1. ¿Keyej amo tikmojkaitaj maj miakej amo kimatikan akoni iuan takuaujtamatiskej?

 ITECH nejin taltikpak kampa Satanás taixyekana, miakej amo kimatij akoni iuan takuaujtamatiskej porin tanamakanij, tekiuanij uan akin taixyekanaj itech taneltokalis miakpa kinkajkayauanij. Uan kiitaj ke no ijkon kichiuaj akin kuali iniuan mouikaj, akin nemij kampa ika yejuan nemij uan hasta ininchankauan. Nejin amo moneki tikmojkaitaskej porin itech Biblia achtook moijtojka ke itech itamian tonalmej miakej tekauaskiaj, tetakajkayauiliskiaj uan kinchiuiliskiaj tein amo kuali inintasojikniuan. Kinextiskiaj ke kichiuaj kemej Satanás akin taixyekana nikan taltikpak, akin amo ueli iuan se takuaujtamati (2 Tim. 3:1-4; 2 Cor. 4:4).

2. 1) ¿Akoni uelis senkis iuan titakuaujtamatiskej? 2) ¿Toni xa motajtaniaj sekin?

² Akin tikchiuaj kemej Cristo tikmatij ke uelis senkis titakuaujtamatiskej iuan Jehová (Jer. 17:7, 8). Tikmatij ke techtasojta uan ke amo keman kinkauas akin kuali iuan mouikaj (Sal. 9:10). No titakuaujtamatij iuan Jesús porin toka momikilij (1 Ped. 3:18). Uan tikitanij ke no uelis titakuaujtamatiskej itech tein Biblia tayolmajxitia (2 Tim. 3:16, 17). Senkis tikmatij ke uelis titakuaujtamatiskej iuan Jehová, Jesús uan itech Biblia. Sayoj ke sekin xa motajtaniaj ox uelis nochipa takuaujtamatiskej iniuan tokniuan. Komo kemaj, ¿keyej uelis titakuaujtamatiskej iniuan?

3. ¿Toni tatiochiualis tikpiaj? (Marcos 10:29, 30).

³ Jehová techmakani tatiochiualis maj tipouikan iniuan miakej tokniuan itech nochi taltikpak akin kemej yeskiaj tochankauan. Uan yejua ika tikseliaj miak taman tein kuali (xikonixtajtolti Marcos 10:29, 30). Itech nochi taltikpak  moajsij tokniuan akin kitasojtaj Jehová ijkon kemej tejuan uan mochikauaj kitakamatiskej. Maski tataman kemej titajtouaj, timotakentiaj uan tataman tein timomattokej tikchiuaskej, keman timoixmatij iniuan tokniuan niman peua timotasojtaj. Uan okachi tikuelitaj porin tiksenueyichiuaj toTajtsin Jehová akin semi techtasojta (Sal. 133:1).

4. ¿Keyej moneki maj tokniuan techpaleuikan?

⁴ Axkan moneki maj okachi kuali timouikakan iniuan tokniuan. Kemansa yejuan techpaleuiaj keman tikpiaj ouijkayomej (Rom. 15:1; Gál. 6:2). No techyolchikauaj maj tiksentokakan tiktekitilikan Jehová uan maj tiksentokakan iuan titakuaujtamatikan (1 Tes. 5:11; Heb. 10:23-25). Komo tokniuan amo techpaleuiskiaj, semi ouij techkisaskia tikixnamikiskej Satanás uan nochin akin kichiuaj kemej yejua. Amo uejkaua senkis kinixnamikiskej itekitikauan Dios uan ijkuak semi timotasojkamatiskej maj tikinpiakan tokniuan.

5. ¿Keyej sekin ouij kinkisa takuaujtamatiskej iniuan tokniuan?

⁵ Sayoj ke sekin xa ouij kinkisa takuaujtamatiskej iniuan tokniuan, xa porin kitapouijkej se tokniuj teisa tein amo monekia teiluis, sayoj ke satepan kiniluij oksekin. Oso xa se tokniuj kijtoj ke kichiuaskia teisa uan amo kichiuak. Oso xa se tokniuj kijtoj oso kichiuak teisa tein kinyolkokoj. Komo ijkon panoua, ¿toni techpaleuis maj okachi titakuaujtamatikan iniuan tokniuan?

