TAMACHTILIS 39
¿Tionijkuiliujtok itech “amatajkuilol kampa ixnesij akin nemiskej”?
“Iixpan moijkuiloj se amatajkuilol tein ika moelnamikij akin kimojkatokaj Jehová” (MAL. 3:16).
NEKUIKATIL 61 ¡Xiksentokakan, itaixpantijkauan Jiova!
TEIN MOITAS *
Ijkon kemej panouanij xiujmej, Jehová kinijkuilouani miakej itech “amatajkuilol kampa ixnesij akin nemiskej”. (Xikonita párrafo 1 uan 2).
1. Kemej kijtoua Malaquías 3:16, ¿katiyejua amatajkuilol kijkuilouani Jehová, uan toni kijkuilojtok ompa?
MIAK xiujmejya Jehová peuak kijkuiloua se amatajkuilol tein semi kualtsin. Ompa ijkuiliujtok inintokay miakej, ika peua Abel akin yekinika kitekitilij Jehová uan amo kikauak (Luc. 11:50, 51). * Ijkon kemej panouanij xiujmej, Jehová kinijkuilouani millones. Itech Biblia moijtoua ke nejin “se amatajkuilol tein ika moelnamikij akin kimojkatokaj Jehová”, oso “amatajkuilol kampa ixnesij akin nemiskej”. Itech nejin tamachtilis keman ika titajtoskej nejin, tikijtoskej “amatajkuilol kampa ixnesij akin nemiskej” (xikonixtajtolti Malaquías 3:16; Apoc. 3:5; 17:8).
2. ¿Akonimej ijkuiliujtokej itech amatajkuilol kampa ixnesij akin nemiskej, uan toni moneki tikchiuaskej komo tiknekij no ompa tiijkuiliujtoskej?
2 Itech nejin amatajkuilol ijkuiliujtokej nochin akin kiueyichiuaj Jehová, kimojkatokaj uan kipatiuitaj itokay. Sekin kichiaj nemiskej nochipaya ompa iluikak uan oksekin nikan taltikpak. Tejuan no uelis ompa tiijkuiliujtoskej komo timochikauaj kuali timouikaskej iuan Jehová, uan nejin ueli tikchiuaj porin Jesús toka momikilij (Juan 3:16, 36). Tinochin tiknekij maj totokay ijkuiliujto itech nejin amatajkuilol.
3, 4. 1) Komo aksa ijkuiliujtok itech amatajkuilol kampa ixnesij akin nemiskej, ¿kijtosneki ke nemis nochipaya? 2) ¿Toni tikitaskej itech nejin tamachtilis uan tein kisentoka?
3 Komo aksa ijkuiliujtok itech amatajkuilol kampa ixnesij akin nemiskej, ¿kijtosneki ke nemis nochipaya? Tein kijtoua Éxodo 32:33 techpaleuis maj tikmatikan. Ompa Jehová kiluij Moisés: “Nikixpolos de noamatajkuilol akin tajtakos noixpan”. Nejin kijtosneki ke Jehová uelis kiixpolos itokay aksa akin ijkuiliujtokya itech nejon amatajkuilol, kemej yeskia kijkuilojtoskia ika lápiz (Apoc. 3:5). Yejua ika moneki tikchiuaskej tein moneki para maj totokay kisentoka ijkuiliujto itech nejon amatajkuilol, hasta keman Jehová kemej yeskia kijkuilosya ika lapicero uan amo keman kiixpolosok.
4 Xa timotajtaniaj seki taman, kemej neskayot, ¿toni kijtoua Biblia keman ininka tajtoua akin ijkuiliujtokej uan akin amo itech amatajkuilol kampa ixnesij akin nemiskej? ¿Kemanian nemiskej nochipaya akin ompa ijkuiliujtokej? ¿Toni kinpanos akin momikilijkej uan amo kiixmatkej Jehová? ¿No ijkuiliujtoskej itech nejon amatajkuilol? Itech nejin tamachtilis uan tein kisentoka ika titajtoskej nejin.
¿AKONIMEJ IJKUILIUJTOKEJ ITECH AMATAJKUILOL?
5, 6. 1) Kemej kijtoua Filipenses 4:3, ¿akonimej ijkuiliujtokejya itech amatajkuilol kampa ixnesij akin nemiskej? 2) ¿Kemanian kijkuiloskej inintokay kemej amo ixpoliuisok?
