1. ¿Toni kichiuanij tayekananij itech taneltokalis kampa kijtouaj kichiuaj kemej Cristo keman onkak neteuilis?

¿KINEKI Dios maj akin kichiuaj kemej Cristo yakan itech neteuilis uan maj kinmiktitij akin kayomej itech okseki altepemej? Yejua nejon kichiuanij itech cien xiujmej tein panouanij miakej akin kijtouayaj ke kichiuaj kemej Cristo. Tayekananij católicos kintiochiuanij tateuianij uan teposmej tein ika tateuiaj. Ijkon, yejuan youij kinmiktitij católicos akin nemij itech okse altepet tein iuan motauelitaj. Uan no ijkon kichiuanij tayekananij protestantes. Yejua nejon motelitak ke kichiujkej itech Ojpatika Neteuilis tein Mochiuak itech Nochi Taltikpak.

2, 3. 1) ¿Toni kichiujkej itaixpantijkauan Jiova itech Ojpatika Neteuilis tein Mochiuak itech Nochi Taltikpak uan satepan? 2) ¿Keyej yejuan senkis kiixtalijkej kichiuaskej nejon?

² ¿Toni kichiujkej itaixpantijkauan Jiova itech Ojpatika Neteuilis tein Mochiuak itech Nochi Taltikpak? Yejuan amo tapaleuijkej. ¿Keyej ijkon kichiujkej? Yekinika, porin kitojtokakej ineskayo Jesús uan kitakamatkej tein tamachtij. Yejua kijtoj: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:35). Uan no kiitakej itajtoluan Pablo tein kinijkuilouilij tokniuan akin nemiaj Corinto uan kikuikej keman kipanotoyaj se taman kemej nejon (xikonixtajtolti 2 Corintios 10:3, 4).

 ³ Kemej akin yekmelauj kichiuaj kemej Cristo momachtiaj Biblia, inintanemilil kiniluia ke amo kuali maj momachtikan tateuiskej nion maj yakan itech neteuilis. Kemej senkis kiixtalijtokej kichiuaskej nejon, tel miakej tokniuan takamej uan siuamej akin tataman xiuit kipiaj semi kintajyouiltianij. Miakej kintsakuanij uan yetonij kampa kinteltekitiltiayaj. Keman nazis taixyekantoyaj Alemania, seki tokniuan hasta kinmiktijkej. Maski kijyouijkej nochi nejon, itaixpantijkauan Jiova akin kayomej Europa amo keman kielkaujkej ke kiselijtokej tanauatil maj kitetapouikan kuali tanauatilmej ika iTekiuajyo Jiova. Yejua ika kisentokakej tanojnotskej kampa tsaktoyaj, kampa okseko kinuikayaj uan kampa kintsakuayaj uan kinteltajyouiltiayaj. * Seki xiujmej satepan, itech xiuit 1994, amo no tapaleuijkej keman kinmijmiktijkej maseualmej ompa Ruanda. Uan amo no tapaleuijkej keman tel miakej kinmiktijkej itech neteuilis tein mochiuak Balcanes ijkuak kichiujkej maj amo moajsiok tein achto katka Yugoslavia.

4. ¿Toni senkis kineltokaj miakej keman kiitanij ke amo titapaleuiaj itech neteuilis?

⁴ Keman tel miakej taltikpakneminij noyampa taltikpak kiitanij ke senkis amo titapaleuiaj itech neteuilis, kinpaleuiani maj senkis kineltokakan ke tiitaixpantijkauan Jiova yekmelauj tiktasojtaj Dios uan taltikpakneminij uan yekmelauj tikchiuaj kemej Cristo. ¿Toni okseki tamanok miakej kintaneltoktiani ke yekmelauj tikchiuaj kemej Cristo?

5. ¿Toni taman monekik kipataskej yekinika itatojtokakauan Jesús?