6. Komo tikintasojtaj tokniuan, ¿keniuj nejon techpaleuis maj okachi titakuaujtamatikan iniuan? (1 Corintios 13:4-8).

⁶ Komo tikintasojtaj tokniuan uelis titakuaujtamatiskej iniuan. Itech 1 Corintios capítulo 13 ika tajtoua tein kichiua aksa akin tetasojta. Komo tikchiuaj tein ompa  kijtoua techpaleuis maj okachi titakuaujtamatikan iniuan tokniuan oso maj oksepa iniuan titakuaujtamatikan komo kichiujkej teisa tein techyolkokoj (xikonixtajtolti 1 Corintios 13:4-8). Kemej neskayot, itech versículo 4 kijtoua ke “akin tetasojta amo yolijsiui uan kualtakat”. Jehová amo yolijsiui touan maski tikchiuaj teisa tein kiyolkokoua. Yejua ika tejuan amo no moneki tiyolijsiuiskej iniuan tokniuan komo kichiuaj oso kijtouaj teisa tein techyolkokoua oso techkualantia. Versículo 5 no kijtoua ke akin tetasojta “amo niman kualani. Amo kipoujtiuj tein kichiuiliaj”. Amo tiknekij tikpoujtiaskej tein techchiuiliaj tokniuan, tein kijtosneki ke amo tiksentokaj tikelnamikij tein techchiuilijkej. Eclesiastés 7:9 kijtoua ke maj amo niman tikualanikan. Okachi kuali maj tikchiuakan tein kijtoua Efesios 4:26: “Amo xikualantokan nochin tonal”.

7. ¿Toni tein motayolmajxitia itech Mateo 7:1-5 techpaleuia maj okachi titakuaujtamatikan iniuan tokniuan?

⁷ Komo tikinitaj tokniuan kemej Jehová kinita no techpaleuis maj iniuan titakuaujtamatikan. Yejuatsin kintasojta uan amo kisentoka kielnamiki tein amo kuali tein kichiuaj. Yejua ika tejuan no moneki ijkon tikchiuaskej (Sal. 130:3). Amo moneki tikitaskej toni ika mopolouaj, ta moneki tikitaskej ininkualneskayouan uan ke uelisok kichiuaskej tein kuali (xikonixtajtolti Mateo 7:1-5). Amo niman tiknemiliaj ke kinekij techyolkokoskej, porin akin tetasojta “nochi kineltoka” (1 Cor. 13:7). Jehová kineki maj titakuaujtamatikan iniuan tokniuan porin yejuan kinextianij ke uelis ijkon tikchiuaskej. *

8. ¿Toni techpaleuis maj okachi titakuaujtamatikan iniuan tokniuan?

⁸ Ijkon kemej moneki tiempo para tikinpoujkaitaskej oksekin, no moneki tiempo para titakuaujtamatiskej iniuan oksekin. ¿Toni techpaleuis maj okachi titakuaujtamatikan iniuan tokniuan? Maj kuali tikinixmatikan, maj titajtokan iniuan itech nechikolmej, maj tisentanojnotsakan, maj amo tiyolijsiuikan uan maj tikauakan maj kinextikan ox takuaujtamachmej. Keman amo semi tikixmatij aksa xa amo tiktapouiaj miak taman. Sayoj ke, ijkon kemej okachi tikixmatij okachi kuali timomachiliaj iuan uan xa tikiluiaj keniuj timomachiliaj (Luc. 16:10). Uan komo se tokniuj kichiuak teisa tein techyolkokoj, maj amo niman tikixtalikan amo iuan timouikaskejok, ta maj tikauakan maj pano tiempo. Tein kichiuas aksa maj amo techtsakuili maj titakuaujtamatikan iniuan oksekin. No techpaleuis komo tikitaj tein kichiujkej seki itekitikauan Jehová ne uejkauj akin kisentokakej takuaujtamatkej iniuan oksekin maski kinyolkokojkej.

9. 1) ¿Toni kichiuak Ana maski kichiuayaj tein amo kuali akin Jehová kinixtalijka maj taixyekanakan? 2) ¿Toni mitsonmachtia tein kichiuak Ana? (Xikonita taixkopin).

⁹ ¿Mitsonyolkokouani tein kichiuani se tokniuj akin kipia tekimej itech inechikol Jehová? Komo ijkon, tein kichiuak Ana uelis mitsonpaleuis. Ijkuak, akin kinixyekanaya israelitas para maj kiueyichiuakan Jehová katka tayekankatiopixkat Elí. Sayoj ke tein kichiuayaj ichankauan amo kinpaleuiaya oksekin. Ikoneuan akin katkaj tiopixkamej auilnemiaj, uan Elí amo mochikauaya kinmelauas. Maski ijkon, Jehová amo niman kikuilij tekit tein kipiaya. ¿Toni kichiuak  Ana? Maski Elí kisentokaya kemej tayekankatiopixkat, Ana yaya kiueyichiuati Jehová itech tabernáculo. Keman Ana kitataujtijtoya Jehová porin semi motayokoltijtoya, Elí kinemilij ke uintitoya uan kiluij tein amo kiyolchikauak (1 Sam. 1:12-16). Ana kiluijka Jehová ke komo kipiaya se okichpiltsin kitemakaskia para maj kitekitili itech tabernáculo. Kichiuak tein motenkaujka maski Elí kiyekpiaskia iokichpiltsin (1 Sam. 1:11). Sayoj ke monekia maj kinmelauakan ikoneuan Elí uan Jehová kichiuak keman kiitak ke okachi kuali (1 Sam. 4:17). Uan Jehová kitatiochiuij Ana keman kichiuak maj kipia se konetsin, akin kitokaytij Samuel (1 Sam. 1:17-20).

