejin tamachtilis?
2 Onkak miak taman tein monekis momachtiskej akin oksepa nemiskej (Is. 26:9; 61:11). Yejua ika monekis tel miakej kinmachtiskej kemej amo keman mochiuani (xikonixtajtolti Isaías 11:9, 10). Akin amo yolmelaujkej monekis momachtiskej toni iTaixyekanalis Dios, keyej monekik momikilis Jesús, keyej moneki maj mochipaua itokay Jehová uan keyej sayoj yejuatsin kinamiki taixyekanas. Uan kemej sekin akin yolmelaujkej momikilijkej achto ke motamiijkuiloskia Biblia, monekis momachtiskej keniuj Jehová kinmatiltijtiajki itekitikauan tein kinekia kichiuas. Yejua ika akin yolmelaujkej uan akin amo yolmelaujkej monekis momachtiskej miak taman.
3 Itech nejin tamachtilis tikitaskej keniuj kinmachtiskej akin oksepa nemiskej uan toni kinpanos akin kiseliskej tein kinmachtiskej uan akin amo. Nejin semi moneki maj tikmatikan. Kemej tikitaskej, seki taman tein achtook moijtojka itech amatajkuilol Daniel uan Apocalipsis techpaleuis maj tikajsikamatikan tein panos keman mikemej oksepa nemiskej. Yekinika, maj tikitakan tein moijtojka itech Daniel 12:1, 2.
“AKIN KOCHTOKEJ ITECH TALNEX IJSASKEJ”
4, 5. ¿Toni kijtoua Daniel 12:1 ke mochiuaskia itech itamian tonalmej?
4 (Xikonixtajtolti Daniel 12:1). Itech amatajkuilol Daniel moijtoua keniuj mochiuas seki taman itech itamian tonalmej. Kemej neskayot, Daniel 12:1 kijtoua ke Miguel oso Jesucristo, ijkatok porin kinpaleuia itekitikauan Dios. Nejin peuak mochiua itech xiuit 1914, keman Jesús peuak taixyekana ompa iluikak.
5 Sayoj ke Daniel no kiluijkej ke Jesús moketsaskia keman onkaskia “ueyi tajyouilis kemej amo keman mochiuani desde ke peuak moajsi se xolal hasta ijkuak”. Nejon tonalmej yejua “tetsaujkatajyouilis” tein ika tajtoua Mateo 24:21. Jesús moketsa oso kinpaleuia itekitikauan Dios keman tami nejon ueyi tajyouilis oso itech Armagedón. Apocalipsis kijtoua ke yejuan akin “tel miakej” uan “makiskej keman mochiuak tetsaujkatajyouilis” (Apoc. 7:9, 14).
6. ¿Toni panos keman tel miakej makisaskejya keman mochiuas ueyi tajyouilis, uan keniuj tikmatij? (No xikonita itech nejin amaix taxelol “Tein tajtanij akin taixtajtoltiaj”, kampa ininka tajtoua akin oksepa nemiskej nikan taltikpak).
6 (Xikonixtajtolti Daniel 12:2). ¿Toni panos keman tel miakej makisaskejya keman mochiuas ueyi tajyouilis? Nejin tein achtook moijtojka kijtoua ke sekin oksepa nemiskej. Sayoj ke nejin amo kiixnextia teisa uan amo no ininka tajtojtok akin yaskej iluikak itech itamian tonalmej kemej achto tikajsikamatiaj, * ta ininka tajtojtok akin oksepa nemiskej itech xochital. ¿Keniuj tikmatij? Itech Job 17:16 no mokui tajtol “talnex”, uan ompa ika motajtoua “miketekoch”. Nejin kinextia ke Daniel 12:2 ika tajtojtok keman mikemej oksepa nemiskej satepan ke tamis itamian tonalmej uan keman panosya Armagedón.
7. 1) ¿Toni kijtosneki keman itech Daniel 12:2 moijtoua ke sekin “nemiskej nochipaya”? 2) ¿Keyej okachi kuali yeski satepan keman oksepa nemiskej akin momikilijkejya?