⁵ Jesús senkis kinextij ke motelneki maj motetapoui kuali tanauatilmej ika iTekiuajyo Dios. Kinixpejpenak 12 imomachtijkauan maj kipeualtiskiaj se tekit tein ajsiskia itech nochi taltikpak uan satepan kinmachtij okseki 70 (Luc. 6:13; 10:1). Jesús kinpaleuij maj ueliskiaj kinmatiltiskiaj oksekin kuali tanauatilmej. Yekinika, monekia kinmachtiskej judíos, sayoj ke satepan kiselijkej se tanauatil tein amo kichiayaj: no monekiskia kinmatiltiskej kuali tanauatilmej akin nemij itech okseki altepemej. ¡Semi ueyi tein monekik kipataskej imomachtijkauan Jesús akin katkaj judíos! (Hech. 1:8.)

6. ¿Toni kipaleuij Pedro maj kiajsikamatini ke Jiova amo techikotasojta?

⁶ Tatitanil Pedro kititankej maj tanojnotsati ichan Cornelio akin amo katka judío. Ompa, Pedro kiajsikamatik ke Dios amo techikotasojta. Satepan tanauatij maj Cornelio uan ichankauan moauianij (Hech. 10:9-48). Nejon tonal uan satepan, monekia tanojnotsaskej noyampa taltikpak; tein kijtosneki ke akin nemij itech nochi altepemej ueliskiaj kikakiskej tamachtilis tein melauak uan kiseliskej.

7, 8. ¿Toni kichiuani inechikol Jiova uan ijkon uelis okachi miakej kikakiskej kuali tanauatilmej? (Xikonita taixkopin ipeujyan tamachtilis.)

⁷ Itech totonaluan, tokniuan akin kiixyekanaj tekit tein kichiuaj itaixpantijkauan Jiova, ika yolpakilis tayolchikauaj maj moteixmatilti kuali tanauatilmej noyampa taltikpak uan maj motamachti. Axkan ajsitokya chikueyi millones itaixpantijkauan Jiova akin kiteixmatiltiaj itamachtilis Cristo itech panoua seiscientos tataman tajtolmej uan amo uejkaua kichiuaskej itech okachi miak tajtolmej. Niman se kinixmati porin tanojnotsaj kajkalpan uan itech ojti, kampa kemansa kiteixmatiltiaj amaixmej itech mesas uan ika okseki taman.

⁸ Itech inechikol Jiova tel kuali kinmachtianij panoua 2,900 tajtolkepanij tein kinpaleuia maj kikepakan itech okseki tajtolmej Biblia uan amaixmej tein ompa kisaj. Uan amo sayoj kikepaj itech tajtolmej tein okachi moixmatij. Ta no kichiuaj itech miak tajtolmej tein amo motelixmatij, sayoj ke tein melauj tajtouaj miak millones taltikpakneminij. Kemej neskayot, ompa España, millones akin moixmatij  kemej catalanes monojnotsaj itech tajtol catalán tein ika yolkej. Uan itech totonaluan, okachi mokui nejon tajtol uan okseki tataman catalán. Itaixpantijkauan Jiova kikixtiaj amaixmej uan kipiaj nechikolmej itech tajtol catalán, tein kichiua maj tamachtilis ajsi itech ininyolo akin kimatij nejon tajtol.

9, 10. ¿Toni kinextia ke inechikol Jiova kitelneki maj nochin kiixmatikan tamachtilis tein melauak?

⁹ Noyampa taltikpak mochiujtok nejon tekit. Itech nochi altepet México, tel miakej tajtouaj español, sayoj ke moajsij xolalmej kampa tajtouaj maseualtajtolmej. Semej yejuan akin tajtouaj maya. Seki xiujmej achto, kali Betel tein taixyekana México uan Centroamérica kintitanik tokniuan akin kikepaj amaixmej itech tajtol maya, kampa mojmostaj uelis tajtoskej uan kikakiskej nejon tajtol. No ijkon mochiuak ika tajtol nepalés, semej tajtolmej tein motajtoua itech altepet Nepal kampa nemij panoua 29 millones. Maski itech nejon ueyi altepet motajtoua kemej ciento veinte tataman tajtolmej, panoua 10 millones tajtouaj nepalés uan oksekin miakej kikuij kemej ojpatika tajtol. Toamaixuan no mokixtiaj itech nejon tajtol.

