Maj tikitakan tein kijtoua Biblia.

Hechos 24:15 kijtoua ke Dios kichiuas maj oksepa nemikan “akin yolmelaujkej uan akin amo yolmelaujkej”. Akin yolmelaujkej yejuan akin kitakamatkej Dios achto ke momikiliskiaj, uan inintokay ijkuiliujtok itech amatajkuilol kampa ixnesij akin nemiskej (Mal. 3:16). Akin amo yolmelaujkej yejuan akin amo uelik kiixmatkej Jehová achto ke momikiliskiaj, yejua ika inintokay amo ijkuiliujtok itech amatajkuilol kampa ixnesij akin nemiskej.

Akin ininka motajtoua itech Juan 5:28, 29 no yejuan akin ininka motajtoua itech Hechos 24:15. Jesús kijtoj ke “akin kichiujkej tein kuali” oksepa nemiskej uan “nemiskej nochipaya, sayoj ke akin kichiujkej tein amo kuali, kiixtaliskej tein kinnamiki kiseliskej”. Akin yolmelaujkej kichiujkej tein kuali achto ke momikiliskiaj, yejua ika oksepa nemiskej para nemiskej nochipaya porin inintokay ijkuiliujtok itech amatajkuilol kampa ixnesij akin nemiskej. Sayoj ke akin amo yolmelaujkej amo kichiujkej tein kuali achto ke momikiliskiaj uan yejua ika keman oksepa nemiskej kiixtaliskej tein kinnamiki kiseliskej. Inintokay ayamo ijkuiliujtok itech amatajkuilol kampa ixnesij akin nemiskej, monekisok kiitaskej tein kichiuaskej. Ijkuak, kinpaleuiskej maj kiixmatikan Jehová uan ika tein kichiuaskej, moixtalis ox moijkuilos inintokay itech amatajkuilol kampa ixnesij akin nemiskej.

Apocalipsis 20:12, 13 kijtoua ke nochin akin oksepa nemiskej monekis kitakamatiskej tein ijkuiliujtos itech “amatatetekuinolmej”, oso yankuik tanauatilmej tein motemakas itech xochital. Akin amo tatakamatiskej kinixpoloskej (Is. 65:20).

Daniel 12:2 kijtoua ke sekin oksepa nemiskej “para nemiskej nochipaya uan oksekin para kinpinaujtiskej uan para kinixtopeuaskej nochipaya”. Nejin versículo ika tajtoua tein kiseliskej akin oksepa nemiskej, sekin “nemiskej nochipaya” uan oksekin “kinixtopeuaskej nochipaya”. Yejua ika, satepan ke tamis 1,000 xiujmej sekin nemiskej nochipaya uan oksekin senkis kinixpoloskej (Apoc. 20:15; 21:3, 4).

Uelis tikijtoskej ke akin oksepa nemiskej kemej yeskia aksa akin kineki nemitiuj itech okse altepet. Akin yolmelaujkej kemej yeskia akin kinmakaj se amat tein ika ueli youi itech okse altepet uan tein kinextia ke uelis ompa nemiskej oso tekitiskej. Sayoj ke akin amo yolmelaujkej kemej yeskia akin kinmakaj se amat tein ika ueli youij itech okse altepet sayoj seki tonalmej oso sayoj uelij paxalotij. Komo kinekij kisentokaskej itech nejon altepet, moneki kichiuaskej tein kintajtaniaj. No ijkon, komo akin amo yolmelaujkej kinekij mokauaskej itech xochital moneki kitakamatiskej itanauatiluan Jehová uan kinextiskej ke yolmelaujkej. Akin youij itech se altepet xa kinmakaj tataman amamej. Sayoj ke keman kiitaj tein kichiuaj itech nejon altepet, sekin kinkauaj maj ompa nemikanya uan oksekin kinkixtiaj. No ijkon, para moixtalis ox mokauaskej itech xochital akin oksepa nemiskej, monekis kiitaskej tein kichiuaskej uan ox amo kikauaj Jehová.

Jehová se Dios akin teiknelia, sayoj ke no kichiua tein kuali yetok uan tein melauak (Deut. 32:4; Sal. 33:5). Kinextis ke tetasojta keman kichiuas maj oksepa nemikan akin yolmelaujkej uan akin amo yolmelaujkej. Sayoj ke kichias maj nochin kitakamatikan tein yejuatsin kiixtalis ke kuali uan tein amo kuali. Sayoj akin kitasojtaskej uan akin kitakamatiskej itanauatiluan kisentokaskej nemiskej itech xochital.