7 Keman itech Daniel 12:2 ininka tajtoua akin oksepa nemiskej, kijtoua ke sekin “nemiskej nochipaya”. ¿Toni kijtosneki nejon? Kijtosneki ke akin oksepa nemiskej uan peuas kiixmatiskej Jehová uan Jesús oso kisentokaskej kinixmatiskej uan tatakamatiskej itech mil xiujmej, nemiskej nochipaya (Juan 17:3). Nejin okachi kuali yeski ke keman sekin oksepa nenkej ne uejkauj (Heb. 11:35). ¿Keyej? Porin yejuan oksepa momikilijkej.
8. ¿Toni kijtosneki ke sekin oksepa nemiskej “para kinpinaujtiskej uan para kinixtopeuaskej nochipaya”?
8 Sayoj ke amo nochin akin oksepa nemiskej kiseliskej tein Jehová kinmachtis. Tein achtook moijtojka itech Daniel kijtoua ke sekin oksepa nemiskej “para kinpinaujtiskej uan para kinixtopeuaskej nochipaya”. Kemej taixnamikiskej amo moijkuilos inintokay itech amatajkuilol kampa ixnesij akin nemiskej uan amo nemiskej nochipaya. “Kinixtopeuaskej nochipaya”, tein kijtosneki ke senkis ixpoliuiskej. Yejua ika, Daniel 12:2 ika tajtoua tein kinpanos nochin akin oksepa nemiskej. Nejin moixtalis ika tein kichiuaskej satepan ke oksepa nemiskej * (Apoc. 20:12). Sekin nemiskej nochipaya uan oksekin amo.
KINPALEUIAJ “MIAKEJ MAJ KICHIUAKAN TEIN KUALI YETOK”
9, 10. 1) Kemej kinextia Daniel 12:3, ¿toni no panos satepan ke tamis tetsaujkatajyouilis? 2) ¿Akonimej “miliniskej kemej iluikak”?
9 (Xikonixtajtolti Daniel 12:3). ¿Toni panos satepan ke tamis “ueyi tajyouilis” tein amo uejkaua peuas? Kemej tikitakejya, Daniel 12:2 kijtoua seki taman, sayoj ke versículo 3 no kijtoua okse taman tein panos satepan ke tamis tetsaujkatajyouilis.
10 ¿Akonimej “miliniskej kemej iluikak”? Tein Jesús kijtoj itech Mateo 13:43 techpaleuis maj tikmatikan. Yejua kijtoj: “Ijkuak, akin yolmelaujkej petaniskej itech iTaixyekanalis ininTajtsin ijkon kemej tonaltsin”. Keman kijtoj nejin, Jesús ininka tajtojtoya “akin kalakiskej itech iTaixyekanalis Dios” oso taijitalmej akin iuan taixyekanaskej ompa iluikak (Mat. 13:38). Yejua ika, Daniel 12:3 ininka tajtojtok taijitalmej uan tein kichiuaskej itech Mil Xiujmej keman Jesús taixyekantos.
Taijitalmej tekitiskej iuan Jesús keman kiixyekanaskej tekit tein mochiuas keman motamachtis itech mil xiujmej. (Xikonita párrafo 11).
11, 12. ¿Toni kichiuaskej 144,000 itech mil xiujmej?
11 Taijitalmej kinpaleuiskej “miakej maj kichiuakan tein kuali yetok”. ¿Keniuj kichiuaskej? Keman kiixyekanaskej iuan Jesús tekit tein mochiuas nikan taltikpak keman motamachtis itech mil xiujmej. Nejon 144,000 taijitalmej amo sayoj yeskij tekiuanij, ta no tiopixkamej (Apoc. 1:6; 5:10; 20:6). Tapaleuiskej para “kinpajtiskej akin pouij itech altepemej”, tein kijtosneki ke kinpaleuiskej akin nemiskej nikan taltikpak maj yolik amo kipiakanok tajtakol (Apoc. 22:1, 2; Ezeq. 47:12). ¡Taijitalmej semi yolpakiskej keman kichiuaskej nejin!