¹⁰ ¿Keyej inechikol Jiova kiixtalia maj mokepakan amaixmej itech miak tataman tajtolmej? Porin kiitaj ke motelneki maj motetapoui kuali tanauatilmej itech nochi altepemej. Itaixpantijkauan Jiova kimoyauanij noyampa taltikpak tel miak millones amaixmej, kemej tratados, folletos uan revistas uan amo kinamakaj. Nochi tein moneki kiixtauanij ika tomin tein kitemakaj ika nochi ininyolo. Nejin mouika ika tein Jesús tanauatij: “Ijkon keme Dios namechtayokolij [...] no ijkon [...] amo teyi xikintopaluikan” (Mat. 10:8).

11, 12. ¿Toni kijtouanij miakej taltikpakneminij keman kiitaj tanojnotsalis tein noyampa taltikpak kichiuaj itaixpantijkauan Jiova?

¹¹ Itaixpantijkauan Jiova tanojnotsaj uan tamachtiaj ika yolpakilis. Senkis kineltokaj ke kiajsikej tamachtilis tein melauak, yejua ika kichiuanij miak taman maski ouij uan ijkon uelis kinmatiltiskej kuali tanauatilmej akin nemij itech okseki uejueyi altepemej uan xolalmej kampa tajtouaj maseualtajtolmej. Miakej kitemouanij nemiskej ika amo miak taman, momachtianij okse tajtol uan mochikauaj nemiskej kemej nemij kampa tapaleuijtokej. Nejin tanojnotsalis uan tamachtilis tein mochiujtok noyampa taltikpak yejua okse taman tein kichiua maj miakej kijtokan ke itaixpantijkauan Jiova yekmelauj imomachtijkauan Jesús.

¹² Tiitaixpantijkauan Jiova tikchiuaj nochi nejin porin senkis tikneltokaj ke tikajsikej tamachtilis tein melauak. Sayoj ke, ¿toni okseki taman kinpaleuiani miakej tokniuan maj  kineltokakan ke yetokej itech taneltokalis tein melauak? (Xikonixtajtolti Romanos 14:17, 18.)

13. ¿Toni kichiuanij itaixpantijkauan Jiova tein tapaleuia maj chipauak moajsi inechikol yejuatsin?

¹³ ¿Keyej axkan seki tokniuan akin amo kikauaj Jiova senkis kineltokaj ke kiajsikej tamachtilis tein melauak? Se itekitikauj Jiova akin kipia kuali taixejekolis kijtoj tein kinemilia: “Mochiua se ueyi chikaujkayot uan ijkon inechikol Jiova uelis moajsis chipauak maski monekis kiyolmajxitiskej oso kimelauaskej akin yeski itech nechikol”. ¿Keniuj ueli kichiuaj maj nechikol moajsi chipauak? Porin nochin itaixpantijkauan Jiova mochikauaj nochi tein uelij kitakamatiskej tanauatilmej tein moajsij itech iTajtol Dios uan kitojtokaj neskayot tein kikaujkej Jesús uan imomachtijkauan. Nejon tapaleuiani maj amo semi miakej akin moneki kinkixtiskej itech nechikol porin amo kitakamatij itanauatiluan Dios. Tel miakej itaixpantijkauan Jiova chipaujkanemij uan kikauaj se kuali neskayot, maski sekin achto monejnemiltiayaj kemej Dios amo kiyolpaktia (xikonixtajtolti 1 Corintios 6:9-11).