5 ¿Akonimej ijkuiliujtokej itech amatajkuilol kampa ixnesij akin nemiskej? Para tikmatiskej, ininka titajtoskej makuil tataman taltikpakneminij. Sekin ijkuiliujtokej itech nejin amatajkuilol uan oksekin amo.
6 Yekinika, yejuan akin kinixpejpenkej oso kinijitakej maj tekiuajtikan iuan Cristo ompa iluikak. Inintokay ijkuiliujtokya itech amatajkuilol kampa ixnesij akin nemiskej. Ijkon kemej tatitanil Pablo kiniluij itekitikaikniuan akin nemiaj Filipos, akin kinixpejpenkej maj tekiuajtikan iuan Cristo ijkuiliujtokejya itech nejon amatajkuilol (xikonixtajtolti Filipenses 4:3). Sayoj ke komo kinekij maj inintokay kisentoka ompa ijkuiliujto, moneki amo kikauaskej Jehová. Uan keman kintaliliskejya ininsello, kijkuiloskej inintokay itech amatajkuilol kemej amo ixpoliuisok. Nejin panos achto ke momikiliskej oso achto ke peuas tetsaujkatajyouilis (Apoc. 7:3).
7. ¿Keniuj techpaleuia Apocalipsis 7:16, 17 maj tikmatikan kemanian amo ixpoliuisok inintokay tel miakej itech amatajkuilol kampa ixnesij akin nemiskej?
7 Ojpatika, yejuan tel miakej akin kemej yeskia ichkamej. ¿Ijkuiliujtokya inintokay itech amatajkuilol kampa ixnesij akin nemiskej? Kemaj. ¿Kisentokas ijkuiliujtos inintokay satepan ke panos Armagedón? Kemaj (Apoc. 7:14). Jesús kijtoj ke yejuan, akin kemej yeskia ichkamej, “nemiskej nochipaya” (Mat. 25:46). Sayoj ke akin makisaskej itech Armagedón amo niman moixtalis ox nemiskej nochipaya, porin inintokay ijkuiliujtos kemej yeskia ika lápiz. Keman Jesús taixyekantos Mil Xiujmej, “kinajxitis kampa mextok at tein kichiua maj se nemi”. Akin kitakamatiskej Cristo uan amo keman kikauaskej Jehová, amo ixpoliuisok inintokay itech amatajkuilol kampa ixnesij akin nemiskej (xikonixtajtolti Apocalipsis 7:16, 17).
8. ¿Akonimej amo ijkuiliujtos inintokay itech amatajkuilol kampa ixnesij akin nemiskej, uan toni kinpanos?
8 Expatika, yejuan akin kemej yeskia chivos uan ixpoliuiskej itech Armagedón. Inintokay amo ijkuiliujtok itech amatajkuilol kampa ixnesij akin nemiskej. Jesús kijtoj ke “ixpoliuiskej uan amo kemanok nesiskej” (Mat. 25:46). Uan Pablo no kijtoj ke kintatsakuiltiskej, “ixpoliuiskej uan amo kemanok nesiskej” (2 Tes. 1:9; 2 Ped. 2:9). No ijkon kinpanos nochin akin kiixtalianij kiuijuikaltiskej ichikaualis Dios. Yejuan senkis ixpoliuiskej uan amo nemiskej nochipaya, amo oksepa nemiskej (Mat. 12:32; Mar. 3:28, 29; Heb. 6:4-6). Axkan maj ininka titajtokan sekin akin momikilijkejya uan oksepa nemiskej.
AKIN OKSEPA NEMISKEJ
9. ¿Akonimej oksepa nemiskej nikan taltikpak uan keyej tatamamej? (Hechos 24:15).
9 Biblia ininka tajtoua sekin akin momikilijkejya uan oksepa nemiskej nikan taltikpak, “akin yolmelaujkej uan akin amo yolmelaujkej” (xikonixtajtolti Hechos 24:15). “Akin yolmelaujkej” yejuan akin nochipa kitekitilijkej Jehová. Uan “akin amo yolmelaujkej” yejuan akin amo kitekitilijkej Jehová achto ke momikiliskiaj. Sekin senkis kitapanauilijkej itanauatiluan Jehová ika tein kichiuayaj. Kemej yejuan oksepa nemiskej, ¿kijtosneki ke inintokay ijkuiliujtok itech amatajkuilol kampa ixnesij akin nemiskej? Para tikmatiskej, maj okachi ininka titajtokan.