12 ¿Akonimej monekis kinpaleuiskej “maj kichiuakan tein kuali yetok”? Akin oksepa nemiskej, akin makisaskej keman mochiuas Armagedón uan konemej akin yoliskej itech xochital. Keman tamis mil xiujmej amo akin tajtakolejok yeski. Sayoj ke, ¿kemanian moijkuilos inintokay kemej yeskia ika lapicero uan amo ika lápiz itech amatajkuilol kampa ixnesij akin nemiskej?
TEIN KINEXTISKEJ ITEKITIKAUAN JEHOVÁ
13, 14. ¿Toni monekis kichiuaskej nochin akin nemiskej itech taltikpak achto ke uelis nemiskej nochipaya?
13 Komo aksa amo tajtakolej amo kijtosneki ke nemis nochipaya. Maj inintech titanemilikan Adán uan Eva. Yejuan amo tajtakolejkej katkaj, sayoj ke monekia kitakamatiskej Jehová para ueliskia nemiskej nochipaya. Sayoj ke amo tatakamatkej (Rom. 5:12).
14 Kemej tikitakejya, keman tamis mil xiujmej nochin akin nemiskej itech taltikpak amo tajtakolejkejok yeskij. Sayoj ke, ¿kipaleuiskej iTaixyekanalis Jehová? ¿Oso sekin kichiuaskej kemej Adán uan Eva akin amo kitakamatkej Jehová maski amo tajtakolejkej katkaj? ¿Keniuj uelis momatis akonimej amo kikauaskej Jehová?
15, 16. 1) ¿Kemanian nochin uelis kinextiskej ke amo kikauaj Jehová? 2) ¿Toni panos satepan?
15 Satanás kitsakuaskej mil xiujmej. Ijkuak, amo akin uelis kikajkayauasok. Sayoj ke keman tamis mil xiujmej kikajkauaskej uan kitemos kinkajkayauas itekitikauan Jehová akin amo tajtakolejkejok yeskij. Ijkuak, nochin uelis kinextiskej ke kiitaj ke semi moneki maj mochipaua itokay Jehová uan ke sayoj yejuatsin kinamiki taixyekanas (Apoc. 20:7-10). Ika tein kichiuaskej moitas ox moijkuilos inintokay itech amatajkuilol kampa ixnesij akin nemiskej kemej amo ixpoliuisok.
16 Maski amo tikmatij kanachimej, sekin kichiuaskej kemej Adán uan Eva uan amo mokauaskej maj Jehová kinixyekana. ¿Toni kinpanos? Apocalipsis 20:15 kijtoua: “Akin amo ijkuiliujtoyaj itech amatajkuilol kampa ixnesij akin nemiskej, kinpantamotkej kampa kuakualakatok tit”. Akin amo tatakamatiskej senkis kinixpoloskej, sayoj ke okachi miakej yeskij akin amo kikauaskej Jehová. Uan inintokay moijkuilos itech amatajkuilol kampa ixnesij akin nemiskej kemej amo ixpoliuisok.
TEIN PANOS ITECH ITAMIAN TONALMEJ
17. ¿Toni kiluijkej Daniel ke panoskia itech nejin tonalmej? (Daniel 12:4, 8-10).
17 ¡Semi techyolpaktia tikmatiskej tein amo uejkaua panos! Sayoj ke se ángel no kiluij Daniel okseki taman tein panoskia axkan oso itech itamian tonalmej (xikonixtajtolti Daniel 12:4, 8-10; 2 Tim. 3:1-5). Nejon ángel kiluij: “Momiakilis tein yekmelauj taixmatilis”. Nejin kijtosneki ke itech itamian tonalmej itekitikauan Dios okachi kuali kiajsikamatiskiaj tein achtook moijtojka itech amatajkuilol Daniel. Nejon ángel no kiluij Daniel okse taman tein panoskia. Kiluij: “Akin amo yolkualmej kichiuaskej tein amo kuali uan nion se akin amo yolkuali kiajsikamatis”.