14. ¿Toni kichiuanij miakej akin monekik kinkixtiskej itech nechikol uan toni tein kuali kiualkuini?

¹⁴ ¿Toni panouani iniuan akin monekik kinkixtiskej itech nechikol, ijkon kemej tanauatia Biblia? Tel miakej moyolnonotsaj ika tein amo kuali tein kichiuaj uan oksepa kuali kinseliaj itech nechikol (xikonixtajtolti 2 Corintios 2:6-8). Kemej itaixpantijkauan Jiova kitakamatij tanauatilmej tein tel kuali tein moajsij itech Biblia, nejon kichiua maj nechikol chipauak moajsi uan maj takuaujtamatikan ke kipia itatiochiualis Dios. Miakej taneltokalismej kinkauaj akin ompa monechikouaj maj kichiuakan tein kinekiskej, sayoj ke itaixpantijkauan Jiova senkis kipaleuiaj itanauatiluan Dios. Nejon kichiuani maj miakej kineltokakan ke yejuan yekmelauj kipiaj tamachtilis tein melauak.

15. ¿Toni kipaleuiani se tokniuj maj senkis kineltoka ke moajsi itech taneltokalis tein melauak?

¹⁵ ¿Keyej okseki itaixpantijkauan Jiova akin kipiaj kuali taixejekolis senkis kineltokaj ke kipiaj tamachtilis tein melauak? Se tokniuj takat akin kipia 54 xiujmej kimelaua: “Keman katka nitelpoch uan hasta axkan, notakuaujtamatilis taksatok itech eyi tamachtilis tein tayekantok tein kemej yeskia kalikximej: 1) Dios nemi; 2) yejuatsin kichiuak maj moijkuilo Biblia; 3) kikuitok uan kitiochiujtok nechikol kampa pouij itaixpantijkauan Jiova. Itech nochi nejin xiujmej tein nimomachtiani Biblia nochipa nikitani ox nejon eyi taman yekmelauj chikauak moajsi. Ijkon kemej panouaj xiujmej okachi nikita ke kemaj chikauak moajsi uan nejon kichikauani notakuaujtamatilis uan nechpaleuia maj okachi nikneltoka ke yekmelauj yejua nejin taneltokalis tein melauak”.

16. ¿Toni kipaleuia se tokniuj siuat maj kineltoka ke kipia tamachtilis tein melauak?

¹⁶ Se tokniuj siuat namikej akin tekiti itech ueyi kali kampa techixyekanaj ompa Nueva  York, kijtoj nejin ika inechikol Jiova: “Sayoj yejua tein yekmelauj kiteixmatiltia itokay Jiova. ¡Uan ijkon moneki mochiuas porin itokay Dios ixnesi itech Biblia kemej 7,000! Uan no, semi nechyolchikaua tajtolmej tein moajsij itech 2 Crónicas 16:9, tein kijtoua: ‘Iixtololouan Jiova tachixtinemij itech nochi taltikpak uan ijkon kinextis ichikaualis uan ika kinpaleuis akin kipiaj ininyolo ajsitok iuan yejuatsin’”. Uan no kijtoj: “Tamachtilis tein melauak nechpaleuiani maj nikpia se yolo ajsitok uan ijkon Jiova ueli nechpaleuia ika ichikaualis. Nokuali uikalis iuan Dios, yejua tein okachi kipia ipatiuj tein nikpia. Uan no niktasojkamati maj Jesús techpaleuiani maj tikixmatikan. Nejon taixmatilis nechpaleuia maj chikauak moajsi tein nikneltoka”.

17. ¿Keyej se tokniuj akin achto kineltokaya ke amo nemi Dios senkis kineltoka ke kiajsik tamachtilis tein melauak?