10. ¿Keniuj kinextij David ke kisentokaya takuaujtamatia iniuan oksekin maski kichiuilijkaj tein amo kuali?

¹⁰ ¿Kemansa mitsonchiuiliani teisa tein amo kuali aksa akin iuan tionmouika? Komo kemaj, xikonita tein kipanok tekiuaj David. Keman iokichpil Absalón kinekia taixyekanas, Ahitofel kipaleuij uan yejua kuali mouikaya iuan David. Nejin xa semi kiyolkokoj David porin iokichpil uan se akin kuali iuan mouikaya kiixnamikkej. Sayoj ke nejin amo kichiuak maj David amo takuaujtamatiniok iniuan oksekin, ta kisentokak takuaujtamatik iuan Husái, akin amo keman kikauak uan amo kinpaleuij akin taixnamikkej. Uan semi kuali tein kichiuak, porin Husái kipaleuij maski ueliskia momikilis (2 Sam. 17:1-16).

11. ¿Keniuj kinextij se itakeual Nabal ke takuaujtamatia iniuan oksekin?

¹¹ Axkan itech xiontanemili tein kichiuak semej itakeualuan Nabal, se takat israelita akin semi tominpiaya. David uan takamej akin iuan yajtinemiaj kinpaleuijkaj itakeualuan Nabal. Satepan David kiluij Nabal maj kinmakani teisa tein kikuaskej, sayoj ke amo kinekik. Yejua ika David semi kualanik uan kijtoj ke kinmiktiskia nochin takamej akin nemiaj ichan Nabal. Se takeual kiluito Abigaíl, isiuatsin Nabal, tein panotoya porin kimatia ke ueliskia kimiktiskej. Yejua amo choloj, ta takuaujtamatik ke Abigail kichiuaskia teisa porin kimatia ke semi tamatkej katka. Uan semi kuali tein kichiuak porin Abigail moyolchikauak uan kiluito David maj amo  kichiuani tein kiixtalijtoya (1 Sam. 25:2-35). Uan Abigail takuaujtamatik ke David yektanemiliskia.

12. ¿Keniuj kinextij Jesús ke takuaujtamatia iniuan itatitaniluan maski mopolouayaj?

¹² Jesús takuaujtamatik iniuan itatitaniluan maski mopolouayaj (Juan 15:15, 16). Keman Santiago uan Juan kitajtanijkej uejueyi tekimej keman taixyekanaskia, Jesús amo kinemilij ke kitekitiliayaj Jehová porin kinekiaj kiseliskej teisa nion kiniluij ke amo yeskiajok itatitaniluan (Mar. 10:35-40). Uan youak keman Jesús kikitskijkej nochin kikaujteujkej (Mat. 26:56). Maski ijkon, Jesús kisentokak takuaujtamatik iniuan. Maski kimatia ke mopolouayaj “kisentokak kintasojtak hasta keman momikilij” (Juan 13:1). Uan satepan ke oksepa nemik, kiniluij 11 itatitaniluan akin amo keman kikaujkaj maj kiixyekananij tekit keman kinpaleuiskiaj oksekin maj kitojtokakan uan maj kinyekpianij iichkauan (Mat. 28:19, 20; Juan 21:15-17). Uan kuali tein kichiuak Jesús porin nochin itatitaniluan kisentokakej kitekitilijkej Jehová hasta keman momikilijkej. Kemej tikitakejya, Ana, David, itakeual Nabal, Abigaíl uan Jesús takuaujtamatkej iniuan oksekin maski tajtakolejkej katkaj. Tein kichiujkej techpaleuia maj no ijkon tikchiuakan.

13. ¿Keyej kemansa ueliskia ouij techkisas titakuaujtamatiskej iniuan oksekin?

¹³ ¿Kemansa tikiluianij teisa se tokniuj uan satepan tikmatkej ke kiniluijya oksekin? Semi techyolkokoua keman aksa kichiua nejon. Se tonal, se tokniuj siuat kiluij se tayekankej se taman tein kipanotoya, mostika isiuatsin nejon tayekankej kinotsak porin kinekia kiyolchikauas. Nejon tayekankej kiluijka isiuatsin tein kipanotoya tokniuj, yejua ika tokniuj siuat amo iuan takuaujtamatiaok nejon tayekankej. Sayoj ke yejua kichiuak teisa tein tapaleuij. Kinojnotsak okse tayekankej uan yejua kipaleuij maj oksepa takuaujtamatini iniuan tayekananij.