10. ¿Keyej oksepa nemiskej “akin yolmelaujkej” uan toni kichiuaskej sekin? (No xikonita itech nejin amaix taxelol “Tein tajtanij akin taixtajtoltiaj”, kampa ika tajtoua akin oksepa nemiskej nikan taltikpak).
10 Naujpatika, yejuan “akin yolmelaujkej”. Achto ke momikiliskiaj, ijkuiliujtoyaya inintokay itech amatajkuilol kampa ixnesij akin nemiskej. ¿Ixpoliuik inintokay itech amatajkuilol keman momikilijkej? Amo, porin Jehová kisentoka kinelnamiki. “Yejua amo ininDios mikemej, ta ininDios akin yoltokej, porin yejua kinita ke nochin yejuan yoltokej” (Luc. 20:38). Keman akin yolmelaujkej oksepa nemiskej, inintokay ijkuiliujtos itech amatajkuilol. Sayoj ke yekinika kemej yeskia ika lápiz (Luc. 14:14). Sekin akin oksepa nemiskej yeskij “taixyekananij itech nochi taltikpak” (Sal. 45:16).
11. ¿Toni moneki kichiuaskej akin “amo yolmelaujkej” para maj inintokay moijkuilo itech amatajkuilol kampa ixnesij akin nemiskej?
11 Makuiltika, yejuan “akin amo yolmelaujkej”. Kemej xa amo kiixmatiaj itanauatiluan Jehová achto ke momikiliskiaj, amo kichiuayaj tein yejuatsin kiuelita. Yejua ika, inintokay amo ijkuiliujtok itech amatajkuilol kampa ixnesij akin nemiskej. Sayoj ke keman Jehová kichiuas maj oksepa nemikan, uelis moijkuilos inintokay itech nejon amatajkuilol. Akin amo yolmelaujkej monekis maj semi kinpaleuikan, porin achto ke momikiliskiaj sekin kichiujkej tein tel amo kuali. Monekis kitakamatiskej itanauatiluan Jehová. ITaixyekanalis Dios kichiuas maj motamachti itech nochi taltikpak kemej amo keman mochiuani para kinpaleuiskej akin amo yolmelaujkej.
12. 1) ¿Akonimej kinmachtiskej akin amo yolmelaujkej? 2) ¿Toni kinpanos akin amo kinekiskej tatakamatiskej?
12 ¿Akonimej kinmachtiskej akin amo yolmelaujkej? Tel miakej akin makisaskej keman mochiuas Armagedón uan akin yolmelaujkej akin oksepa nemiskej. ¿Toni monekis kichiuaskej akin amo yolmelaujkej para maj inintokay moijkuilo itech amatajkuilol kampa ixnesij akin nemiskej? Monekis kuali mouikaskej iuan Jehová uan motemaktiskej iuan. Jesús uan akin iuan taixkeyakanaskej, akin yeskij kemej tamelauanij kiitaskej tein kichiuaskej akin amo yolmelaujkej (Apoc. 20:4). Komo aksa amo kineki tatakamatis, niman kiixpoloskej maski kipias 100 xiujmej (Is. 65:20). Kemej Jehová uan Jesús kimatij tein tiknemiliaj uan tein tikmachiliaj, kiitaskej maj amo akin kichiua tein amo kuali itech xochital (Is. 11:9; 60:18; 65:25; Juan 2:25).
AKIN NEMISKEJ NOCHIPAYA UAN AKIN KIIXTALISKEJ TEIN KINNAMIKI KISELISKEJ
13, 14. 1) ¿Keniuj tikajsikamatiaj achto tein Jesús kijtoj itech Juan 5:29? 2) ¿Toni moneki tikitaskej keman tikixtajtoltiskej tein Jesús kijtoj?