¹⁷ Se tokniuj takat akin achto kineltokaya ke amo nemi Dios, kijtoj: “Keman nikita itachijchiualis Dios, nikmati ke yejuatsin kineki maj tiyolpakikan itech tonemilis, yejua ika nikneltoka ke amo kikauas maj nochipaya titajyouijtokan. Uan no, maski nikan taltikpak okachiok kichiuaj tein tel amo kuali, ixolal Jiova okachi kipia takuaujtamatilis, yolpakilis uan netasojtalis. Sayoj iespíritu Jiova ueliskia kichiuas nejin tel ueyi taman” (xikonixtajtolti 1 Pedro 4:1-4).

18. 1) ¿Keyej ome tokniuan kineltokaj ke kipiaj tamachtilis tein melauak? 2) ¿No ijkon tikonnemilia tejuatsin?

¹⁸ Okse tokniuj takat akin miak xiujmejya kitekitiliani Dios, kijtoj keyej uelis tikneltokaskej ke nejin yejua taneltokalis tein melauak: “Ijkon kemej panouanij xiujmej, nemachtil tein nikpiani nechpaleuiani maj senkis nikneltoka ke itaixpantijkauan Jiova mochikauanij kichiuaskej kemej nechikol tein moajsik itech yekinika siglo. Niyani itech okseki altepemej tein uejuejka moajsij uan nikitani keniuj tokniuan amo xeliujtokej ijkon kemej moteixmatiltiaj. Tamachtilis tein kitemaka Biblia nechpaleuiani maj nikpia yolpakilis uan maj kuali nimomachili”. Keman se tokniuj takat akin kipia panoua 60 xiujmej kitajtanijkej keyej kineltoka ke itaixpantijkauan Jiova kipiaj tamachtilis tein melauak, kimelauak ke yejuan yekmelauj kitojtokaj Jesús. Yejua kijtoj: “Timomachtianij ika nejmachkayot inemilis uan itanojnotsalis Jesús uan techpaleuiani maj tikpatiuitakan neskayot tein techkauilij. Tikpatanij seki taman itech tonemilis uan ijkon okachi timotokiskej iuan Dios itechkopa Jesús. Tikajsikamatinij ke inemilis Jesús tein kitemakak tapaleuia maj tikpiakan nemakixtilis. Uan tikmatij ke Dios kiajokuik itech mikemej porin moajsij akin kiitakej nejon” (xikonixtajtolti 1 Corintios 15:3-8).

19, 20. 1) ¿Toni Pablo kinelnamiktij tokniuan akin nemiaj Roma ke monekia kichiuaskej? 2) ¿Toni tatiochiualis tikpiaj akin tikchiuaj kemej Cristo?

¹⁹ Kemej tikintasojtaj taltikpakneminij, amo uelis sayoj tejuan timokauiliskej tamachtilis tein melauak tein kitelpia ipatiuj. Pablo kiniluij tokniuan itech nechikol tein moajsia Roma: “Komo tikyekijtoua senteixtenoj nejon ‘tajtol itech motenoj’, ke Jesús yejua toTekotsin, uan itech moyolo titakuaujtamati ke Dios kiajokuik itech mikemej, timakisas. Porin ika toyolo titakuaujtamatij uan ijkon timochiuaskej tiyolmelaujkej, sayoj ke ika totenoj tikyekijtouaj senteixtenoj uan ijkon tikpiaskej nemakixtilis” (Rom. 10:9, 10, TNM).

²⁰ Tiitaixpantijkauan Jiova senkis tikneltokaj ke tikajsikej tamachtilis tein melauak. Uan tikmatij ke se ueyi tatiochiualis maj tikinmachtikan oksekin kuali tanauatilmej ika iTekiuajyo Dios. Keman tikinnojnotsaskej, maj tiktemokan tikintaneltoktiskej, amo sayoj ika tein tikinmachtiskej itech Biblia, ta no maj tiknextikan ke senkis tikneltokaj ke tikajsikej tamachtilis tein melauak.