18. ¿Toni kinpanos amo uejkaua akin amo yolkualmej?
18 Axkan, akin amo yolkualmej kichiuaj tein kinekij uan moita ke kuali yetokej (Mal. 3:14, 15). Sayoj ke amo uejkaua Jesús kiixtalis tein kinnamiki kiseliskej akin kemej yeskia chivos uan kinxelos akin kemej yeskia ichkamej (Mat. 25:31-33). Akin amo yolkualmej amo makisaskej keman mochiuas tetsaujkatajyouilis uan amo oksepa nemiskej. Inintokay amo ijkuiliujtos itech “amatajkuilol tein ika moelnamikij akin kimojkatokaj Jehová”, tein ika tajtoua Malaquías 3:16.
19. ¿Toni moneki tikchiuaskej axkan, uan keyej? (Malaquías 3:16-18).
19 Axkan moneki tiknextiskej ke amo tipouij iniuan akin amo yolkualmej (xikonixtajtolti Malaquías 3:16-18). Jehová kinsentilijtok akin semi kinpatiuita. ¿Melauj ke tiknekij iniuan tipouiskej?
¡Semi kualtsin yeski keman tikitaskej ke oksepa nemi Daniel, akin tikintasojtaj uan oksekin para kiseliskej tein Jehová motenkauak kinmakas itech xochital! (Xikonita párrafo 20).
20. ¿Toni motenkauak Jehová iuan Daniel, uan keyej tikonneki maj mochiua?
20 Semi kualtsin tein axkan panotok, sayoj ke amo uejkaua panos okseki taman tein okachi kualtsin. Amo uejkaua ixpoliuis nochi tein amo kuali. Satepan tikitaskej keniuj mochiua tein Jehová motenkauak iuan Daniel, keman kiluij ke oksepa nemis uan kiselis tein yejuatsin kiluijka ke kimakas (Dan. 12:13). Xa semi tiknekij maj ejkoya tonal keman Daniel oksepa nemis uan no akin semi tikintasojtaj akin momikilijkejya. Yejua ika, maj timochikauakan amo tikauaskej Jehová. Ijkon, yejuatsin kijkuilos totokay itech amatajkuilol kampa ixnesij akin nemiskej.
NEKUIKATIL 80 Xikitakan ke Jiova yolkuali
^ Itech nejin tamachtilis tikitaskej keniuj tikajsikamatij axkan tein kijtoua Daniel 12:2, 3 kampa kijtoua ke miakej kinmachtiskej. Tikitaskej kemanian mochiuas nejin uan akonimej ininka motajtoua. No tikitaskej keniuj tein motamachtis kinpaleuis maj amo kikauakan Jehová akin nemiskej nikan taltikpak keman Satanás kikajkauaskej satepan ke Jesús taixyekanas Mil Xiujmej.
^ Akin yekinika oksepa nemiskej xa yeskij itekitikauan Dios akin okachi yankuixtok momikilijkej itech itamian tonalmej uan satepan akin tepitsin achto momikilijkej uan ijkon motojtokatiaskej. Komo ijkon panoua, nochin uelis kinseliskej akin yejuan kinixmatkej. Biblia kinextia ke ixyetok keniuj yeski keman oksepa nemiskej akin yaskej iluikak, yejua ika tikyekmatij ke no ixyetok keniuj yeski keman oksepa nemiskej nikan taltikpak akin momikilijkejya (1 Cor. 14:33; 15:23).
^ Nejin kiixpata tein moijtouaya itech amatajkuilol Prestemos atención a las profecías de Daniel capítulo 17 uan itech amaix La Atalaya 1 de julio de 1987, páginas 21 hasta 25.
^ Sayoj ke keman itech Hechos 24:15 kijtoua “akin yolmelaujkej uan akin amo yolmelaujkej” uan itech Juan 5:29 “akin kichiujkej tein kuali” uan “akin kichiujkej tein amo kuali”, ika motajtoua tein kichiujkej akin oksepa nemiskej achto ke momikiliskiaj.