14. ¿Toni kipaleuij se tokniuj takat maj oksepa takuaujtamatini iniuan oksekin?

¹⁴ Se tokniuj takat uejkauak kualantoya iniuan ome tayekananij porin kinemiliaya ke amo katkaj takuaujtamachmej. Sayoj ke kielnamikik se taman tein kijtojka se tokniuj akin semi kipoujkaitaya: “Satanás yejua akin techtauelita, amo tokniuan”. Tokniuj itech tanemilij nejin uan kitataujtij Jehová. Satepan uelik oksepa kuali mouikak iniuan nejon ome tayekananij.

15. ¿Toni ueliskia kichiuas maj uejkaua para uelis oksepa titakuaujtamatiskej iniuan oksekin? Xikonijto tein kipanok Grete.

¹⁵ ¿Mitsonkuilianij se tekit tein tikonpiaya itech nechikol? Nejon xa semi teyolkokoua. Maj tikitakan tein kipanok Grete uan imomaj, ome tokniuan siuamej akin nenkej kemej itech xiuit 1930. Yejuan kitekitilijkej Jehová uan amo keman kikaujkej. Nemiaj Alemania keman nazis amo kinkauayaj itaixpantijkauan Jehová maj taueyichiuakan. Tokniuan kiluijkej Grete maj kipanoltiani itech amat amaix Tanejmachtijkej tein kinmakayaj tokniuan. Satepan kimatkej ke ipopaj semi taixnamikia uan kemej kinemiliayaj ke ueliskia kinteluilis kikuilijkej Grete tekit tein kipiaya. Sayoj ke Grete kipanok okseki taman. Keman mochiujtoya Ojpatika Ueyi Neteuilis, tokniuan amo kinmakayajok amaixmej yejua uan imomaj nion kintajpalouayaj keman kinitayaj. Nejon semi kiyolkokoj Grete, uan semi uejkauak para kintapojpoluij nejon tokniuan uan  para oksepa iniuan takuaujtamatik. Satepan kiajsikamatik ke Jehová kintapojpoluijkaya uan yejua ika no monekia ijkon kichiuas. *

16. ¿Keyej moneki timochikauaskej titakuaujtamatiskej iniuan tokniuan?

¹⁶ Komo tikpanouanij se taman kemej tein kipanokej tokniuan akin ininka titajtojkej, maj timochikauakan oksepa titakuaujtamatiskej iniuan tokniuan. Xa uejkauas sayoj ke amo nenkaj yeski. Kemej neskayot, komo tikuaj teisa uan techpoxkokoua, satepan xa okachi kuali tikitaskej tein tikuaj, sayoj ke tiksentokaskej titakuaskej. No ijkon, komo aksa techchiuilia teisa tein amo kuali, maj amo tikauakan maj nejon kichiua maj amo titakuaujtamatikanok iniuan tokniuan maski tajtakolejkej. Komo oksepa titakuaujtamatij iniuan, okachi tiyolpakiskej uan tikitaskej keniuj uelis titapaleuiskej itech nechikol para maj tokniuan takuaujtamatikan iniuan oksekin.

17. 1) ¿Keyej semi moneki maj titakuaujtamatikan iniuan oksekin? 2) ¿Toni tikitaskej itech okse tamachtilis?

¹⁷ Itech nejin taltikpak kampa Satanás taixyekantok miakej amo iniuan takuaujtamatij oksekin. Sayoj ke akin tiktekitiliaj Jehová titakuaujtamatij iniuan tokniuan porin timotasojtaj. Yejua ika tiyolpakij uan kuali timouikaj. Uan satepan keman okachi motaouijkantalis nejin semi techpaleuis. Sayoj ke, ¿toni uelis tikchiuaskej komo techyolkokoj tein kichiuak se tokniuj? Para uelis oksepa iuan titakuaujtamatiskej moneki timochikauaskej tikitaskej tein panok kemej Jehová kiita, tikchiuaskej tein kijtoua Biblia, timochikauaskej okachi tikintasojtaskej tokniuan uan timomachtiskej tein kichiujkej akin ininka motajtoua itech Biblia. Komo ijkon tikchiuaj, tikinpiaskej okachi totasojikniuan akin okachi amo tekauaj ke se tokniuj (Prov. 18:24). Sayoj ke, amo sayoj moneki maj titakuaujtamatikan iniuan tokniuan, ta yejuan no moneki kiitaskej ke uelis touan takuaujtamatiskej. Itech okse tamachtilis tikitaskej toni uelis tikchiuaskej para maj touan takuaujtamatikan.