13 Jesús no ininka tajtoj akin oksepa nemiskej nikan taltikpak. Kemej neskayot, kijtoj: “Ejkos hora keman nochin akin yetokej itech miketekochmej, kikakiskej itajtol uan ualkisaskej: akin kichiujkej tein kuali, nemiskej nochipaya, sayoj ke akin kichiujkej tein amo kuali, kiixtaliskej tein kinnamiki kiseliskej” (Juan 5:28, 29). ¿Toni kijtosnekik Jesús?
14 Achto tiknemiliayaj ke Jesús ika tajtojtoya tein kichiuaskiaj satepan ke oksepa nemiskej. Tein kijtosneki, ke sekin kichiuaskiaj tein kuali uan oksekin kichiuaskiaj tein amo kuali. Sayoj ke Jesús amo kijtoj ke akin oksepa nemiskej kichiuaskej tein kuali oso kichiuaskej tein amo kuali, ta kijtoj “akin kichiujkej tein kuali” uan “akin kichiujkej tein amo kuali”. Nejin kijtosneki ke ika tajtojtoya tein kichiujkej achto ke momikiliskiaj. Uan nejin taixejekol porin itech xochital amo kikauaskej maj aksa kichiua tein amo kuali. Akin amo yolmelaujkej kichiujkej tein amo kuali achto ke momikiliskiaj. Komo ijkon, ¿toni kijtosnekik Jesús keman kijtoj ke sekin “nemiskej nochipaya” uan oksekin “kiixtaliskej tein kinnamiki kiseliskej”?
15. ¿Akonimej “nemiskej nochipaya” keman oksepa nemiskej, uan keyej?
15 Keman oksepa nemiskej akin yolmelaujkej oso akin kichiujkej tein kuali, “nemiskej nochipaya” porin inintokay ijkuiliujtokya itech amatajkuilol kampa ixnesij akin nemiskej. Nejin kijtosneki ke keman itech Juan 5:29 ininka tajtoua “akin kichiujkej tein kuali” no yejuan “akin yolmelaujkej” akin ininka motajtoua itech Hechos 24:15. Uan nejin mouika ika tein kijtoua Romanos 6:7: “Akin momikilia kitapojpoluiliaj itajtakol”. Tein kijtosneki ke keman akin yolmelaujkej momikiliaj, Jehová kintapojpoluia inintajtakoluan, sayoj ke kielnamiki nochi tein kuali tein kichiujkej (Heb. 6:10). Sayoj ke keman oksepa nemiskej akin yolmelaujkej, moneki kisentokaskej kitekitiliskej Jehová para maj inintokay kisentoka ijkuiliujto itech amatajkuilol kampa ixnesij akin nemiskej.
16. ¿Toni kijtosneki ke kiixtaliskejok “tein kinnamiki kiseliskej” sekin akin oksepa nemiskej?
16 ¿Uan toni kinpanos akin kichiujkej tein amo kuali achto ke momikiliskiaj? Jehová kintapojpoluij inintajtakoluan keman momikilijkej, sayoj ke amo kitekitilijkej. Yejua ika inintokay amo ijkuiliujtok itech amatajkuilol kampa ixnesij akin nemiskej. “Akin kichiujkej tein amo kuali” no yejuan “akin amo yolmelaujkej” akin ininka motajtoua itech Hechos 24:15. Keman moijtoua ke kiixtaliskejok “tein kinnamiki kiseliskej”, * kijtosneki ke monekisok kiitaskej tein kichiuaskej (Luc. 22:30). Moneki panos tiempo para kiitaskej akonimej kinnamiki kinijkuiloskej itech amatajkuilol kampa ixnesij akin nemiskej. Yejua ika, moneki kikauaskej tein amo kuali tein kichiuayaj uan kitekitiliskej Jehová.
17, 18. 1) ¿Toni monekis kichiuaskej akin oksepa nemiskej nikan taltikpak? 2) ¿Toni kijtosneki keman itech Apocalipsis 20:12, 13 kijtoua ke akin oksepa nemiskej kiixtaliskej “tein kinnamiki kiseliskej [...] por nochi tein kichiujkej”?
17 Maski achto ke momikiliskiaj sekin katkaj yolmelaujkej uan oksekin amo, keman oksepa nemiskej nochin moneki kitakamatiskej tanauatilmej tein motemakaskej itech mil xiujmej. Tatitanil Juan kijtoj tein Dios kichiuak maj kiitani: “Nikinitak akin momikilijkaj, akin ueyichiuanimej uan akin amo, ijkatoyaj iixpan ueyi silla uan motapojkej amatajkuilolmej. Sayoj ke motapoj okse amatajkuilol, nejin yejua kampa ixnesij akin nemiskej. Uan akin tokotsyetok itech ueyi silla kiixtalij tein kinnamiki kiseliskej akin momikilijkaj por nochi tein kichiujkej, ijkon kemej ijkuiliujtoya itech nejon amatajkuilolmej” (Apoc. 20:12, 13).
18 ¿Keniuj kiixtaliskej tein kinnamiki kiseliskej akin oksepa nemiskej? Amo kiitaskej tein kichiujkej achto ke momikiliskiaj porin keman momikilijkej Jehová kintapojpoluij inintajtakoluan, ta kiitaskej keniuj kiseliskej tein kinmachtiskej itech xochital. Hasta seki itekitikauan Jehová akin amo keman kikaujkej kemej Noé, Samuel, David uan Daniel monekis momachtiskej akoni Jesús, keyej toka momikilij uan itech takuaujtamatiskej. Komo yejuan monekis kichiuaskej nejon, okachiok akin amo yolmelaujkej.
19. ¿Toni kinpanos akin amo kiseliskej tein kinmachtiskej?
19 ¿Toni kinpanos akin amo kiseliskej tein kinmachtiskej? Apocalipsis 20:15 kijtoua: “Akin amo ijkuiliujtoyaj itech amatajkuilol kampa ixnesij akin nemiskej, kinpantamotkej kampa kuakualakatok tit”. Nejin kijtosneki ke senkis kinixpoloskej. Yejua ika semi moneki maj timochikauakan para maj totokay ijkuiliujto itech amatajkuilol kampa ixnesij akin nemiskej uan maj kisentoka ompa ijkuiliujto.
Se tokniuj takat tapaleuia keman motamachtia itech Mil Xiujmej. (Xikonita párrafo 20).
20. ¿Toni mochiuas itech Mil Xiujmej keman Jesús taixyekantos? (Xikonita taixkopin ipeujyan amaix).
20 Nochi tein mochiuas itech Mil Xiujmej keman Jesús taixyekantos semi kualtsin yeski. Kinmachtiskej semi miakej kemej amo keman mochiuani. Sayoj ke ijkuak, no moitas tein kichiuaskej akin yolmelaujkej uan akin amo yolmelaujkej (Is. 26:9; Hech. 17:31). ¿Keniuj kinmachtiskej akin oksepa nemiskej? Nejin tikitaskej itech okse tamachtilis uan techpaleuis maj tikpatiuitakan tein mochiuas.
NEKUIKATIL 147 Dios motenkaua ke tinemiskej nochipaya
^ Itech nejin tamachtilis tikitaskej keniuj tikajsikamatij axkan Juan 5:28, 29 keman Jesús kijtoj: “Akin kichiujkej tein kuali, nemiskej nochipaya, sayoj ke akin kichiujkej tein amo kuali, kiixtaliskej tein kinnamiki kiseliskej”. Tikitaskej toni kijtosneki nejin uan akonimej ininka motajtoua.
^ Nejin amatajkuilol peuak moijkuiloua “desde keman peuak yolij akin nemij nikan taltikpak”. Keman moijtoua “akin nemij nikan taltikpak” kijtosneki akin uelis kinpaleuis tein Jesús kichiuak keman momikilij (Mat. 25:34; Apoc. 17:8). Uan nesi ke Abel yejua akin yekinika ijkuiliujtok itech amatajkuilol kampa ixnesij akin nemiskej.
^ Achto tikijtouayaj ke tajtolmej “kiixtaliskej tein kinnamiki kiseliskej” kijtosnekia teisa tein amo kuali oso ke aksa kitatsakuiltiskej. Uan tein melauj nejon tajtolmej xa uelis ijkon moajsikamatis. Sayoj ke keman Jesús ika tajtoj nejin itech Juan 5:29 amo kijtosnekia nejin, ta ika tajtojtoya keman se kiita tein kichiua aksa. Se diccionario bíblico griego kijtoua ke nejin tajtolmej kijtosnekij “keman se kiita tein kichiua aksa”.
